অথ ধ্যানশ্লোকাঃ
শুক্লাম্বরধরং বিষ্ণুং শশিবর্ণং চতুর্ভুজম্ ।
প্রসন্নবদনং ধ্যায়েৎ সর্ববিঘ্নোপশান্তয়ে ॥
বাগীশাদ্যাঃ সুমনসঃ সর্বার্থানামুপক্রমে ।
যং নত্বা কৃতকৃত্যাঃ স্যুস্তং নমামি গজাননম্ ॥
দোর্ভির্যুক্তা চতুর্ভিঃ স্ফটিকমণিময়ীমক্ষমালাং দধানা
হস্তেনৈকেন পদ্মং সিতমপি চ শুকং পুস্তকং চাপরেণ ।
ভাসা কুন্দেন্দুশঙ্খস্ফটিকমণিনিভা ভাসমানাসমানা
সা মে বাগ্দেবতেয়ং নিবসতু বদনে সর্বদা সুপ্রসন্না ॥
গুরুর্ব্রহ্মা গুরুর্বিষ্ণুঃ গুরুর্দেবো মহেশ্বরঃ ।
গুরুঃ সাক্ষাৎ পরং ব্রহ্ম তস্মৈ শ্রীগুরবে নমঃ ॥
কূজন্তং রামরামেতি মধুরং মধুরাক্ষরম্ ।
আরুহ্য কবিতাশাখাং বন্দে বাল্মীকিকোকিলম্ ॥
বাল্মীকের্মুনিসিম্হস্য কবিতাবনচারিণঃ ।
শৃণ্বন্ রামকথানাদং কো ন যাতি পরাং গতিম্ ॥
যঃ পিবন্ সততং রামচরিতামৃতসাগরম্ ।
অতৃপ্তস্তং মুনিং বন্দে প্রাচেতসমকল্মষম্ ॥
গোষ্পদীকৃতবারাশিং মশকীকৃতরাক্ষসম্ ।
রামায়ণমহামালারত্নং বন্দেঽনিলাত্মজম্ ॥
অঞ্জনানন্দনং বীরং জানকীশোকনাশনম্ ।
কপীশমক্ষহন্তারং বন্দে লঙ্কাভয়ঙ্করম্ ॥
উল্লঙ্্ঘ্য সিন্ধোঃ সলিলং সলীলং
	যঃ শোকবহ্নিং জনকাত্মজায়াঃ ।
আদায় তেনৈব দদাহ লঙ্কাং
	নমামি তং প্রাঞ্জলিরাঞ্জনেয়ম্ ॥
আঞ্জনেয়মতিপাটলাননং কাঞ্চনাদ্রিকমনীয়বিগ্রহম্ ।
পারিজাততরুমূলবাসিনং ভাবয়ামি পবমাননন্দনম্ ॥
যত্র যত্র রঘুনাথকীর্তনং তত্র তত্র কৃতমস্তকাঞ্জলিম্ ।
বাষ্পবারিপরিপূর্ণলোচনং মারুতিং নমত রাক্ষসান্তকম্ ॥
মনোজবং মারুততুল্যবেগং জিতেন্দ্রিয়ং বুদ্ধিমতাং বরিষ্ঠম্ ।
বাতাত্মজং বানরয়ূথমুখ্যং শ্রীরামদূতং শিরসা নমামি ॥
যঃ কর্ণাঞ্জলিসম্পুটৈরহরহঃ সম্যক্ পিবত্যাদরাৎ
বাল্মীকের্বদনারবিন্দগলিতং রামায়ণাখ্যং মধু ।
জন্মব্যাধিজরাবিপত্তিমরণৈরত্যন্তসোপদ্রবং
সংসারং স বিহায় গচ্ছতি পুমান্ বিষ্ণোঃ পদং শাশ্বতম্ ॥
তদুপগতসমাসসন্ধিয়োগং সমমধুরোপনতার্থবাক্যবদ্ধম্ ।
রঘুবরচরিতং মুনিপ্রণীতং দশশিরসশ্চ বধং নিশাময়ধ্বম্ ॥
বাল্মীকিগিরিসম্ভূতা রামসাগরগামিনী ।
পুনাতু ভুবনং পুণ্যা রামায়ণমহানদী ॥
শ্লোকসারসমাকীর্ণং সর্গকল্লোলসঙ্কুলম্ ।
কাণ্ডগ্রাহমহামীনং বন্দে রামায়ণার্ণবম্ ॥
বেদবেদ্যে পরে পুংসি জাতে দশরথাত্মজে ।
বেদঃ প্রাচেতসাদাসীৎ সাক্ষাদ্রামায়ণাত্মনা ॥
বৈদেহীসহিতং সুরদ্রুমতলে হৈমে মহামণ্টপে
মধ্যে পুষ্পকমাসনে মণিময়ে বীরাসনে সুস্থিতম্ ।
অগ্রে বাচয়তি প্রভঞ্জনসুতে তত্ত্বং মুনিভ্যঃ পরং
ব্যাখ্যান্তং ভরতাদিভিঃ পরিবৃতং রামং ভজে শ্যামলম্ ॥
বামে ভূমিসুতা পুরশ্চ হনুমান্ পশ্চাৎ সুমিত্রাসুতঃ
শত্রুঘ্নো ভরতশ্চ পার্শ্বদলয়োর্বায়্বাদিকোণেষু চ ।
সুগ্রীবশ্চ বিভীষণশ্চ যুবরাট্ তারাসুতো জাম্ববান্
মধ্যে নীলসরোজকোমলরুচিং রামং ভজে শ্যামলম্ ॥
নমোঽস্তু রামায় সলক্ষ্মণায়
	দেব্যৈ চ তস্যৈ জনকাত্মজায়ৈ ।
নমোঽস্তু রুদ্রেন্দ্রয়মানিলেভ্যো
	নমোঽস্তু চন্দ্রার্কমরুদ্গণেভ্যঃ ॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ধ্যানশ্লোকাঃ