অথ মঙ্গলশ্লোকাঃ
স্বস্তি প্রজাভ্যঃ পরিপালয়ন্তাং
	ন্যায়্যেন মার্গেণ মহীং মহীশাঃ ।
গোব্রাহ্মণেভ্যঃ শুভমস্তু নিত্যং
	লোকাঃ সমস্তাঃ সুখিনো ভবন্তু ॥
কালে বর্ষতু পর্জন্যঃ পৃথিবী সস্যশালিনী ।
দেশোঽয়ং ক্ষোভরহিতো ব্রাহ্মণাঃ সন্তু নির্ভয়াঃ ॥
অপুত্রাঃ পুত্রিণঃ সন্তু পুত্রিণঃ সন্তু পৌত্রিণঃ ।
অধনাঃ সধনাঃ সন্তু জীবন্তু শরদাং শতম্ ॥
চরিতং রঘুনাথস্য শতকোটিপ্রবিস্তরম্ ।
একৈকমক্ষরং প্রোক্তং মহাপাতকনাশনম্ ॥
শ্রৃণ্বন্ রামায়ণং ভক্ত্যা যঃ পাদং পদমেব বা ।
স যাতি ব্রহ্মণঃ স্থানং ব্রহ্মণা পূজ্যতে সদা ॥
রামায় রামভদ্রায় রামচন্দ্রায় বেধসে ।
রঘুনাথায় নাথায় সীতায়াঃ পতয়ে নমঃ ॥
যন্মঙ্গলং সহস্রাক্ষে সর্বদেবনমস্কৃতে ।
বৃত্রনাশে সমভবত্তত্তে ভবতু মঙ্গলম্ ॥
যন্মঙ্গলং সুপর্ণস্য বিনতাকল্পয়ৎ পুরা ।
অমৃতং প্রার্থয়ানস্য তত্তে ভবতু মঙ্গলম্ ॥
মঙ্গলং কোসলেন্দ্রায় মহনীয়গুণাত্মনে ।
চক্রবর্তিতনূজায় সার্বভৌমায় মঙ্গলম্ ॥
অমৃতোৎপাদনে দৈত্যান্ ঘ্নতো বজ্রধরস্য যৎ ।
অদিতির্মঙ্গলং প্রাদাত্তত্তে ভবতু মঙ্গলম্ ॥
ত্রীন্ বিক্রমান্ প্রক্রমতো বিষ্ণোরমিততেজসঃ ।
যদাসীন্মঙ্গলং রাম তত্তে ভবতু মঙ্গলম্ ॥
ঋষয়ঃ সাগরা দ্বীপা বেদা লোকা দিশশ্চ তে ।
মঙ্গলানি মহাবাহো দিশন্তু তব সর্বদা ॥
কায়েন বাচা মনসেন্দ্রিয়ৈর্বা
	বুদ্ধ্যাত্মনা বা প্রকৃতেঃ স্বভাবাৎ ।
করোমি যদ্ যৎ সকলং পরস্মৈ
	নারায়ণায়েতি সমর্পয়ামি ॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে মঙ্গলশ্লোকাঃ