অথ প্রথমঃ সর্গঃ
ততো রাবণনীতায়াঃ সীতায়াঃ শত্রুকর্ষণঃ।
ইয়েষ পদমন্বেষ্টুং চারণাচরিতে পথি ॥১॥
দুষ্করং নিষ্প্রতিদ্বন্দ্বং চিকীর্ষন্ কর্ম বানরঃ।
সমুদগ্রশিরোগ্রীবো গবাং পতিরিবাবভৌ ॥২॥
অথ বৈদূর্যবর্ণেষু শাদ্বলেষু মহাবলঃ।
ধীরঃ সলিলকল্পেষু বিচচার যথাসুখম্ ॥৩॥
দ্বিজান্ বিত্রাসয়ন্ ধীমানুরসা পাদপান্ হরন্ ।
মৃগাংশ্চ সুবহূন্ নিঘ্নন্ প্রবৃদ্ধ ইব কেসরী ॥৪॥
নীললোহিতমাঞ্জিষ্ঠপদ্মবর্ণৈঃ সিতাসিতৈঃ।
স্বভাবসিদ্ধৈর্বিমলৈর্ধাতুভিঃ সমলঙ্কৃতম্ ॥৫॥
কামরূপিভিরাবিষ্টমভীক্ষ্ণং সপরিচ্ছদৈঃ।
যক্ষকিন্নরগন্ধর্বৈর্দেবকল্পৈঃ সপন্নগৈঃ॥৬॥
স তস্য গিরিবর্যস্য তলে নাগবরায়ুতে ।
তিষ্ঠন্ কপিবরস্তত্র হ্রদে নাগ ইবাবভৌ ॥৭॥
স সূর্যায় মহেন্দ্রায় পবনায় স্বয়ম্ভুবে ।
ভূতেভ্যশ্চাঞ্জলিং কৃত্বা চকার গমনে মতিম্ ॥৮॥
অঞ্জলিং প্রাঙ্্মুখং কুর্বন্ পবনায়াত্ময়োনয়ে ।
ততো হি ববৃধে গন্তুং দক্ষিণো দক্ষিণাং দিশম্ ॥৯॥
প্লবগপ্রবরৈর্দৃষ্টঃ প্লবনে কৃতনিশ্চয়ঃ।
ববৃধে রামবৃদ্ধ্যর্থং সমুদ্র ইব পর্বসু ॥১০॥
নিষ্প্রমাণশরীরঃ সন্ লিলঙ্ঘয়িষুরর্ণবম্ ।
বাহুভ্যাং পীডয়ামাস চরণাভ্যাং চ পর্বতম্ ॥১১॥
স চচালাচলশ্চাশু মুহূর্তং কপিপীডিতঃ।
তরূণাং পুষ্পিতাগ্রাণাং সর্বং পুষ্পমশাতয়ৎ ॥১২॥
তেন পাদপমুক্তেন পুষ্পৌঘেণ সুগন্ধিনা ।
সর্বতঃ সংবৃতঃ শৈলো বভৌ পুষ্পময়ো যথা ॥১৩॥
তেন চোত্তমবীর্যেণ পীড্যমানঃ স পর্বতঃ।
সলিলং সম্প্রসুস্রাব মদমত্ত ইব দ্বিপঃ॥১৪॥
পীড্যমানস্তু বলিনা মহেন্দ্রস্তেন পর্বতঃ।
রীতীর্নির্বর্তয়ামাস কাঞ্চনাঞ্জনরাজতীঃ॥১৫॥
মুমোচ চ শিলাঃ শৈলো বিশালাঃ সমনঃশিলাঃ।
মধ্যমেনার্চিষা জুষ্টো ধূমরাজীরিবানলঃ॥১৬॥
হরিণা পীড্যমানেন পীড্যমানানি সর্বতঃ।
গুহাবিষ্টানি সত্ত্বানি বিনেদুর্বিকৃতৈঃ স্বরৈঃ॥১৭॥
স মহান্ সত্ত্বসন্নাদঃ শৈলপীডানিমিত্তজঃ।
পৃথিবীং পূরয়ামাস দিশশ্চোপবনানি চ ॥১৮॥
শিরোভিঃ পৃথুভির্নাগা ব্যক্তস্বস্তিকলক্ষণৈঃ।
বমন্তঃ পাবকং ঘোরং দদংশুর্দশনৈঃ শিলাঃ॥১৯॥
তাস্তদা সবিষৈর্দষ্টাঃ কুপিতৈস্তৈর্মহাশিলাঃ।
জজ্বলুঃ পাবকোদ্দীপ্তা বিভিদুশ্চ সহস্রধা ॥২০॥
যানি ত্বৌষধজালানি তস্মিঞ্জাতানি পর্বতে ।
বিষঘ্নান্যপি নাগানাং ন শেকুঃ শমিতুং বিষম্ ॥২১॥
ভিদ্যতেঽয়ং গিরির্ভূতৈরিতি মত্বা তপস্বিনঃ।
ত্রস্তা বিদ্যাধরাস্তস্মাদুৎপেতুঃ স্ত্রীগণৈঃ সহ ॥২২॥
পানভূমিগতং হিত্বা হৈমমাসবভাজনম্ ।
পাত্রাণি চ মহার্হাণি করকাংশ্চ হিরণ্ময়ান্ ॥২৩॥
লেহ্যানুচ্চাবচান্ ভক্ষ্যান্ মাংসানি বিবিধানি চ ।
আর্ষভাণি চ চর্মাণি খড্ঙ্গাংশ্চ কনকৎসরূন্ ॥২৪॥
কৃতকণ্ঠগুণাঃ ক্ষীবা রক্তমাল্যানুলেপনাঃ।
রক্তাক্ষাঃ পুষ্করাক্ষাশ্চ গগনং প্রতিপেদিরে ॥২৫॥
হারনূপুরকেয়ূরপারিহার্যধরাঃ স্ত্রিয়ঃ।
বিস্মিতাঃ সস্মিতাস্তস্থুরাকাশে রমণৈঃ সহ ॥২৬॥
দর্শয়ন্তো মহাবিদ্যাং বিদ্যাধরমহর্ষয়ঃ।
সহিতাস্তস্থুরাকাশে বীক্ষাঞ্চক্রুশ্চ পর্বতম্ ॥২৭॥
শুশ্রুবুশ্চ তদা শব্দমৃষীণাং ভাবিতাত্মনাম্ ।
চারণানাং চ সিদ্ধানাং স্থিতানাং বিমলেঽম্বরে ॥২৮॥
এষ পর্বতসঙ্কাশো হনুমান্ মারুতাত্মজঃ।
তিতীর্ষতি মহাবেগঃ সমুদ্রং বরুণালয়ম্ ॥২৯॥
রামার্থং বানরার্থং চ চিকীর্ষন্ কর্ম দুষ্করম্ ।
সমুদ্রস্য পরং পারং দুষ্প্রাপং প্রাপ্তুমিচ্ছতি ॥৩০॥
ইতি বিদ্যাধরা বাচঃ শ্রুত্বা তেষাং তপস্বিনাম্ ।
তমপ্রমেয়ং দদৃশুঃ পর্বতে বানরর্ষভম্ ॥৩১॥
দুধুবে চ স রোমাণি চকম্পে চানলোপমঃ।
ননাদ চ মহানাদং সুমহানিব তোয়দঃ॥৩২॥
আনুপূর্ব্যা চ বৃত্তং তল্লাঙ্গূলং রোমভিশ্চিতম্ ।
উৎপতিষ্যন্ বিচিক্ষেপ পক্ষিরাজ ইবোরগম্ ॥৩৩॥
তস্য লাঙ্গূলমাবিদ্ধমতিবেগস্য পৃষ্ঠতঃ।
দদৃশে গরুডেনেব হ্রিয়মাণো মহোরগঃ॥৩৪॥
বাহূ সংস্তম্ভয়ামাস মহাপরিঘসংনিভৌ ।
আসসাদ কপিঃ কট্যাং চরণৌ সঞ্চুকোচ চ ॥৩৫॥
সংহৃত্য চ ভুজৌ শ্রীমাংস্তথৈব চ শিরোধরাম্ ।
তেজঃ সত্ত্বং তথা বীর্যমাবিবেশ স বীর্যবান্ ॥৩৬॥
মার্গমালোকয়ন্ দূরাদূর্ধ্বপ্রণিহিতেক্ষণঃ।
রুরোধ হৃদয়ে প্রাণানাকাশমবলোকয়ন্ ॥৩৭॥
পদ্ভ্যাং দৃঢমবস্থানং কৃত্বা স কপিকুঞ্জরঃ।
নিকুচ্য কর্ণৌ হনুমানুৎপতিষ্যন্ মহাবলঃ॥৩৮॥
বানরান্ বানরশ্রেষ্ঠ ইদং বচনমব্রবীৎ ।
যথা রাঘবনির্মুক্তঃ শরঃ শ্বসনবিক্রমঃ॥৩৯॥
গচ্ছেৎ তদ্বৎ গমিষ্যামি লঙ্কাং রাবণপালিতাম্ ।
নহি দ্রক্ষ্যামি যদি তাং লঙ্কায়াং জনকাত্মজাম্ ॥৪০॥
অনেনৈব হি বেগেন গমিষ্যামি সুরালয়ম্ ।
যদি বা ত্রিদিবে সীতাং ন দ্রক্ষ্যামি কৃতশ্রমঃ॥৪১॥
বদ্ধ্বা রাক্ষসরাজানমানয়িষ্যামি রাবণম্ ।
সর্বথা কৃতকার্যোঽহমেষ্যামি সহ সীতয়া ॥৪২॥
আনয়িষ্যামি বা লঙ্কাং সমুৎপাট্য সরাবণাম্ ।
এবমুক্ত্বা তু হনুমান্ বানরো বানরোত্তমঃ॥৪৩॥
উৎপপাতাথ বেগেন বেগবানবিচারয়ন্ ।
সুপর্ণমিব চাত্মানং মেনে স কপিকুঞ্জরঃ॥৪৪॥
সমুৎপততি বেগাৎ তু বেগাৎ তে নগরোহিণঃ।
সংহৃত্য বিটপান্ সর্বান্ সমুৎপেতুঃ সমন্ততঃ॥৪৫॥
স মত্তকোয়ষ্টিভকান্ পাদপান্ পুষ্পশালিনঃ।
উদ্বহন্নুরুবেগেন জগাম বিমলেঽম্বরে ॥৪৬॥
ঊরুবেগোত্থিতা বৃক্ষা মুহূর্তং কপিমন্বয়ুঃ।
প্রস্থিতং দীর্ঘমধ্বানং স্ববন্ধুমিব বান্ধবাঃ॥৪৭॥
তমূরুবেগোন্মথিতাঃ সালাশ্চান্যে নগোত্তমাঃ।
অনুজগ্মুর্হনূমন্তং সৈন্যা ইব মহীপতিম্ ॥৪৮॥
সুপুষ্পিতাগ্রৈর্বহুভিঃ পাদপৈরন্বিতঃ কপিঃ।
হনূমান্ পর্বতাকারো বভূবাদ্ভুতদর্শনঃ॥৪৯॥
সারবন্তোঽথ যে বৃক্ষা ন্যমজ্জন্ লবণাম্ভসি ।
ভয়াদিব মহেন্দ্রস্য পর্বতা বরুণালয়ে ॥৫০॥
স নানাকুসুমৈঃ কীর্ণঃ কপিঃ সাঙ্কুরকোরকৈঃ।
শুশুভে মেঘসঙ্কাশঃ খদ্যোতৈরিব পর্বতঃ॥৫১॥
বিমুক্তাস্তস্য বেগেন মুক্ত্বা পুষ্পাণি তে দ্রুমাঃ।
ব্যবশীর্যন্ত সলিলে নিবৃত্তাঃ সুহৃদো যথা ॥৫২॥
লঘুত্বেনোপপন্নং তদ্ বিচিত্রং সাগরেঽপতৎ ।
দ্রুমাণাং বিবিধং পুষ্পং কপিবায়ুসমীরিতম্ ।
তারাচিতমিবাকাশং প্রবভৌ স মহার্ণবঃ॥৫৩॥
পুষ্পৌঘেণ সুগন্ধেন নানাবর্ণেন বানরঃ।
বভৌ মেঘ ইবোদ্যন্ বৈ বিদ্যুদ্গণবিভূষিতঃ॥৫৪॥
তস্য বেগসমুদ্ভূতৈঃ পুষ্পৈস্তোয়মদৃশ্যত ।
তারাভিরিব রামাভিরুদিতাভিরিবাম্বরম্ ॥৫৫॥
তস্যাম্বরগতৌ বাহূ দদৃশাতে প্রসারিতৌ ।
পর্বতাগ্রাদ্ বিনিষ্ক্রান্তৌ পঞ্চাস্যাবিব পন্নগৌ ॥৫৬॥
পিবন্নিব বভৌ চাপি সোর্মিজালং মহার্ণবম্ ।
পিপাসুরিব চাকাশং দদৃশে স মহাকপিঃ॥৫৭॥
তস্য বিদ্যুৎপ্রভাকারে বায়ুমার্গানুসারিণঃ।
নয়নে বিপ্রকাশেতে পর্বতস্থাবিবানলৌ ॥৫৮॥
পিঙ্গে পিঙ্গাক্ষমুখ্যস্য বৃহতী পরিমণ্ডলে ।
চক্ষুষী সম্প্রকাশেতে চন্দ্রসূর্যাবিব স্থিতৌ ॥৫৯॥
মুখং নাসিকয়া তস্য তাম্রয়া তাম্রমাবভৌ ।
সন্ধ্যযা সমভিস্পৃষ্টং যথা স্যাৎ সূর্যমণ্ডলম্ ॥৬০॥
লাঙ্গূলং চ সমাবিদ্ধং প্লবমানস্য শোভতে ।
অম্বরে বায়ুপুত্রস্য শক্রধ্বজ ইবোচ্ছ্রিতম্ ॥৬১॥
লাঙ্গূলচক্রো হনুমান্ শুক্লদংষ্ট্রোঽনিলাত্মজঃ।
ব্যরোচত মহাপ্রাজ্ঞঃ পরিবেষীব ভাস্করঃ॥৬২॥
স্ফিগ্দেশেনাতিতাম্রেণ ররাজ স মহাকপিঃ।
মহতা দারিতেনেব গিরির্গৈরিকধাতুনা ॥৬৩॥
তস্য বানরসিংহস্য প্লবমানস্য সাগরম্ ।
কক্ষান্তরগতো বায়ুর্জীমূত ইব গর্জতি ॥৬৪॥
খে যথা নিপতত্যুল্কা উত্তরান্তাদ্ বিনিঃসৃতা ।
দৃশ্যতে সানুবন্ধা চ তথা স কপিকুঞ্জরঃ॥৬৫॥
পতৎপতঙ্গসঙ্কাশো ব্যায়তঃ শুশুভে কপিঃ।
প্রবৃদ্ধ ইব মাতঙ্গঃ কক্ষ্যযা বধ্যমানয়া ॥৬৬॥
উপরিষ্টাচ্ছরীরেণ চ্ছায়যা চাবগাঢয়া ।
সাগরে মারুতাবিষ্টা নৌরিবাসীৎ তদা কপিঃ॥৬৭॥
যং যং দেশং সমুদ্রস্য জগাম স মহাকপিঃ।
স তু তস্যাঙ্গবেগেন সোন্মাদ ইব লক্ষ্যতে ॥৬৮॥
সাগরস্যোর্মিজালানামুরসা শৈলবর্ষ্মণাম্ ।
অভিঘ্নংস্তু মহাবেগঃ পুপ্লুবে স মহাকপিঃ॥৬৯॥
কপিবাতশ্চ বলবান্ মেঘবাতশ্চ নির্গতঃ।
সাগরং ভীমনির্হ্রাদং কম্পয়ামাসতুর্ভৃশম্ ॥৭০॥
বিকর্ষন্নূর্মিজালানি বৃহন্তি লবণাম্ভসি ।
পুপ্লুবে কপিশার্দূলো বিকিরন্নিব রোদসী ॥৭১॥
মেরুমন্দরসঙ্কাশানুদ্গতান্ সুমহার্ণবে ।
অত্যক্রামন্মহাবেগস্তরঙ্গান্ গণয়ন্নিব ॥৭২॥
তস্য বেগসমুদ্ঘুষ্টং জলং সজলদং তদা ।
অম্বরস্থং বিবভ্রাজে শরদভ্রমিবাততম্ ॥৭৩॥
তিমিনক্রঝষাঃ কূর্মা দৃশ্যন্তে বিবৃতাস্তদা ।
বস্ত্রাপকর্ষণেনেব শরীরাণি শরীরিণাম্ ॥৭৪॥
ক্রমমাণং সমীক্ষ্যাথ ভুজগাঃ সাগরঙ্গমাঃ।
ব্যোম্নি তং কপিশার্দূলং সুপর্ণমিব মেনিরে ॥৭৫॥
দশয়োজনবিস্তীর্ণা ত্রিংশদ্যোজনমায়তা ।
ছায়া বানরসিংহস্য জবে চারুতরাভবৎ ॥৭৬॥
শ্বেতাভ্রঘনরাজীব বায়ুপুত্রানুগামিনী ।
তস্য সা শুশুভে ছায়া পতিতা লবণাম্ভসি ॥৭৭॥
শুশুভে স মহাতেজা মহাকায়ো মহাকপিঃ।
বায়ুমার্গে নিরালম্বে পক্ষবানিব পর্বতঃ॥৭৮॥
যেনাসৌ যাতি বলবান্ বেগেন কপিকুঞ্জরঃ।
তেন মার্গেণ সহসা দ্রোণীকৃত ইবার্ণবঃ॥৭৯॥
আপাতে পক্ষিসঙ্ঘানাং পক্ষিরাজ ইব ব্রজন্ ।
হনুমান্ মেঘজালানি প্রকর্ষন্ মারুতো যথা ॥৮০॥
পাণ্ডুরারুণবর্ণানি নীলমঞ্জিষ্ঠকানি চ ।
কপিনাঽঽকৃষ্যমাণানি মহাভ্রাণি চকাশিরে ॥৮১॥
প্রবিশন্নভ্রজালানি নিষ্পতংশ্চ পুনঃ পুনঃ।
প্রচ্ছন্নশ্চ প্রকাশশ্চ চন্দ্রমা ইব দৃশ্যতে ॥৮২॥
প্লবমানং তু তং দৃষ্ট্বা প্লবগং ত্বরিতং তদা ।
ববৃষুস্তত্র পুষ্পাণি দেবগন্ধর্বচারণাঃ॥৮৩॥
ততাপ নহি তং সূর্যঃ প্লবন্তং বানরেশ্বরম্ ।
সিষেবে চ তদা বায়ূ রামকার্যার্থসিদ্ধয়ে ॥৮৪॥
ঋষয়স্তুষ্টুবুশ্চৈনং প্লবমানং বিহায়সা ।
জগুশ্চ দেবগন্ধর্বাঃ প্রশংসন্তো বনৌকসম্ ॥৮৫॥
নাগাশ্চ তুষ্টুবুর্যক্ষা রক্ষাংসি বিবিধানি চ ।
প্রেক্ষ্য সর্বে কপিবরং সহসা বিগতক্লমম্ ॥৮৬॥
তস্মিন্ প্লবগশার্দূলে প্লবমানে হনূমতি ।
ইক্ষ্বাকুকুলমানার্থী চিন্তয়ামাস সাগরঃ॥৮৭॥
সাহায়্যং বানরেন্দ্রস্য যদি নাহং হনূমতঃ।
করিষ্যামি ভবিষ্যামি সর্ববাচ্যো বিবক্ষতাম্ ॥৮৮॥
অহমিক্ষ্বাকুনাথেন সগরেণ বিবর্ধিতঃ।
ইক্ষ্বাকুসচিবশ্চায়ং তন্নার্হত্যবসাদিতুম্ ॥৮৯॥
তথা ময়া বিধাতব্যং বিশ্রমেত যথা কপিঃ।
শেষং চ ময়ি বিশ্রান্তঃ সুখী সোঽতিতরিষ্যতি ॥৯০॥
ইতি কৃত্বা মতিং সাধ্বীং সমুদ্রশ্ছন্নমম্ভসি ।
হিরণ্যনাভং মৈনাকমুবাচ গিরিসত্তমম্ ॥৯১॥
ত্বমিহাসুরসঙ্ঘানাং দেবরাজ্ঞা মহাত্মনা ।
পাতালনিলয়ানাং হি পরিঘঃ সংনিবেশিতঃ॥৯২॥
ত্বমেষাং জ্ঞাতবীর্যাণাং পুনরেবোৎপতিষ্যতাম্ ।
পাতালস্যাপ্রমেয়স্য দ্বারমাবৃত্য তিষ্ঠসি ॥৯৩॥
তির্যগূর্ধ্বমধশ্চৈব শক্তিস্তে শৈল বর্ধিতুম্ ।
তস্মাৎ সঞ্চোদয়ামি ত্বামুত্তিষ্ঠ গিরিসত্তম ॥৯৪॥
স এষ কপিশার্দূলস্ত্বামুপর্যেতি বীর্যবান্ ।
হনূমান্ রামকার্যার্থী ভীমকর্মা খমাপ্লুতঃ॥৯৫॥
অস্য সাহ্যং ময়া কার্যমিক্ষ্বাকুকুলবর্তিনঃ।
মম হীক্ষ্বাকবঃ পূজ্যাঃ পরং পূজ্যতমাস্তব ॥৯৬॥
কুরু সাচিব্যমস্মাকং ন নঃ কার্যমতিক্রমেৎ ।
কর্তব্যমকৃতং কার্যং সতাং মন্যুমুদীরয়েৎ ॥৯৭॥
সলিলাদূর্ধ্বমুত্তিষ্ঠ তিষ্ঠত্বেষ কপিস্ত্বয়ি ।
অস্মাকমতিথিশ্চৈব পূজ্যশ্চ প্লবতাং বরঃ॥৯৮॥
চামীকরমহানাভ দেবগন্ধর্বসেবিত ।
হনূমাংস্ত্বয়ি বিশ্রান্তস্ততঃ শেষং গমিষ্যতি ॥৯৯॥
কাকুৎস্থস্যানৃশংস্যং চ মৈথিল্যাশ্চ বিবাসনম্ ।
শ্রমং চ প্লবগেন্দ্রস্য সমীক্ষ্যোত্থাতুমর্হসি ॥১০০॥
হিরণ্যগর্ভো মৈনাকো নিশম্য লবণাম্ভসঃ ।
উৎপপাত জলাৎ তূর্ণং মহাদ্রুমলতাবৃতঃ॥১০১॥
স সাগরজলং ভিত্ত্বা বভূবাত্যুচ্ছ্রিতস্তদা ।
যথা জলধরং ভিত্ত্বা দীপ্তরশ্মির্দিবাকরঃ॥১০২॥
স মহাত্মা মুহূর্তেন পর্বতঃ সলিলাবৃতঃ।
দর্শয়ামাস শৃঙ্গাণি সাগরেণ নিয়োজিতঃ॥১০৩॥
শাতকুম্ভময়ৈঃ শৃঙ্গৈঃ সকিন্নরমহোরগৈঃ।
আদিত্যোদয়সঙ্কাশৈরুল্লিখদ্ভিরিবাম্বরম্ ॥১০৪॥
তস্য জাম্বূনদৈঃ শৃঙ্গৈঃ পর্বতস্য সমুত্থিতৈঃ ।
আকাশং শস্ত্রসঙ্কাশমভবৎ কাঞ্চনপ্রভম্ ॥১০৫॥
জাতরূপময়ৈঃ শৃঙ্গৈর্ভ্রাজমানৈর্মহাপ্রভৈঃ।
আদিত্যশতসঙ্কাশঃ সোঽভবৎ গিরিসত্তমঃ॥১০৬॥
সমুত্থিতমসঙ্গেন হনূমানগ্রতঃ স্থিতম্ ।
মধ্যে লবণতোয়স্য বিঘ্নোঽয়মিতি নিশ্চিতঃ॥১০৭॥
স তমুচ্ছ্রিতমত্যর্থং মহাবেগো মহাকপিঃ।
উরসা পাতয়ামাস জীমূতমিব মারুতঃ॥১০৮॥
স তদাসাদিতস্তেন কপিনা পর্বতোত্তমঃ।
বুদ্ধ্বা তস্য হরের্বেগং জহর্ষ চ ননাদ চ ॥১০৯॥
তমাকাশগতং বীরমাকাশে সমুপস্থিতঃ।
প্রীতো হৃষ্টমনা বাক্যমব্রবীৎ পর্বতঃ কপিম্ ॥১১০॥
মানুষং ধারয়ন্ রূপমাত্মনঃ শিখরে স্থিতঃ।
দুষ্করং কৃতবান্ কর্ম ত্বমিদং বানরোত্তম ॥১১১॥
নিপত্য মম শৃঙ্গেষু সুখং বিশ্রম্য গম্যতাম্ ।
রাঘবস্য কুলে জাতৈরুদধিঃ পরিবর্ধিতঃ॥১১২॥
স ত্বাং রামহিতে যুক্তং প্রত্যর্চয়তি সাগরঃ।
কৃতে চ প্রতিকর্তব্যমেষ ধর্মঃ সনাতনঃ॥১১৩॥
সোঽয়ং তৎপ্রতিকারার্থী ত্বত্তঃ সম্মানমর্হতি ।
ত্বন্নিমিত্তমনেনাহং বহুমানাৎ প্রচোদিতঃ॥১১৪॥
যোজনানাং শতং চাপি কপিরেষ খমাপ্লুতঃ।
তব সানুষু বিশ্রান্তঃ শেষং প্রক্রমতামিতি ॥১১৫॥
তিষ্ঠ ত্বং হরিশার্দূল ময়ি বিশ্রম্য গম্যতাম্ ।
তদিদং গন্ধবৎ স্বাদু কন্দমূলফলং বহু ॥১১৬॥
তদাস্বাদ্য হরিশ্রেষ্ঠ বিশ্রান্তোঽথ গমিষ্যসি ।
অস্মাকমপি সম্বন্ধঃ কপিমুখ্য ত্বয়াস্তি বৈ ।
প্রখ্যাতস্ত্রিষু লোকেষু মহাগুণপরিগ্রহঃ॥১১৭॥
বেগবন্তঃ প্লবন্তো যে প্লবগা মারুতাত্মজ ।
তেষাং মুখ্যতমং মন্যে ত্বামহং কপিকুঞ্জর ॥১১৮॥
অতিথিঃ কিল পূজার্হঃ প্রাকৃতোঽপি বিজানতা ।
ধর্মং জিজ্ঞাসমানেন কিং পুনর্যাদৃশো ভবান্ ॥১১৯॥
ত্বং হি দেববরিষ্ঠস্য মারুতস্য মহাত্মনঃ।
পুত্রস্তস্যৈব বেগেন সদৃশঃ কপিকুঞ্জর ॥১২০॥
পূজিতে ত্বয়ি ধর্মজ্ঞে পূজাং প্রাপ্নোতি মারুতঃ।
তস্মাৎ ত্বং পূজনীয়ো মে শৃণু চাপ্যত্র কারণম্ ॥১২১॥
পূর্বং কৃতয়ুগে তাত পর্বতাঃ পক্ষিণোঽভবন্ ।
তেঽপি জগ্মুর্দিশঃ সর্বা গরুডা ইব বেগিনঃ॥১২২॥
ততস্তেষু প্রয়াতেষু দেবসঙ্ঘাঃ সহর্ষিভিঃ।
ভূতানি চ ভয়ং জগ্মুস্তেষাং পতনশঙ্কয়া ॥১২৩॥
ততঃ ক্রুদ্ধঃ সহস্রাক্ষঃ পর্বতানাং শতক্রতুঃ।
পক্ষাংশ্চিচ্ছেদ বজ্রেণ ততঃ শতসহস্রশঃ॥১২৪॥
স মামুপগতঃ ক্রুদ্ধো বজ্রমুদ্যম্য দেবরাট্ ।
ততোঽহং সহসা ক্ষিপ্তঃ শ্বসনেন মহাত্মনা ॥১২৫॥
অস্মিন্ লবণতোয়ে চ প্রক্ষিপ্তঃ প্লবগোত্তম ।
গুপ্তপক্ষঃ সমগ্রশ্চ তব পিত্রাভিরক্ষিতঃ॥১২৬॥
ততোঽহং মানয়ামি ত্বাং মান্যোঽসি মম মারুতে ।
ত্বয়া মমৈষ সম্বন্ধঃ কপিমুখ্য মহাগুণঃ॥১২৭॥
অস্মিন্নেবঙ্গতে কার্যে সাগরস্য মমৈব চ ।
প্রীতিং প্রীতমনাঃ কর্তুং ত্বমর্হসি মহামতে ॥১২৮॥
শ্রমং মোক্ষয় পূজাং চ গৃহাণ হরিসত্তম ।
প্রীতিং চ মম মান্যস্য প্রীতোঽস্মি তব দর্শনাৎ ॥১২৯॥
এবমুক্তঃ কপিশ্রেষ্ঠস্তং নগোত্তমমব্রবীৎ ।
প্রীতোঽস্মি কৃতমাতিথ্যং মন্যুরেষোঽপনীয়তাম্ ॥১৩০॥
ত্বরতে কার্যকালো মে অহশ্চাপ্যতিবর্ততে ।
প্রতিজ্ঞা চ ময়া দত্তা ন স্থাতব্যমিহান্তরা ॥১৩১॥
ইত্যুক্ত্বা পাণিনা শৈলমালভ্য হরিপুঙ্গবঃ।
জগামাকাশমাবিশ্য বীর্যবান্ প্রহসন্নিব ॥১৩২॥
স পর্বতসমুদ্রাভ্যাং বহুমানাদবেক্ষিতঃ।
পূজিতশ্চোপপন্নাভিরাশীর্ভিরভিনন্দিতঃ॥১৩৩॥
অথোর্ধ্বং দূরমাগত্য হিত্বা শৈলমহার্ণবৌ ।
পিতুঃ পন্থানমাসাদ্য জগাম বিমলেঽম্বরে ॥১৩৪॥
ভূয়শ্চোর্ধ্বং গতিং প্রাপ্য গিরিং তমবলোকয়ন্ ।
বায়ুসূনুর্নিরালম্বো জগাম কপিকুঞ্জরঃ॥১৩৫॥
তদ্ দ্বিতীয়ং হনুমতো দৃষ্ট্বা কর্ম সুদুষ্করম্ ।
প্রশশংসুঃ সুরাঃ সর্বে সিদ্ধাশ্চ পরমর্ষয়ঃ॥১৩৬॥
দেবতাশ্চাভবন্ হৃষ্টাস্তত্রস্থাস্তস্য কর্মণা ।
কাঞ্চনস্য সুনাভস্য সহস্রাক্ষশ্চ বাসবঃ॥১৩৭॥
উবাচ বচনং ধীমান্ পরিতোষাৎ সগদ্গদম্ ।
সুনাভং পর্বতশ্রেষ্ঠং স্বয়মেব শচীপতিঃ॥১৩৮॥
হিরণ্যনাভ শৈলেন্দ্র পরিতুষ্টোঽস্মি তে ভৃশম্ ।
অভয়ং তে প্রয়চ্ছামি গচ্ছ সৌম্য যথাসুখম্ ॥১৩৯॥
সাহ্যং কৃতং তে সুমহদ্ বিশ্রান্তস্য হনূমতঃ।
ক্রমতো যোজনশতং নির্ভয়স্য ভয়ে সতি ॥১৪০॥
রামস্যৈষ হিতায়ৈব যাতি দাশরথেঃ কপিঃ।
সৎক্রিয়াং কুর্বতা শক্ত্যা তোষিতোঽস্মি দৃঢং ত্বয়া ॥১৪১॥
স তৎ প্রহর্ষমলভদ্ বিপুলং পর্বতোত্তমঃ।
দেবতানাং পতিং দৃষ্ট্বা পরিতুষ্টং শতক্রতুম্ ॥১৪২॥
স বৈ দত্তবরঃ শৈলো বভূবাবস্থিতস্তদা ।
হনূমাংশ্চ মুহূর্তেন ব্যতিচক্রাম সাগরম্ ॥১৪৩॥
ততো দেবাঃ সগন্ধর্বাঃ সিদ্ধাশ্চ পরমর্ষয়ঃ।
অব্রুবন্ সূর্যসঙ্কাশাং সুরসাং নাগমাতরম্ ॥১৪৪॥
অয়ং বাতাত্মজঃ শ্রীমান্ প্লবতে সাগরোপরি ।
হনূমান্ নাম তস্য ত্বং মুহূর্তং বিঘ্নমাচর ॥১৪৫॥
রাক্ষসং রূপমাস্থায় সুঘোরং পর্বতোপমম্ ।
দংষ্ট্রাকরালং পিঙ্গাক্ষং বক্ত্রং কৃত্বা নভঃস্পৃশম্ ॥১৪৬॥
বলমিচ্ছামহে জ্ঞাতুং ভূয়শ্চাস্য পরাক্রমম্ ।
ত্বাং বিজেষ্যত্যুপায়েন বিষাদং বা গমিষ্যতি ॥১৪৭॥
এবমুক্তা তু সা দেবী দৈবতৈরভিসৎকৃতা ।
সমুদ্রমধ্যে সুরসা বিভ্রতী রাক্ষসং বপুঃ॥১৪৮॥
বিকৃতং চ বিরূপং চ সর্বস্য চ ভয়াবহম্ ।
প্লবমানং হনূমন্তমাবৃত্যেদমুবাচ হ॥১৪৯॥
মম ভক্ষ্যঃ প্রদিষ্টস্ত্বমীশ্বরৈর্বানরর্ষভ ।
অহং ত্বাং ভক্ষয়িষ্যামি প্রবিশেদং মমাননম্ ॥১৫০॥
বর এষ পুরা দত্তো মম ধাত্রেতি সত্বরা ।
ব্যাদায় বক্ত্রং বিপুলং স্থিতা সা মারুতেঃ পুরঃ॥১৫১॥
এবমুক্তঃ সুরসয়া প্রহৃষ্টবদনোঽব্রবীৎ ।
রামো দাশরথির্নাম প্রবিষ্টো দণ্ডকাবনম্ ।
লক্ষ্মণেন সহ ভ্রাত্রা বৈদেহ্যা চাপি ভার্যযা ॥১৫২॥
অন্যকার্যবিষক্তস্য বদ্ধবৈরস্য রাক্ষসৈঃ।
তস্য সীতা হৃতা ভার্যা রাবণেন যশস্বিনী॥১৫৩॥
তস্যাঃ সকাশং দূতোঽহং গমিষ্যে রামশাসনাৎ ।
কর্তুমর্হসি রামস্য সাহ্যং বিষয়বাসিনি ॥১৫৪॥
অথবা মৈথিলীং দৃষ্ট্বা রামং চাক্লিষ্টকারিণম্ ।
আগমিষ্যামি তে বক্ত্রং সত্যং প্রতিশৃণোমি তে ॥১৫৫॥
এবমুক্তা হনুমতা সুরসা কামরূপিণী ।
অব্রবীন্নাতিবর্তেন্মাং কশ্চিদেষ বরো মম ॥১৫৬॥
তং প্রয়ান্তং সমুদ্বীক্ষ্য সুরসা বাক্যমব্রবীৎ ।
বলং জিজ্ঞাসমানা সা নাগমাতা হনূমতঃ॥১৫৭॥
নিবিশ্য বদনং মেঽদ্য গন্তব্যং বানরোত্তম ।
বর এষ পুরা দত্তো মম ধাত্রেতি সত্বরা ॥১৫৮॥
ব্যাদায় বিপুলং বক্ত্রং স্থিতা সা মারুতেঃ পুরঃ ।
এবমুক্তঃ সুরসয়া ক্রুদ্ধো বানরপুঙ্গবঃ॥১৫৯॥
অব্রবীৎ কুরু বৈ বক্ত্রং যেন মাং বিষহিষ্যসি ।
ইত্যুক্ত্বা সুরসাং ক্রুদ্ধো দশয়োজনমায়তাম্ ॥১৬০॥
দশয়োজনবিস্তারো হনূমানভবৎ তদা ।
তং দৃষ্ট্বা মেঘসঙ্কাশং দশয়োজনমায়তম্ ।
চকার সুরসাপ্যাস্যং বিংশদ যোজনমায়তম্ ॥১৬১॥
হনূমাংস্তু ততঃ ক্রুদ্ধস্ত্রিংশদ্ যোজনমায়তঃ।
চকার সুরসা বক্ত্রং চত্বারিংশৎ তথোচ্ছ্রিতম্ ॥১৬২॥
বভূব হনুমান্ বীরঃ পঞ্চাশদ্ যোজনোচ্ছ্রিতঃ।
চকার সুরসা বক্ত্রং ষষ্টিং যোজনমুচ্ছ্রিতম্ ॥১৬৩॥
তদৈব হনুমান্ বীরঃ সপ্ততিং যোজনোচ্ছ্রিতঃ।
চকার সুরসা বক্ত্রমশীতিং যোজনোচ্ছ্রিতম্ ॥১৬৪॥
হনূমাননলপ্রখ্যো নবতিং যোজনোচ্ছ্রিতঃ ।
চকার সুরসা বক্ত্রং শতয়োজনমায়তম্ ॥১৬৫॥
তদ্ দৃষ্ট্বা ব্যাদিতং ত্বাস্যং বায়ুপুত্রঃ স বুদ্ধিমান্ ।
দীর্ঘজিহ্বং সুরসয়া সুভীমং নরকোপমম্ ॥১৬৬॥
স সঙ্ক্ষিপ্যাত্মনঃ কায়ং জীমূত ইব মারুতিঃ।
তস্মিন্ মুহূর্তে হনুমান্ বভূবাঙ্গুষ্ঠমাত্রকঃ॥১৬৭॥
সোঽভিপদ্যাথ তদ্বক্ত্রং নিষ্পত্য চ মহাবলঃ।
অন্তরিক্ষে স্থিতঃ শ্রীমানিদং বচনমব্রবীৎ ॥১৬৮॥
প্রবিষ্টোঽস্মি হি তে বক্ত্রং দাক্ষায়ণি নমোঽস্তু তে ।
গমিষ্যে যত্র বৈদেহী সত্যশ্চাসীদ্ বরস্তব ॥১৬৯॥
তং দৃষ্ট্বা বদনান্মুক্তং চন্দ্রং রাহুমুখাদিব ।
অব্রবীৎ সুরসা দেবী স্বেন রূপেণ বানরম্ ॥১৭০॥
অর্থসিদ্ধ্যৈ হরিশ্রেষ্ঠ গচ্ছ সৌম্য যথাসুখম্ ।
সমানয় চ বৈদেহীং রাঘবেণ মহাত্মনা ॥১৭১॥
তৎ তৃতীয়ং হনুমতো দৃষ্ট্বা কর্ম সুদুষ্করম্ ।
সাধুসাধ্বিতি ভূতানি প্রশশংসুস্তদা হরিম্ ॥১৭২॥
স সাগরমনাধৃষ্যমভ্যেত্য বরুণালয়ম্ ।
জগামাকাশমাবিশ্য বেগেন গরুডোপমঃ॥১৭৩॥
সেবিতে বারিধারাভিঃ পতগৈশ্চ নিষেবিতে ।
চরিতে কৈশিকাচার্যৈরৈরাবতনিষেবিতে ॥১৭৪॥
সিংহকুঞ্জরশার্দূলপতগোরগবাহনৈঃ।
বিমানৈঃ সম্পতদ্ভিশ্চ বিমলৈঃ সমলঙ্কৃতে ॥১৭৫॥
বজ্রাশনিসমস্পর্শৈঃ পাবকৈরিব শোভিতে ।
কৃতপুণ্যৈর্মহাভাগৈঃ স্বর্গজিদ্ভিরধিষ্ঠিতে ॥১৭৬॥
বহতা হব্যমত্যন্তং সেবিতে চিত্রভানুনা ।
গ্রহনক্ষত্রচন্দ্রার্কতারাগণবিভূষিতে ॥১৭৭॥
মহর্ষিগণগন্ধর্বনাগয়ক্ষসমাকুলে ।
বিবিক্তে বিমলে বিশ্বে বিশ্বাবসুনিষেবিতে ॥১৭৮॥
দেবরাজগজাক্রান্তে চন্দ্রসূর্যপথে শিবে ।
বিতানে জীবলোকস্য বিততে ব্রহ্মনির্মিতে ॥১৭৯॥
বহুশঃ সেবিতে বীরৈর্বিদ্যাধরগণৈর্বৃতে ।
জগাম বায়ুমার্গে চ গরুত্মানিব মারুতিঃ॥১৮০॥
হনুমান্ মেঘজালানি প্রাকর্ষন্ মারুতো যথা ।
কালাগুরুসবর্ণানি রক্তপীতসিতানি চ ॥১৮১॥
কপিনা কৃষ্যমাণানি মহাভ্রাণি চকাশিরে ।
প্রবিশন্নভ্রজালানি নিষ্পতংশ্চ পুনঃ পুনঃ॥১৮২॥
প্রাবৃষীন্দুরিবাভাতি নিষ্পতন্ প্রবিশংস্তদা ।
প্রদৃশ্যমানঃ সর্বত্র হনূমান্ মারুতাত্মজঃ॥১৮৩॥
ভেজেঽম্বরং নিরালম্বং পক্ষয়ুক্ত ইবাদ্রিরাট্ ।
প্লবমানং তু তং দৃষ্ট্বা সিংহিকা নাম রাক্ষসী ॥১৮৪॥
মনসা চিন্তয়ামাস প্রবৃদ্ধা কামরূপিণী ।
অদ্য দীর্ঘস্য কালস্য ভবিষ্যাম্যহমাশিতা ॥১৮৫॥
ইদং মম মহাসত্ত্বং চিরস্য বশমাগতম্ ।
ইতি সঞ্চিন্ত্য মনসা চ্ছায়ামস্য সমাক্ষিপৎ ॥১৮৬॥
ছায়ায়াং গৃহ্যমাণায়াং চিন্তয়ামাস বানরঃ।
সমাক্ষিপ্তোঽস্মি সহসা পঙ্কূকৃতপরাক্রমঃ॥১৮৭॥
প্রতিলোমেন বাতেন মহানৌরিব সাগরে ।
তির্যগূর্ধ্বমধশ্চৈব বীক্ষমাণস্তদা কপিঃ॥১৮৮॥
দদর্শ স মহাসত্ত্বমুত্থিতং লবণাম্ভসি ।
তদ্ দৃষ্ট্বা চিন্তয়ামাস মারুতির্বিকৃতাননাম্ ॥১৮৯॥
কপিরাজ্ঞা যথাখ্যাতং সত্ত্বমদ্ভুতদর্শনম্ ।
ছায়াগ্রাহি মহাবীর্যং তদিদং নাত্র সংশয়ঃ॥১৯০॥
স তাং বুদ্ধ্বার্থতত্ত্বেন সিংহিকাং মতিমান্ কপিঃ।
ব্যবর্ধত মহাকায়ঃ প্রাবৃষীব বলাহকঃ॥১৯১॥
তস্য সা কায়মুদ্বীক্ষ্য বর্ধমানং মহাকপেঃ।
বক্ত্রং প্রসারয়ামাস পাতালাম্বরসংনিভম্ ॥১৯২॥
ঘনরাজীব গর্জন্তী বানরং সমভিদ্রবৎ ।
স দদর্শ ততস্তস্যা বিকৃতং সুমহন্মুখম্ ॥১৯৩॥
কায়মাত্রং চ মেধাবী মর্মাণি চ মহাকপিঃ।
স তস্যা বিকৃতে বক্ত্রে বজ্রসংহননঃ কপিঃ॥১৯৪॥
সঙ্ক্ষিপ্য মুহুরাত্মানং নিপপাত মহাকপিঃ।
আস্যে তস্যা নিমজ্জন্তং দদৃশুঃ সিদ্ধচারণাঃ॥১৯৫॥
গ্রস্যমানং যথা চন্দ্রং পূর্ণং পর্বণি রাহুণা ।
ততস্তস্যা নখৈস্তীক্ষ্ণৈর্মর্মাণ্যুৎকৃত্য বানরঃ॥১৯৬॥
উৎপপাতাথ বেগেন মনঃসম্পাতবিক্রমঃ।
তাং তু দিষ্ট্যা চ ধৃত্যা চ দাক্ষিণ্যেন নিপাত্য সঃ॥১৯৭॥
কপিপ্রবীরো বেগেন ববৃধে পুনরাত্মবান্ ।
হৃতহৃৎসা হনুমতা পপাত বিধুরাম্ভসি ।
স্বয়ম্ভুবৈব হনুমান্ সৃষ্টস্তস্যা নিপাতনে ॥১৯৮॥
তাং হতাং বানরেণাশু পতিতাং বীক্ষ্য সিংহিকাম্ ।
ভূতান্যাকাশচারীণি তমূচুঃ প্লবগোত্তমম্ ॥১৯৯॥
ভীমমদ্য কৃতং কর্ম মহৎসত্ত্বং ত্বয়া হতম্ ।
সাধয়ার্থমভিপ্রেতমরিষ্টং প্লবতাং বর ॥২০০॥
যস্য ত্বেতানি চত্বারি বানরেন্দ্র যথা তব ।
ধৃতির্দৃষ্টির্মতির্দাক্ষ্যং স কর্মসু ন সীদতি ॥২০১॥
স তৈঃ সম্পূজিতঃ পূজ্যঃ প্রতিপন্নপ্রয়োজনৈঃ।
জগামাকাশমাবিশ্য পন্নগাশনবৎ কপিঃ॥২০২॥
প্রাপ্তভূয়িষ্ঠপারস্তু সর্বতঃ পরিলোকয়ন্ ।
যোজনানাং শতস্যান্তে বনরাজীং দদর্শ সঃ॥২০৩॥
দদর্শ চ পতন্নেব বিবিধদ্রুমভূষিতম্ ।
দ্বীপং শাখামৃগ শ্রেষ্ঠো মলয়োপবনানি চ ॥২০৪॥
সাগরং সাগরানূপান্ সাগরানূপজান্ দ্রুমান্ ।
সাগরস্য চ পত্নীনাং মুখান্যপি বিলোকয়ৎ ॥২০৫॥
স মহামেঘসঙ্কাশং সমীক্ষ্যাত্মানমাত্মবান্ ।
নিরুন্ধন্তমিবাকাশং চকার মতিমান্ মতিম্ ॥২০৬॥
কায়বৃদ্ধিং প্রবেগং চ মম দৃষ্ট্বৈব রাক্ষসাঃ।
ময়ি কৌতূহলং কুর্যুরিতি মেনে মহামতিঃ॥২০৭॥
ততঃ শরীরং সঙ্ক্ষিপ্য তন্মহীধরসংনিভম্ ।
পুনঃ প্রকৃতিমাপেদে বীতমোহ ইবাত্মবান্ ॥২০৮॥
তদ্রূপমতিসঙ্ক্ষিপ্য হনূমান্ প্রকৃতৌ স্থিতঃ।
ত্রীন্ ক্রমানিব বিক্রম্য বলিবীর্যহরো হরিঃ॥২০৯॥
স চারুনানাবিধরূপধারী
	পরং সমাসাদ্য সমুদ্রতীরম্ ।
পরৈরশক্যং প্রতিপন্নরূপঃ
	সমীক্ষিতাত্মা সমবেক্ষিতার্থঃ॥২১০॥
ততঃ স লম্বস্য গিরেঃ সমৃদ্ধে
	বিচিত্রকূটে নিপপাত কূটে ।
সকেতকোদ্দালকনারিকেলে
	মহাভ্রকূটপ্রতিমো মহাত্মা ॥২১১॥
ততস্তু সম্প্রাপ্য সমুদ্রতীরং
	সমীক্ষ্য লঙ্কাং গিরিবর্যমূর্ধ্নি ।
কপিস্তু তস্মিন্ নিপপাত পর্বতে
	বিধূয় রূপং ব্যথয়ন্মৃগদ্বিজান্ ॥২১২॥
স সাগরং দানবপন্নগায়ুতং
	বলেন বিক্রম্য মহোর্মিমালিনম্ ।
নিপত্য তীরে চ মহোদধেস্তদা
	দদর্শ লঙ্কামমরাবতীমিব ॥২১৩॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে প্রথমঃ সর্গঃ