অথ দ্বিতীয়ঃ সর্গঃ স সাগরমনাধৃষ্যমতিক্রম্য মহাবলঃ। ত্রিকূটস্য তটে লঙ্কাং স্থিতঃ স্বস্থো দদর্শ হ ॥১॥ ততঃ পাদপমুক্তেন পুষ্পবর্ষেণ বীর্যবান্ । অভিবৃষ্টস্ততস্তত্র বভৌ পুষ্পময়ো হরিঃ॥২॥ যোজনানাং শতং শ্রীমাংস্তীর্ত্বাপ্যুত্তমবিক্রমঃ। অনিঃশ্বসন্ কপিস্তত্র ন গ্লানিমধিগচ্ছতি ॥৩॥ শতান্যহং যোজনানাং ক্রমেয়ং সুবহূন্যপি । কিং পুনঃ সাগরস্যান্তং সঙ্খ্যাতং শতয়োজনম্ ॥৪॥ স তু বীর্যবতাং শ্রেষ্ঠঃ প্লবতামপি চোত্তমঃ। জগাম বেগবান্ লঙ্কাং লঙ্ঘয়িত্বা মহোদধিম্ ॥৫॥ শাদ্বলানি চ নীলানি গন্ধবন্তি বনানি চ । মধুমন্তি চ মধ্যেন জগাম নগবন্তি চ ॥৬॥ শৈলাংশ্চ তরুসঞ্ছন্নান্ বনরাজীশ্চ পুষ্পিতাঃ। অভিচক্রাম তেজস্বী হনূমান্ প্লবগর্ষভঃ॥৭॥ স তস্মিন্নচলে তিষ্ঠন্ বনান্যুপবনানি চ । স নগাগ্রে স্থিতাং লঙ্কাং দদর্শ পবনাত্মজঃ॥৮॥ সরলান্ কর্ণিকারাংশ্চ খর্জূরাংশ্চ সুপুষ্পিতান্ । প্রিয়ালান্ মুচুলিন্দাংশ্চ কুটজান্ কেতকানপি ॥৯॥ প্রিয়ঙ্গূন্ গন্ধপূর্ণাংশ্চ নীপান্ সপ্তচ্ছদাংস্তথা । অসনান্ কোবিদারাংশ্চ করবীরাংশ্চ পুষ্পিতান্ ॥১০॥ পুষ্পভারনিবদ্ধাংশ্চ তথা মুকুলিতানপি । পাদপান্ বিহগাকীর্ণান্ পবনাধূতমস্তকান্ ॥১১॥ হংসকারণ্ডবাকীর্ণা বাপীঃ পদ্মোৎপলাবৃতাঃ। আক্রীডান্ বিবিধান্ রম্যান্ বিবিধাংশ্চ জলাশয়ান্ ॥১২॥ সন্ততান্ বিবিধৈর্বৃক্ষৈঃ সর্বর্তুফলপুষ্পিতৈঃ। উদ্যানানি চ রম্যাণি দদর্শ কপিকুঞ্জরঃ॥১৩॥ সমাসাদ্য চ লক্ষ্মীবাঁল্লঙ্কাং রাবণপালিতাম্ । পরিখাভিঃ সপদ্মাভিঃ সোৎপলাভিরলঙ্কৃতাম্ ॥১৪॥ সীতাপহরণাৎ তেন রাবণেন সুরক্ষিতাম্ । সমন্তাদ্ বিচরদ্ভিশ্চ রাক্ষসৈরুগ্রধন্বিভিঃ॥১৫॥ কাঞ্চনেনাবৃতাং রম্যাং প্রাকারেণ মহাপুরীম্ । গৃহৈশ্চ গিরিসঙ্কাশৈঃ শারদাম্বুদসন্নিভৈঃ॥১৬॥ পাণ্ডুরাভিঃ প্রতোলীভিরুচ্চাভিরভিসংবৃতাম্ । অট্টালকশতাকীর্ণাং পতাকাধ্বজশোভিতাম্ ॥১৭॥ তোরণৈঃ কাঞ্চনৈর্দিব্যৈর্লতাপঙ্ক্তিবিরাজিতৈঃ। দদর্শ হনুমান্ লঙ্কাং দেবো দেবপুরীমিব ॥১৮॥ গিরিমূর্ধ্নি স্থিতাং লঙ্কাং পাণ্ডুরৈর্ভবনৈঃ শুভৈঃ। দদর্শ স কপিঃ শ্রীমান্ পুরীমাকাশগামিব ॥১৯॥ পালিতাং রাক্ষসেন্দ্রেণ নির্মিতাং বিশ্বকর্মণা । প্লবমানামিবাকাশে দদর্শ হনুমান্ কপিঃ॥২০॥ বপ্রপ্রাকারজঘনাং বিপুলাম্বুবনাম্বরাম্ । শতঘ্নীশূলকেশান্তামট্টালকাবতংসকাম্ ॥২১॥ মনসেব কৃতাং লঙ্কাং নির্মিতাং বিশ্বকর্মণা । দ্বারমুত্তরমাসাদ্য চিন্তয়ামাস বানরঃ॥২২॥ কৈলাসনিলয়প্রখ্যমালিখন্তমিবাম্বরম্ । ধ্রিয়মাণমিবাকাশমুচ্ছ্রিতৈর্ভবনোত্তমৈঃ॥২৩॥ সম্পূর্ণা রাক্ষসৈর্ঘোরৈর্নাগৈর্ভোগবতীমিব । অচিন্ত্যাং সুকৃতাং স্পষ্টাং কুবেরাধ্যুষিতাং পুরা ॥২৪॥ দংষ্ট্রাভির্বহুভিঃ শূরৈঃ শূলপট্টিশপাণিভিঃ। রক্ষিতাং রাক্ষসৈর্ঘোরৈর্গুহামাশীবিষৈরিব ॥২৫॥ তস্যাশ্চ মহতীং গুপ্তিং সাগরং চ নিরীক্ষ্য সঃ। রাবণং চ রিপুং ঘোরং চিন্তয়ামাস বানরঃ॥২৬॥ আগত্যাপীহ হরয়ো ভবিষ্যন্তি নিরর্থকাঃ। নহি যুদ্ধেন বৈ লঙ্কা শক্যা জেতুং সুরৈরপি ॥২৭॥ ইমাং ত্ববিষমাং লঙ্কাং দুর্গাং রাবণপালিতাম্ । প্রাপ্যাপি সুমহাবাহুঃ কিং করিষ্যতি রাঘবঃ॥২৮॥ অবকাশো ন সাম্নস্তু রাক্ষসেষ্বভিগম্যতে । ন দানস্য ন ভেদস্য নৈব যুদ্ধস্য দৃশ্যতে ॥২৯॥ চতুর্ণামেব হি গতির্বানরাণাং তরস্বিনাম্ । বালিপুত্রস্য নীলস্য মম রাজ্ঞশ্চ ধীমতঃ॥৩০॥ যাবজ্জানামি বৈদেহীং যদি জীবতি বা ন বা । তত্রৈব চিন্তয়িষ্যামি দৃষ্ট্বা তাং জনকাত্মজাম্ ॥৩১॥ ততঃ স চিন্তয়ামাস মুহূর্তং কপিকুঞ্জরঃ। গিরেঃ শৃঙ্গে স্থিতস্তস্মিন্ রামস্যাভ্যুদয়ং ততঃ॥৩২॥ অনেন রূপেণ ময়া ন শক্যা রক্ষসাং পুরী । প্রবেষ্টুং রাক্ষসৈর্গুপ্তা ক্রূরৈর্বলসমন্বিতৈঃ॥৩৩॥ মহৌজসো মহাবীর্যা বলবন্তশ্চ রাক্ষসাঃ। বঞ্চনীয়া ময়া সর্বে জানকীং পরিমার্গতা ॥৩৪॥ লক্ষ্যালক্ষ্যেণ রূপেণ রাত্রৌ লঙ্কাপুরী ময়া । প্রাপ্তকালং প্রবেষ্টুং মে কৃত্যং সাধয়িতুং মহৎ ॥৩৫॥ তাং পুরীং তাদৃশীং দৃষ্ট্বা দুরাধর্ষাং সুরাসুরৈঃ। হনূমাংশ্চিন্তয়ামাস বিনিঃশ্বস্য মুহুর্মুহুঃ॥৩৬॥ কেনোপায়েন পশ্যেয়ং মৈথিলীং জনকাত্মজাম্ । অদৃষ্টো রাক্ষসেন্দ্রেণ রাবণেন দুরাত্মনা ॥৩৭॥ ন বিনশ্যেৎ কথং কার্যং রামস্য বিদিতাত্মনঃ। একামেকস্তু পশ্যেয়ং রহিতে জনকাত্মজাম্ ॥৩৮॥ ভূতাশ্চার্থা বিনশ্যন্তি দেশকালবিরোধিতাঃ। বিক্লবং দূতমাসাদ্য তমঃ সূর্যোদয়ে যথা ॥৩৯॥ অর্থানর্থান্তরে বুদ্ধির্নিশ্চিতাপি ন শোভতে । ঘাতয়ন্তীহ কার্যাণি দূতাঃ পণ্ডিতমানিনঃ॥৪০॥ ন বিনশ্যেৎ কথং কার্যং বৈক্লব্যং ন কথং ভবেৎ । লঙ্ঘনং চ সমুদ্রস্য কথং নু ন ভবেদ্ বৃথা ॥৪১॥ ময়ি দৃষ্টে তু রক্ষোভী রামস্য বিদিতাত্মনঃ। ভবেদ্ ব্যর্থমিদং কার্যং রাবণানর্থমিচ্ছতঃ॥৪২॥ নহি শক্যং ক্বচিৎ স্থাতুমবিজ্ঞাতেন রাক্ষসৈঃ। অপি রাক্ষসরূপেণ কিমুতান্যেন কেনচিৎ ॥৪৩॥ বায়ুরপ্যত্র নাজ্ঞাতশ্চরেদিতি মতির্মম । নহ্যত্রাবিদিতং কিঞ্চিদ্ রক্ষসাং ভীমকর্মণাম্ ॥৪৪॥ ইহাহং যদি তিষ্ঠামি স্বেন রূপেণ সংবৃতঃ। বিনাশমুপয়াস্যামি ভর্তুরর্থশ্চ হাস্যতি ॥৪৫॥ তদহং স্বেন রূপেণ রজন্যাং হ্রস্বতাং গতঃ। লঙ্কামভিপতিষ্যামি রাঘবস্যার্থসিদ্ধয়ে ॥৪৬॥ রাবণস্য পুরীং রাত্রৌ প্রবিশ্য সুদুরাসদাম্ । প্রবিশ্য ভবনং সর্বং দ্রক্ষ্যামি জনকাত্মজাম্ ॥৪৭॥ ইতি নিশ্চিত্য হনুমান্ সূর্যস্যাস্তময়ং কপিঃ। আচকাঙ্ক্ষে তদা বীরো বৈদেহ্যা দর্শনোৎসুকঃ॥৪৮॥ সূর্যে চাস্তং গতে রাত্রৌ দেহং সঙ্ক্ষিপ্য মারুতিঃ। বৃষদংশকমাত্রোঽথ বভূবাদ্ভুতদর্শনঃ॥৪৯॥ প্রদোষকালে হনুমাংস্তূর্ণমুৎপত্য বীর্যবান্ । প্রবিবেশ পুরীং রম্যাং প্রবিভক্তমহাপথাম্ ॥৫০॥ প্রাসাদমালাবিততাং স্তম্ভৈঃ কাঞ্চনসন্নিভৈঃ। শাতকুম্ভনিভৈর্জালৈর্গন্ধর্বনগরোপমাম্ ॥৫১॥ সপ্তভৌমাষ্টভৌমৈশ্চ স দদর্শ মহাপুরীম্ । তলৈঃ স্ফটিকসঙ্কীর্ণৈঃ কার্তস্বরবিভূষিতৈঃ॥৫২॥ বৈদূর্যমণিচিত্রৈশ্চ মুক্তাজালবিভূষিতৈঃ। তৈস্তৈঃ শুশুভিরে তানি ভবনান্যত্র রক্ষসাম্ ॥৫৩॥ কাঞ্চনানি বিচিত্রাণি তোরণানি চ রক্ষসাম্ । লঙ্কামুদ্যোতয়ামাসুঃ সর্বতঃ সমলঙ্কৃতাম্ ॥৫৪॥ অচিন্ত্যামদ্ভুতাকারাং দৃষ্ট্বা লঙ্কাং মহাকপিঃ। আসীদ্ বিষণ্ণো হৃষ্টশ্চ বৈদেহ্যা দর্শনোৎসুকঃ॥৫৫॥ স পাণ্ডুরাবিদ্ধবিমানমালিনীং মহার্হজাম্বূনদজালতোরণাম্ । যশস্বিনীং রাবণবাহুপালিতাং ক্ষপাচরৈর্ভীমবলৈঃ সুপালিতাম্ ॥৫৬॥ চন্দ্রোঽপি সাচিব্যমিবাস্য কুর্বং- স্তারাগণৈর্মধ্যগতো বিরাজন্ । জ্যোৎস্নাবিতানেন বিতত্য লোকা- নুত্তিষ্ঠতেঽনেকসহস্ররশ্মিঃ॥৫৭॥ শঙ্খপ্রভং ক্ষীরমৃণালবর্ণ মুদ্গচ্ছমানং ব্যবভাসমানম্ । দদর্শ চন্দ্রং স কপিপ্রবীরঃ পোপ্লূয়মানং সরসীব হংসম্ ॥৫৮॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে দ্বিতীয়ঃ সর্গঃ