অথ তৃতীয়ঃ সর্গঃ স লম্বশিখরে লম্বে লম্বতোয়দসন্নিভে । সত্ত্বমাস্থায় মেধাবী হনুমান্ মারুতাত্মজঃ॥১॥ নিশি লঙ্কাং মহাসত্ত্বো বিবেশ কপিকুঞ্জরঃ। রম্যকাননতোয়াঢ্যাং পুরীং রাবণপালিতাম্ ॥২॥ শারদাম্বুধরপ্রখ্যৈর্ভবনৈরুপশোভিতাম্ । সাগরোপমনির্ঘোষাং সাগরানিলসেবিতাম্ ॥৩॥ সুপুষ্টবলসম্পুষ্টাং যথৈব বিটপাবতীম্ । চারুতোরণনির্যূহাং পাণ্ডুরদ্বারতোরণাম্ ॥৪॥ ভুজগাচরিতাং গুপ্তাং শুভাং ভোগবতীমিব । তাং সবিদ্যুদ্ঘনাকীর্ণাং জ্যোতির্গণনিষেবিতাম্ ॥৫॥ চণ্ডমারুতনির্হ্রাদাং যথা চাপ্যমরাবতীম্ । শাতকুম্ভেন মহতা প্রাকারেণাভিসংবৃতাম্ ॥৬॥ কিঙ্কিণীজালঘোষাভিঃ পতাকাভিরলঙ্কৃতাম্ । আসাদ্য সহসা হৃষ্টঃ প্রাকারমভিপেদিবান্ ॥৭॥ বিস্ময়াবিষ্টহৃদয়ঃ পুরীমালোক্য সর্বতঃ। জাম্বূনদময়ৈর্দ্বারৈর্বৈদূর্যকৃতবেদিকৈঃ॥৮॥ বজ্রস্ফটিকমুক্তাভির্মণিকুট্টিমভূষিতৈঃ। তপ্তহাটকনির্যূহৈ রাজতামলপাণ্ডুরৈঃ॥৯॥ বৈদূর্যকৃতসোপানৈঃ স্ফাটিকান্তরপাংসুভিঃ। চারুসঞ্জবনোপেতৈঃ খমিবোৎপতিতৈঃ শুভৈঃ॥১০॥ ক্রৌঞ্চবর্হিণসঙ্ঘুষ্টৈ রাজহংসনিষেবিতৈঃ। তূর্যাভরণনির্ঘোষৈঃ সর্বতঃ পরিনাদিতাম্ ॥১১॥ বস্বোকসারপ্রতিমাং সমীক্ষ্য নগরীং ততঃ। খমিবোৎপতিতাং লঙ্কাং জহর্ষ হনুমান্ কপিঃ॥১২॥ তাং সমীক্ষ্য পুরীং লঙ্কাং রাক্ষসাধিপতেঃ শুভাম্ । অনুত্তমামৃদ্ধিমতীং চিন্তয়ামাস বীর্যবান্ ॥১৩॥ নেয়মন্যেন নগরী শক্যা ধর্ষয়িতুং বলাৎ । রক্ষিতা রাবণবলৈরুদ্যতায়ুধপাণিভিঃ॥১৪॥ কুমুদাঙ্গদয়োর্বাপি সুষেণস্য মহাকপেঃ। প্রসিদ্ধেয়ং ভবেদ্ ভূমির্মৈন্দদ্বিবিদয়োরপি ॥১৫॥ বিবস্বতস্তনূজস্য হরেশ্চ কুশপর্বণঃ। ঋক্ষস্য কপিমুখ্যস্য মম চৈব গতির্ভবেৎ ॥১৬॥ সমীক্ষ্য চ মহাবাহো রাঘবস্য পরাক্রমম্ । লক্ষ্মণস্য চ বিক্রান্তমভবৎ প্রীতিমান্ কপিঃ॥১৭॥ তাং রত্নবসনোপেতাং গোষ্ঠাগারাবতংসিকাম্ । যন্ত্রাগারস্তনীমৃদ্ধাং প্রমদামিব ভূষিতাম্ ॥১৮॥ তাং নষ্টতিমিরাং দীপৈর্ভাস্বরৈশ্চ মহাগ্রহৈঃ। নগরীং রাক্ষসেন্দ্রস্য স দদর্শ মহাকপিঃ॥১৯॥ অথ সা হরিশার্দূলং প্রবিশন্তং মহাকপিম্ । নগরী স্বেন রূপেণ দদর্শ পবনাত্মজম্ ॥২০॥ সা তং হরিবরং দৃষ্ট্বা লঙ্কা রাবণপালিতা । স্বয়মেবোত্থিতা তত্র বিকৃতাননদর্শনা ॥২১॥ পুরস্তাৎ তস্য বীরস্য বায়ুসূনোরতিষ্ঠত । মুঞ্চমানা মহানাদমব্রবীৎ পবনাত্মজম্ ॥২২॥ কস্ত্বং কেন চ কার্যেণ ইহ প্রাপ্তো বনালয় । কথয়স্বেহ যৎ তত্ত্বং যাবৎ প্রাণা ধরন্তি তে ॥২৩॥ ন শক্যং খল্বিয়ং লঙ্কা প্রবেষ্টুং বানর ত্বয়া । রক্ষিতা রাবণবলৈরভিগুপ্তা সমন্ততঃ॥২৪॥ অথ তামব্রবীদ্ বীরো হনুমানগ্রতঃ স্থিতাম্ । কথয়িষ্যামি তৎ তত্ত্বং যন্মাং ত্বং পরিপৃচ্ছসে ॥২৫॥ কা ত্বং বিরূপনয়না পুরদ্বারেঽবতিষ্ঠসে । কিমর্থং চাপি মাং ক্রোধান্নির্ভর্ত্সয়সি দারুণে ॥২৬॥ হনুমদ্বচনং শ্রুত্বা লঙ্কা সা কামরূপিণী । উবাচ বচনং ক্রুদ্ধা পরুষং পবনাত্মজম্ ॥২৭॥ অহং রাক্ষসরাজস্য রাবণস্য মহাত্মনঃ। আজ্ঞাপ্রতীক্ষা দুর্ধর্ষা রক্ষামি নগরীমিমাম্ ॥২৮॥ ন শক্যং মামবজ্ঞায় প্রবেষ্টুং নগরীমিমাম্ । অদ্য প্রাণৈঃ পরিত্যক্তঃ স্বপ্স্যসে নিহতো ময়া ॥২৯॥ অহং হি নগরী লঙ্কা স্বয়মেব প্লবঙ্গম । সর্বতঃ পরিরক্ষামি অতস্তে কথিতং ময়া ॥৩০॥ লঙ্কায়া বচনং শ্রুত্বা হনূমান্ মারুতাত্মজঃ। যত্নবান্ স হরিশ্রেষ্ঠঃ স্থিতঃ শৈল ইবাপরঃ॥৩১॥ স তাং স্ত্রীরূপবিকৃতাং দৃষ্ট্বা বানরপুঙ্গবঃ। আবভাষেঽথ মেধাবী সত্ত্ববান্ প্লবগর্ষভঃ॥৩২॥ দ্রক্ষ্যামি নগরীং লঙ্কাং সাট্টপ্রাকারতোরণাম্ । ইত্যর্থমিহ সম্প্রাপ্তঃ পরং কৌতূহলং হি মে ॥৩৩॥ বনান্যুপবনানীহ লঙ্কায়াঃ কাননানি চ । সর্বতো গৃহমুখ্যানি দ্রষ্টুমাগমনং হি মে ॥৩৪॥ তস্য তদ্ বচনং শ্রুত্বা লঙ্কা সা কামরূপিণী । ভূয় এব পুনর্বাক্যং বভাষে পরুষাক্ষরম্ ॥৩৫॥ মামনির্জিত্য দুর্বুদ্ধে রাক্ষসেশ্বরপালিতাম্ । ন শক্যং হ্যদ্য তে দ্রষ্টুং পুরীয়ং বানরাধম ॥৩৬॥ ততঃ স হরিশার্দূলস্তামুবাচ নিশাচরীম্ । দৃষ্ট্বা পুরীমিমাং ভদ্রে পুনর্যাস্যে যথাগতম্ ॥৩৭॥ ততঃ কৃত্বা মহানাদং সা বৈ লঙ্কা ভয়ঙ্করম্ । তলেন বানরশ্রেষ্ঠং তাডয়ামাস বেগিতা ॥৩৮॥ ততঃ স হরিশার্দূলো লঙ্কয়া তাডিতো ভৃশম্ । ননাদ সুমহানাদং বীর্যবান্ মারুতাত্মজঃ॥৩৯॥ ততঃ সংবর্তয়ামাস বামহস্তস্য সোঽঙ্গুলীঃ। মুষ্টিনাভিজঘানৈনাং হনুমান্ ক্রোধমূর্চ্ছিতঃ॥৪০॥ স্ত্রী চেতি মন্যমানেন নাতিক্রোধঃ স্বয়ং কৃতঃ। সা তু তেন প্রহারেণ বিহ্বলাঙ্গী নিশাচরী । পপাত সহসা ভূমৌ বিকৃতাননদর্শনা ॥৪১॥ ততস্তু হনুমান্ বীরস্তাং দৃষ্ট্বা বিনিপাতিতাম্ । কৃপাং চকার তেজস্বী মন্যমানঃ স্ত্রিয়ং চ তাম্ ॥৪২॥ ততো বৈ ভৃশমুদ্বিগ্না লঙ্কা সা গদ্গদাক্ষরম্ । উবাচাগর্বিতং বাক্যং হনুমন্তং প্লবঙ্গমম্ ॥৪৩॥ প্রসীদ সুমহাবাহো ত্রায়স্ব হরিসত্তম । সময়ে সৌম্য তিষ্ঠন্তি সত্ত্ববন্তো মহাবলাঃ॥৪৪॥ অহং তু নগরী লঙ্কা স্বয়মেব প্লবঙ্গম । নির্জিতাহং ত্বয়া বীর বিক্রমেণ মহাবল ॥৪৫॥ ইদং চ তথ্যং শৃণু মে ব্রুবন্ত্যা বৈ হরীশ্বর । স্বয়ং স্বয়ম্ভুবা দত্তং বরদানং যথা মম ॥৪৬॥ যদা ত্বাং বানরঃ কশ্চিদ্ বিক্রমাদ্ বশমানয়েৎ । তদা ত্বয়া হি বিজ্ঞেয়ং রক্ষসাং ভয়মাগতম্ ॥৪৭॥ স হি মে সময়ঃ সৌম্য প্রাপ্তোঽদ্য তব দর্শনাৎ । স্বয়ম্ভূবিহিতঃ সত্যো ন তস্যাস্তি ব্যতিক্রমঃ॥৪৮॥ সীতানিমিত্তং রাজ্ঞস্তু রাবণস্য দুরাত্মনঃ। রক্ষসাং চৈব সর্বেষাং বিনাশঃ সমুপাগতঃ॥৪৯॥ তৎ প্রবিশ্য হরিশ্রেষ্ঠ পুরীং রাবণপালিতাম্ । বিধৎস্ব সর্বকার্যাণি যানি যানীহ বাঞ্ছসি ॥৫০॥ প্রবিশ্য শাপোপহতাং হরীশ্বর পুরীং শুভাং রাক্ষসমুখ্যপালিতাম্ । যদৃচ্ছয়া ত্বং জনকাত্মজাং সতীং বিমার্গ সর্বত্র গতো যথাসুখম্ ॥৫১॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে তৃতীয়ঃ সর্গঃ