অথ চতুর্থঃ সর্গঃ
স নির্জিত্য পুরীং লঙ্কাং শ্রেষ্ঠাং তাং কামরূপিণীম্ ।
বিক্রমেণ মহাতেজা হনুমান্ কপিসত্তমঃ॥১॥
অদ্বারেণ মহাবীর্যঃ প্রাকারমবপুপ্লুবে ।
নিশি লঙ্কাং মহাসত্ত্বো বিবেশ কপিকুঞ্জরঃ॥২॥
প্রবিশ্য নগরীং লঙ্কাং কপিরাজহিতঙ্করঃ।
চক্রেঽথ পাদং সব্যং চ শত্রূণাং স তু মূর্ধনি ॥৩॥
প্রবিষ্টঃ সত্ত্বসম্পন্নো নিশায়াং মারুতাত্মজঃ।
স মহাপথমাস্থায় মুক্তপুষ্পবিরাজিতম্ ॥৪॥
ততস্তু তাং পুরীং লঙ্কাং রম্যামভিয়যৌ কপিঃ।
হসিতোৎকৃষ্টনিনদৈস্তূর্যঘোষপুরস্কৃতৈঃ॥৫॥
বজ্রাঙ্কুশনিকাশৈশ্চ বজ্রজালবিভূষিতৈঃ।
গৃহমেধৈঃ পুরী রম্যা বভাসে দ্যৌরিবাম্বুদৈঃ॥৬॥
প্রজজ্বাল তদা লঙ্কা রক্ষোগণগৃহৈঃ শুভৈঃ।
সিতাভ্রসদৃশৈশ্চিত্রৈঃ পদ্মস্বস্তিকসংস্থিতৈঃ॥৭॥
বর্ধমানগৃহৈশ্চাপি সর্বতঃ সুবিভূষিতৈঃ।
তাং চিত্রমাল্যাভরণাং কপিরাজহিতঙ্করঃ॥৮॥
রাঘবার্থে চরন্ শ্রীমান্ দদর্শ চ ননন্দ চ ।
ভবনাদ্ভবনং গচ্ছন্ দদর্শ কপিকুঞ্জরঃ॥৯॥
বিবিধাকৃতিরূপাণি ভবনানি ততস্ততঃ।
শুশ্রাব রুচিরং গীতং ত্রিস্থানস্বরভূষিতম্ ॥১০॥
স্ত্রীণাং মদনবিদ্ধানাং দিবি চাপ্সরসামিব ।
শুশ্রাব কাঞ্চীনিনদং নূপুরাণাং চ নিঃস্বনম্ ॥১১॥
সোপাননিনদাংশ্চাপি ভবনেষু মহাত্মনাম্ ।
আস্ফোটিতনিনাদাংশ্চ ক্ষ্বেডিতাংশ্চ ততস্ততঃ॥১২॥
শুশ্রাব জপতাং তত্র মন্ত্রান্ রক্ষোগৃহেষু বৈ ।
স্বাধ্যায় নিরতাংশ্চৈব যাতুধানান্দদর্শ সঃ॥১৩॥
রাবণস্তবসংয়ুক্তান্গর্জতো রাক্ষসানপি ।
রাজমার্গং সমাবৃত্য স্থিতং রক্ষোগণং মহৎ ॥১৪॥
দদর্শ মধ্যমে গুল্মে রাক্ষসস্য চরান্ বহূন্ ।
দীক্ষিতান্ জটিলান্ মুণ্ডান্ গোজিনাম্বরবাসসঃ॥১৫॥
দর্ভমুষ্টিপ্রহরণানগ্নিকুণ্ডায়ুধাংস্তথা ।
কূটমুদ্গরপাণীংশ্চ দণ্ডায়ুধধরানপি ॥১৬॥
একাক্ষানেকবর্ণাংশ্চ লম্বোদরপয়োধরান্ ।
করালান্ভুগ্নবক্ত্রাংশ্চ বিকটান্বামনাংস্তথা ॥১৭॥
ধন্বিনঃ খড্গিনশ্চৈব শতঘ্নী মুসলায়ুধান্ ।
পরিঘোত্তমহস্তাংশ্চ বিচিত্রকবচোজ্জ্বলান্ ॥১৮॥
নাতিস্তূলান্ নাতিকৃশান্ নাতিদীর্ঘাতিহ্রস্বকান্ ।
নাতিগৌরান্ নাতিকৃষ্ণান্নাতিকুব্জান্ন বামনান্ ॥১৯॥
বিরূপান্বহুরূপাংশ্চ সুরূপাংশ্চ সুবর্চসঃ।
পতাকিনশ্চধ্বজিনো দদর্শ বিবিধায়ুধান্ ॥২০॥
শক্তিবৃক্ষায়ুধাংশ্চৈব পট্টিশাশনিধারিণঃ।
ক্ষেপণীপাশহস্তাংশ্চ দদর্শ স মহাকপিঃ॥২১॥
স্রগ্বিণস্ত্বনুলিপ্তাংশ্চ বরাভরণভূষিতান্ ।
নানবেষসমায়ুক্তান্ যথাস্বৈরচরান্ বহূন্ ॥২২॥
তীক্ষ্ণশূলধরাংশ্চৈব বজ্রিণশ্চ মহাবলান্ ।
শতসাহস্রমব্যগ্রমারক্ষং মধ্যমং কপিঃ॥২৩॥
রক্ষোঽধিপতিনির্দিষ্টং দদর্শান্তঃ পুরাগ্রতঃ।
স তদা তদ্ গৃহং দৃষ্ট্বা মহাহাটকতোরণম্ ॥২৪॥
রাক্ষসেন্দ্রস্য বিখ্যাতমদ্রিমূর্ধ্নি প্রতিষ্ঠিতম্ ।
পুণ্ডরীকাবতংসাভিঃ পরিখাভিঃ সমাবৃতম্ ॥২৫॥
প্রাকারাবৃতমত্যন্তং দদর্শ স মহাকপিঃ।
ত্রিবিষ্টপনিভং দিব্যং দিব্যনাদবিনাদিতম্ ॥২৬॥
বাজিহ্রেষিতসঙ্ঘুষ্টং নাদিতং ভূষণৈস্তথা ।
রথৈর্যানৈর্বিমানৈশ্চ তথা হয়গজৈঃ শুভৈঃ॥২৭॥
বারণৈশ্চ চতুর্দন্তৈঃ শ্বেতাভ্রনিচয়োপমৈঃ।
ভূষিতৈ রুচিরদ্বারং মত্তৈশ্চ মৃগপক্ষিভিঃ॥২৮॥
রক্ষিতং সুমহাবীর্যৈর্যাতুধানৈঃ সহস্রশঃ।
রাক্ষসাধিপতের্গুপ্তমাবিবেশ গৃহং কপিঃ॥২৯॥
স হেমজাম্বূনদচক্রবালং
	মহার্হমুক্তামণি ভূষিতান্তম্্ ।
পরার্ধ্যকালাগুরুচন্দনার্হং
	স রাবণান্তঃ পুরমাবিবেশ ॥৩০॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে চতুর্থঃ সর্গঃ