অথ পঞ্চমঃ সর্গঃ ততঃ স মধ্যঙ্গতমংশুমন্তং জ্যোৎস্নাবিতানং মুহুরুদ্বমন্তম্ । দদর্শ ধীমান্ ভুবি ভানুমন্তং গোষ্ঠে বৃষং মত্তমিব ভ্রমন্তম্ ॥১॥ লোকস্য পাপানি বিনাশয়ন্তং মহোদধিং চাপি সমেধয়ন্তম্ । ভূতানি সর্বাণি বিরাজয়ন্তং দদর্শ শীতাংশুমথাভিয়ান্তম্ ॥২॥ যা ভাতি লক্ষ্মীর্ভুবি মন্দরস্থা যথা প্রদোষেষু চ সাগরস্থা । তথৈব তোয়েষু চ পুষ্করস্থা ররাজ সা চারুনিশাকরস্থা ॥৩॥ হংসো যথা রাজতপঞ্জরস্থঃ সিংহো যথা মন্দরকন্দরস্থঃ। বীরো যথা গর্বিতকুঞ্জরস্থ- শ্চন্দ্রোঽপি বভ্রাজ তথাম্বরস্থঃ॥৪॥ স্থিতঃ ককুদ্মানিব তীক্ষ্ণশৃঙ্গো মহাচলঃ শ্বেত ইবোর্ধ্বশৃঙ্গঃ। হস্তীব জাম্বূনদবদ্ধশৃঙ্গো বিভাতি চন্দ্রঃ পরিপূর্ণশৃঙ্গঃ॥৫॥ বিনষ্টশীতাম্বুতুষারপঙ্কো মহাগ্রহগ্রাহবিনষ্টপঙ্কঃ। প্রকাশলক্ষ্ম্যাশ্রয়নির্মলাঙ্কো ররাজ চন্দ্রো ভগবান্ শশাঙ্কঃ॥৬॥ শিলাতলং প্রাপ্য যথা মৃগেন্দ্রো মহারণং প্রাপ্য যথা গজেন্দ্রঃ। রাজ্যং সমাসাদ্য যথা নরেন্দ্র- স্তথাপ্রকাশো বিররাজ চন্দ্রঃ॥৭॥ প্রকাশচন্দ্রোদয়নষ্টদোষঃ প্রবৃদ্ধরক্ষঃ পিশিতাশদোষঃ। রামাভিরামেরিতচিত্তদোষঃ স্বর্গপ্রকাশো ভগবান্প্রদোষঃ॥৮॥ তন্ত্রীস্বরাঃ কর্ণসুখাঃ প্রবৃত্তাঃ স্বপন্তি নার্যঃ পতিভিঃ সুবৃত্তাঃ। নক্তঞ্চরাশ্চাপি তথা প্রবৃত্তা বিহর্তুমত্যদ্ভুতরৌদ্রবৃত্তাঃ॥৯॥ মত্তপ্রমত্তানি সমাকুলানি রথাশ্বভদ্রাসনসঙ্কুলানি । বীরশ্রিয়া চাপি সমাকুলানি দদর্শ ধীমান্স কপিঃ কুলানি ॥১০॥ পরস্পরং চাধিকমাক্ষিপন্তি ভুজাংশ্চ পীনানধিবিক্ষিপন্তি । মত্তপ্রলাপানধিবিক্ষিপন্তি মত্তানি চান্যোন্যমধিক্ষিপন্তি ॥১১॥ রক্ষাংসি বক্ষাংসি চ বিক্ষিপন্তি গাত্রাণি কান্তাসু চ বিক্ষিপন্তি । রূপাণি চিত্রাণি চ বিক্ষিপন্তি দৃঢানি চাপানি চ বিক্ষিপন্তি ॥১২॥ দদর্শ কান্তাশ্চ সমালভন্ত্য- স্তথাপরাস্তত্র পুনঃ স্বপন্ত্যঃ। সুরূপবক্ত্রাশ্চ তথা হসন্ত্যঃ ক্রুদ্ধাঃ পরাশ্চাপি বিনিঃশ্বসন্ত্যঃ॥১৩॥ মহাগজৈশ্চাপি তথা নদদ্ভিঃ সুপূজিতৈশ্চাপি তথা সুসদ্ভিঃ। ররাজ বীরৈশ্চ বিনিঃশ্বসদ্ভি- র্হ্রদা ভুজঙ্গৈরিব নিঃশ্বসদ্ভিঃ॥১৪॥ বুদ্ধিপ্রধানান্রুচিরাভিধানান্ সংশ্রদ্দধানাঞ্জগতঃ প্রধানান্ । নানাবিধানান্রুচিরাভিধানান্ দদর্শ তস্যাং পুরি যাতুধানান্ ॥১৫॥ ননন্দ দৃষ্ট্বা স চ তান্সুরূপান্ নানাগুণানাত্মগুণানুরূপান্ । বিদ্যোতমানান্স চ তান্সুরূপান্ দদর্শ কাংশ্চিচ্চ পুনর্বিরূপান্ ॥১৩॥ ততো বরার্হাঃ সুবিশুদ্ধভাবা- স্তেষাং স্ত্রিয়স্তত্র মহানুভাবাঃ। প্রিয়েষু পানেষু চ সক্তভাবা দদর্শ তারা ইব সুস্বভাবাঃ॥১৭॥ স্ত্রিয়ো জ্বলন্তীস্ত্রপয়োপগূঢা নিশীথকালে রমণোপগূঢাঃ। দদর্শ কাশ্চিৎপ্রমদোপগূঢা যথা বিহঙ্গা বিহগোপগূঢাঃ॥১৮॥ অন্যাঃ পুনর্হর্ম্যতলোপবিষ্টা- স্তত্র প্রিয়াঙ্কেষু সুখোপবিষ্টাঃ। ভর্তুঃ পরা ধর্মপরা নিবিষ্টা দদর্শ ধীমান্মদনোপবিষ্টাঃ॥১৯॥ অপ্রাবৃতাঃ কাঞ্চনরাজিবর্ণাঃ কাশ্চিৎপরার্ধ্যাস্তপনীয়বর্ণাঃ। পুনশ্চ কাশ্চিচ্ছশলক্ষ্মবর্ণাঃ কান্তপ্রহীণা রুচিরাঙ্গবর্ণাঃ॥২০॥ ততঃ প্রিয়ান্প্রাপ্য মনোঽভিরামান্ সুপ্রীতিয়ুক্তাঃ সুমনোঽভিরামাঃ। গৃহেষু হৃষ্টাঃ পরমাভিরামা হরিপ্রবীরঃ স দদর্শ রামাঃ॥২১॥ চন্দ্রপ্রকাশাশ্চ হি বক্ত্রমালা বক্রাঃ সুপক্ষ্মাশ্চ সুনেত্রমালাঃ। বিভূষণানাং চ দদর্শ মালাঃ শতহ্রদানামিব চারুমালাঃ॥২২॥ ন ত্বেব সীতাং পরমাভিজাতাং পথি স্থিতে রাজকুলে প্রজাতাম্ । লতাং প্রফুল্লামিব সাধুজাতাং দদর্শ তন্বীং মনসাভিজাতাম্ ॥২৩॥ সনাতনে বর্ত্মনি সংনিবিষ্টাং রামেক্ষণীং তাং মদনাভিবিষ্টাম্ । ভর্তুর্মনঃ শ্রীমদনুপ্রবিষ্টাং স্ত্রীভ্যঃ পরাভ্যশ্চ সদা বিশিষ্টাম্ ॥২৪॥ উষ্ণার্দিতাং সানুসৃতাস্রকণ্ঠীং পুরা বরার্হোত্তমনিষ্ককণ্ঠীম্ । সুজাতপক্ষ্মামভিরক্তকণ্ঠীং বনে প্রনৃত্তামিব নীলকণ্ঠীম্ ॥২৫॥ অব্যক্তরেখামিব চন্দ্রলেখাং পাংসুপ্রদিগ্ধামিব হেমরেখাম্ । ক্ষতপ্ররূঢামিব বর্ণরেখাং বায়ুপ্রভুগ্নামিব মেঘরেখাম্ ॥২৬॥ সীতামপশ্যন্মনুজেশ্বরস্য রামস্য পত্নীং বদতাং বরস্য । বভূব দুঃখোপহতশ্চিরস্য প্লবঙ্গমো মন্দ ইবাচিরস্য ॥২৭॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে পঞ্চমঃ সর্গঃ