অথ ষষ্ঠঃ সর্গঃ
স নিকামং বিমানেষু বিচরন্কামরূপধৃক্ ।
বিচচার কপির্লঙ্কাং লাঘবেন সমন্বিতঃ॥১॥
আসসাদ চ লক্ষ্মীবান্রাক্ষসেন্দ্রনিবেশনম্ ।
প্রাকারেণার্কবর্ণেন ভাস্বরেণাভিসংবৃতম্ ॥২॥
রক্ষিতং রাক্ষসৈর্ভীমৈঃ সিংহৈরিব মহদ্বনম্ ।
সমীক্ষমাণো ভবনং চকাশে কপিকুঞ্জরঃ॥৩॥
রূপ্যকোপহিতৈশ্চিত্রৈস্তোরণৈর্হেমভূষণৈঃ।
বিচিত্রাভিশ্চ কক্ষ্যাভির্দ্বারৈশ্চ রুচিরৈর্বৃতম্ ॥৪॥
গজাস্থিতৈর্মহামাত্রৈঃ শূরৈশ্চ বিগতশ্রমৈঃ।
উপস্থিতমসংহার্যৈর্হয়ৈঃ স্যন্দনয়ায়িভিঃ॥৫॥
সিংহব্যাঘ্রতনুত্রাণৈর্দান্তকাঞ্চনরাজতীঃ।
ঘোষবদ্ভির্বিচিত্রৈশ্চ সদা বিচরিতং রথৈঃ॥৬॥
বহুরত্নসমাকীর্ণং পরার্ধ্যাসনভূষিতম্ ।
মহারথসমাবাপং মহারথমহাসনম্ ॥৭॥
দৃশ্যৈশ্চ পরমোদারৈস্তৈস্তৈশ্চ মৃগপক্ষিভিঃ।
বিবিধৈর্বহুসাহস্রৈঃ পরিপূর্ণং সমন্ততঃ॥৮॥
বিনীতৈরন্তপালৈশ্চ রক্ষোভিশ্চ সুরক্ষিতম্ ।
মুখ্যাভিশ্চ বরস্ত্রীভিঃ পরিপূর্ণং সমন্ততঃ॥৯॥
মুদিতপ্রমদা রত্নং রাক্ষসেন্দ্রনিবেশনম্ ।
বরাভরণসংহ্রাদৈ সমুদ্রস্বননিঃস্বনম্ ॥১০॥
তদ্রাজগুণসম্পন্নং মুখ্যৈশ্চ বরচন্দনৈঃ।
মহাজনসমাকীর্ণং সিংহৈরিব মহদ্বনম্ ॥১১॥
ভেরীমৃদঙ্গাভিরুতং শঙ্খঘোষবিনাদিতম্ ।
নিত্যার্চিতং পর্বসুতং পূজিতং রাক্ষসৈঃ সদা ॥১২॥
সমুদ্রমিব গম্ভীরং সমুদ্রসমনিঃস্বনম্ ।
মহাত্মনো মহদ্বেশ্ম মহারত্নপরিচ্ছদম্ ॥১৩॥
মহারত্নসমাকীর্ণং দদর্শ স মহাকপিঃ।
বিরাজমানং বপুষা গজাশ্বরথসঙ্কুলম্ ॥১৪॥
লঙ্কাভরণমিত্যেব সোঽমন্যত মহাকপিঃ।
চচার হনুমাংস্তত্র রাবণস্য সমীপতঃ॥১৫॥
গৃহাদ্গৃহং রাক্ষসানামুদ্যানানি চ সর্বশঃ।
বীক্ষমাণোঽপ্যসন্ত্রস্তঃ প্রাসাদাংশ্চ চচার সঃ॥১৬॥
অবপ্লুত্য মহাবেগঃ প্রহস্তস্য নিবেশনম্ ।
ততোঽন্যৎপুপ্লুবে বেশ্ম মহাপার্শ্বস্য বীর্যবান্ ॥১৭॥
অথ মেঘপ্রতীকাশং কুম্ভকর্ণনিবেশনম্ ।
বিভীষণস্য চ তথা পুপ্লুবে স মহাকপিঃ॥১৮॥
মহোদরস্য চ তথা বিরূপাক্ষস্য চৈব হি ।
বিদ্যুজ্জিহ্বস্য ভবনং বিদ্যুন্মালেস্তথৈব চ ॥১৯॥
বজ্রদংষ্ট্রস্য চ তথা পুপ্লুবে স মহাকপিঃ।
শুকস্য চ মহাবেগঃ সারণস্য চ ধীমতঃ॥২০॥
তথা চেন্দ্রজিতো বেশ্ম জগাম হরিয়ূথপঃ।
জম্বুমালেঃ সুমালেশ্চ জগাম হরিসতমঃ॥২১॥
রশ্মিকেতোশ্চ ভবনং সূর্যশত্রোস্তথৈব চ ।
বজ্রকায়স্য চ তথা পুপ্লুবে স মহাকপিঃ॥২২॥
ধূম্রাক্ষস্যাথ সম্পাতের্ভবনং মারুতাত্মজঃ।
বিদ্যুদ্রূপস্য ভীমস্য ঘনস্য বিঘনস্য চ ॥২৩॥
শুকনাভস্য চক্রস্য শঠস্য কপটস্য চ ।
হ্রস্বকর্ণস্য দংষ্ট্রস্য লোমশস্য চ রক্ষসঃ॥২৪॥
যুদ্ধোন্মত্তস্য মত্তস্য ধ্বজগ্রীবস্য সাদিনঃ।
বিদ্যুজ্জিহ্বদ্বিজিহ্বানাং তথা হস্তিমুখস্য চ ॥২৫॥
করালস্য পিশাচস্য শোণিতাক্ষস্য চৈব হি ।
প্লবমানঃ ক্রমেণৈব হনূমান্মারুতাত্মজঃ॥২৬॥
তেষু তেষু মহার্হেষু ভবনেষু মহায়শাঃ।
তেষামৃদ্ধিমতামৃদ্ধিং দদর্শ স মহাকপিঃ॥২৭॥
সর্বেষাং সমতিক্রম্য ভবনানি সমন্ততঃ।
আসসাদাথ লক্ষ্মীবান্রাক্ষসেন্দ্রনিবেশনম্ ॥২৮॥
রাবণস্যোপশায়িন্যো দদর্শ হরিসত্তমঃ।
বিচরন্হরিশার্দূলো রাক্ষসীর্বিকৃতেক্ষণাঃ॥২৯॥
শূলমুদ্গরহস্তাংশ্চ শক্তিতোমরধারিণঃ।
দদর্শ বিবিধান্গুল্মাংস্তস্য রক্ষঃপতের্গৃহে ॥৩০॥
রাক্ষসাংশ্চ মহাকায়ান্নানাপ্রহরণোদ্যতান্ ।
রক্তাঞ্শ্বেতান্সিতাংশ্চাপি হরীংশ্চাপি মহাজবান্ ॥৩১॥
কুলীনান্রূপসম্পন্নান্গজান্পরগজারুজান্ ।
শিক্ষিতান্ গজশিক্ষায়ামৈরাবতসমান্যুধি ॥৩২॥
নিহন্তৄন্পরসৈন্যানাং গৃহে তস্মিন্দদর্শ সঃ।
ক্ষরতশ্চ যথা মেঘান্স্রবতশ্চ যথা গিরীন্ ॥৩৩॥
মেঘস্তনিতনির্ঘোষান্দুর্ধর্ষান্সমরে পরৈঃ।
সহস্রং বাহিনীস্তত্র জাম্বূনদপরিষ্কৃতাঃ॥৩৪॥
হেমজালৈরবিচ্ছিন্নাস্তরুণাদিত্যসংনিভাঃ।
দদর্শ রাক্ষসেন্দ্রস্য রাবণস্য নিবেশনে ॥৩৫॥
শিবিকা বিবিধাকারাঃ স কপির্মারুতাত্মজঃ।
লতাগৃহাণি চিত্রাণি চিত্রশালাগৃহাণি চ ॥৩৬॥
ক্রীডাগৃহাণি চান্যানি দারুপর্বতকানি চ ।
কামস্য গৃহকং রম্যং দিবাগৃহকমেব চ ॥৩৭॥
দদর্শ রাক্ষসেন্দ্রস্য রাবণস্য নিবেশনে ।
স মন্দরসমপ্রখ্যং ময়ূরস্থানসঙ্কুলম্ ॥৩৮॥
ধ্বজয়ষ্টিভিরাকীর্ণং দদর্শ ভবনোত্তমম্ ।
অনন্তরত্ননিচয়ং নিধিজালং সমন্ততঃ।
ধীরনিষ্ঠিতকর্মাঙ্গং গৃহং ভূতপতেরিব ॥৩৯॥
অর্চির্ভিশ্চাপি রত্নানাং তেজসা রাবণস্য চ ।
বিররাজ চ তদ্বেশ্ম রশ্মিবানিব রশ্মিভিঃ॥৪০॥
জাম্বূনদময়ান্যেব শয়নান্যাসনানি চ ।
ভাজনানি চ শুভ্রাণি দদর্শ হরিয়ূথপঃ॥৪১॥
মধ্বাসবকৃতক্লেদং মণিভাজনসঙ্কুলম্ ।
মনোরমমসম্বাধং কুবেরভবনং যথা ॥৪২॥
নূপুরাণাং চ ঘোষেণ কাঞ্চীনাং নিঃস্বনেন চ ।
মৃদঙ্গতলনির্ঘোষৈর্ঘোষবদ্ভির্বিনাদিতম্ ॥৪৩॥
প্রাসাদসঙ্ঘাতয়ুতং স্ত্রীরত্নশতসঙ্কুলম্ ।
সুব্যূঢকক্ষ্যং হনুমান্প্রবিবেশ মহাগৃহম্ ॥৪৪॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ষষ্ঠঃ সর্গঃ