অথ সপ্তমঃ সর্গঃ স বেশ্মজালং বলবান্দদর্শ ব্যাসক্তবৈদূর্যসুবর্ণজালম্ । যথা মহৎপ্রাবৃষি মেঘজালং বিদ্যুৎপিনদ্ধং সবিহঙ্গজালম্ ॥১॥ নিবেশনানাং বিবিধাশ্চ শালাঃ প্রধানশঙ্খায়ুধচাপশালাঃ। মনোহরাশ্চাপি পুনর্বিশালা দদর্শ বেশ্মাদ্রিষু চন্দ্রশালাঃ॥২॥ গৃহাণি নানাবসুরাজিতানি দেবাসুরৈশ্চাপি সুপূজিতানি । সর্বৈশ্চ দোষৈঃ পরিবর্জিতানি কপির্দদর্শ স্ববলার্জিতানি ॥৩॥ তানি প্রয়ত্নাভিসমাহিতানি ময়েন সাক্ষাদিব নির্মিতানি । মহীতলে সর্বগুণোত্তরাণি দদর্শ লঙ্কাধিপতের্গৃহাণি ॥৪॥ ততো দদর্শোচ্ছ্রিতমেঘরূপং মনোহরং কাঞ্চনচারুরূপম্ । রক্ষোঽধিপস্যাত্মবলানুরূপং গৃহোত্তমং হ্যপ্রতিরূপরূপম্ ॥৫॥ মহীতলে স্বর্গমিব প্রকীর্ণং শ্রিয়া জ্বলন্তং বহুরত্নকীর্ণম্ । নানাতরূণাং কুসুমাবকীর্ণং গিরেরিবাগ্রং রজসাবকীর্ণম্ ॥৬॥ নারীপ্রবেকৈরিব দীপ্যমানং তডিদ্ভিরম্ভোধরমর্চ্যমানম্ । হংসপ্রবেকৈরিব বাহ্যমানং শ্রিয়া যুতং খে সুকৃতং বিমানম্ ॥৭॥ যথা নগাগ্রং বহুধাতুচিত্রং যথা নভশ্চ গ্রহচন্দ্রচিত্রম্ । দদর্শ যুক্তীকৃতচারুমেঘ- চিত্রং বিমানং বহুরত্নচিত্রম্ ॥৮॥ মহী কৃতা পর্বতরাজিপূর্ণা শৈলাঃ কৃতা বৃক্ষবিতানপূর্ণাঃ। বৃক্ষাঃ কৃতাঃ পুষ্পবিতানপূর্ণাঃ পুষ্পং কৃতং কেসরপত্রপূর্ণম্ ॥৯॥ কৃতানি বেশ্মানি চ পাণ্ডুরাণি তথা সুপুষ্পাণ্যপি পুষ্করাণি । পুনশ্চ পদ্মানি সকেসরাণি বনানি চিত্রাণি সরোবরাণি ॥১০॥ পুষ্পাহ্বয়ং নাম বিরাজমানং রত্নপ্রভাভিশ্চ বিঘূর্ণমানম্ । বেশ্মোত্তমানামপি চোচ্চমানং মহাকপিস্তত্র মহাবিমানম্ ॥১১॥ কৃতাশ্চ বৈদূর্যময়া বিহঙ্গা রূপ্যপ্রবালৈশ্চ তথা বিহঙ্গাঃ। চিত্রাশ্চ নানাবসুভির্ভুজঙ্গা জাত্যানুরূপাস্তুরগাঃ শুভাঙ্গাঃ॥১২॥ প্রবালজাম্বূনদপুষ্পপক্ষাঃ সলীলমাবর্জিতজিহ্মপক্ষাঃ। কামস্য সাক্ষাদিব ভান্তি পক্ষাঃ কৃতা বিহঙ্গাঃ সুমুখাঃ সুপক্ষাঃ॥১৩॥ নিয়ুজ্যমানাশ্চ গজাঃ সুহস্তাঃ সকেসরাশ্চোৎপলপত্রহস্তাঃ। বভূব দেবী চ কৃতাসুহস্তা লক্ষ্মীস্তথা পদ্মিনি পদ্মহস্তা ॥১৪॥ ইতীব তদ্গৃহমভিগম্য শোভনং সবিস্ময়ো নগমিব চারুকন্দরং । পুনশ্চ তৎপরমসুগন্ধি সুন্দরং হিমাত্যযে নগমিব চারুকন্দরং ॥১৫॥ ততঃ স তাং কপিরভিপত্য পূজিতাং চরন্পুরীং দশমুখবাহুপালিতাম্ । অদৃশ্য তাং জনকসুতাং সুপূজিতাং সুদুঃখিতাং পতিগুণবেগনির্জিতাম্ ॥১৬॥ ততস্তদা বহুবিধভাবিতাত্মনঃ কৃতাত্মনো জনকসুতাং সুবর্ত্মনঃ। অপশ্যতোঽভবদতিদুঃখিতং মনঃ সচক্ষুষঃ প্রবিচরতো মহাত্মনঃ॥১৭॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে সপ্তমঃ সর্গঃ