অথ অষ্টমঃ সর্গঃ স তস্য মধ্যে ভবনস্য সংস্থিতো মহদ্বিমানং মণিরত্নচিত্রিতম্ । প্রতপ্তজাম্বূনদজালকৃত্রিমং দদর্শ ধীমান্ পবনাত্মজঃ কপিঃ॥১॥ তদপ্রমেয়প্রতিকারকৃত্রিমং কৃতং স্বয়ং সাধ্বিতি বিশ্বকর্মণা । দিবং গতে বায়ুপথে প্রতিষ্ঠিতং ব্যরাজতাদিত্যপথস্য লক্ষ্ম তৎ ॥২॥ ন তত্র কিঞ্চিন্ন কৃতং প্রয়ত্নতো ন তত্র কিঞ্চিন্ন মহার্হরত্নবৎ । ন তে বিশেষা নিয়তাঃ সুরেষ্বপি ন তত্র কিঞ্চিন্ন মহাবিশেষবৎ ॥৩॥ তপঃ সমাধানপরাক্রমার্জিতং মনঃ সমাধানবিচারচারিণম্ । অনেকসংস্থানবিশেষনির্মিতং ততস্ততস্তুল্যবিশেষনির্মিতম্ ॥৪॥ মনঃ সমাধায় তু শীঘ্রগামিনং দুরাসদং মারুততুল্যগামিনম্ । মহাত্মনাং পুণ্যকৃতাং মহর্দ্ধিনাং যশস্বিনামগ্র্যমুদামিবালয়ম্ ॥৫॥ বিশেষমালম্ব্য বিশেষসংস্থিতং বিচিত্রকূটং বহুকূটমণ্ডিতম্ । মনোঽভিরামং শরদিন্দুনির্মলং বিচিত্রকূটং শিখরং গিরের্যথা ॥৬॥ বহন্তি যৎকুণ্ডলশোভিতাননা মহাশনা ব্যোমচরানিশাচরাঃ। বিবৃত্তবিধ্বস্তবিশাললোচনা মহাজবা ভূতগণাঃ সহস্রশঃ॥৭॥ বসন্তপুষ্পোৎকরচারুদর্শনং বসন্তমাসাদপি চারুদর্শনম্ । স পুষ্পকং তত্র বিমানমুত্তমং দদর্শ তদ্বানরবীরসত্তমঃ॥৮॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে অষ্টমঃ সর্গঃ