অথ নবমঃ সর্গঃ তস্যালয়বরিষ্ঠস্য মধ্যে বিমলমায়তম্ । দদর্শ ভবনশ্রেষ্ঠং হনূমান্মারুতাত্মজঃ॥১॥ অর্ধয়োজনবিস্তীর্ণমায়তং যোজনং মহৎ । ভবনং রাক্ষসেন্দ্রস্য বহুপ্রাসাদসঙ্কুলম্ ॥২॥ মার্গমাণস্তু বৈদেহীং সীতামায়তলোচনাম্ । সর্বতঃ পরিচক্রাম হনূমানরিসূদনঃ॥৩॥ উত্তমং রাক্ষসাবাসং হনুমানবলোকয়ন্ । আসসাদাথ লক্ষ্মীবান্ রাক্ষসেন্দ্রনিবেশনম্ ॥৪॥ চতুর্বিষাণৈর্দ্বিরদৈস্ত্রিবিষাণৈস্তথৈব চ । পরিক্ষিপ্তমসম্বাধং রক্ষ্যমাণমুদায়ুধৈঃ॥৫॥ রাক্ষসীভিশ্চ পত্নীভী রাবণস্য নিবেশনম্ । আহৃতাভিশ্চ বিক্রম্য রাজকন্যাভিরাবৃতম্ ॥৬॥ তন্নক্রমকরাকীর্ণং তিমিঙ্গিলঝষাকুলম্ । বায়ুবেগসমাধূতং পন্নগৈরিব সাগরম্ ॥৭॥ যা হি বৈশ্রবণে লক্ষ্মীর্যা চন্দ্রে হরিবাহনে । সা রাবণগৃহে রম্যা নিত্যমেবানপায়িনী ॥৮॥ যা চ রাজ্ঞঃ কুবেরস্য যমস্য বরুণস্য চ । তাদৃশী তদ্বিশিষ্টা বা ঋদ্ধী রক্ষোগৃহেষ্বিহ ॥৯॥ তস্য হর্ম্যস্য মধ্যস্থবেশ্ম চান্যৎসুনির্মিতম্ । বহুনির্যূহসংয়ুক্তং দদর্শ পবনাত্মজঃ॥১০॥ ব্রহ্মণোঽর্থে কৃতং দিব্যং দিবি যদ্বিশ্বকর্মণা । বিমানং পুষ্পকং নাম সর্বরত্নবিভূষিতম্ ॥১১॥ পরেণ তপসা লেভে যৎকুবেরঃ পিতামহাৎ । কুবেরমোজসা জিত্বা লেভে তদ্রাক্ষসেশ্বরঃ॥১২॥ ঈহামৃগসমায়ুক্তৈঃ কার্তস্বরহিরণ্ময়ৈঃ। সুকৃতৈরাচিতং স্তম্ভৈঃ প্রদীপ্তমিব চ শ্রিয়া ॥১৩॥ মেরুমন্দরসঙ্কাশৈরুল্লিখদ্ভিরিবাম্বরম্ । কূটাগারৈঃ শুভাগারৈঃ সর্বতঃ সমলঙ্কৃতম্ ॥১৪॥ জ্বলনার্কপ্রতীকাশৈঃ সুকৃতং বিশ্বকর্মণা । হেমসোপানয়ুক্তং চ চারুপ্রবরবেদিকম্ ॥১৫॥ জালবাতায়নৈর্যুক্তং কাঞ্চনৈঃ স্ফাটিকৈরপি । ইন্দ্রনীলমহানীলমণিপ্রবরবেদিকম্ ॥১৬॥ বিদ্রুমেণ বিচিত্রেণ মণিভিশ্চ মহাধনৈঃ। নিস্তুলাভিশ্চ মুক্তাভিস্তলেনাভিবিরাজিতম্ ॥১৭॥ চন্দনেন চ রক্তেন তপনীয়নিভেন চ । সুপুণ্যগন্ধিনা যুক্তমাদিত্যতরুণোপমম্ ॥১৮॥ কূটাগারৈর্বরাকারৈর্বিবিধৈঃ সমলঙ্কৃতম্ । বিমানং পুষ্পকং দিব্যমারুরোহ মহাকপিঃ। তত্রস্থঃ সর্বতো গন্ধং পানভক্ষ্যান্নসম্ভবম্ ॥১৯॥ দিব্যং সংমূর্ছিতং জিঘ্রন্রূপবন্তমিবানিলম্ । স গন্ধস্তং মহাসত্ত্বং বন্ধুর্বন্ধুমিবোত্তমম্ ॥২০॥ ইত এহীত্যুবাচেব তত্র যত্র স রাবণঃ। ততস্তাং প্রস্থিতঃ শালাং দদর্শ মহতীং শিবাম্ ॥২১॥ রাবণস্য মহাকান্তাং কান্তামিব বরস্ত্রিয়ম্ । মণিসোপানবিকৃতাং হেমজালবিরাজিতাম্ ॥২২॥ স্ফাটিকৈরাবৃততলাং দন্তান্তরিতরূপিকাম্ । মুক্তাবজ্রপ্রবালৈশ্চ রূপ্যচামীকরৈরপি ॥২৩॥ বিভূষিতাং মণিস্তম্ভৈঃ সুবহুস্তম্ভভূষিতাম্ । সমৈরৃজুভিরত্যুচ্চৈঃ সমন্তাৎসুবিভূষিতৈঃ॥২৪॥ স্তম্ভৈঃ পক্ষৈরিবাত্যুচ্চৈর্দিবং সম্প্রস্থিতামিব । মহত্যা কুথয়াঽঽস্তীর্ণাং পৃথিবীলক্ষণাঙ্কয়া ॥২৫॥ পৃথিবীমিব বিস্তীর্ণাং সরাষ্ট্রগৃহশালিনীম্ । নাদিতাং মত্তবিহগৈর্দিব্যগন্ধাধিবাসিতাম্ ॥২৬॥ পরার্ঘ্যাস্তরণোপেতাং রক্ষোঽধিপনিষেবিতাম্ । ধূম্রামগুরুধূপেন বিমলাং হংসপাণ্ডুরাম্ ॥২৭॥ পত্রপুষ্পোপহারেণ কল্মাষীমিব সুপ্রভাম্ । মনসো মোদজননীং বর্ণস্যাপি প্রসাধিনীম্ ॥২৮॥ তাং শোকনাশিনীং দিব্যাং শ্রিয়ঃ সঞ্জননীমিব । ইন্দ্রিয়াণীন্দ্রিয়ার্থৈস্তু পঞ্চ পঞ্চভিরুত্তমৈঃ॥২৯॥ তর্পয়ামাস মাতেব তদা রাবণপালিতা । স্বর্গোঽয়ং দেবলোকোঽয়মিন্দ্রস্যাপি পুরী ভবেৎ । সিদ্ধির্বেয়ং পরা হি স্যাদিত্যমন্যত মারুতিঃ॥৩০॥ প্রধ্যায়ত ইবাপশ্যৎপ্রদীপাংস্তত্র কাঞ্চনান্ । ধূর্তানিব মহাধূর্তৈর্দেবনেন পরাজিতান্ ॥৩১॥ দীপানাং চ প্রকাশেন তেজসা রাবণস্য চ । অর্চির্ভির্ভূষণানাং চ প্রদীপ্তেত্যভ্যমন্যত ॥৩২॥ ততোঽপশ্যৎকুথাসীনং নানাবর্ণাম্বরস্রজম্ । সহস্রং বরনারীণাং নানাবেষবিভূষিতম্ ॥৩৩॥ পরিবৃত্তেঽর্ধরাত্রে তু পাননিদ্রাবশঙ্গতম্ । ক্রীডিত্বোপরতং রাত্রৌ প্রসুপ্তং বলবত্তদা ॥৩৪॥ তৎপ্রসুপ্তং বিরুরুচে নিঃশব্দান্তরভূষিতম্ । নিঃশব্দহংসভ্রমরং যথা পদ্মবনং মহৎ ॥৩৫॥ তাসাং সংবৃতদান্তানি মীলিতাক্ষীণি মারুতিঃ। অপশ্যৎপদ্মগন্ধীনি বদনানি সুয়োষিতাম্ ॥৩৬॥ প্রবুদ্ধানীব পদ্মানি তাসাং ভূত্বা ক্ষপাক্ষয়ে । পুনঃসংবৃতপত্রাণি রাত্রাবিব বভুস্তদা ॥৩৭॥ ইমানি মুখপদ্মানি নিয়তং মত্তষট্পদাঃ। অম্বুজানীব ফুল্লানি প্রার্থয়ন্তি পুনঃ পুনঃ॥৩৮॥ ইতি বামন্যত শ্রীমানুপপত্ত্যা মহাকপিঃ। মেনে হি গুণতস্তানি সমানি সলিলোদ্ভবৈঃ॥৩৯॥ সা তস্য শুশুভে শালা তাভিঃ স্ত্রীভির্বিরাজিতা । শরদীব প্রসন্না দ্যৌস্তারাভিরভিশোভিতা ॥৪০॥ স চ তাভিঃ পরিবৃতঃ শুশুভে রাক্ষসাধিপঃ। যথা হ্যুডুপতিঃ শ্রীমাংস্তারাভিরিব সংবৃতঃ॥৪১॥ যাশ্চ্যবন্তেঽম্বরাত্তারাঃ পুণ্যশেষসমাবৃতাঃ। ইমাস্তাঃ সঙ্গতাঃ কৃৎস্না ইতি মেনে হরিস্তদা ॥৪২॥ তারাণামিব সুব্যক্তং মহতীনাং শুভার্চিষাম্ । প্রভাবর্ণপ্রসাদাশ্চ বিরেজুস্তত্র যোষিতাম্ ॥৪৩॥ ব্যাবৃত্তকচপীনস্রক্প্রকীর্ণবরভূষণাঃ। পানব্যায়ামকালেষু নিদ্রোপহতচেতসঃ॥৪৪॥ ব্যাবৃত্ততিলকাঃ কাশ্চিৎকাশ্চিদুদ্ভ্রান্তনূপুরাঃ। পার্শ্বে গলিতহারাশ্চ কাশ্চিৎপরময়োষিতঃ॥৪৫॥ মুক্তাহারবৃতাশ্চান্যাঃ কাশ্চিৎপ্রস্রস্তবাসসঃ। ব্যাবিদ্ধরশনাদামাঃ কিশোর্য ইব বাহিতাঃ॥৪৬॥ অকুণ্ডলধরাশ্চান্যা বিচ্ছিন্নমৃদিতস্রজঃ। গজেন্দ্রমৃদিতাঃ ফুল্লা লতা ইব মহাবনে ॥৪৭॥ চন্দ্রাংশুকিরণাভাশ্চ হারাঃ কাসাঙ্চিদুদ্গতাঃ। হংসা ইব বভুঃ সুপ্তাঃ স্তনমধ্যেষু যোষিতাম্ ॥৪৮॥ অপরাসাং চ বৈদূর্যাঃ কাদম্বা ইব পক্ষিণঃ। হেমসূত্রাণি চান্যাসাং চক্রবাকা ইবাভবন্ ॥৪৯॥ হংসকারণ্ডবোপেতাশ্চক্রবাকোপশোভিতাঃ। আপগা ইব তা রেজুর্জঘনৈঃ পুলিনৈরিব ॥৫০॥ কিঙ্কিণীজালসঙ্কাশাস্তা হেমবিপুলাম্বুজাঃ। ভাবগ্রাহা যশস্তীরাঃ সুপ্তা নদ্য ইবাবভুঃ॥৫১॥ মৃদুষ্বঙ্গেষু কাসাঞ্চিৎকুচাগ্রেষু চ সংস্থিতাঃ। বভূবুর্ভূষণানীব শুভা ভূষণরাজয়ঃ॥৫২॥ অংশুকান্তাশ্চ কাসাঞ্চিন্মুখমারুতকম্পিতাঃ। উপর্যুপরি বক্ত্রাণাং ব্যাধূয়ন্তে পুনঃ পুনঃ॥৫৩॥ তাঃ পতাকা ইবোদ্ধূতাঃ পত্নীনাং রুচিরপ্রভাঃ। নানাবর্ণসুবর্ণানাং বক্ত্রমূলেষু রেজিরে ॥৫৪॥ ববল্গুশ্চাত্র কাসাঞ্চিৎকুণ্ডলানি শুভার্চিষাম্ । মুখমারুতসঙ্কম্পৈর্মন্দং মন্দং চ যোষিতাম্ ॥৫৫॥ শর্করাসবগন্ধঃ স প্রকৃত্যা সুরভিঃ সুখঃ। তাসাং বদননিঃশ্বাসঃ সিষেবে রাবণং তদা ॥৫৬॥ রাবণাননশঙ্কাশ্চ কাশ্চিদ্রাবণয়োষিতঃ। মুখানি চ সপত্নীনামুপাজিঘ্রন্পুনঃ পুনঃ॥৫৭॥ অত্যর্থং সক্তমনসো রাবণে তা বরস্ত্রিয়ঃ। অস্বতন্ত্রাঃ সপত্নীনাং প্রিয়মেবাচরংস্তদা ॥৫৮॥ বাহূনুপনিধায়ান্যাঃ পারিহার্যবিভূষিতান্ । অংশুকানি চ রম্যাণি প্রমদাস্তত্র শিশ্যিরে ॥৫৯॥ অন্যা বক্ষসি চান্যস্যাস্তস্যাঃ কাচিৎপুনর্ভুজম্ । অপরা ত্বঙ্কমন্যস্যাস্তস্যাশ্চাপ্যপরা কুচৌ ॥৬০॥ ঊরুপার্শ্বকটীপৃষ্ঠমন্যোন্যস্য সমাশ্রিতাঃ। পরস্পরনিবিষ্টাঙ্গ্যো মদস্নেহবশানুগাঃ॥৬১॥ অন্যোন্যস্যাঙ্গসংস্পর্শাৎপ্রীয়মাণাঃ সুমধ্যমাঃ। একীকৃতভুজাঃ সর্বাঃ সুষুপুস্তত্র যোষিতঃ॥৬২॥ অন্যোন্যভুজসূত্রেণ স্ত্রীমালাগ্রথিতা হি সা । মালেব গ্রথিতা সূত্রে শুশুভে মত্তষট্পদা ॥৬৩॥ লতানাং মাধবে মাসি ফুল্লানাং বায়ুসেবনাৎ । অন্যোন্যমালাগ্রথিতং সংসক্তকুসুমোচ্চয়ম্ ॥৬৪॥ প্রতিবেষ্টিতসুস্কন্ধমন্যোন্যভ্রমরাকুলম্ । আসীদ্বনমিবোদ্ধূতং স্ত্রীবনং রাবণস্য তৎ ॥৬৫॥ উচিতেষ্বপি সুব্যক্তং ন তাসাং যোষিতাং তদা । বিবেকঃ শক্য আধাতুং ভূষণাঙ্গাম্বরস্রজাম্ ॥৬৩॥ রাবণে সুখসংবিষ্টে তাঃ স্ত্রিয়ো বিবিধপ্রভাঃ। জ্বলন্তঃ কাঞ্চনা দীপাঃ প্রেক্ষন্তো নিমিষা ইব ॥৬৭॥ রাজর্ষিবিপ্রদৈত্যানাং গন্ধর্বাণাং চ যোষিতঃ। রক্ষসাং চাভবন্কন্যাস্তস্য কামবশঙ্গতাঃ॥৬৮॥ যুদ্ধকামেন তাঃ সর্বা রাবণেন হৃতাঃ স্ত্রিয়ঃ। সমদা মদনেনৈব মোহিতাঃ কাশ্চিদাগতাঃ॥৬৯॥ ন তত্র কাশ্চিৎ প্রমদাঃ প্রসহ্য বীর্যোপপন্নেন গুণেন লব্ধাঃ। ন চান্যকামাপি ন চান্যপূর্বা বিনা বরার্হাং জনকাত্মজাং তু ॥৭০॥ ন চাকুলীনা ন চ হীনরূপা নাদক্ষিণা নানুপচার যুক্তা । ভার্যাভবত্তস্য ন হীনসত্ত্বা ন চাপি কান্তস্য ন কামনীয়া ॥৭১॥ বভূব বুদ্ধিস্তু হরীশ্বরস্য যদীদৃশী রাঘবধর্মপত্নী । ইমা মহারাক্ষসরাজভার্যাঃ সুজাতমস্যেতি হি সাধুবুদ্ধেঃ॥৭২॥ পুনশ্চ সোঽচিন্তয়দা্ত্তরূপো ধ্রুবং বিশিষ্টা গুণতো হি সীতা । অথায়মস্যাং কৃতবান্ মহাত্মা লঙ্কেশ্বরঃ কষ্টমনার্যকর্ম ॥৭৩॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে নবমঃ সর্গঃ