অথ দশমঃ সর্গঃ তত্র দিব্যোপমং মুখ্যং স্ফাটিকং রত্নভূষিতম্ । অবেক্ষমাণো হনুমান্ দদর্শ শয়নাসনম্ ॥১॥ দান্তকাঞ্চনচিত্রাঙ্গৈর্বৈদূর্যৈশ্চ বরাসনৈঃ। মহার্হাস্তরণোপেতৈরুপপন্নং মহাধনৈঃ॥২॥ তস্য চৈকতমে দেশে দিব্যমাল্যোপশোভিতম্ । দদর্শ পাণ্ডুরং ছত্রং তারাধিপতিসংনিভম্ ॥৩॥ জাতরূপপরিক্ষিপ্তং চিত্রভানোঃ সমপ্রভম্ । অশোকমালাবিততং দদর্শ পরমাসনম্ ॥৪॥ বালব্যজনহস্তাভির্বীজ্যমানং সমন্ততঃ। গন্ধৈশ্চ বিবিধৈর্জুষ্টং বরধূপেন ধূপিতম্ ॥৫॥ পরমাস্তরণাস্তীর্ণমাবিকাজিনসংবৃতম্ । দামভির্বরমাল্যানাং সমন্তাদুপশোভিতম্ ॥৬॥ তস্মিঞ্জীমূতসঙ্কাশং প্রদীপ্তোজ্জ্বলকুণ্ডলম্ । লোহিতাক্ষং মহাবাহুং মহারজতবাসসং ॥৭॥ লোহিতেনানুলিপ্তাঙ্গং চন্দনেন সুগন্ধিনা । সন্ধ্যারক্তমিবাকাশে তোয়দং সতডিদ্গুণম্ ॥৮॥ বৃতমাভরণৈর্দিব্যৈঃ সুরূপং কামরূপিণম্ । সবৃক্ষবনগুল্মাঢ্যং প্রসুপ্তমিব মন্দরম্ ॥৯॥ ক্রীডিত্বোপরতং রাত্রৌ বরাভরণভূষিতম্ । প্রিয়ং রাক্ষসকন্যানাং রাক্ষসানাং সুখাবহম্ ॥১০॥ পীত্বাপ্যুপরতং চাপি দদর্শ স মহাকপিঃ। ভাস্বরে শয়নে বীরং প্রসুপ্তং রাক্ষসাধিপম্ ॥১১॥ নিঃশ্বসন্তং যথা নাগং রাবণং বানরোত্তমঃ। আসাদ্য পরমোদ্বিগ্নঃ সোপাসর্পৎসুভীতবৎ ॥১২॥ অথারোহণমাসাদ্য বেদিকান্তরমাশ্রিতঃ। ক্ষীবং রাক্ষসশার্দূলং প্রেক্ষতে স্ম মহাকপিঃ॥১৩॥ শুশুভে রাক্ষসেন্দ্রস্য স্বপতঃ শয়নং শুভম্ । গন্ধহস্তিনি সংবিষ্টে যথা প্রস্রবণং মহৎ ॥১৪॥ কাঞ্চনাঙ্গদসংনদ্ধৌ দদর্শ স মহাত্মনঃ। বিক্ষিপ্তৌ রাক্ষসেন্দ্রস্য ভুজাবিন্দ্রধ্বজোপমৌ ॥১৫॥ ঐরাবতবিষাণাগ্রৈরাপীডিনকৃতব্রণৌ । বজ্রোল্লিখিতপীনাংসৌ বিষ্ণুচক্রপরিক্ষতৌ ॥১৬॥ পীনৌ সমসুজাতাংসৌ সঙ্গতৌ বলসংয়ুতৌ । সুলক্ষণ নখাঙ্গুষ্ঠৌ স্বঙ্গুলীয়কলক্ষিতৌ ॥১৭॥ সংহতৌ পরিঘাকারৌ বৃত্তৌ করিকরোপমৌ । বিক্ষিপ্তৌ শয়নে শুভ্রে পঞ্চশীর্ষাবিবোরগৌ ॥১৮॥ শশক্ষতজকল্পেন সুশীতেন সুগন্ধিনা । চন্দনেন পরার্ধ্যেন স্বনুলিপ্তৌ স্বলঙ্কৃতৌ ॥১৯॥ উত্তমস্ত্রীবিমৃদিতৌ গন্ধোত্তমনিষেবিতৌ । যক্ষপন্নগগন্ধর্বদেবদানবরাবিণৌ ॥২০॥ দদর্শ স কপিস্তস্য বাহূ শয়নসংস্থিতৌ । মন্দরস্যান্তরে সুপ্তৌ মহাহী রুষিতাবিব ॥২১॥ তাভ্যাং স পরিপূর্ণাভ্যামুভাভ্যাং রাক্ষসেশ্বরঃ। শুশুভেঽচলসঙ্কাশঃ শৃঙ্গাভ্যামিব মন্দরঃ॥২২॥ চূতপুংনাগসুরভির্বকুলোত্তমসংয়ুতঃ। মৃষ্টান্নরসসংয়ুক্তঃ পানগন্ধপুরঃসরঃ॥২৩॥ তস্য রাক্ষসরাজস্য নিশ্চক্রাম মহামুখাৎ । শয়ানস্য বিনিঃশ্বাসঃ পূরয়ন্নিব তদ্গৃহম্ ॥২৪॥ মুক্তামণিবিচিত্রেণ কাঞ্চনেন বিরাজিতা । মুকুটেনাপবৃত্তেন কুণ্ডলোজ্জ্বলিতাননম্ ॥২৫॥ রক্তচন্দনদিগ্ধেন তথা হারেণ শোভিনা । পীনায়তবিশালেন বক্ষসাভিবিরাজিতা ॥২৬॥ পাণ্ডুরেণাপবিদ্ধেন ক্ষৌমেণ ক্ষতজেক্ষণম্ । মহার্হেণ সুসংবীতং পীতেনোত্তরবাসসা ॥২৭॥ মাষরাশিপ্রতীকাশং নিঃশ্বসন্তং ভুজঙ্গবৎ । গাঙ্গে মহতি তোয়ান্তে প্রসুপ্তমিব কুঞ্জরম্ ॥২৮॥ চতুর্ভিঃ কাঞ্চনৈর্দীপৈর্দীপ্যমানং চতুর্দিশম্ । প্রকাশীকৃতসর্বাঙ্গং মেঘং বিদ্যুদ্গণৈরিব ॥২৯॥ পাদমূলগতাশ্চাপি দদর্শ সুমহাত্মনঃ। পত্নীঃ স প্রিয়ভার্যস্য তস্য রক্ষঃপতের্গৃহে ॥৩০॥ শশিপ্রকাশবদনা বরকুণ্ডলভূষণাঃ। অম্লানমাল্যাভরণা দদর্শ হরিয়ূথপঃ॥৩১॥ নৃত্যবাদিত্রকুশলা রাক্ষসেন্দ্রভুজাঙ্কগাঃ। বরাভরণধারিণ্যো নিষণ্ণা দদৃশে কপিঃ॥৩২॥ বজ্রবৈদূর্যগর্ভাণি শ্রবণান্তেষু যোষিতাম্ । দদর্শ তাপনীয়ানি কুণ্ডলান্যঙ্গদানি চ ॥৩৩॥ তাসাং চন্দ্রোপমৈর্বক্ত্রৈঃ শুভৈর্ললিতকুণ্ডলৈঃ। বিররাজ বিমানং তন্নভস্তারাগণৈরিব ॥৩৪॥ মদব্যায়ামখিন্নাস্তা রাক্ষসেন্দ্রস্য যোষিতঃ। তেষু তেষ্ববকাশেষু প্রসুপ্তাস্তনুমধ্যমাঃ॥৩৫॥ অঙ্গহারৈস্তথৈবান্যা কোমলৈর্নৃত্যশালিনী । বিন্যস্তশুভসর্বাঙ্গী প্রসুপ্তা বরবরর্ণিনী ॥৩৬॥ কাচিদ্বীণাং পরিষ্বজ্য প্রসুপ্তা সম্প্রকাশতে । মহানদীপ্রকীর্ণেব নলিনী পোতমাশ্রিতা ॥৩৭॥ অন্যা কক্ষগতেনৈব মড্ডুকেনাসিতেক্ষণা । প্রসুপ্তা ভামিনী ভাতি বালপুত্রেব বৎসলা ॥৩৮॥ পটহং চারুসর্বাঙ্গী ন্যস্য শেতে শুভস্তনী । চিরস্য রমণং লব্ধ্বা পরিষ্বজ্যেব কামিনী ॥৩৯॥ কাচিদ্ বীণাং পরিষ্বজ্য সুপ্তা কমললোচনা । বরং প্রিয়তমং গৃহ্য সকামেব হি কামিনি ॥৪০॥ বিপঞ্চীং পরিগৃহ্যান্যা নিয়তা নৃত্যশালিনী । নিদ্রাবশমনুপ্রাপ্তা সহকান্তেব ভামিনী ॥৪১॥ অন্যা কনকসঙ্কাশৈর্মৃদুপীনৈর্মনোরমৈঃ। মৃদঙ্গং পরিবিদ্ধ্যাঙ্গৈঃ প্রসুপ্তা মত্তলোচনা ॥৪২॥ ভুজপাশান্তরস্থেন কক্ষগেন কৃশোদরী । পণবেন সহানিন্দ্যা সুপ্তা মদকৃতশ্রমা ॥৪৩॥ ডিণ্ডিমং পরিগৃহ্যান্যা তথৈবাসক্তডিণ্ডিমা । প্রসুপ্তা তরুণং বৎসমুপগুহ্যেব ভামিনী ॥৪৪॥ কাচিদাডম্বরং নারী ভুজসম্ভোগপীডিতম্ । কৃত্বা কমলপত্রাক্ষী প্রসুপ্তা মদমোহিতা ॥৪৫॥ কলশীমপবিদ্ধ্যান্যা প্রসুপ্তা ভাতি ভামিনী । বসন্তে পুষ্পশবলা মালেব পরিমার্জিতা ॥৪৬॥ পাণিভ্যাং চ কুচৌ কাচিৎসুবর্ণকলশোপমৌ । উপগূহ্যাবলা সুপ্তা নিদ্রাবলপরাজিতা ॥৪৭॥ অন্যা কমলপত্রাক্ষী পূর্ণেন্দুসদৃশাননা । অন্যামালিঙ্গ্য সুশ্রোণীং প্রসুপ্তা মদবিহ্বলা ॥৪৮॥ আতোদ্যানি বিচিত্রাণি পরিষ্বজ্য বরস্ত্রিয়ঃ। নিপীড্য চ কুচৈঃ সুপ্তাঃ কামিন্যঃ কামুকানিব ॥৪৯॥ তাসামেকান্তবিন্যস্তে শয়ানাং শয়নে শুভে । দদর্শ রূপসম্পন্নামথ তাং স কপিঃ স্ত্রিয়ম্ ॥৫০॥ মুক্তামণিসমায়ুক্তৈর্ভূষণৈঃ সুবিভূষিতাম্ । বিভূষয়ন্তীমিব চ স্বশ্রিয়া ভবনোত্তমম্ ॥৫১॥ গৌরীং কনকবর্ণাভামিষ্টামন্তঃপুরেশ্বরীম্ । কপির্মন্দোদরীং তত্র শয়ানাং চারুরূপিণীম্ ॥৫২॥ স তাং দৃষ্ট্বা মহাবাহুর্ভূষিতাং মারুতাত্মজঃ। তর্কয়ামাস সীতেতি রূপয়ৌবনসম্পদা । হর্ষেণ মহতা যুক্তো ননন্দ হরিয়ূথপঃ॥৫৩॥ আস্ফোটয়ামাস চুচুম্ব পুচ্ছং ননন্দ চিক্রীড জগৌ জগাম । স্তম্ভানরোহন্নিপপাত ভূমৌ নিদর্শয়ন্ স্বাং প্রকৃতিং কপীনাম্ ॥৫৪॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে দশমঃ সর্গঃ