অথ একাদশঃ সর্গঃ
অবধূয় চ তাং বুদ্ধিং বভূবাবস্থিতস্তদা ।
জগাম চাপরাং চিন্তাং সীতাং প্রতি মহাকপিঃ॥১॥
ন রামেণ বিয়ুক্তা সা স্বপ্তুমর্হতি ভামিনী ।
ন ভোক্তুং নাপ্যলঙ্কর্তুং ন পানমুপসেবিতুম্ ॥২॥
নান্যং নরমুপস্থাতুং সুরাণামপি চেশ্বরম্ ।
ন হি রামসমঃ কশ্চিদ্বিদ্যতে ত্রিদশেষ্বপি ॥৩॥
অন্যেয়মিতি নিশ্চিত্য ভূয়স্তত্র চচার সঃ।
পানভূমৌ হরিশ্রেষ্ঠঃ সীতাসন্দর্শর্নোৎসুকঃ॥৪॥
ক্রীডিতেনাপরাঃ ক্লান্তা গীতেন চ তথাপরাঃ।
নৃত্যেন চাপরাঃ ক্লান্তাঃ পানবিপ্রহতাস্তথা ॥৫॥
মুরজেষু মৃদঙ্গেষু চেলিকাসু চ সংস্থিতাঃ।
তথাঽঽস্তরণমুখ্যেষু সংবিষ্টাশ্চাপরাঃ স্ত্রিয়ঃ॥৬॥
অঙ্গনানাং সহস্রেণ ভূষিতেন বিভূষণৈঃ।
রূপসংলাপশীলেন যুক্তগীতার্থভাষিণা ॥৭॥
দেশকালাভিয়ুক্তেন যুক্তবাক্যাভিধায়িনা ।
রতাধিকেন সংয়ুক্তাং দদর্শ হরিয়ূথপঃ॥৮॥
অন্যত্রাপি বরস্ত্রীণাং রুপসংলাপশায়িনাম্ ।
সহস্রং যুবতীনাং তু প্রসুপ্তং স দদর্শ হ ॥৯॥
দেশকালাভিয়ুক্তং তু যুক্তবাক্যাভিধায়ি তৎ ।
রতাবিরতসংসুপ্তং দদর্শ হরিয়ুথপঃ॥১০॥
তাসাং মধ্যে মহাবাহুঃ শুশুভে রাক্ষসেশ্বরঃ।
গোষ্ঠে মহতি মুখ্যানাং গবাং মধ্যে যথা বৃষঃ॥১১॥
স রাক্ষসেন্দ্রঃ শুশুভে তাভিঃ পরিবৃতঃ স্বয়ম্ ।
করেণুভির্যথারণ্যে পরিকীর্ণো মহাদ্বিপঃ॥১২॥
সর্বকামৈরুপেতাং চ পানভূমিং মহাত্মনঃ।
দদর্শ কপিশার্দূলস্তস্য রক্ষঃপতের্গৃহে ॥১৩॥
মৃগাণাং মহিষাণাং চ বরাহাণাং চ ভাগশঃ।
তত্র ন্যস্তানি মাংসানি পানভূমৌ দদর্শ সঃ॥১৪॥
রৌক্মেষু চ বিশলেষু ভাজনেষ্বপ্যভক্ষিতান্ ।
দদর্শ কপিশার্দূলো ময়ূরান্কুক্কুটাংস্তথা ॥১৫॥
বরাহবাধ্রীণসকান্দধিসৌবর্চলায়ুতান্ ।
শল্যান্মৃগময়ূরাংশ্চ হনূমানন্ববৈক্ষত ॥১৬॥
কৃকলান্ বিবিধাংশ্ছাগাঞ্ছশকানর্ধভক্ষিতান্ ।
মহিষানেকশল্যাংশ্চ মেষাংশ্চ কৃতনিষ্ঠিতান্ ॥১৭॥
লেহ্যানুচ্চাবচান্ পেয়ান্ ভোজ্যান্যুঞ্চাবচানি চ ।
তথাম্ললবণোত্তংসৈর্বিবিধৈ রাগখাণ্ডবৈঃ॥১৮॥
মহানূপুরকেয়ূরৈরপবিদ্ধৈর্মহাধনৈঃ।
পানভাজনবিক্ষিপ্তৈঃ ফলৈশ্চ বিবিধৈরপি ॥১৯॥
কৃতপুষ্পোপহারা ভূরধিকাং পুষ্যতি শ্রিয়ম্ ।
তত্র তত্র চ বিন্যস্তৈঃ সুশ্লিষ্টশয়নাসনৈঃ॥২০॥
পানভূমির্বিনা বহ্নিং প্রদীপ্তেবোপলক্ষ্যতে ।
বহুপ্রকারৈর্বিবিধৈর্বরসংস্কারসংস্কৃতৈঃ॥২১॥
মাংসৈঃ কুশলসংয়ুক্তৈঃ পানভূমিগতৈঃ পৃথক্ ।
দিব্যাঃ প্রসন্নাবিবিধাঃ সুরাঃ কৃতসুরা অপি ॥২২॥
শর্করাসবমাধ্বীকাঃ পুষ্পাসবফলাসবাঃ।
বাসচূর্ণৈশ্চ বিবিধৈর্মৃষ্টাস্তৈস্তৈঃ পৃথক্পৃথক্ ॥২৩॥
সন্ততা শুশুভে ভূমির্মাল্যৈশ্চ বহুসংস্থিতৈঃ।
হিরণ্ময়ৈশ্চ কলশৈর্ভাজনৈঃ স্ফাটিকৈরপি ॥২৪॥
জাম্বূনদময়ৈশ্চান্যৈঃ করকৈরভিসংবৃতা ।
রাজতেষু চ কুম্ভেষু জাম্বূনদময়েষু চ ॥২৫॥
পানশ্রেষ্ঠাং তথা ভূমিং কপিস্তত্র দদর্শ সঃ।
সোঽপশ্যচ্ছাতকুম্ভানি সীধোর্মণিময়ানি চ ॥২৬॥
তানি তানি চ পূর্ণানি ভাজনানি মহাকপিঃ।
ক্বচিদর্ধাবশেষাণি ক্বচিৎপীতান্যশেষতঃ॥২৭॥
ক্বচিন্নৈব প্রপীতানি পানানি স দদর্শ হ ।
ক্বচিদ্ভক্ষ্যাংশ্চ বিবিধান্ক্বচিৎপানানি ভাগশঃ॥২৮॥
ক্বচিদর্ধাবশেষাণি পশ্যন্বৈ বিচচার হ ।
শয়নান্যত্র নারীণাং শূন্যানি বহুধা পুনঃ।
পরস্পরং সমাশ্লিষ্য কাশ্চিৎসুপ্তাবরাঙ্গনাঃ॥২৯॥
কাচিচ্চ বস্ত্রমন্যস্যা অপহৃত্যোপগুহ্য চ ।
উপগম্যাবলা সুপ্তা নিদ্রাবলপরাজিতা ॥৩০॥
তাসামুচ্ছ্বাসবাতেন বস্ত্রং মাল্যং চ গাত্রজম্ ।
নাত্যর্থং স্পন্দতে চিত্রং প্রাপ্য মন্দমিবানিলম্ ॥৩১॥
চন্দনস্য চ শীতস্য শীধোর্মধুরসস্য চ ।
বিবিধস্য চ মাল্যস্য পুষ্পস্য বিবিধস্য চ ॥৩২॥
বহুধা মারুতস্তস্য গন্ধং বিবিধমুদ্বহন্ ।
স্নানানাং চন্দনানাং চ ধূপানাং চৈব মূর্ছিতঃ॥৩৩॥
প্রববৌ সুরভির্গন্ধো বিমানে পুষ্পকে তদা ।
শ্যামাবদাতাস্তত্রান্যাঃ কাশ্চিৎকৃষ্ণা বরাঙ্গনাঃ॥৩৪॥
কাশ্চিৎকাঞ্চনবর্ণাঙ্গ্যঃ প্রমদা রাক্ষসালয়ে ।
তাসাং নিদ্রাবশত্বাচ্চ মদনেন বিমূর্ছিতম্ ॥৩৫॥
পদ্মিনীনাং প্রসুপ্তানাং রূপমাসীদ্যথৈব হি ।
এবং সর্বমশেষেণ রাবণান্তঃপুরং কপিঃ।
দদর্শ স মহাতেজা ন দদর্শ চ জানকীম্ ॥৩৬॥
নিরীক্ষমাণশ্চ ততস্তাঃ স্ত্রিয়ঃ স মহাকপিঃ।
জগাম মহতীং শঙ্কাং ধর্মসাধ্বসশঙ্কিতঃ॥৩৭॥
পরদারাবরোধস্য প্রসুপ্তস্য নিরীক্ষণম্ ।
ইদং খলু মমাত্যর্থং ধর্মলোপং করিষ্যতি ॥৩৮॥
ন হি মে পরদারাণাং দৃষ্টির্বিষয়বর্তিনী ।
অয়ং চাত্র ময়া দৃষ্টঃ পরদারপরিগ্রহঃ॥৩৯॥
তস্য প্রাদুরভূচ্চিন্তাপুনরন্যা মনস্বিনঃ।
নিশ্চিতৈকান্তচিত্তস্য কার্যনিশ্চয়দর্শিনী ॥৪০॥
কামং দৃষ্টা ময়া সর্বা বিশ্বস্তা রাবণস্ত্রিয়ঃ।
ন তু মে মনসা কিঞ্চিদ্বৈকৃত্যমুপপদ্যতে ॥৪১॥
মনো হি হেতুঃ সর্বেষামিন্দ্রিয়াণাং প্রবর্তনে ।
শুভাশুভাস্ববস্থাসু তচ্চ মে সুব্যবস্থিতম্ ॥৪২॥
নান্যত্র হি ময়া শক্যা বৈদেহী পরিমার্গিতুম্ ।
স্ত্রিয়ো হি স্ত্রীষু দৃশ্যন্তে সদা সম্পরিমার্গণে ॥৪৩॥
যস্য সত্ত্বস্য যা যোনিস্তস্যাং তৎপরিমার্গতে ।
ন শক্যং প্রমদা নষ্টা মৃগীষু পরিমার্গিতুম্ ॥৪৪॥
তদিদং মার্গিতং তাবচ্ছুদ্ধেন মনসা ময়া ।
রাবণান্তঃপুরং সর্বং দৃশ্যতে ন চ জানকী ॥৪৫॥
দেবগন্ধর্বকন্যাশ্চ নাগকন্যাশ্চ বীর্যবান্ ।
অবেক্ষমাণো হনুমান্নৈবাপশ্যত জানকীম্ ॥৪৬॥
তামপশ্যন্কপিস্তত্র পশ্যংশ্চান্যা বরস্ত্রিয়ঃ।
অপক্রম্য তদা বীরঃ প্রস্থাতুমুপচক্রমে ॥৪৭॥
স ভূয়ঃ সর্বতঃ শ্রীমান্ মারুতির্যত্নমাশ্রিতঃ।
আপানভূমিমুৎসৃজ্য তাং বিচেতুং প্রচক্রমে ॥৪৮॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একাদশঃ সর্গঃ