অথ দ্বাদশঃ সর্গঃ স তস্য মধ্যে ভবনস্য সংস্থিতো লতাগৃহাংশ্চিত্রগৃহান্নিশাগৃহান্ । জগাম সীতাং প্রতিদর্শনোৎসুকো ন চৈব তাং পশ্যতি চারুদর্শনাম্ ॥১॥ স চিন্তয়ামাস ততো মহাকপিঃ প্রিয়ামপশ্যন্রঘুনন্দনস্য তাম্ । ধ্রুবং ন সীতা ধ্রিয়তে যথা ন মে বিচিন্বতো দর্শনমেতি মৈথিলী ॥২॥ সা রাক্ষসানাং প্রবরেণ জানকী স্বশীলসংরক্ষণতৎপরা সতী । অনেন নূনং প্রতি দুষ্টকর্মণা হতা ভবেদার্যপথে পরে স্থিতা ॥৩॥ বিরূপরূপা বিকৃতা বিবর্চসো মহাননা দীর্ঘবিরূপদর্শনাঃ। সমীক্ষ্য তা রাক্ষসরাজয়োষিতো ভয়াদ্বিনষ্টা জনকেশ্বরাত্মজা ॥৪॥ সীতামদৃষ্ট্বা হ্যনবাপ্য পৌরুষং বিহৃত্য কালং সহ বানরৈশ্চিরম্ । ন মেঽস্তি সুগ্রীবসমীপগা গতিঃ সুতীক্ষ্ণদণ্ডো বলবাংশ্চ বানরঃ॥৫॥ দৃষ্টমন্তঃপুরং সর্বং দৃষ্টা রাবণয়োষিতঃ। ন সীতা দৃশ্যতে সাধ্বী বৃথা জাতো মম শ্রমঃ॥৬॥ কিং নু মাং বানরাঃ সর্বে গতং বক্ষ্যন্তি সঙ্গতাঃ। গত্বা তত্র ত্বয়া বীর কিং কৃতং তদ্বদস্ব নঃ॥৭॥ অদৃষ্ট্বা কিং প্রবক্ষ্যামি তামহং জনকাত্মজাম্ । ধ্রুবং প্রায়মুপাসিষ্যে কালস্য ব্যতিবর্তনে ॥৮॥ কিং বা বক্ষ্যতি বৃদ্ধশ্চ জাম্ববানঙ্গদশ্চ সঃ। গতং পারং সমুদ্রস্য বানরাশ্চ সমাগতাঃ॥৯॥ অনির্বেদঃ শ্রিয়ো মূলমনির্বেদঃ পরং সুখম্ । অনির্বেদো হি সততং সর্বার্থেষু প্রবর্তকঃ॥১০॥ করোতি সফলং জন্তোঃ কর্ম যচ্চ করোতি সঃ। তস্মাদনির্বেদকরং যত্নং চেষ্টেঽহমুত্তমম্ ॥১১॥ ভূয়স্তত্র বিচেষ্যামি ন যত্র বিচয়ঃ কৃতঃ। অদৃষ্টাংশ্চ বিচেষ্যামি দেশান্রাবণপালিতান্ ॥১২॥ আপানশালা বিচিতাস্তথা পুষ্পগৃহাণি চ । চিত্রশালাশ্চ বিচিতা ভূয়ঃ ক্রীডাগৃহাণি চ ॥১৩॥ নিষ্কুটান্তররথ্যাশ্চ বিমানানি চ সর্বশঃ। ইতি সঞ্চিন্ত্য ভূয়োঽপি বিচেতুমুপচক্রমে ॥১৪॥ ভূমীগৃহাংশ্চৈত্যগৃহান্গৃহাতিগৃহকানপি । উৎপতন্নিপতংশ্চাপি তিষ্ঠন্গচ্ছন্পুনঃ ক্বচিৎ ॥১৫॥ অপবৃণ্বংশ্চ দ্বারাণি কপাটান্যবঘট্টয়ন্ । প্রবিশন্নিষ্পতংশ্চাপি প্রপতন্নুৎপতন্নিব ॥১৬॥ সর্বমপ্যবকাশং স বিচচার মহাকপিঃ। চতুরঙ্গুলমাত্রোঽপি নাবকাশঃ স বিদ্যতে । রাবণান্তঃপুরে তস্মিন্যং কপির্ন জগাম সঃ॥১৭॥ প্রাকরান্তরবীথ্যশ্চ বেদিকশ্চৈত্যসংশ্রয়াঃ। শ্বভ্রাশ্চ পুষ্করিণ্যশ্চ সর্বং তেনাবলোকিতম্ ॥১৮॥ রাক্ষস্যো বিবিধাকারা বিরূপা বিকৃতাস্তথা । দৃষ্টা হনুমতা তত্র ন তু সা জনকাত্মজা ॥১৯॥ রূপেণাপ্রতিমা লোকে পরা বিদ্যাধরস্ত্রিয়ঃ। দৃষ্টা হনুমতা তত্র ন তু রাঘবনন্দিনী ॥২০॥ নাগকন্যা বরারোহাঃ পূর্ণচন্দ্রনিভাননাঃ। দৃষ্টা হনুমতা তত্র ন তু সা জনকাত্মজা ॥২১॥ প্রমথ্য রাক্ষসেন্দ্রেণ নাগকন্যা বলাদ্ধৃতাঃ। দৃষ্টা হনুমতা তত্র ন সা জনকনন্দিনী ॥২২॥ সোঽপশ্যংস্তাং মহাবাহুঃ পশ্যংশ্চান্যা বরস্ত্রিয়ঃ। বিষসাদ মহাবাহুর্হনূমান্মারুতাত্মজঃ॥২৩॥ উদ্যোগং বানরেন্দ্রাণাং প্লবনং সাগরস্য চ । ব্যর্থং বীক্ষ্যানিলসুতশ্চিন্তাং পুনরুপাগতঃ॥২৪॥ অবতীর্য বিমানাচ্চ হনূমান্মারুতাত্মজঃ। চিন্তামুপজগামাথ শোকোপহতচেতনঃ॥২৫॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে দ্বাদশঃ সর্গঃ