অথ ত্রয়োদশঃ সর্গঃ বিমানাত্তু স সঙ্ক্রম্য প্রাকারং হরিয়ূথপঃ। হনূমান্বেগবানাসীদ্যথা বিদ্যুদ্ ঘনান্তরে ॥১॥ সম্পরিক্রম্য হনুমান্রাবণস্য নিবেশনান্ । অদৃষ্ট্বা জানকীং সীতামব্রবীদ্বচনং কপিঃ॥২॥ ভূয়িষ্ঠং লোলিতা লঙ্কা রামস্য চরতা প্রিয়ম্ । ন হি পশ্যামি বৈদেহীং সীতাং সর্বাঙ্গশোভনাম্ ॥৩॥ পল্বলানি তটাকানি সরাংসি সরিতস্তথা । নদ্যোঽনূপবনান্তাশ্চ দুর্গাশ্চ ধরণীধরাঃ॥৪॥ লোলিতা বসুধা সর্বা ন চ পশ্যামি জানকীম্ । ইহ সম্পাতিনা সীতা রাবণস্য নিবেশনে ॥৫॥ আখ্যাতা গৃধ্ররাজেন ন চ সা দৃশ্যতে ন কিম্ । কিং নু সীতাথ বৈদেহী মৈথিলী জনকাত্মজা । উপতিষ্ঠেত বিবশা রাবণেন হৃতা বলাৎ ॥৬॥ ক্ষিপ্রমুৎপততো মন্যে সীতামাদায় রক্ষসঃ। বিভ্যতো রামবাণানামন্তরা পতিতা ভবেৎ ॥৭॥ অথবা হ্রিয়মাণায়াঃ পথি সিদ্ধনিষেবিতে । মন্যে পতিতমার্যায়া হৃদয়ং প্রেক্ষ্য সাগরম্ ॥৮॥ রাবণস্যোরুবেগেন ভুজাভ্যাং পীডিতেন চ । তয়া মন্যে বিশালাক্ষ্যা ত্যক্তং জীবিতমার্যযা ॥৯॥ উপর্যুপরি সা নূনং সাগরং ক্রমতস্তদা । বিচেষ্টমানা পতিতা সমুদ্রে জনকাত্মজা ॥১০॥ আহো ক্ষুদ্রেণ চানেন রক্ষন্তী শীলমাত্মনঃ। অবন্ধুর্ভক্ষিতা সীতা রাবণেন তপস্বিনী ॥১১॥ অথ বা রাক্ষসেন্দ্রস্য পত্নীভিরসিতেক্ষণা । অদুষ্টা দুষ্টভাবাভির্ভক্ষিতা সা ভবিষ্যতি ॥১২॥ সম্পূর্ণচন্দ্রপ্রতিমং পদ্মপত্রনিভেক্ষণম্ । রামস্য ধ্যায়তী বক্ত্রং পঞ্চত্বং কৃপণা গতা ॥১৩॥ হা রাম লক্ষ্মণেত্যেবং হায়োধ্যে চেতি মৈথিলী । বিলপ্য বহু বৈদেহী ন্যস্তদেহা ভবিষ্যতি ॥১৪॥ অথবা নিহিতা মন্যে রাবণস্য নিবেশনে । ভৃশং লালপ্যতে বালা পঞ্জরস্থেব সারিকা ॥১৫॥ জনকস্য কুলে জাতা রামপত্নী সুমধ্যমা । কথমুৎপলপত্রাক্ষী রাবণস্য বশং ব্রজেৎ ॥১৬॥ বিনষ্টা বা প্রণষ্টা বা মৃতা বা জনকাত্মজা । রামস্য প্রিয়ভার্যস্য ন নিবেদয়িতুং ক্ষমম্ ॥১৭॥ নিবেদ্যমানে দোষঃ স্যাদ্দোষঃ স্যাদনিবেদনে । কথং নু খলু কর্তব্যং বিষমং প্রতিভাতি মে ॥১৮॥ অস্মিন্নেবঙ্গতে কার্যে প্রাপ্তকালং ক্ষমং চ কিম্ । ভবেদিতি মতিং ভূয়ো হনুমান্প্রবিচারয়ন্ ॥১৯॥ যদি সীতামদৃষ্ট্বাহং বানরেন্দ্রপুরীমিতঃ। গমিষ্যামি ততঃ কো মে পুরুষার্থো ভবিষ্যতি ॥২০॥ মমেদং লঙ্ঘনং ব্যর্থং সাগরস্য ভবিষ্যতি । প্রবেশশ্চৈব লঙ্কায়াং রাক্ষসানাং চ দর্শনম্ ॥২১॥ কিং বা বক্ষ্যতি সুগ্রীবো হরয়ো বাপি সঙ্গতাঃ। কিষ্কিন্ধামনুসম্প্রাপ্তং তৌ বা দশরথাত্মজৌ ॥২২॥ গত্বা তু যদি কাকুৎস্থং বক্ষ্যামি পরুষং বচঃ। ন দৃষ্টেতি ময়া সীতা ততস্ত্যক্ষ্যতি জীবিতম্ ॥২৩॥ পরুষং দারুণং তীক্ষ্ণং ক্রূরমিন্দ্রিয়তাপনম্ । সীতানিমিত্তং দুর্বাক্যং শ্রুত্বা স ন ভবিষ্যতি ॥২৪॥ তং তু কৃচ্ছ্রগতং দৃষ্ট্বা পঞ্চত্বগতমানসং । ভৃশানুরক্তমেধাবী ন ভবিষ্যতি লক্ষ্মণঃ॥২৫॥ বিনষ্টৌ ভ্রাতরৌ শ্রুত্বা ভরতোঽপি মরিষ্যতি । ভরতং চ মৃতং দৃষ্ট্বা শত্রুঘ্নো ন ভবিষ্যতি ॥২৬॥ পুত্রান্ মৃতান্ সমীক্ষ্যাথ ন ভবিষ্যন্তি মাতরঃ। কৌসল্যা চ সুমিত্রা চ কৈকেয়ী চ ন সংশয়ঃ॥২৭॥ কৃতজ্ঞঃ সত্যসন্ধশ্চ সুগ্রীবঃ প্লবগাধিপঃ। রামং তথাগতং দৃষ্ট্বা ততস্ত্যক্ষ্যতি জীবিতম্ ॥২৮॥ দুর্মনা ব্যথিতা দীনা নিরানন্দা তপস্বিনী । পীডিতা ভর্তৃশোকেন রুমা ত্যক্ষ্যতি জীবিতম্ ॥২৯॥ বালিজেন তু দুঃখেন পীডিতা শোককর্শিতা । পঞ্চত্বমাগতা রাজ্ঞী তারাপি ন ভবিষ্যতি ॥৩০॥ মাতাপিত্রোর্বিনাশেন সুগ্রীব ব্যসনেন চ । কুমারোঽপ্যঙ্গদঃ তস্মাদ্ বিজহিষ্যতি জীবিতম্ ॥৩১॥ ভর্তৃজেন তু দুঃখেন অভিভূতা বনৌকসঃ। শিরাংস্যভিহনিষ্যন্তি তলৈর্মুষ্টিভিরেব চ ॥৩২॥ সান্ত্বেনানুপ্রদানেন মানেন চ যশস্বিনা । লালিতাঃ কপিনাথেন প্রাণাংস্ত্যক্ষ্যন্তি বানরাঃ॥৩৩॥ ন বনেষু ন শৈলেষু ন নিরোধেষু বা পুনঃ। ক্রীডামনুভবিষ্যন্তি সমেত্য কপিকুঞ্জরাঃ॥৩৪॥ সপুত্রদারাঃ সামাত্যা ভর্তৃব্যসনপীডিতাঃ। শৈলাগ্রেভ্যঃ পতিষ্যন্তি সমেষু বিষমেষু চ ॥৩৫॥ বিষমুদ্বন্ধনং বাপি প্রবেশং জ্বলনস্য বা । উপবাসমথো শস্ত্রং প্রচরিষ্যন্তি বানরাঃ॥৩৬॥ ঘোরমারোদনং মন্যে গতে ময়ি ভবিষ্যতি । ইক্ষ্বাকুকুলনাশশ্চ নাশশ্চৈব বনৌকসাম্ ॥৩৭॥ সোঽহং নৈব গমিষ্যামি কিষ্কিন্ধাং নগরীমিতঃ। ন হি শক্ষ্যাম্যহং দ্রষ্টুং সুগ্রীবং মৈথিলীং বিনা ॥৩৮॥ ময়্যগচ্ছতি চেহস্থে ধর্মাত্মানৌ মহারথৌ । আশয়া তৌ ধরিষ্যেতে বানরাশ্চ তরস্বিনঃ॥৩৯॥ হস্তাদানো মুখাদানো নিয়তো বৃক্ষমূলিকঃ। বানপ্রস্থো ভবিষ্যামি হ্যদৃষ্ট্বা জনকাত্মজাম্ ॥৪০॥ সাগরানূপজে দেশে বহুমূলফলোদকে । চিতিং কৃত্বা প্রবেক্ষ্যামি সমিদ্ধমরণীসুতম্ ॥৪১॥ উপবিষ্টস্য বা সম্যগ্লিঙ্গিনং সাধয়িষ্যতঃ। শরীরং ভক্ষয়িষ্যন্তি বায়সাঃ শ্বাপদানি চ ॥৪২॥ ইদমপ্যৃষিভির্দৃষ্টং নির্যাণমিতি মে মতিঃ। সম্যগাপঃ প্রবেক্ষ্যামি ন চেৎপশ্যামি জানকীম্ ॥৪৩॥ সুজাতমূলা সুভগা কীর্তিমালা যশস্বিনী । প্রভগ্না চিররাত্রায় মম সীতামপশ্যতঃ॥৪৪॥ তাপসো বা ভবিষ্যামি নিয়তো বৃক্ষমূলিকঃ। নেতঃ প্রতিগমিষ্যামি তামদৃষ্ট্বাসিতেক্ষণাম্ ॥৪৫॥ যদি তু প্রতিগচ্ছামি সীতামনধিগম্য তাম্ । অঙ্গদঃ সহিতঃ সর্বৈর্বানরৈর্ন ভবিষ্যতি ॥৪৬॥ বিনাশে বহবো দোষা জীবন্প্রাপ্নোতি ভদ্রকম্ । তস্মাৎপ্রাণান্ধরিষ্যামি ধ্রুবো জীবতি সঙ্গমঃ॥৪৭॥ এবং বহুবিধং দুঃখং মনসা ধারয়ন্ বহু । নাধ্যগচ্ছত্তদা পারং শোকস্য কপিকুঞ্জরঃ॥৪৮॥ ততো বিক্রমমাসাদ্য ধৈর্যবান্ কপিকুঞ্জরঃ। রাবণং বা বধিষ্যামি দশগ্রীবং মহাবলম্ । কামমস্তু হৃতা সীতা প্রত্যাচীর্ণং ভবিষ্যতি ॥৪৯॥ অথবৈনং সমুৎক্ষিপ্য উপর্যুপরি সাগরম্ । রামায়োপহরিষ্যামি পশুং পশুপতেরিব ॥৫০॥ ইতি চিন্তা সমাপন্নঃ সীতামনধিগম্য তাম্ । ধ্যানশোকপরীতাত্মা চিন্তয়ামাস বানরঃ॥৫১॥ যাবৎসীতাং ন পশ্যামি রামপত্নীং যশস্বিনীম্ । তাবদেতাং পুরীং লঙ্কাং বিচিনোমি পুনঃ পুনঃ॥৫২॥ সম্পাতি বচনাচ্চাপি রামং যদ্যানয়াম্যহম্ । অপশ্যন্রাঘবো ভার্যাং নির্দহেৎসর্ববানরান্ ॥৫৩॥ ইহৈব নিয়তাহারো বৎস্যামি নিয়তেন্দ্রিয়ঃ। ন মৎকৃতে বিনশ্যেয়ুঃ সর্বে তে নরবানরাঃ॥৫৪॥ অশোকবনিকা চাপি মহতীয়ং মহাদ্রুমা । ইমামধিগমিষ্যামি নহীয়ং বিচিতা ময়া ॥৫৫॥ বসূন্ রুদ্রাংস্তথাঽঽদিত্যানশ্বিনৌ মরুতোঽপি চ । নমস্কৃত্বা গমিষ্যামি রক্ষসাং শোকবর্ধনঃ॥৫৬॥ জিত্বা তু রাক্ষসান্দেবীমিক্ষ্বাকুকুলনন্দিনীম্ । সম্প্রদাস্যামি রামায় সিদ্ধীমিব তপস্বিনে ॥৫৭॥ স মুহূর্তমিব ধ্যাত্বা চিন্তাবিগ্রথিতেন্দ্রিয়ঃ। উদতিষ্ঠন্মহাবাহুর্হনূমান্মারুতাত্মজঃ॥৫৮॥ নমোঽস্তু রামায় সলক্ষ্মণায় দেব্যৈ চ তস্যৈ জনকাত্মজায়ৈ । নমোঽস্তু রুদ্রেন্দ্রয়মানিলেভ্যো নমোঽস্তু চন্দ্রার্কমরুদ্গণেভ্যঃ॥৫৯॥ স তেভ্যস্তু নমস্কৃত্বা সুগ্রীবায় চ মারুতিঃ। দিশঃ সর্বাঃ সমালোক্য সোঽশোকবনিকাং প্রতি ॥৬০॥ স গত্বা মনসা পূর্বমশোকবনিকাং শুভাম্ । উত্তরং চিন্তয়ামাস বানরো মারুতাত্মজঃ॥৬১॥ ধ্রুবং তু রক্ষোবহুলা ভবিষ্যতি বনাকুলা । অশোকবনিকা পুণ্যা সর্বসংস্কারসংস্কৃতা ॥৬২॥ রক্ষিণশ্চাত্র বিহিতা নূনং রক্ষন্তি পাদপান্ । ভগবানপি বিশ্বাত্মা নাতিক্ষোভং প্রবায়তি ॥৬৩॥ সঙ্ক্ষিপ্তোঽয়ং ময়াঽঽত্মা চ রামার্থে রাবণস্য চ । সিদ্ধিং দিশন্তু মে সর্বে দেবাঃ সর্ষিগণাস্ত্বিহ ॥৬৪॥ ব্রহ্মা স্বয়ম্ভূর্ভগবান্দেবাশ্চৈব তপস্বিনঃ। সিদ্ধিমগ্নিশ্চ বায়ুশ্চ পুরুহূতশ্চ বজ্রভৃৎ ॥৬৫॥ বরুণঃ পাশহস্তশ্চ সোমাদিত্যৌ তথৈব চ । অশ্বিনৌ চ মহাত্মানৌ মরুতঃ সর্ব এব চ ॥৬৬॥ সিদ্ধিং সর্বাণি ভূতানি ভূতানাং চৈব যঃ প্রভুঃ। দাস্যন্তি মম যে চান্যেঽপ্যদৃষ্টাঃ পথি গোচরাঃ॥৬৭॥ তদুন্নসং পাণ্ডুরদন্তমব্রণং শুচিস্মিতং পদ্মপলাশলোচনম্ । দ্রক্ষ্যে তদার্যাবদনং কদান্বহং প্রসন্নতারাধিপতুল্যবর্চসম্ ॥৬৮॥ ক্ষুদ্রেণ হীনেন নৃশংসমূর্তিনা সুদারুণালঙ্কৃতবেষধারিণা । বলাভিভূতা হ্যবলা তপস্বিনী কথং নু মে দৃষ্টিপথেঽদ্য সা ভবেৎ ॥৬৯॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ত্রয়োদশঃ সর্গঃ