অথ চথুর্দশঃ সর্গঃ
স মুহূর্তমিব ধ্যাত্বা মনসা চাধিগম্য তাম্ ।
অবপ্লুতো মহাতেজাঃ প্রাকারং তস্য বেশ্মনঃ॥১॥
স তু সংহৃষ্টসর্বাঙ্গঃ প্রাকারস্থো মহাকপিঃ।
পুষ্পিতাগ্রান্বসন্তাদৌ দদর্শ বিবিধান্দ্রুমান্ ॥২॥
সালানশোকান্ভব্যাংশ্চ চম্পকাংশ্চ সুপুষ্পিতান্ ।
উদ্দালকান্নাগবৃক্ষাংশ্চূতান্কপিমুখানপি ॥৩॥
তথাঽঽম্রবণসম্পন্নাঁল্লতাশতসমন্বিতান্ ।
জ্যামুক্ত ইব নারাচঃ পুপ্লুবে বৃক্ষবাটিকাম্ ॥৪॥
স প্রবিষ্য বিচিত্রাং তাং বিহগৈরভিনাদিতাম্ ।
রাজতৈঃ কাঞ্চনৈশ্চৈব পাদপৈঃ সর্বতো বৃতাম্ ॥৫॥
বিহগৈর্মৃগসঙ্ঘৈশ্চ বিচিত্রাং চিত্রকাননাম্ ।
উদিতাদিত্যসঙ্কাশাং দদর্শ হনুমান্ বলী ॥৬॥
বৃতাং নানাবিধৈর্বৃক্ষৈঃ পুষ্পোপগফলোপগৈঃ।
কোকিলৈর্ভৃঙ্গরাজৈশ্চ মত্তৈর্নিত্যনিষেবিতাম্ ॥৭॥
প্রহৃষ্টমনুজাং কালে মৃগপক্ষিমদাকুলাম্ ।
মত্তবর্হিণসঙ্ঘুষ্টাং নানাদ্বিজগণায়ুতাম্ ॥৮॥
মার্গমাণো বরারোহাং রাজপুত্রীমনিন্দিতাম্ ।
সুখপ্রসুপ্তান্বিহগান্বোধয়ামাস বানরঃ॥৯॥
উৎপতদ্ভির্দ্বিজগণৈঃ পক্ষৈর্বাতৈঃ সমাহতাঃ।
অনেকবর্ণা বিবিধা মুমুচুঃ পুষ্পবৃষ্টয়ঃ॥১০॥
পুষ্পাবকীর্ণঃ শুশুভে হনুমান্মারুতাত্মজঃ।
অশোকবনিকামধ্যে যথা পুষ্পময়ো গিরিঃ॥১১॥
দিশঃ সর্বাভিধাবন্তং বৃক্ষখণ্ডগতং কপিম্ ।
দৃষ্ট্বা সর্বাণি ভূতানি বসন্ত ইতি মেনিরে ॥১২॥
বৃক্ষেভ্যঃ পতিতৈঃ পুষ্পৈরবকীর্ণাঃ পৃথগ্বিধৈঃ।
ররাজ বসুধা তত্র প্রমদেব বিভূষিতা ॥১৩॥
তরস্বিনা তে তরবস্তরসা বহু কম্পিতাঃ।
কুসুমানি বিচিত্রাণি সসৃজুঃ কপিনা তদা ॥১৪॥
নির্ধূতপত্রশিখরাঃ শীর্ণপুষ্পফলদ্রুমাঃ।
নিক্ষিপ্তবস্ত্রাভরণা ধূর্তা ইব পরাজিতাঃ॥১৫॥
হনূমতা বেগবতা কম্পিতাস্তে নগোত্তমাঃ।
পুষ্পপত্রফলান্যাশু মুমুচুঃ ফলশালিনঃ॥১৬॥
বিহঙ্গসঙ্ঘৈর্হীনাস্তে স্কন্ধমাত্রাশ্রয়া দ্রুমাঃ।
বভূবুরগমাঃ সর্বে মারুতেন বিনির্ধুতাঃ॥১৭॥
বিধূতকেশী যুবতির্যথা মৃদিতবর্ণকা ।
নিপীতশুভদন্তোষ্ঠী নখৈর্দন্তৈশ্চ বিক্ষতা ॥১৮॥
তথা লাঙ্গূলহস্তৈস্তু চরণাভ্যাং চ মর্দিতা ।
তথৈবাশোকবনিকা প্রভগ্নবরপাদপা ॥১৯॥
মহালতানাং দামানি ব্যধমত্তরসা কপিঃ।
যথা প্রাবৃষি বেগেন মেঘজালানি মারুতঃ॥২০॥
স তত্র মণিভূমীশ্চ রাজতীশ্চ মনোরমাঃ।
তথা কাঞ্চনভূমীশ্চ বিচরন্দদৃশে কপিঃ॥২১॥
বাপীশ্চ বিবিধাকারাঃ পূর্ণাঃ পরমবারিণা ।
মহার্হৈর্মণিসোপানৈরুপপন্নাস্ততস্ততঃ॥২২॥
মুক্তাপ্রবালসিকতাঃ স্ফাটিকান্তরকুট্টিমাঃ।
কাঞ্চনৈস্তরুভিশ্চিত্রৈস্তীরজৈরুপশোভিতাঃ॥২৩॥
বুদ্ধপদ্মোৎপলবনাশ্চক্রবাকোপশোভিতাঃ।
নত্যূহরুতসঙ্ঘুষ্টা হংসসারসনাদিতাঃ॥২৪॥
দীর্ঘাভির্দ্রুময়ুক্তাভিঃ সরিদ্ভিশ্চ সমন্ততঃ।
অমৃতোপমতোয়াভিঃ শিবাভিরুপসংস্কৃতাঃ॥২৫॥
লতাশতৈরবততাঃ সন্তানকুসুমাবৃতাঃ।
নানাগুল্মাবৃতবনাঃ করবীরকৃতান্তরাঃ॥২৬॥
ততোঽম্বুধরসঙ্কাশং প্রবৃদ্ধশিখরং গিরিম্ ।
বিচিত্রকূটং কূটৈশ্চ সর্বতঃ পরিবারিতম্ ॥২৭॥
শিলাগৃহৈরবততং নানাবৃক্ষসমাবৃতম্ ।
দদর্শ কপিশার্দূলো রম্যং জগতি পর্বতম্ ॥২৮॥
দদর্শ চ নগাত্তস্মান্নদীং নিপতিতাং কপিঃ।
অঙ্কাদিব সমুৎপত্য প্রিয়স্য পতিতাং প্রিয়াম্ ॥২৯॥
জলে নিপতিতাগ্রৈশ্চ পাদপৈরুপশোভিতাম্ ।
বার্যমাণামিব ক্রুদ্ধাং প্রমদাং প্রিয়বন্ধুভিঃ॥৩০॥
পুনরাবৃত্ততোয়াং চ দদর্শ স মহাকপিঃ।
প্রসন্নামিব কান্তস্য কান্তাং পুনরুপস্থিতাম্ ॥৩১॥
তস্যাদূরাৎস পদ্মিন্যো নানাদ্বিজগণায়ুতাঃ।
দদর্শ কপিশার্দূলো হনুমান্মারুতাত্মজঃ॥৩২॥
কৃত্রিমাং দীর্ঘিকাং চাপি পূর্ণাং শীতেন বারিণা ।
মণিপ্রবরসোপানাং মুক্তাসিকতশোভিতাম্ ॥৩৩॥
বিবিধৈর্মৃগসঙ্ঘৈশ্চ বিচিত্রাং চিত্রকাননাম্ ।
প্রাসাদৈঃ সুমহদ্ভিশ্চ নির্মিতৈর্বিশ্বকর্মণা ॥৩৪॥
কাননৈঃ কৃত্রিমৈশ্চাপি সর্বতঃ সমলঙ্কৃতাম্ ।
যে কেচিৎপাদপাস্তত্র পুষ্পোপগফলোপগাঃ॥৩৫॥
সচ্ছত্রাঃ সবিতর্দীকাঃ সর্বে সৌবর্ণবেদিকাঃ।
লতাপ্রতানৈর্বহুভিঃ পর্ণৈশ্চ বহুভির্বৃতাম্ ॥৩৬॥
কাঞ্চনীং শিংশপামেকাং দদর্শ স মহাকপিঃ।
বৃতাং হেমময়ীভিস্তু বেদিকাভিঃ সমন্ততঃ॥৩৭॥
সোঽপশ্যদ্ভূমিভাগাংশ্চ নগপ্রস্রবণানি চ ।
সুবর্ণবৃক্ষানপরান্দদর্শ শিখিসংনিভান্ ॥৩৮॥
তেষাং দ্রুমাণাং প্রভয়া মেরোরিব মহাকপিঃ।
অমন্যত তদা বীরঃ কাঞ্চনোঽস্মীতি সর্বতঃ॥৩৯॥
তান্ কাঞ্চনান্ বৃক্ষগণান্ মারুতেন প্রকম্পিতান্ ।
কিঙ্কিণীশতনির্ঘোষান্ দৃষ্ট্বা বিস্ময়মাগমৎ ॥৪০॥
সুপুষ্পিতাগ্রান্ রুচিরাংস্তরুণাঙ্কুরপল্লবান্ ।
তামারুহ্য মহাবেগঃ শিংশপাং পর্ণসংবৃতাম্ ॥৪১॥
ইতো দ্রক্ষ্যামি বৈদেহীং রাম দর্শনলালসাম্ ।
ইতশ্চেতশ্চ দুঃখার্তাং সম্পতন্তীং যদৃচ্ছয়া ॥৪২॥
অশোকবনিকা চেয়ং দৃঢং রম্যা দুরাত্মনঃ।
চন্দনৈশ্চম্পকৈশ্চাপি বকুলৈশ্চ বিভূষিতা ॥৪৩॥
ইয়ং চ নলিনী রম্যা দ্বিজসঙ্ঘনিষেবিতা ।
ইমাং সা রাজমহিষী নূনমেষ্যতি জানকী ॥৪৪॥
সা রামা রাজমহিষী রাঘবস্য প্রিয়া সতী ।
বনসঞ্চারকুশলা ধ্রুবমেষ্যতি জানকী ॥৪৫॥
অথবা মৃগশাবাক্ষী বনস্যাস্য বিচক্ষণা ।
বনমেষ্যতি সাদ্যেহ রামচিন্তাসুকর্শিতা ॥৪৬॥
রামশোকাভিসন্তপ্তা সা দেবী বামলোচনা ।
বনবাসরতা নিত্যমেষ্যতে বনচারিণী ॥৪৭॥
বনেচরাণাং সততং নূনং স্পৃহয়তে পুরা ।
রামস্য দয়িতা চার্যা জনকস্য সুতা সতী ॥৪৮॥
সন্ধ্যাকালমনাঃ শ্যামা ধ্রুবমেষ্যতি জানকী ।
নদীং চেমাং শুভজলাং সন্ধ্যার্থে বরবর্ণিনী ॥৪৯॥
তস্যাশ্চাপ্যনুরূপেয়মশোকবনিকা শুভা ।
শুভায়াঃ পার্থিবেন্দ্রস্য পত্নী রামস্য সম্মতা ॥৫০॥
যদি জীবতি সা দেবী তারাধিপনিভাননা ।
আগমিষ্যতি সাবশ্যমিমাং শিতজলাং নদীম্ ॥৫১॥
এবং তু মত্বা হনুমান্মহাত্মা
	প্রতীক্ষমাণো মনুজেন্দ্রপত্নীম্ ।
অবেক্ষমাণশ্চ দদর্শ সর্বং
	সুপুষ্পিতে পর্ণঘনে নিলীনঃ॥৫২॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে চথুর্দশঃ সর্গঃ