অথ পঞ্চদশঃ সর্গঃ
স বীক্ষমাণস্তত্রস্থো মার্গমাণশ্চ মৈথিলীম্ ।
অবেক্ষমাণশ্চ মহীং সর্বাং তামন্ববৈক্ষত ॥১॥
সন্তানকলতাভিশ্চ পাদপৈরুপশোভিতাম্ ।
দিব্যগন্ধরসোপেতাং সর্বতঃ সমলঙ্কৃতাম্ ॥২॥
তাং স নন্দনসঙ্কাশাং মৃগপক্ষিভিরাবৃতাম্ ।
হর্ম্যপ্রাসাদসম্বাধাং কোকিলাকুলনিঃস্বনাম্ ॥৩॥
কাঞ্চনোৎপলপদ্মাভির্বাপীভিরুপশোভিতাম্ ।
বহ্বাসনকুথোপেতাং বহুভূমিগৃহায়ুতাম্ ॥৪॥
সর্বর্তুকুসুমৈ রম্যৈঃ ফলবদ্ভিশ্চ পাদপৈঃ।
পুষ্পিতানামশোকানাং শ্রিয়া সূর্যোদয়প্রভাম্ ॥৫॥
প্রদীপ্তামিব তত্রস্থো মারুতিঃ সমুদৈক্ষত ।
নিষ্পত্রশাখাং বিহগৈঃ ক্রিয়মাণামিবাসকৃৎ ॥৬॥
বিনিষ্পতদ্ভিঃ শতশশ্চিত্রৈঃ পুষ্পাবতংসকৈঃ।
সমূলপুষ্পরচিতৈরশোকৈঃ শোকনাশনৈঃ॥৭॥
পুষ্পভারাতিভারৈশ্চ স্পৃশদ্ভিরিব মেদিনীম্ ।
কর্ণিকারৈঃ কুসুমিতৈঃ কিংশুকৈশ্চ সুপুষ্পিতৈঃ॥৮॥
স দেশঃ প্রভয়া তেষাং প্রদীপ্ত ইব সর্বতঃ।
পুংনাগাঃ সপ্তপর্ণাশ্চ চম্পকোদ্দালকাস্তথা ॥৯॥
বিবৃদ্ধমূলা বহবঃ শোভন্তে স্ম সুপুষ্পিতাঃ।
শাতকুম্ভনিভাঃ কেচিৎকেচিদগ্নিশিখপ্রভাঃ॥১০॥
নীলাঞ্জননিভাঃ কেচিত্তত্রাশোকাঃ সহস্রশঃ।
নন্দনং বিবুধোদ্যানং চিত্রং চৈত্ররথং যথা ॥১১॥
অতিবৃত্তমিবাচিন্ত্যং দিব্যং রম্যশ্রিয়ায়ুতম্ ।
দ্বিতীয়মিব চাকাশং পুষ্পজ্যোতির্গণায়ুতম্ ॥১২॥
পুষ্পরত্নশতৈশ্চিত্রং পঞ্চমং সাগরং যথা ।
সর্বর্তুপুষ্পৈর্নিচিতং পাদপৈর্মধুগন্ধিভিঃ॥১৩॥
নানানিনাদৈরুদ্যানং রম্যং মৃগগণদ্বিজৈঃ।
অনেকগন্ধপ্রবহং পুণ্যগন্ধং মনোহরম্ ॥১৪॥
শৈলেন্দ্রমিব গন্ধাঢ্যং দ্বিতীয়ং গন্ধমাদনম্ ।
অশোকবনিকায়াং তু তস্যাং বানরপুঙ্গবঃ॥১৫॥
স দদর্শাবিদূরস্থং চৈত্যপ্রাসাদমূর্জিতম্ ।
মধ্যে স্তম্ভসহস্রেণ স্থিতং কৈলাসপাণ্ডুরম্ ॥১৬॥
প্রবালকৃতসোপানং তপ্তকাঞ্চনবেদিকম্ ।
মুষ্ণন্তমিব চক্ষূংষি দ্যোতমানমিব শ্রিয়া ॥১৭॥
নির্মলং প্রাংশুভাবত্বাদুল্লিখন্তমিবাম্বরম্ ।
ততো মলিনসংবীতাং রাক্ষসীভিঃ সমাবৃতাম্ ॥১৮॥
উপবাসকৃশাং দীনাং নিঃশ্বসন্তীং পুনঃ পুনঃ।
দদর্শ শুক্লপক্ষাদৌ চন্দ্ররেখামিবামলাম্ ॥১৯॥
মন্দপ্রখ্যায়মানেন রূপেণ রুচিরপ্রভাম্ ।
পিনদ্ধাং ধূমজালেন শিখামিব বিভাবসোঃ॥২০॥
পীতেনৈকেন সংবীতাং ক্লিষ্টেনোত্তমবাসসা ।
সপঙ্কামনলঙ্কারাং বিপদ্মামিব পদ্মিনীম্ ॥২১॥
পীডিতাং দুঃখসন্তপ্তাং পরিক্ষীণাং তপস্বিনীম্ ।
গ্রহেণাঙ্গারকেণেব পীডিতামিব রোহিণীম্ ॥২২॥
অশ্রুপূর্ণমুখীং দীনাং কৃশামনশনেন চ ।
শোকধ্যানপরাং দীনাং নিত্যং দুঃখপরায়ণাম্ ॥২৩॥
প্রিয়ং জনমপশ্যন্তীং পশ্যন্তীং রাক্ষসীগণম্ ।
স্বগণেন মৃগীং হীনাং শ্বগণেনাবৃতামিব ॥২৪॥
নীলনাগাভয়া বেণ্যা জঘনং গতয়ৈকয়া ।
নীলয়া নীরদাপায়ে বনরাজ্যা মহীমিব ॥২৫॥
সুখার্হাং দুঃখসন্তপ্তাং ব্যসনানামকোবিদাম্ ।
তাং বিলোক্য বিশালাক্ষীমধিকং মলিনাং কৃশাম্ ॥২৬॥
তর্কয়ামাস সীতেতি কারণৈরুপপাদিভিঃ।
হ্রিয়মাণা তদা তেন রক্ষসা কামরূপিণা ॥২৭॥
যথারূপা হি দৃষ্টা সা তথারূপেয়মঙ্গনা ।
পূর্ণচন্দ্রাননাং সুভ্রূং চারুবৃত্তপয়োধরাম্ ॥২৮॥
কুর্বতীং প্রভয়া দেবীং সর্বা বিতিমিরা দিশঃ।
তাং নীলকণ্ঠীং বিম্বোষ্ঠীং সুমধ্যাং সুপ্রতিষ্ঠিতাম্ ॥২৯॥
সীতাং পদ্মপলাশাক্ষীং মন্মথস্য রতিং যথা ।
ইষ্টাং সর্বস্য জগতঃ পূর্ণচন্দ্রপ্রভামিব ॥৩০॥
ভূমৌ সুতনুমাসীনাং নিয়তামিব তাপসীম্ ।
নিঃশ্বাসবহুলাং ভীরুং ভুজগেন্দ্রবধূমিব ॥৩১॥
শোকজালেন মহতা বিততেন ন রাজতীম্ ।
সংসক্তাং ধূমজালেন শিখামিব বিভাবসোঃ॥৩২॥
তাং স্মৃতীমিব সন্দিগ্ধামৃদ্ধিং নিপতিতামিব ।
বিহতামিব চ শ্রদ্ধামাশাং প্রতিহতামিব ॥৩৩॥
সোপসর্গাং যথা সিদ্ধিং বুদ্ধিং সকলুষামিব ।
অভূতেনাপবাদেন কীর্তিং নিপতিতামিব ॥৩৪॥
রামোপরোধব্যথিতাং রক্ষোগণনিপীডিতাম্ ।
অবলাং মৃগশাবাক্ষীং বীক্ষমাণাং ততস্ততঃ॥৩৫॥
বাষ্পাম্বুপরিপূর্ণেন কৃষ্ণবক্রাক্ষিপক্ষ্মণা ।
বদনেনাপ্রসন্নেন নিঃশ্বসন্তীং পুনঃ পুনঃ॥৩৬॥
মলপঙ্কধরাং দীনাং মণ্ডনার্হামমণ্ডিতাম্ ।
প্রভাং নক্ষত্ররাজস্য কালমেঘৈরিবাবৃতাম্ ॥৩৭॥
তস্য সন্দিদিহে বুদ্ধিস্তথা সীতাং নিরীক্ষ্য চ ।
আম্নায়ানাময়োগেন বিদ্যাং প্রশিথিলামিব ॥৩৮॥
দুঃখেন বুবুধে সীতাং হনুমাননলঙ্কৃতাম্ ।
সংস্কারেণ যথা হীনাং বাচমর্থান্তরং গতাম্ ॥৩৯॥
তাং সমীক্ষ্য বিশালাক্ষীং রাজপুত্রীমনিন্দিতাম্ ।
তর্কয়ামাস সীতেতি কারণৈরুপপাদয়ন্ ॥৪০॥
বৈদেহ্যা যানি চাঙ্গেষু তদা রামোঽন্বকীর্তয়ৎ ।
তান্যাভরণজালানি গাত্রশোভীন্যলক্ষয়ৎ ॥৪১॥
সুকৃতৌ কর্ণবেষ্টৌ চ শ্বদংষ্ট্রৌ চ সুসংস্থিতৌ ।
মণিবিদ্রুমচিত্রাণি হস্তেষ্বাভরণানি চ ॥৪২॥
শ্যামানি চিরয়ুক্তত্বাত্তথা সংস্থানবন্তি চ ।
তান্যেবৈতানি মন্যেঽহং যানি রামোঽব্নকীর্তয়ৎ ॥৪৩॥
তত্র যান্যবহীনানি তান্যহং নোপলক্ষয়ে ।
যান্যস্যা নাবহীনানি তানীমানি ন সংশয়ঃ॥৪৪॥
পীতং কনকপট্টাভং স্রস্তং তদ্বসনং শুভম্ ।
উত্তরীয়ং নগাসক্তং তদা দৃষ্টং প্লবঙ্গমৈঃ॥৪৫॥
ভূষণানি চ মুখ্যানি দৃষ্টানি ধরণীতলে ।
অনয়ৈবাপবিদ্ধানি স্বনবন্তি মহান্তি চ ॥৪৬॥
ইদং চিরগৃহীতত্বাদ্বসনং ক্লিষ্টবত্তরম্ ।
তথাপ্যনূনং তদ্বর্ণং তথা শ্রীমদ্যথেতরৎ ॥৪৭॥
ইয়ং কনকবর্ণাঙ্গী রামস্য মহিষী প্রিয়া ।
প্রণষ্টাপি সতী যস্য মনসো ন প্রণশ্যতি ॥৪৮॥
ইয়ং সা যৎকৃতে রামশ্চতুর্ভিরিহ তপ্যতে ।
কারুণ্যেনানৃশংস্যেন শোকেন মদনেন চ ॥৪৯॥
স্ত্রী প্রণষ্টেতি কারুণ্যাদাশ্রিতেত্যানৃশংস্যতঃ।
পত্নী নষ্টেতি শোকেন প্রিয়েতি মদনেন চ ॥৫০॥
অস্যা দেব্যা যথারূপমঙ্গপ্রত্যঙ্গসৌষ্ঠবম্ ।
রামস্য চ যথারূপং তস্যেয়মসিতেক্ষণা ॥৫১॥
অস্যা দেব্যা মনস্তস্মিংস্তস্য চাস্যাং প্রতিষ্ঠিতম্ ।
তেনেয়ং স চ ধর্মাত্মা মুহূর্তমপি জীবতি ॥৫২॥
দুষ্করং কৃতবান্ রামো হীনো যদনয়া প্রভুঃ।
ধারয়ত্যাত্মনো দেহং ন শোকেনাবসীদতি ॥৫৩॥
এবং সীতাং তদা দৃষ্ট্বা হৃষ্টঃ পবনসন্ভবঃ।
জগাম মনসা রামং প্রশশংস চ তং প্রভুম্ ॥৫৪॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে পঞ্চদশঃ সর্গঃ