অথ ষোডশঃ সর্গঃ প্রশস্য তু প্রশস্তব্যাং সীতাং তাং হরিপুঙ্গবঃ। গুণাভিরামং রামং চ পুনশ্চিন্তাপরোঽভবৎ ॥১॥ স মুহূর্তমিব ধ্যাত্বা বাষ্পপর্যাকুলেক্ষণঃ। সীতামাশ্রিত্য তেজস্বী হনুমান্ বিললাপ হ ॥২॥ মান্যা গুরুবিনীতস্য লক্ষ্মণস্য গুরুপ্রিয়া । যদি সীতা হি দুঃখার্তা কালো হি দুরতিক্রমঃ॥৩॥ রামস্য ব্যবসায়জ্ঞা লক্ষ্মণস্য চ ধীমতঃ। নাত্যর্থং ক্ষুভ্যতে দেবী গঙ্গেব জলদাগমে ॥৪॥ তুল্যশীলবয়োবৃত্তাং তুল্যাভিজনলক্ষণাম্ । রাঘবোঽর্হতি বৈদেহীং তং চেয়মসিতেক্ষণা ॥৫॥ তাং দৃষ্ট্বা নবহেমাভাং লোককান্তামিব শ্রিয়ম্ । জগাম মনসা রামং বচনং চেদমব্রবীৎ ॥৬॥ অস্যা হেতোর্বিশালাক্ষ্যা হতো বালী মহাবলঃ। রাবণপ্রতিমো বীর্যে কবন্ধশ্চ নিপাতিতঃ॥৭॥ বিরাধশ্চ হতঃ সঙ্খ্যে রাক্ষসো ভীমবিক্রমঃ। বনে রামেণ বিক্রম্য মহেন্দ্রেণেব শম্বরঃ॥৮॥ চতুর্দশ সহস্রাণি রক্ষসাং ভীমকর্মণাম্ । নিহতানি জনস্থানে শরৈরগ্নিশিখোপমৈঃ॥৯॥ খরশ্চ নিহতঃ সঙ্খ্যে ত্রিশিরাশ্চ নিপাতিতঃ। দূষণশ্চ মহাতেজা রামেণ বিদিতাত্মনা ॥১০॥ ঐশ্বর্যং বানরাণাং চ দুর্লভং বালিপালিতম্ । অস্যা নিমিত্তে সুগ্রীবঃ প্রাপ্তবাঁল্লোকবিশৃতঃ॥১১॥ সাগরশ্চ ময়া ক্রান্তঃ শ্রীমান্নদনদীপতিঃ। অস্যা হেতোর্বিশালাক্ষ্যাঃ পুরী চেয়ং নিরীক্ষিতা ॥১২॥ যদি রামঃ সমুদ্রান্তাং মেদিনীং পরিবর্তয়েৎ । অস্যাঃ কৃতে জগচ্চাপি যুক্তমিত্যেব মে মতিঃ॥১৩॥ রাজ্যং বা ত্রিষু লোকেষু সীতা বা জনকাত্মজা । ত্রৈলোক্যরাজ্যং সকলং সীতায়া নাপ্নুয়াৎকলাম্ ॥১৪॥ ইয়ং সা ধর্মশীলস্য জনকস্য মহাত্মনঃ। সুতা মৈথিলরাজস্য সীতা ভর্তৃদৃঢব্রতা ॥১৫॥ উত্থিতা মেদিনীং ভিত্ত্বা ক্ষেত্রে হলমুখক্ষতে । পদ্মরেণুনিভৈঃ কীর্ণা শুভৈঃ কেদারপাংসুভিঃ॥১৬॥ বিক্রান্তস্যার্যশীলস্য সংয়ুগেষ্বনিবর্তিনঃ। স্নুষা দশরথস্যৈষা জ্যেষ্ঠা রাজ্ঞো যশস্বিনী ॥১৭॥ ধর্মজ্ঞস্য কৃতজ্ঞস্য রামস্য বিদিতাত্মনঃ। ইয়ং সা দয়িতা ভার্যা রাক্ষসী বশমাগতা ॥১৮॥ সর্বান্ভোগান্পরিত্যজ্য ভর্তৃস্নেহবলাৎকৃতা । অচিন্তয়িত্বা কষ্টানি প্রবিষ্টা নির্জনং বনম্ ॥১৯॥ সন্তুষ্টা ফলমূলেন ভর্তৃশুশ্রূষণা পরা । যা পরাং ভজতে প্রীতিং বনেঽপি ভবনে যথা ॥২০॥ সেয়ং কনকবর্ণাঙ্গী নিত্যং সুস্মিতভাষিণী । সহতে যাতনামেতামনর্থানামভাগিনী ॥২১॥ ইমাং তু শীলসম্পন্নাং দ্রষ্টুমিচ্ছতি রাঘবঃ। রাবণেন প্রমথিতাং প্রপামিব পিপাসিতঃ॥২২॥ অস্যা নূনং পুনর্লাভাদ্রাঘবঃ প্রীতিমেষ্যতি । রাজা রাজ্যপরিভ্রষ্টঃ পুনঃ প্রাপ্যেব মেদিনীম্ ॥২৩॥ কামভোগৈঃ পরিত্যক্তা হীনা বন্ধুজনেন চ । ধারয়ত্যাত্মনো দেহং তৎসমাগমকাঙ্ক্ষিণী ॥২৪॥ নৈষা পশ্যতি রাক্ষস্যো নেমান্পুষ্পফলদ্রুমান্ । একস্থহৃদয়া নূনং রামমেবানুপশ্যতি ॥২৫॥ ভর্তা রাম পরং নার্যা শোভনং ভূষণাদপি । এষা হি রহিতা তেন শোভনার্হা ন শোভতে ॥২৬॥ দুষ্করং কুরুতে রামো হীনো যদনয়া প্রভুঃ। ধারয়ত্যাত্মনো দেহং ন দুঃখেনাবসীদতি ॥২৭॥ ইমামসিতকেশান্তাং শতপত্রনিভেক্ষণাম্ । সুখার্হাং দুঃখিতাং জ্ঞাত্বা মমাপি ব্যথিতং মনঃ॥২৮॥ ক্ষিতিক্ষমা পুষ্করসংনিভাক্ষি যা রক্ষিতা রাঘবলক্ষ্মণাভ্যাম্ । সা রাক্ষসীভির্বিকৃতেক্ষণাভিঃ সংরক্ষ্যতে সম্প্রতি বৃক্ষমূলে ॥২৯॥ হিমহতনলিনীব নষ্টশোভা ব্যসনপরম্পরয়া নিপীড্যমানা । সহচররহিতেব চক্রবাকী জনকসুতা কৃপণাং দশাং প্রপন্না ॥৩০॥ অস্যা হি পুষ্পাবনতাগ্রশাখাঃ শোকং দৃঢং বৈ জনয়ন্ত্যশোকাঃ। হিমব্যপায়েন চ শীতরশ্মি- রভ্যুত্থিতো নৈকসহস্ররশ্মিঃ॥৩১॥ ইত্যেবমর্থং কপিরন্ববেক্ষ্য সীতেয়মিত্যেব তু জাতবুদ্ধিঃ। সংশ্রিত্য তস্মিন্নিষসাদ বৃক্ষে বলী হরীণামৃষভস্তরস্বী ॥৩২॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ষোডশঃ সর্গঃ