অথ সপ্তদশঃ সর্গঃ
ততঃ কুমুদষণ্ডাভো নির্মলং নির্মলোদয়ঃ।
প্রজগাম নভশ্চন্দ্রো হংসো নীলমিবোদকম্ ॥১॥
সাচিব্যমিব কুর্বন্স প্রভয়া নির্মলপ্রভঃ।
চন্দ্রমা রশ্মিভিঃ শীতৈঃ সিষেবে পবনাত্মজম্ ॥২॥
স দদর্শ ততঃ সীতাং পূর্ণচন্দ্রনিভাননাম্ ।
শোকভারৈরিব ন্যস্তাং ভারৈর্নাবমিবাম্ভসি ॥৩॥
দিদৃক্ষমাণো বৈদেহীং হনূমান্মারুতাত্মজঃ।
স দদর্শাবিদূরস্থা রাক্ষসীর্ঘোরদর্শনাঃ॥৪॥
একাক্ষীমেককর্ণাং চ কর্ণপ্রাবরণাং তথা ।
অকর্ণাং শঙ্কুকর্ণাং চ মস্তকোচ্ছ্বাসনাসিকাম্ ॥৫॥
অতিকায়োত্তমাঙ্গীং চ তনুদীর্ঘশিরোধরাম্ ।
ধ্বস্তকেশীং তথাকেশীং কেশকম্বলধারিণীম্ ॥৬॥
লম্বকর্ণললাটাং চ লম্বোদরপয়োধরাম্ ।
লম্বোষ্ঠীং চিবুকোষ্ঠীং চ লম্বাস্যাং লম্বজানুকাম্ ॥৭॥
হ্রস্বাং দীর্ঘাং চ কুব্জাং চ বিকটাং বামনাং তথা ।
করালাং ভুগ্নবক্ত্রাং চ পিঙ্গাক্ষীং বিকৃতাননাম্ ॥৮॥
বিকৃতাঃ পিঙ্গলাঃ কালীঃ ক্রোধনাঃ কলহপ্রিয়াঃ।
কালায়সমহাশূলকূটমুদ্গরধারিণীঃ॥৯॥
বরাহমৃগশার্দূলমহিষাজশিবা মুখাঃ।
গজোষ্ট্রহয়পাদাশ্চ নিখাতশিরসোঽপরাঃ॥১০॥
একহস্তৈকপাদাশ্চ খরকর্ণ্যশ্বকর্ণিকাঃ।
গোকর্ণীর্হস্তিকর্ণীশ্চ হরিকর্ণীস্তথাপরাঃ॥১১॥
অতিনাসাশ্চ কাশ্চিচ্চ তির্যঙ্্নাসা অনাসিকাঃ।
গজসন্নিভনাসাশ্চ ললাটোচ্ছ্বাসনাসিকাঃ॥১২॥
হস্তিপাদা মহাপাদা গোপাদাঃ পাদচূলিকাঃ।
অতিমাত্রশিরোগ্রীবা অতিমাত্রকুচোদরীঃ॥১৩॥
অতিমাত্রাস্য নেত্রাশ্চ দীর্ঘজিহ্বাননাস্তথা ।
অজামুখীর্হস্তিমুখীর্গোমুখীঃ সূকরীমুখীঃ॥১৪॥
হয়োষ্ট্রখরবক্ত্রাশ্চ রাক্ষসীর্ঘোরদর্শনাঃ।
শূলমুদ্গরহস্তাশ্চ ক্রোধনাঃ কলহপ্রিয়াঃ॥১৫॥
করালা ধূম্রকেশিন্যো রাক্ষসীর্বিকৃতাননাঃ।
পিবন্তী সততং পানং সুরামাংসসদাপ্রিয়াঃ॥১৬॥
মাংসশোণিতদিগ্ধাঙ্গীর্মাংসশোণিতভোজনাঃ।
তা দদর্শ কপিশ্রেষ্ঠো রোমহর্ষণদর্শনাঃ॥১৭॥
স্কন্ধবন্তমুপাসীনাঃ পরিবার্য বনস্পতিম্ ।
তস্যাধস্তাচ্চ তাং দেবীং রাজপুত্রীমনিন্দিতাম্ ॥১৮॥
লক্ষয়ামাস লক্ষ্মীবান্হনূমাঞ্জনকাত্মজাম্ ।
নিষ্প্রভাং শোকসন্তপ্তাং মলসঙ্কুলমূর্ধজাম্ ॥১৯॥
ক্ষীণপুণ্যাং চ্যুতাং ভূমৌ তারাং নিপতিতামিব ।
চারিত্র্য ব্যপদেশাঢ্যাং ভর্তৃদর্শনদুর্গতাম্ ॥২০॥
ভূষণৈরুত্তমৈর্হীনাং ভর্তৃবাৎসল্যভূষিতাম্ ।
রাক্ষসাধিপসংরুদ্ধাং বন্ধুভিশ্চ বিনাকৃতাম্ ॥২১॥
বিয়ূথাং সিংহসংরুদ্ধাং বদ্ধাং গজবধূমিব ।
চন্দ্ররেখাং পয়োদান্তে শারদাভ্রৈরিবাবৃতাম্ ॥২২॥
ক্লিষ্টরূপামসংস্পর্শাদয়ুক্তামিব বল্লকীম্ ।
স তাং ভর্তৃহিতে যুক্তাময়ুক্তাং রক্ষসাং বশে ॥২৩॥
অশোকবনিকামধ্যে শোকসাগরমাপ্লুতাম্ ।
তাভিঃ পরিবৃতাং তত্র সগ্রহামিব রোহিণীম্ ॥২৪॥
দদর্শ হনুমাংস্তত্র লতামকুসুমামিব ।
সা মলেন চ দিগ্ধাঙ্গী বপুষা চাপ্যলঙ্কৃতা ।
মৃণালী পঙ্কদিগ্ধেব বিভাতি চ ন ভাতি চ ॥২৫॥
মলিনেন তু বস্ত্রেণ পরিক্লিষ্টেন ভামিনীম্ ।
সংবৃতাং মৃগশাবাক্ষীং দদর্শ হনুমান্কপিঃ॥২৬॥
তাং দেবীং দীনবদনামদীনাং ভর্তৃতেজসা ।
রক্ষিতাং স্বেন শীলেন সীতামসিতলোচনাম্ ॥২৭॥
তাং দৃষ্ট্বা হনুমান্সীতাং মৃগশাবনিভেক্ষণাম্ ।
মৃগকন্যামিব ত্রস্তাং বীক্ষমাণাং সমন্ততঃ॥২৮॥
দহন্তীমিব নিঃশ্বাসৈর্বৃক্ষান্পল্লবধারিণঃ।
সঙ্ঘাতমিব শোকানাং দুঃখস্যোর্মিমিবোত্থিতাম্ ॥২৯॥
তাং ক্ষমাং সুবিভক্তাঙ্গীং বিনাভরণশোভিনীম্ ।
প্রহর্ষমতুলং লেভে মারুতিঃ প্রেক্ষ্য মৈথিলীম্ ॥৩০॥
হর্ষজানি চ সোঽশ্রূণি তাং দৃষ্ট্বা মদিরেক্ষণাম্ ।
মুমোচ হনুমাংস্তত্র নমশ্চক্রে চ রাঘবম্ ॥৩১॥
নমস্কৃত্বাথ রামায় লক্ষ্মণায় চ বীর্যবান্ ।
সীতাদর্শনসংহৃষ্টো হনুমান্ সংবৃতোঽভবৎ ॥৩২॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে সপ্তদশঃ সর্গঃ