অথ অষ্টাদশঃ সর্গঃ
তথা বিপ্রেক্ষমাণস্য বনং পুষ্পিতপাদপম্ ।
বিচিন্বতশ্চ বৈদেহীং কিঞ্চিচ্ছেষা নিশাভবৎ ॥১॥
ষডঙ্গবেদবিদুষাং ক্রতুপ্রবরয়াজিনাম্ ।
শুশ্রাব ব্রহ্মঘোষান্ স বিরাত্রে ব্রহ্মরক্ষসাম্ ॥২॥
অথ মঙ্গলবাদিত্রৈঃ শব্দৈঃ শ্রোত্রমনোহরৈঃ।
প্রাবোধ্যত মহাবাহুর্দশগ্রীবো মহাবলঃ॥৩॥
বিবুধ্য তু মহাভাগো রাক্ষসেন্দ্রঃ প্রতাপবান্ ।
স্রস্তমাল্যাম্বরধরো বৈদেহীমন্বচিন্তয়ৎ ॥৪॥
ভৃশং নিয়ুক্তস্তস্যাং চ মদনেন মদোৎকটঃ।
ন তু তং রাক্ষসঃ কামং শশাকাত্মনি গূহিতুম্ ॥৫॥
স সর্বাভরণৈর্যুক্তো বিভ্রচ্ছ্রিয়মনুত্তমাম্ ।
তাং নগৈর্বিবিধৈর্জুষ্টাং সর্বপুষ্পফলোপগৈঃ॥৬॥
বৃতাং পুষ্করিণীভিশ্চ নানাপুষ্পোপশোভিতাম্ ।
সদা মত্তৈশ্চ বিহগৈর্বিচিত্রাং পরমাদ্ভুতৈঃ॥৭॥
ঈহামৃগৈশ্চ বিবিধৈর্বৃতাং দৃষ্টিমনোহরৈঃ।
বীথীঃ সম্প্রেক্ষমাণশ্চ মণিকাঞ্চনতোরণাম্ ॥৮॥
নানামৃগগণাকীর্ণাং ফলৈঃ প্রপতিতৈর্বৃতাম্ ।
অশোকবনিকামেব প্রাবিশৎসন্ততদ্রুমাম্ ॥৯॥
অঙ্গনাশতমাত্রং তু তং ব্রজন্তমনুব্রজন্ ।
মহেন্দ্রমিব পৌলস্ত্যং দেবগন্ধর্বয়োষিতঃ॥১০॥
দীপিকাঃ কাঞ্চনীঃ কাশ্চিজ্জগৃহুস্তত্র যোষিতঃ।
বালব্যজনহস্তাশ্চ তালবৃন্তানি চাপরাঃ॥১১॥
কাঞ্চনৈশ্চৈব ভৃঙ্গারৈর্জহ্রুঃ সলিলমগ্রতঃ।
মণ্ডলাগ্রা বৃসীশ্চৈব গৃহ্যান্যাঃ পৃষ্ঠতো যয়ুঃ॥১২॥
কাচিদ্রত্নময়ীং পাত্রীং পূর্ণাং পানস্য ভ্রাজতীম্ ।
দক্ষিণা দক্ষিণেনৈব তদা জগ্রাহ পাণিনা ॥১৩॥
রাজহংসপ্রতীকাশং ছত্রং পূর্ণশশিপ্রভম্ ।
সৌবর্ণদণ্ডমপরা গৃহীত্বা পৃষ্ঠতো যয়ৌ ॥১৪॥
নিদ্রামদপরীতাক্ষ্যো রাবণস্যোত্তমস্ত্রিয়ঃ।
অনুজগ্মুঃ পতিং বীরং ঘনং বিদ্যুল্লতা ইব ॥১৫॥
ব্যাবিদ্ধহারকেয়ূরাঃ সমামৃদিতবর্ণকাঃ।
সমাগলিতকেশান্তাঃ সস্বেদবদনাস্তথাঃ॥১৬॥
ঘূর্ণন্ত্যো মদশেষেণ নিদ্রয়া চ শুভাননাঃ।
স্বেদক্লিষ্টাঙ্গকুসুমাঃ সুমাল্যাকুলমূর্ধজাঃ॥১৭॥
প্রয়ান্তং নৈর্ঋতপতিং নার্যো মদিরলোচনাঃ।
বহুমানাচ্চ কামাচ্চ প্রিয়ভার্যাস্তমন্বয়ুঃ॥১৮॥
স চ কামপরাধীনঃ পতিস্তাসাং মহাবলঃ।
সীতাসক্তমনা মন্দো মন্দাঞ্চিতগতির্বভৌ ॥১৯॥
ততঃ কাঞ্চীনিনাদং চ নূপুরাণাং চ নিঃস্বনম্ ।
শুশ্রাব পরমস্ত্রীণাং কপির্মারুতনন্দনঃ॥২০॥
তং চাপ্রতিমকর্মাণমচিন্ত্যবলপৌরুষম্ ।
দ্বারদেশমনুপ্রাপ্তং দদর্শ হনুমান্ কপিঃ॥২১॥
দীপিকাভিরনেকাভিঃ সমন্তাদবভাসিতম্ ।
গন্ধতৈলাবসিক্তাভির্ধ্রিয়মাণাভিরগ্রতঃ॥২২॥
কামদর্পমদৈর্যুক্তং জিহ্মতাম্রায়তেক্ষণম্ ।
সমক্ষমিব কন্দর্পমপবিদ্ধশরাসনম্ ॥২৩॥
মথিতামৃতফেনাভমরজো বস্ত্রমুত্তমম্ ।
সপুষ্পমবকর্ষন্তং বিমুক্তং সক্তমঙ্গদে ॥২৪॥
তং পত্রবিটপে লীনঃ পত্রপুষ্পশতাবৃতঃ।
সমীপমুপসঙ্ক্রান্তং বিজ্ঞাতুমুপচক্রমে ॥২৫॥
অবেক্ষমাণস্তু তদা দদর্শ কপিকুঞ্জরঃ।
রূপয়ৌবনসম্পন্না রাবণস্য বরস্ত্রিয়ঃ॥২৬॥
তাভিঃ পরিবৃতো রাজা সুরূপাভির্মহায়শাঃ।
তন্মৃগদ্বিজসঙ্ঘুষ্টং প্রবিষ্টঃ প্রমদাবনম্ ॥২৭॥
ক্ষীবো বিচিত্রাভরণঃ শঙ্কুকর্ণো মহাবলঃ।
তেন বিশ্রবসঃ পুত্রঃ স দৃষ্টো রাক্ষসাধিপঃ॥২৮॥
বৃতঃ পরমনারীভিস্তারাভিরিব চন্দ্রমাঃ।
তং দদর্শ মহাতেজাস্তেজোবন্তং মহাকপিঃ॥২৯॥
রাবণোঽয়ং মহাবাহুরিতি সঞ্চিন্ত্য বানরঃ।
সোঽয়মেব পুরা শেতে পুরমধ্যে গৃহোত্তমে ।
অবপ্লুতো মহাতেজা হনূমান্মারুতাত্মজঃ॥৩০॥
স তথাপ্যুগ্রতেজাঃ স নির্ধূতস্তস্য তেজসা ।
পত্রে গুহ্যান্তরে সক্তো মতিমান্ সংবৃতোঽভবৎ ॥৩১॥
স তামসিতকেশান্তাং সুশ্রোণীং সংহতস্তনীম্ ।
দিদৃক্ষুরসিতাপাঙ্গীমুপাবর্তত রাবণঃ॥৩২॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে অষ্টাদশঃ সর্গঃ