অথ একোনবিংশঃ সর্গঃ
তস্মিন্নেব ততঃ কালে রাজপুত্রী ত্বনিন্দিতা ।
রূপয়ৌবনসম্পন্নং ভূষণোত্তমভূষিতম্ ॥১॥
ততো দৃষ্ট্বৈব বৈদেহী রাবণং রাক্ষসাধিপম্ ।
প্রাবেপত বরারোহা প্রবাতে কদলী যথা ॥২॥
ঊরুভ্যামুদরং ছাদ্য বাহুভ্যাং চ পয়োধরৌ ।
উপবিষ্টা বিশালাক্ষী রুদতী বরবর্ণিনী ॥৩॥
দশগ্রীবস্তু বৈদেহীং রক্ষিতাং রাক্ষসীগণৈঃ।
দদর্শ দীনাং দুঃখার্তাং নাবং সন্নামিবার্ণবে ॥৪॥
অসংবৃতায়ামাসীনাং ধরণ্যাং সংশিতব্রতাম্ ।
ছিন্নাং প্রপতিতাং ভূমৌ শাখামিব বনস্পতেঃ॥৫॥
মলমণ্ডনদিগ্ধাঙ্গীং মণ্ডনার্হামমণ্ডনাম্ ।
মৃণালী পঙ্কদিগ্ধেব বিভাতি ন বিভাতি চ ॥৬॥
সমীপং রাজসিংহস্য রামস্য বিদিতাত্মনঃ।
সঙ্কল্পহয়সংয়ুক্তৈর্যান্তীমিব মনোরথৈঃ॥৭॥
শুষ্যন্তীং রুদতীমেকাং ধ্যানশোকপরায়ণাম্ ।
দুঃখস্যান্তমপশ্যন্তীং রামাং রামমনুব্রতাম্ ॥৮॥
চেষ্টমানামথাবিষ্টাং পন্নগেন্দ্রবধূমিব ।
ধূপ্যমানাং গ্রহেণেব রোহিণীং ধূমকেতুনা ॥৯॥
বৃত্তশীলে কুলে জাতামাচারবতি ধার্মিকে ।
পুনঃ সংস্কারমাপন্নাং জাতমিব চ দুষ্কুলে ॥১০॥
সন্নামিব মহাকীর্তিং শ্রদ্ধামিব বিমানিতাম্ ।
প্রজ্ঞামিব পরিক্ষীণামাশাং প্রতিহতামিব ॥১১॥
আয়তীমিব বিধ্বস্তামাজ্ঞাং প্রতিহতামিব ।
দীপ্তামিব দিশং কালে পূজামপহতামিব ॥১২॥
পৌর্ণমাসীমিব নিশাং তমোগ্রস্তেন্দুমণ্ডলাম্ ।
পদ্মিনীমিব বিধ্বস্তাং হতশূরাং চমূমিব ॥১৩॥
প্রভামিব তমোধ্বস্তামুপক্ষীণামিবাপগাম্ ।
বেদীমিব পরামৃষ্টাং শান্তামগ্নিশিখামিব ॥১৪॥
উৎকৃষ্টপর্ণকমলাং বিত্রাসিতবিহঙ্গমাম্ ।
হস্তিহস্তপরামৃষ্টামাকুলামিব পদ্মিনীম্ ॥১৫॥
পতিশোকাতুরাং শুষ্কাং নদীং বিস্রাবিতামিব ।
পরয়া মৃজয়া হীনাং কৃষ্ণপক্ষে নিশামিব ॥১৬॥
সুকুমারীং সুজাতাঙ্গীং রত্নগর্ভগৃহোচিতাম্ ।
তপ্যমানামিবোষ্ণেন মৃণালীমচিরোদ্ধৃতাম্ ॥১৭॥
গৃহীতামালিতাং স্তম্ভে যূথপেন বিনাকৃতাম্ ।
নিঃশ্বসন্তীং সুদুঃখার্তাং গজরাজবধূমিব ॥১৮॥
একয়া দীর্ঘয়া বেণ্যা শোভমানাময়ত্নতঃ।
নীলয়া নীরদাপায়ে বনরাজ্যা মহীমিব ॥১৯॥
উপবাসেন শোকেন ধ্যানেন চ ভয়েন চ ।
পরিক্ষীণাং কৃশাং দীনামল্পাহারাং তপোধনাম্ ॥২০॥
আয়াচমানাং দুঃখার্তাং প্রাঞ্জলিং দেবতামিব ।
ভাবেন রঘুমুখ্যস্য দশগ্রীবপরাভবম্ ॥২১॥
সমীক্ষমাণাং রুদতীমনিন্দিতাং
	সুপক্ষ্মতাম্রায়তশুক্ললোচনাম্ ।
অনুব্রতাং রামমতীব মৈথিলীং
	প্রলোভয়ামাস বধায় রাবণঃ॥২২॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একোনবিংশঃ সর্গঃ