অথ বিংশঃ সর্গঃ স তাং পরিবৃতাং দীনাং নিরানন্দাং তপস্বিনীম্ । সাকারৈর্মধুরৈর্বাক্যৈর্ন্যদর্শয়ত রাবণঃ॥১॥ মাং দৃষ্ট্বা নাগনাসোরুগূহমানা স্তনোদরম্ । অদর্শনমিবাত্মানং ভয়ান্নেতুং ত্বমিচ্ছসি ॥২॥ কাময়ে ত্বাং বিশালাক্ষি বহুমন্যস্ব মাং প্রিয়ে । সর্বাঙ্গগুণসম্পন্নে সর্বলোকমনোহরে ॥৩॥ নেহ কেচিন্মনুষ্যা বা রাক্ষসাঃ কামরূপিণঃ। ব্যপসর্পতু তে সীতে ভয়ং মত্তঃ সমুত্থিতম্ ॥৪॥ স্বধর্মো রক্ষসাং ভীরু সর্বদৈব ন সংশয়ঃ। গমনং বা পরস্ত্রীণাং হরণং সম্প্রমথ্য বা ॥৫॥ এবং চৈবমকামাং ত্বাং ন চ স্প্রক্ষ্যামি মৈথিলি । কামং কামঃ শরীরে মে যথাকামং প্রবর্ততাম্ ॥৬॥ দেবি নেহ ভয়ং কার্যং ময়ি বিশ্বসিহি প্রিয়ে । প্রণয়স্ব চ তত্ত্বেন মৈবং ভূঃ শোকলালসা ॥৭॥ একবেণী ধরাশয়্যা ধ্যানং মলিনমম্বরম্ । অস্থানেঽপ্যুপবাসশ্চ নৈতান্যৌপয়িকানি তে ॥৮॥ বিচিত্রাণি চ মাল্যানি চন্দনান্যগরূণি চ । বিবিধানি চ বাসাংসি দিব্যান্যাভরণানি চ ॥৯॥ মহার্হাণি চ পানানি শয়নান্যাসনানি চ । গীতং নৃত্যং চ বাদ্যং চ লভ মাং প্রাপ্য মৈথিলি ॥১০॥ স্ত্রীরত্নমসি মৈবং ভূঃ কুরু গাত্রেষু ভূষণম্ । মাং প্রাপ্য হি কথং বা স্যাস্ত্বমনর্হা সুবিগ্রহে ॥১১॥ ইদং তে চারু সঞ্জাতং যৌবনং হ্যতিবর্ততে । যদতীতং পুনর্নৈতি স্রোতঃ স্রোতস্বিনামিব ॥১২॥ ত্বাং কৃত্বোপরতো মন্যে রূপকর্তা স বিশ্বকৃৎ । নহি রূপোপমা হ্যন্যা তবাস্তি শুভদর্শনে ॥১৩॥ ত্বাং সমাসাদ্য বৈদেহি রূপয়ৌবনশালিনীম্ । কঃ পুনর্নাতিবর্তেত সাক্ষাদপি পিতামহঃ॥১৪॥ যদ্যৎপশ্যামি তে গাত্রং শীতাংশুসদৃশাননে । তস্মিংস্তস্মিন্পৃথুশ্রোণি চক্ষুর্মম নিবধ্যতে ॥১৫॥ ভব মৈথিলি ভার্যা মে মোহমেতং বিসর্জয় । বহ্বীনামুত্তমস্ত্রীণাং মমাগ্রমহিষী ভব ॥১৬॥ লোকেভ্যো যানি রত্নানি সম্প্রমথ্যাহৃতানি মে । তানি তে ভীরু সর্বাণি রাজ্যং চৈব দদামি তে ॥১৭॥ বিজিত্য পৃথিবীং সর্বাং নানানগরমালিনীম্ জনকায় প্রদাস্যামি তব হেতোর্বিলাসিনি ॥১৮॥ নেহ পশ্যামি লোকেঽন্যং যো মে প্রতিবলো ভবেৎ । পশ্য মে সুমহদ্বীর্যমপ্রতিদ্বন্দ্বমাহবে ॥১৯॥ অসকৃৎসংয়ুগে ভগ্না ময়া বিমৃদিতধ্বজাঃ। অশক্তাঃ প্রত্যনীকেষু স্থাতুং মম সুরাসুরাঃ॥২০॥ ইচ্ছ মাং ক্রিয়তামদ্য প্রতিকর্ম তবোত্তমম্ । সুপ্রভাণ্যবসজ্জন্তাং তবাঙ্গে ভূষণানি হি ॥২১॥ সাধু পশ্যামি তে রূপং সুয়ুক্তং প্রতিকর্মণা । প্রতিকর্মাভিসংয়ুক্তা দাক্ষিণ্যেন বরাননে ॥২২॥ ভুঙ্ক্ষ্ব ভোগান্যথাকামং পিব ভীরু রমস্ব চ । যথেষ্টং চ প্রয়চ্ছ ত্বং পৃথিবীং বা ধনানি চ ॥২৩॥ ললস্ব ময়ি বিস্রব্ধা ধৃষ্টমাজ্ঞাপয়স্ব চ । মৎপ্রসাদাল্ললন্ত্যাশ্চ ললতাং বান্ধবস্তব ॥২৪॥ ঋদ্ধিং মমানুপশ্য ত্বং শ্রিয়ং ভদ্রে যশস্বিনি । কিং করিষ্যসি রামেণ সুভগে চীরবাসিনা ॥২৫॥ নিক্ষিপ্তবিজয়ো রামো গতশ্রীর্বনগোচরঃ। ব্রতী স্থণ্ডিলশায়ী চ শঙ্কে জীবতি বা ন বা ॥২৬॥ ন হি বৈদেহি রামস্ত্বাং দ্রষ্টুং বাপ্যুপলভ্যতে । পুরো বলাকৈরসিতৈর্মেঘৈর্জ্যোৎস্নামিবাবৃতাম্ ॥২৭॥ ন চাপি মম হস্তাত্ত্বাং প্রাপ্তুমর্হতি রাঘবঃ। হিরণ্যকশিপুঃ কীর্তিমিন্দ্রহস্তগতামিব ॥২৮॥ চারুস্মিতে চারুদতি চারুনেত্রে বিলাসিনি । মনো হরসি মে ভীরু সুপর্ণঃ পন্নগং যথা ॥২৯॥ ক্লিষ্টকৌশেয়বসনাং তন্বীমপ্যনলঙ্কৃতাম্ । ত্বাং দৃষ্ট্বা স্বেষু দারেষু রতিং নোপলভাম্যহম্ ॥৩০॥ অন্তঃপুরনিবাসিন্যঃ স্ত্রিয়ঃ সর্বগুণান্বিতাঃ। যাবত্যো মম সর্বাসামৈশ্বর্যং কুরু জানকি ॥৩১॥ মম হ্যসিতকেশান্তে ত্রৈলোক্যপ্রবরস্ত্রিয়ঃ। তাস্ত্বাং পরিচরিষ্যন্তি শ্রিয়মপ্সরসো যথা ॥৩২॥ যানি বৈশ্রবণে সুভ্রু রত্নানি চ ধনানি চ । তানি লোকাংশ্চ সুশ্রোণি ময়া ভুঙ্ক্ষ্ব যথাসুখম্ ॥৩৩॥ ন রামস্তপসা দেবি ন বলেন চ বিক্রমৈঃ। ন ধনেন ময়া তুল্যস্তেজসা যশসাপি বা ॥৩৪॥ পিব বিহর রমস্ব ভুঙ্ক্ষ্ব ভোগান্ ধননিচয়ং প্রদিশামি মেদিনীং চ । ময়ি লল ললনে যথাসুখং ত্বং ত্বয়ি চ সমেত্য ললন্তু বান্ধবাস্তে ॥৩৫॥ কুসুমিততরুজালসন্ততানি ভ্রমরয়ুতানি সমুদ্রতীরজানি । কনকবিমলহারভূষিতাঙ্গী বিহর ময়া সহ ভীরু কাননানি ॥৩৬॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে বিংশঃ সর্গঃ