অথ একবিংশঃ সর্গঃ তস্য তদ্বচনং শ্রুত্বা সীতা রৌদ্রস্য রক্ষসঃ। আর্তা দীনস্বরা দীনং প্রত্যুবাচ ততঃ শনৈঃ॥১॥ দুঃখার্তা রুদতী সীতা বেপমানা তপস্বিনী । চিন্তয়ন্তী বরারোহা পতিমেব পতিব্রতা ॥২॥ তৃণমন্তরতঃ কৃত্বা প্রত্যুবাচ শুচিস্মিতা । নিবর্তয় মনো মত্তঃ স্বজনে ক্রিয়তাং মনঃ॥৩॥ ন মাং প্রার্থয়িতুং যুক্তস্ত্বং সিদ্ধিমিব পাপকৃৎ । অকার্যং ন ময়া কার্যমেকপত্ন্যা বিগর্হিতম্ ॥৪॥ কুলং সম্প্রাপ্তয়া পুণ্যং কুলে মহতি জাতয়া । এবমুক্ত্বা তু বৈদেহী রাবণং তং যশস্বিনী ॥৫॥ রাবণং পৃষ্ঠতঃ কৃত্বা ভূয়ো বচনমব্রবীৎ । নাহমৌপয়িকী ভার্যা পরভার্যা সতী তব ॥৬॥ সাধু ধর্মমবেক্ষস্ব সাধু সাধুব্রতং চর । যথা তব তথান্যেষাং রক্ষ্যা দারা নিশাচর ॥৭॥ আত্মানমুপমাং কৃত্বা স্বেষু দারেষু রম্যতাম্ । অতুষ্টং স্বেষু দারেষু চপলং চপলেন্দ্রিয়ম্ । নয়ন্তি নিকৃতিপ্রজ্ঞং পরদারাঃ পরাভবম্ ॥৮॥ ইহ সন্তো ন বা সন্তি সতো বা নানুবর্তসে । যথা হি বিপরীতা তে বুদ্ধিরাচারবর্জিতা ॥৯॥ বচো মিথ্যা প্রণীতাত্মা পথ্যমুক্তং বিচক্ষণৈঃ। রাক্ষসানামভাবায় ত্বং বা ন প্রতিপদ্যসে ॥১০॥ অকৃতাত্মানমাসাদ্য রাজানমনয়ে রতম্ । সমৃদ্ধানি বিনশ্যন্তি রাষ্ট্রাণি নগরাণি চ ॥১১॥ তথৈব ত্বাং সমাসাদ্য লঙ্কা রত্নৌঘ সঙ্কুলা । অপরাধাত্তবৈকস্য নচিরাদ্বিনশিষ্যতি ॥১২॥ স্বকৃতৈর্হন্যমানস্য রাবণাদীর্ঘদর্শিনঃ। অভিনন্দন্তি ভূতানি বিনাশে পাপকর্মণঃ॥১৩॥ এবং ত্বাং পাপকর্মাণং বক্ষ্যন্তি নিকৃতা জনাঃ। দিষ্ট্যৈতদ্ব্যসনং প্রাপ্তো রৌদ্র ইত্যেব হর্ষিতাঃ॥১৪॥ শক্যা লোভয়িতুং নাহমৈশ্বর্যেণ ধনেন বা । অনন্যা রাঘবেণাহং ভাস্করেণ যথা প্রভা ॥১৫॥ উপধায় ভুজং তস্য লোকনাথস্য সৎকৃতম্ । কথং নামোপধাস্যামি ভুজমন্যস্য কস্যচিৎ ॥১৬॥ অহমৌপয়িকী ভার্যা তস্যৈব চ ধরাপতেঃ। ব্রতস্নাতস্য বিদ্যেব বিপ্রস্য বিদিতাত্মনঃ॥১৭॥ সাধু রাবণ রামেণ মাং সমানয় দুঃখিতাম্ । বনে বাসিতয়া সার্ধং করেণ্বেব গজাধিপম্ ॥১৮॥ মিত্রমৌপয়িকং কর্তুং রামঃ স্থানং পরীপ্সতা । বন্ধং চানিচ্ছতা ঘোরং ত্বয়াসৌ পুরুষর্ষভঃ॥১৯॥ বিদিতঃ স হি ধর্মজ্ঞঃ শরণাগতবৎসলঃ। তেন মৈত্রী ভবতু তে যদি জীবিতুমিচ্ছসি ॥২০॥ প্রসাদয়স্ব ত্বং চৈনং শরণাগতবৎসলম্ । মাং চাস্মৈ প্রয়তো ভূত্বা নির্যাতয়িতুমর্হসি ॥২১॥ এবং হি তে ভবেৎ স্বস্তি সম্প্রদায় রঘূত্তমে । অন্যথা ত্বং হি কুর্বাণঃ পরাং প্রাপ্স্যসি চাপদম্ ॥২২॥ বর্জয়েদ্বজ্রমুৎসৃষ্টং বর্জয়েদন্তকশ্চিরম্ । ত্বদ্বিধং ন তু সঙ্ক্রুদ্ধো লোকনাথঃ স রাঘবঃ॥২৩॥ রামস্য ধনুষঃ শব্দং শ্রোষ্যসি ত্বং মহাস্বনম্ । শতক্রতুবিসৃষ্টস্য নির্ঘোষমশনেরিব ॥২৪॥ ইহ শীঘ্রং সুপর্বাণো জ্বলিতাস্যা ইবোরগাঃ। ইষবো নিপতিষ্যন্তি রামলক্ষ্মণলক্ষিতাঃ॥২৫॥ রক্ষাংসি নিহনিষ্যন্তঃ পুর্যামস্যাং ন সংশয়ঃ। অসম্পাতং করিষ্যন্তি পতন্তঃ কঙ্কবাসসঃ॥২৬॥ রাক্ষসেন্দ্রমহাসর্পান্স রামগরুডো মহান্ । উদ্ধরিষ্যতি বেগেন বৈনতেয় ইবোরগান্ ॥২৭॥ অপনেষ্যতি মাং ভর্তা ত্বত্তঃ শীঘ্রমরিন্দমঃ। অসুরেভ্যঃ শ্রিয়ং দীপ্তাং বিষ্ণুস্ত্রিভিরিব ক্রমৈঃ॥২৮॥ জনস্থানে হতস্থানে নিহতে রক্ষসাং বলে । অশক্তেন ত্বয়া রক্ষঃ কৃতমেতদসাধু বৈ ॥২৯॥ আশ্রমং তত্তয়োঃ শূন্যং প্রবিশ্য নরসিংহয়োঃ। গোচরং গতয়োর্ভ্রাত্রোরপনীতা ত্বয়াধম ॥৩০॥ ন হি গন্ধমুপাঘ্রায় রামলক্ষ্মণয়োস্ত্বয়া । শক্যং সন্দর্শনে স্থাতুং শুনা শার্দূলয়োরিব ॥৩১॥ তস্য তে বিগ্রহে তাভ্যাং যুগগ্রহণমস্থিরম্ । বৃত্রস্যেবেন্দ্রবাহুভ্যাং বাহোরেকস্য বিগ্রহে ॥৩২॥ ক্ষিপ্রং তব স নাথো মে রামঃ সৌমিত্রিণা সহ । তোয়মল্পমিবাদিত্যঃ প্রাণানাদাস্যতে শরৈঃ॥৩৩॥ গিরিং কুবেরস্য গতোঽথবালয়ং সভাং গতো বা বরুণস্য রাজ্ঞঃ। অসংশয়ং দাশরথের্বিমোক্ষ্যসে মহাদ্রুমঃ কালহতোঽশনেরিব ॥৩৪॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একবিংশঃ সর্গঃ