অথ দ্বাবিংশঃ সর্গঃ সীতায়া বচনং শ্রুত্বা পরুষং রাক্ষসেশ্বরঃ। প্রত্যুবাচ ততঃ সীতাং বিপ্রিয়ং প্রিয়দর্শনাম্ ॥১॥ যথা যথা সান্ত্বয়িতা বশ্যঃ স্ত্রীণাং তথা তথা । যথা যথা প্রিয়ং বক্তা পরিভূতস্তথা তথা ॥২॥ সংনিয়চ্ছতি মে ক্রোধং ত্বয়ি কামঃ সমুত্থিতঃ। দ্রবতো মার্গমাসাদ্য হয়ানিব সুসারথিঃ॥৩॥ বামঃ কামো মনুষ্যাণাং যস্মিন্কিল নিবধ্যতে । জনে তস্মিংস্ত্বনুক্রোশঃ স্নেহশ্চ কিল জায়তে ॥৪॥ এতস্মাৎকারণান্ন ত্বাং ঘাতয়ামি বরাননে । বধার্হামবমানার্হাং মিথ্যা প্রব্রজনে রতাম্ ॥৫॥ পরুষাণি হি বাক্যানি যানি যানি ব্রবীষি মাম্ । তেষু তেষু বধো যুক্তস্তব মৈথিলি দারুণঃ॥৬॥ এবমুক্ত্বা তু বৈদেহীং রাবণো রাক্ষসাধিপঃ। ক্রোধসংরম্ভসংয়ুক্তঃ সীতামুত্তরমব্রবীৎ ॥৭॥ দ্বৌ মাসৌ রক্ষিতব্যৌ মে যোঽবধিস্তে ময়া কৃতঃ। ততঃ শয়নমারোহ মম ত্বং বরবর্ণিনি ॥৮॥ দ্বাভ্যামূর্ধ্বং তু মাসাভ্যাং ভর্তারং মামনিচ্ছতীম্ । মম ত্বাং প্রাতরাশার্থে সূদাশ্ছেৎস্যন্তি খণ্ডশঃ॥৯॥ তাং ভর্ত্স্যমানাং সম্প্রেক্ষ্য রাক্ষসেন্দ্রেণ জানকীম্ । দেবগন্ধর্বকন্যাস্তা বিষেদুর্বিকৃতেক্ষণাঃ॥১০॥ ওষ্ঠপ্রকারৈরপরা নেত্রৈর্বক্ত্রৈস্তথাপরাঃ। সীতামাশ্বাসয়ামাসুস্তর্জিতাং তেন রক্ষসা ॥১১॥ তাভিরাশ্বাসিতা সীতা রাবণং রাক্ষসাধিপম্ । উবাচাত্মহিতং বাক্যং বৃত্তশৌটীর্যগর্বিতম্ ॥১২॥ নূনং ন তে জনঃ কশ্চিদস্মিন্নিঃশ্রেয়সি স্থিতঃ। নিবারয়তি যো ন ত্বাং কর্মণোঽস্মাদ্বিগর্হিতাৎ ॥১৩॥ মাং হি ধর্মাত্মনঃ পত্নীং শচীমিব শচীপতেঃ। ত্বদন্যস্ত্রিষু লোকেষু প্রার্থয়েন্মনসাপি কঃ॥১৪॥ রাক্ষসাধম রামস্য ভার্যামমিততেজসঃ। উক্তবানসি যৎপাপং ক্ব গতস্তস্য মোক্ষ্যসে ॥১৫॥ যথা দৃপ্তশ্চ মাতঙ্গঃ শশশ্চ সহিতৌ বনে । তথা দ্বিরদবদ্রামস্ত্বং নীচ শশবৎস্মৃতঃ॥১৬॥ স ত্বমিক্ষ্বাকুনাথং বৈ ক্ষিপন্নিহ ন লজ্জসে । চক্ষুষো বিষয়ে তস্য ন যাবদুপগচ্ছসি ॥১৭॥ ইমে তে নয়নে ক্রূরে বিকৃতে কৃষ্ণপিঙ্গলে । ক্ষিতৌ ন পতিতে কস্মান্মামনার্য নিরীক্ষতঃ॥১৮॥ তস্য ধর্মাত্মনঃ পত্নী স্নুষা দশরথস্য চ । কথং ব্যাহরতো মাং তে ন জিহ্বা পাপ শীর্যতি ॥১৯॥ অসন্দেশাত্তু রামস্য তপসশ্চানুপালনাৎ । ন ত্বাং কুর্মি দশগ্রীব ভস্ম ভস্মার্হতেজসা ॥২০॥ নাপহর্তুমহং শক্যা তস্য রামস্য ধীমতঃ। বিধিস্তব বধার্থায় বিহিতো নাত্র সংশয়ঃ॥২১॥ শূরেণ ধনদভ্রাতা বলৈঃ সমুদিতেন চ । অপোহ্য রামং কস্মাঞ্চিদ্ দারচৌর্যং ত্বয়া কৃতম্ ॥২২॥ সীতায়া বচনং শ্রুত্বা রাবণো রাক্ষসাধিপঃ। বিবৃত্য নয়নে ক্রূরে জানকীমন্ববৈক্ষত ॥২৩॥ নীলজীমূতসঙ্কাশো মহাভুজশিরোধরঃ। সিংহসত্ত্বগতিঃ শ্রীমান্ দীপ্তজিহ্বোগ্রলোচনঃ॥২৪॥ চলাগ্রমুকুটপ্রাংশুশ্চিত্রমাল্যানুলেপনঃ। রক্তমাল্যাম্বরধরস্তপ্তাঙ্গদবিভূষণঃ॥২৫॥ শ্রোণীসূত্রেণ মহতা মেচকেন সুসংবৃতঃ। অমৃতোৎপাদনে নদ্ধো ভুজঙ্গেনেব মন্দরঃ॥২৬॥ তাভ্যাং স পরিপূর্ণাভ্যাং ভুজাভ্যাং রাক্ষসেশ্বরঃ। শুশুভেঽচলসঙ্কাশঃ শৃঙ্গাভ্যামিব মন্দরঃ॥২৭॥ তরুণাদিত্যবর্ণাভ্যাং কুণ্ডলাভ্যাং বিভূষিতঃ। রক্তপল্লবপুষ্পাভ্যামশোকাভ্যামিবাচলঃ॥২৮॥ স কল্পবৃক্ষপ্রতিমো বসন্ত ইব মূর্তিমান্ । শ্মশানচৈত্যপ্রতিমো ভূষিতোঽপি ভয়ঙ্করঃ॥২৯॥ অবেক্ষমাণো বৈদেহীং কোপসংরক্তলোচনঃ। উবাচ রাবণঃ সীতাং ভুজঙ্গ ইব নিঃশ্বসন্ ॥৩০॥ অনয়েনাভিসম্পন্নমর্থহীনমনুব্রতে । নাশয়াম্যহমদ্য ত্বাং সূর্যঃ সন্ধ্যামিবৌজসা ॥৩১॥ ইত্যুক্ত্বা মৈথিলীং রাজা রাবণঃ শত্রুরাবণঃ। সন্দদর্শ ততঃ সর্বা রাক্ষসীর্ঘোরদর্শনাঃ॥৩২॥ একাক্ষীমেককর্ণাং চ কর্ণপ্রাবরণাং তথা । গোকর্ণীং হস্তিকর্ণীং চ লম্বকর্ণীমকর্ণিকাম্ ॥৩৩॥ হস্তিপদ্যশ্বপদ্যৌ চ গোপদীং পাদচূলিকাম্ । একাক্ষীমেকপাদীং চ পৃথুপাদীমপাদিকাম্ ॥৩৪॥ অতিমাত্রশিরোগ্রীবামতিমাত্রকুচোদরীম্ । অতিমাত্রাস্যনেত্রাং চ দীর্ঘজিহ্বানখামপি ॥৩৫॥ অনাসিকাং সিংহমুখীং গোমুখীং সূকরীমুখীম্ । যথা মদ্বশগা সীতা ক্ষিপ্রং ভবতি জানকী ॥৩৬॥ তথা কুরুত রাক্ষস্যঃ সর্বাঃ ক্ষিপ্রং সমেত্য বা । প্রতিলোমানুলোমৈশ্চ সামদানাদিভেদনৈঃ॥৩৭॥ আবর্জয়ত বৈদেহীং দণ্ডস্যোদ্যমনেন চ । ইতি প্রতিসমাদিশ্য রাক্ষসেন্দ্রঃ পুনঃ পুনঃ॥৩৮॥ কামমন্যুপরীতাত্মা জানকীং প্রতি গর্জত । উপগম্য ততঃ ক্ষিপ্রং রাক্ষসী ধান্যমালিনী ॥৩৯॥ পরিষ্বজ্য দশগ্রীবমিদং বচনমব্রবীৎ । ময়া ক্রীড মহারাজ সীতয়া কিং তবানয়া ॥৪০॥ বিবর্ণয়া কৃপণয়া মানুষ্যা রাক্ষসেশ্বর । নূনমস্যাং মহারাজ ন দেবা ভোগসত্তমান্ ॥৪১॥ বিদধত্যমরশ্রেষ্ঠাস্তব বাহুবলার্জিতান্ । অকামাং কাময়ানস্য শরীরমুপতপ্যতে ॥৪২॥ ইচ্ছতীং কাময়ানস্য প্রীতির্ভবতি শোভনা । এবমুক্তস্তু রাক্ষস্যা সমুৎক্ষিপ্তস্ততো বলী । প্রহসন্মেঘসঙ্কাশো রাক্ষসঃ স ন্যবর্তত ॥৪৩॥ প্রস্থিতঃ স দশগ্রীবঃ কম্পয়ন্নিব মেদিনীম্ । জ্বলদ্ভাস্করসঙ্কাশং প্রবিবেশ নিবেশনম্ ॥৪৪॥ দেবগন্ধর্বকন্যাশ্চ নাগকন্যাশ্চ তাস্ততঃ। পরিবার্য দশগ্রীবং প্রবিশুস্তা গৃহোত্তমম্ ॥৪৫॥ স মৈথিলীং ধর্মপরামবস্থিতাং প্রবেপমানাং পরিভর্ত্স্য রাবণঃ। বিহায় সীতাং মদনেন মোহিতঃ স্বমেব বেশ্ম প্রবিবেশ রাবণঃ॥৪৬॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে দ্বাবিংশঃ সর্গঃ