অথ ত্রয়োবিংশঃ সর্গঃ
ইত্যুক্ত্বা মৈথিলীং রাজা রাবণঃ শত্রুরাবণঃ।
সন্দিশ্য চ ততঃ সর্বা রাক্ষসীর্নির্জগাম হ ॥১॥
নিষ্ক্রান্তে রাক্ষসেন্দ্রে তু পুনরন্তঃপুরং গতে ।
রাক্ষস্যো ভীমরূপাস্তাঃ সীতাং সমভিদুদ্রুবুঃ॥২॥
ততঃ সীতামুপাগম্য রাক্ষস্যঃ ক্রোধমূর্ছিতাঃ।
পরং পরুষয়া বাচা বৈদেহীমিদমব্রুবন্ ॥৩॥
পৌলস্ত্যস্য বরিষ্ঠস্য রাবণস্য মহাত্মনঃ।
দশগ্রীবস্য ভার্যাত্বং সীতে ন বহু মন্যসে ॥৪॥
ততস্ত্বেকজটা নাম রাক্ষসী বাক্যমব্রবীৎ ।
আমন্ত্র্য ক্রোধতাম্রাক্ষী সীতাং করতলোদরীম্ ॥৫॥
প্রজাপতীনাং ষণ্ণাং তু চতুর্থোঽয়ং প্রজাপতিঃ।
মানসো ব্রহ্মণঃ পুত্রঃ পুলস্ত্য ইতি বিশ্রুতঃ॥৬॥
পুলস্ত্যস্য তু তেজস্বী মহর্ষির্মানসঃ সুতঃ।
নাম্না স বিশ্রবা নাম প্রজাপতিসমপ্রভঃ॥৭॥
তস্য পুত্রো বিশালাক্ষি রাবণঃ শত্রুরাবণঃ।
তস্য ত্বং রাক্ষসেন্দ্রস্য ভার্যা ভবিতুমর্হসি ॥৮॥
ময়োক্তং চারুসর্বাঙ্গি বাক্যং কিং নানুমন্যসে ।
ততো হরিজটা নাম রাক্ষসী বাক্যমব্রবীৎ ॥৯॥
বিবৃত্য নয়নে কোপান্মার্জারসদৃশেক্ষণা ।
যেন দেবাস্ত্রয়স্ত্রিংশদ্দেবরাজশ্চ নির্জিতঃ॥১০॥
তস্য ত্বং রাক্ষসেন্দ্রস্য ভার্যা ভবিতুমর্হসি ।
বীর্যোৎসিক্তস্য শূরস্য সঙ্গ্রামেষ্বনিবর্তিনঃ।
বলিনো বীর্যযুক্তস্য ভার্যা ত্বং কিং ন লিপ্সসে ॥১১॥
প্রিয়াং বহুমতাং ভার্যাং ত্যক্ত্বা রাজা মহাবলঃ।
সর্বাসাং চ মহাভাগাং ত্বামুপৈষ্যতি রাবণঃ॥১২॥
সমৃদ্ধং স্ত্রীসহস্রেণ নানারত্নোপশোভিতম্ ।
অন্তঃপুরং তদুৎসৃজ্য ত্বামুপৈষ্যতি রাবণঃ॥১৩॥
অন্যা তু বিকটা নাম রাক্ষসী বাক্যমব্রবীৎ ।
অসকৃদ্ ভীমবীর্যেণ নাগা গন্ধর্বদানবাঃ।
নির্জিতাঃ সমরে যেন স তে পার্শ্বমুপাগতঃ॥১৪॥
তস্য সর্বসমৃদ্ধস্য রাবণস্য মহাত্মনঃ।
কিমর্থং রাক্ষসেন্দ্রস্য ভার্যাত্বং নেচ্ছসেঽধমে ॥১৫॥
ততস্তাং দুর্মুখী নাম রাক্ষসী বাক্যমব্রবীৎ ।
যস্য সূর্যো ন তপতি ভীতো যস্য স মারুতঃ।
ন বাতি স্মায়তাপাঙ্গি কিং ত্বং তস্য ন তিষ্ঠসে ॥১৬॥
পুষ্পবৃষ্টিং চ তরবো মুমুচুর্যস্য বৈ ভয়াৎ ।
শৈলাঃ সুস্ত্রুবুঃ পানীয়ং জলদাশ্চ যদেচ্ছতি ॥১৭॥
তস্য নৈরৃতরাজস্য রাজরাজস্য ভামিনি ।
কিং ত্বং ন কুরুষে বুদ্ধিং ভার্যার্থে রাবণস্য হি ॥১৮॥
সাধু তে তত্ত্বতো দেবি কথিতং সাধু ভামিনি ।
গৃহাণ সুস্মিতে বাক্যমন্যথা ন ভবিষ্যসি ॥১৯॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ত্রয়োবিংশঃ সর্গঃ