অথ চতুর্বিংশঃ সর্গঃ
ততঃ সীতাং সমস্তাস্তা রাক্ষস্যো বিকৃতাননাঃ।
পরুষং পরুষানর্হামূচুস্তদ্বাক্যমপ্রিয়ম্ ॥১॥
কিং ত্বমন্তঃপুরে সীতে সর্বভূতমনোরমে ।
মহার্হশয়নোপেতে ন বাসমনুমন্যসে ॥২॥
মানুষী মানুষস্যৈব ভার্যাত্বং বহু মন্যসে ।
প্রত্যাহর মনো রামান্নৈবং জাতু ভবিষ্যতি ॥৩॥
ত্রৈলোক্যবসুভোক্তারং রাবণং রাক্ষসেশ্বরম্ ।
ভর্তারমুপসঙ্গম্য বিহরস্ব যথাসুখম্ ॥৪॥
মানুষী মানুষং তং তু রামমিচ্ছসি শোভনে ।
রাজ্যাদ্ভ্রষ্টমসিদ্ধার্থং বিক্লবন্তমনিন্দিতে ॥৫॥
রাক্ষসীনাং বচঃ শ্রুত্বা সীতা পদ্মনিভেক্ষণা ।
নেত্রাভ্যামশ্রুপূর্ণাভ্যামিদং বচনমব্রবীৎ ॥৬॥
যদিদং লোকবিদ্বিষ্টমুদাহরত সঙ্গতাঃ।
নৈতন্মনসি বাক্যং মে কিল্বিষং প্রতিতিষ্ঠতি ॥৭॥
ন মানুষী রাক্ষসস্য ভার্যা ভবিতুমর্হতি ।
কামং খাদত মাং সর্বা ন করিষ্যামি বো বচঃ॥৮॥
দীনো বা রাজ্যহীনো বা যো মে ভর্তা স মে গুরুঃ।
তং নিত্যমনুরক্তাস্মি যথা সূর্যং সুবর্চলা ॥৯॥
যথা শচী মহাভাগা শক্রং সমুপতিষ্ঠতি ।
অরুন্ধতী বসিষ্ঠং চ রোহিণী শশিনং যথা ॥১০॥
লোপামুদ্রা যথাগস্ত্যং সুকন্যা চ্যবনং যথা ।
সাবিত্রী সত্যবন্তং চ কপিলং শ্রীমতী যথা ॥১১॥
সৌদাসং মদয়ন্তীব কেশিনী সগরং যথা ।
নৈষধং দময়ন্তীব ভৈমী পতিমনুব্রতা ॥১২॥
তথাঽহমিক্ষ্বাকুবরং রামং পতিমনুব্রতা ।
সীতায়া বচনং শ্রুত্বা রাক্ষস্যঃ ক্রোধমূর্ছিতাঃ।
ভর্ত্সয়ন্তি স্ম পরুষৈর্বাক্যৈ রাবণচোদিতাঃ॥১৩॥
অবলীনঃ স নির্বাক্যো হনুমান্ শিংশপাদ্রুমে ।
সীতাং সন্তর্জয়ন্তীস্তা রাক্ষসীরশৃণোৎকপিঃ॥১৪॥
তামভিক্রম্য সংরব্ধা বেপমানাং সমন্ততঃ।
ভৃশং সংলিলিহুর্দীপ্তান্প্রলম্বান্ দশনচ্ছদান্ ॥১৫॥
ঊচুশ্চ পরমক্রুদ্ধাঃ প্রগৃহ্যাশু পরশ্বধান্ ।
নেয়মর্হতি ভর্তারং রাবণং রাক্ষসাধিপম্ ॥১৬॥
সা ভর্ত্স্যমানা ভীমাভী রাক্ষসীভির্বরাঙ্গনা ।
সা বাষ্পমপমার্জন্তী শিংশপাং তামুপাগমৎ ॥১৭॥
ততস্তাং শিংশপাং সীতা রাক্ষসীভিঃ সমাবৃতা ।
অভিগম্য বিশালাক্ষী তস্থৌ শোকপরিপ্লুতা ॥১৮॥
তাং কৃশাং দীনবদনাং মলিনাম্বরবাসিনীম্ ।
ভর্ত্সয়াঞ্চক্রিরে ভীমা রাক্ষস্যস্তাঃ সমন্ততঃ॥১৯॥
ততস্তু বিনতা নাম রাক্ষসী ভীমদর্শনা ।
অব্রবীৎকুপিতাকারা করালা নির্ণতোদরী ॥২০॥
সীতে পর্যাপ্তমেতাবদ্ভর্তৃস্নেহঃ প্রদর্শিতঃ।
সর্বত্রাতিকৃতং ভদ্রে ব্যসনায়োপকল্পতে ॥২১॥
পরিতুষ্টাস্মি ভদ্রং তে মানুষস্তে কৃতো বিধিঃ।
মমাপি তু বচঃ পথ্যং ব্রুবন্ত্যাঃ কুরু মৈথিলি ॥২২॥
রাবণং ভজ ভর্তারং ভর্তারং সর্বরক্ষসাম্ ।
বিক্রান্তমাপতন্তং চ সুরেশমিব বাসবম্ ॥২৩॥
দক্ষিণং ত্যাগশীলং চ সর্বস্য প্রিয়বাদিনম্ ।
মানুষং কৃপণং রামং ত্যক্ত্বা রাবণমাশ্রয় ॥২৪॥
দিব্যাঙ্গরাগা বৈদেহি দিব্যাভরণভূষিতা ।
অদ্যপ্রভৃতি লোকানাং সর্বেষামীশ্বরী ভব ॥২৫॥
অগ্নেঃ স্বাহা যথা দেবী শচীবেন্দ্রস্য শোভনে ।
কিং তে রামেণ বৈদেহি কৃপণেন গতায়ুষা ॥২৬॥
এতদুক্তং চ মে বাক্যং যদি ত্বং ন করিষ্যসি ।
অস্মিন্মুহূর্তে সর্বাস্ত্বাং ভক্ষয়িষ্যামহে বয়ম্ ॥২৭॥
অন্যা তু বিকটা নাম লম্বমানপয়োধরা ।
অব্রবীৎকুপিতা সীতাং মুষ্টিমুদ্যম্য তর্জতী ॥২৮॥
বহূন্যপ্রতিরূপাণি বচনানি সুদুর্মতে ।
অনুক্রোশান্মৃদুত্বাচ্চ সোঢানি তব মৈথিলি ॥২৯॥
ন চ নঃ কুরুষে বাক্যং হিতং কালপুরস্কৃতম্ ।
আনীতাসি সমুদ্রস্য পারমন্যৈর্দুরাসদম্ ॥৩০॥
রাবণান্তঃপুরে ঘোরে প্রবিষ্টা চাসি মৈথিলি ।
রাবণস্য গৃহে রুদ্ধা অস্মাভিস্ত্বভিরক্ষিতা ॥৩১॥
ন ত্বাং শক্তঃ পরিত্রাতুমপি সাক্ষাৎপুরন্দরঃ।
কুরুষ্ব হিতবাদিন্যা বচনং মম মৈথিলি ॥৩২॥
অলমশ্রুনিপাতেন ত্যজ শোকমনর্থকম্ ।
ভজ প্রীতিং প্রহর্ষং চ ত্যজন্তী নিত্যদৈন্যতাম্ ॥৩৩॥
সীতে রাক্ষসরাজেন পরিক্রীড যথাসুখম্ ।
জানীমহে যথা ভীরু স্ত্রীণাং যৌবনমধ্রুবম্ ॥৩৪॥
যাবন্ন তে ব্যতিক্রামেত্তাবৎসুখমবাপ্নুহি ।
উদ্যানানি চ রম্যাণি পর্বতোপবনানি চ ॥৩৫॥
সহ রাক্ষসরাজেন চর ত্বং মদিরেক্ষণে ।
স্ত্রীসহস্রাণি তে দেবি বশে স্থাস্যন্তি সুন্দরি ॥৩৬॥
রাবণং ভজ ভর্তারং ভর্তারং সর্বরক্ষসাম্ ।
উৎপাট্য বা তে হৃদয়ং ভক্ষয়িষ্যামি মৈথিলি ॥৩৭॥
যদি মে ব্যাহৃতং বাক্যং ন যথাবৎকরিষ্যসি ।
ততশ্চণ্ডোদরী নাম রাক্ষসী ক্রূরদর্শনা ॥৩৮॥
ভ্রাময়ন্তী মহচ্ছূলমিদং বচনমব্রবীৎ ।
ইমাং হরিণশাবাক্ষীং ত্রাসোৎকম্পপয়োধরাম্ ॥৩৯॥
রাবণেন হৃতাং দৃষ্ট্বা দৌর্হৃদো মে মহানয়ম্ ।
যকৃৎপ্লীহং মহৎ ক্রোডং হৃদয়ং চ সবন্ধনম্ ॥৪০॥
গাত্রাণ্যপি তথা শীর্ষং খাদেয়মিতি মে মতিঃ।
ততস্তু প্রঘসা নাম রাক্ষসী বাক্যমব্রবীৎ ॥৪১॥
কণ্ঠমস্যা নৃশংসায়াঃ পীডয়ামঃ কিমাস্যতে ।
নিবেদ্যতাং ততো রাজ্ঞে মানুষী সা মৃতেতি হ ॥৪২॥
নাত্র কশ্চন সন´দেহঃ খাদতেতি স বক্ষ্যতি ।
ততস্ত্বজামুখী নাম রাক্ষসী বাক্যমব্রবীৎ ॥৪৩॥
বিশস্যেমাং ততঃ সর্বান্সমান্কুরুত পিণ্ডকান্ ।
বিভজাম ততঃ সর্বা বিবাদো মে ন রোচতে ॥৪৪॥
পেয়মানীয়তাং ক্ষিপ্রং মাল্যং চ বিবিধং বহু ।
ততঃ শূর্পণখা নাম রাক্ষসী বাক্যমব্রবীৎ ॥৪৫॥
অজামুখ্যা যদুক্তং বৈ তদেব মম রোচতে ।
সুরা চানীয়তাং ক্ষিপ্রং সর্বশোকবিনাশিনী ॥৪৬॥
মানুষং মাং সমাস্বাদ্য নৃত্যামোঽথ নিকুম্ভিলাম্ ।
এবং নির্ভর্ত্স্যমানা সা সীতা সুরসুতোপমা ।
রাক্ষসীভির্বিরূপাভির্ধৈর্যমুৎসৃজ্য রোদিতি ॥৪৭॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে চতুর্বিংশঃ সর্গঃ