অথ পঞ্চবিংশঃ সর্গঃ
অথ তাসাং বদন্তীনাং পরুষং দারুণং বহু ।
রাক্ষসীনামসৌম্যানাং রুরোদ জনকাত্মজা ॥১॥
এবমুক্তা তু বৈদেহী রাক্ষসীভির্মনস্বিনী ।
উবাচ পরমত্রস্তা বাষ্পগদ্গদয়া গিরা ॥২॥
ন মানুষী রাক্ষসস্য ভার্যা ভবিতুমর্হতি ।
কামং খাদত মাং সর্বা ন করিষ্যামি বো বচঃ॥৩॥
সা রাক্ষসীমধ্যগতা সীতা সুরসুতোপমা ।
ন শর্ম লেভে শোকার্তা রাবণেনেব ভর্ত্সিতা ॥৪॥
বেপতে স্মাধিকং সীতা বিশন্তীবাঙ্গমাত্মনঃ।
বনে যূথপরিভ্রষ্টা মৃগী কোকৈরিবার্দিতা ॥৫॥
সা ত্বশোকস্য বিপুলাং শাখামালম্ব্য পুষ্পিতাম্ ।
চিন্তয়ামাস শোকেন ভর্তারং ভগ্নমানসা ॥৬॥
সা স্নাপয়ন্তী বিপুলৌ স্তনৌ নেত্রজলস্রবৈঃ।
চিন্তয়ন্তী ন শোকস্য তদান্তমধিগচ্ছতি ॥৭॥
সা বেপমানা পতিতা প্রবাতে কদলী যথা ।
রাক্ষসীনাং ভয়ত্রস্তা বিবর্ণবদনাভবৎ ॥৮॥
তস্যাঃ সা দীর্ঘবহুলা বেপন্ত্যাঃ সীতয়া তদা ।
দদৃশে কম্পিতা বেণী ব্যালীব পরিসর্পতী ॥৯॥
সা নিঃশ্বসন্তী শোকার্তা কোপোপহতচেতনা ।
আর্তা ব্যসৃজদশ্রূণি মৈথিলী বিললাপ চ ॥১০॥
হা রামেতি চ দুঃখার্তা হা পুনর্লক্ষ্মণেতি চ ।
হা শ্বশ্রূর্মম কৌসল্যে হা সুমিত্রেতি ভামিনী ॥১১॥
লোকপ্রবাদঃ সত্যোঽয়ং পণ্ডিতৈঃ সমুদাহৃতঃ।
অকালে দুর্লভো মৃত্যুঃ স্ত্রিয়া বা পুরুষস্য বা ॥১২॥
যত্রাহমাভিঃ ক্রূরাভী রাক্ষসীভিরিহার্দিতা ।
জীবামি হীনা রামেণ মুহূর্তমপি দুঃখিতা ॥১৩॥
এষাল্পপুণ্যা কৃপণা বিনশিষ্যাম্যনাথবৎ ।
সমুদ্রমধ্যে নৌঃ পূর্ণা বায়ুবেগৈরিবাহতা ॥১৪॥
ভর্তারং তমপশ্যন্তী রাক্ষসীবশমাগতা ।
সীদামি খলু শোকেন কূলং তোয়হতং যথা ॥১৫॥
তং পদ্মদলপত্রাক্ষং সিংহবিক্রান্তগামিনম্ ।
ধন্যাঃ পশ্যন্তি মে নাথং কৃতজ্ঞং প্রিয়বাদিনম্ ॥১৬॥
সর্বথা তেন হীনায়া রামেণ বিদিতাত্মনা ।
তীক্ষ্ণং বিষমিবাস্বাদ্য দুর্লভং মম জীবনম্ ॥১৭॥
কীদৃশং তু মহাপাপং ময়া দেহান্তরে কৃতম্ ।
তেনেদং প্রাপ্যতে ঘোরং মহাদুঃখং সুদারুণম্ ॥১৮॥
জীবিতং ত্যক্তুমিচ্ছামি শোকেন মহতা বৃতা ।
রাক্ষসীভিশ্চ রক্ষন্ত্যা রামো নাসাদ্যতে ময়া ॥১৯॥
ধিগস্তু খলু মানুষ্যং ধিগস্তু পরবশ্যতাম্ ।
ন শক্যং যৎপরিত্যক্তুমাত্মচ্ছন্দেন জীবিতম্ ॥২০॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে পঞ্চবিংশঃ সর্গঃ