অথ ষড্বিংশঃ সর্গঃ
প্রসক্তাশ্রুমুখী ত্বেবং ব্রুবতী জনকাত্মজা ।
অধোগতমুখী বালা বিলপ্তুমুপচক্রমে ॥১॥
উন্মত্তেব প্রমত্তেব ভ্রান্তচিত্তেব শোচতী ।
উপাবৃত্তা কিশোরীব বিচেষ্টন্তী মহীতলে ॥২॥
রাঘবস্য প্রমত্তস্য রক্ষসা কামরূপিণা ।
রাবণেন প্রমথ্যাহমানীতা ক্রোশতী বলাৎ ॥৩॥
রাক্ষসীবশমাপন্না ভর্ত্স্যমানা চ দারুণম্ ।
চিন্তয়ন্তী সুদুঃখার্তা নাহং জীবিতুমুৎসহে ॥৪॥
নহি মে জীবিতেনার্থো নৈবার্থৈর্ন চ ভূষণৈঃ।
বসন্ত্যা রাক্ষসীমধ্যে বিনা রামং মহারথম্ ॥৫॥
অশ্মসারমিদং নূনমথবাপ্যজরামরম্ ।
হৃদয়ং মম যেনেদং ন দুঃখেন বিশীর্যতে ॥৬॥
ধিঙ্মামনার্যামসতীং যাহং তেন বিনা কৃতা ।
মুহূর্তমপি জীবামি জীবিতং পাপজীবিকা ॥৭॥
চরণেনাপি সব্যেন ন স্পৃশেয়ং নিশাচরম্ ।
রাবণং কিং পুনরহং কাময়েয়ং বিগর্হিতম্ ॥৮॥
প্রত্যাখ্যানং ন জানাতি নাত্মানং নাত্মনঃ কুলম্ ।
যো নৃশংসস্বভাবেন মাং প্রার্থয়িতুমিচ্ছতি ॥৯॥
ছিন্না ভিন্না প্রভিন্না বা দীপ্তা বাগ্নৌ প্রদীপিতা ।
রাবণং নোপতিষ্ঠেয়ং কিং প্রলাপেন বশ্চিরম্ ॥১০॥
খ্যাতঃ প্রাজ্ঞঃ কৃতজ্ঞশ্চ সানুক্রোশশ্চ রাঘবঃ।
সদ্বৃত্তো নিরনুক্রোশঃ শঙ্কে মদ্ভাগ্যসঙ্ক্ষয়াৎ ॥১১॥
রাক্ষসানাং জনস্থানে সহস্রাণি চতুর্দশ ।
একেনৈব নিরস্তানি স মাং কিং নাভিপদ্যতে ॥১২॥
নিরুদ্ধা রাবণেনাহমল্পবীর্যেণ রক্ষসা ।
সমর্থঃ খলু মে ভর্তা রাবণং হন্তুমাহবে ॥১৩॥
বিরাধো দণ্ডকারণ্যে যেন রাক্ষসপুঙ্গবঃ।
রণে রামেণ নিহতঃ স মাং কিং নাভিপদ্যতে ॥১৪॥
কামং মধ্যে সমুদ্রস্য লঙ্কেয়ং দুষ্প্রধর্ষণা ।
ন তু রাঘববাণানাং গতিরোধো ভবিষ্যতি ॥১৫॥
কিং নু তৎকারণং যেন রামো দৃঢপরাক্রমঃ।
রক্ষসাপহৃতাং ভার্যামিষ্টাং যো নাভিপদ্যতে ॥১৬॥
ইহস্থাং মাং ন জানীতে শঙ্কে লক্ষ্মণপূর্বজঃ।
জানন্নপি স তেজস্বী ধর্ষণাং মর্ষয়িষ্যতি ॥১৭॥
হৃতেতি মাং যোঽধিগত্য রাঘবায় নিবেদয়েৎ ।
গৃধ্ররাজোঽপি স রণে রাবণেন নিপাতিতঃ॥১৮॥
কৃতং কর্ম মহত্তেন মাং তথাভ্যবপদ্যতা ।
তিষ্ঠতা রাবণবধে বৃদ্ধেনাপি জটায়ুষা ॥১৯॥
যদি মামিহ জানীয়াদ্বর্তমানাং হি রাঘবঃ।
অদ্য বাণৈরভিক্রুদ্ধঃ কুর্যাল্লোকমরাক্ষসম্ ॥২০॥
নির্দহেচ্চ পুরীং লঙ্কাং নির্দহেচ্চ মহোদধিম্ ।
রাবণস্য চ নীচস্য কীর্তিং নাম চ নাশয়েৎ ॥২১॥
ততো নিহতনাথানাং রাক্ষসীনাং গৃহে গৃহে ।
যথাহমেবং রুদতী তথা ভূয়ো ন সংশয়ঃ॥২২॥
অন্বিষ্য রক্ষসাং লঙ্কাং কুর্যাদ্রামঃ সলক্ষ্মণঃ।
নহি তাভ্যাং রিপুর্দৃষ্টো মুহূর্তমপি জীবতি ॥২৩॥
চিতাধূমাকুলপথা গৃধ্রমণ্ডলমণ্ডিতা ।
অচিরেণৈব কালেন শ্মশানসদৃশী ভবেৎ ॥২৪॥
অচিরেণৈব কালেন প্রাপ্স্যাম্যেনং মনোরথম্ ।
দুষ্প্রস্থানোঽয়মাভাতি সর্বেষাং বো বিপর্যযঃ॥২৫॥
যাদৃশানি তু দৃশ্যন্তে লঙ্কায়ামশুভানি তু ।
অচিরেণৈব কালেন ভবিষ্যতি হতপ্রভা ॥২৬॥
নূনং লঙ্কা হতে পাপে রাবণে রাক্ষসাধিপে ।
শোষমেষ্যতি দুর্ধর্ষা প্রমদা বিধবা যথা ॥২৭॥
পুণ্যোৎসবসমৃদ্ধা চ নষ্টভর্ত্রী সরাক্ষসা ।
ভবিষ্যতি পুরী লঙ্কা নষ্টভর্ত্রী যথাঙ্গনা ॥২৮॥
নূনং রাক্ষসকন্যানাং রুদতীনাং গৃহে গৃহে ।
শ্রোষ্যামি নচিরাদেব দুঃখার্তানামিহ ধ্বনিম্ ॥২৯॥
সান্ধকারা হতদ্যোতা হতরাক্ষসপুঙ্গবা ।
ভবিষ্যতি পুরী লঙ্কা নির্দগ্ধা রামসায়কৈঃ॥৩০॥
যদি নাম স শূরো মাং রামো রক্তান্তলোচনঃ।
জানীয়াদ্বর্তমানাং যাং রাক্ষসস্য নিবেশনে ॥৩১॥
অনেন তু নৃশংসেন রাবণেনাধমেন মে ।
সময়ো যস্তু নির্দিষ্টস্তস্য কালোঽয়মাগতঃ॥৩২॥
স চ মে বিহিতো মৃত্যুরস্মিন্ দুষ্টেন বর্ততে ।
অকার্যং যে ন জানন্তি নৈরৃতাঃ পাপকারিণঃ॥৩৩॥
অধর্মাত্তু মহোৎপাতো ভবিষ্যতি হি সাম্প্রতম্ ।
নৈতে ধর্মং বিজানন্তি রাক্ষসাঃ পিশিতাশনাঃ॥৩৪॥
ধ্রুবং মাং প্রাতরাশার্থং রাক্ষসঃ কল্পয়িষ্যতি ।
সাহং কথং করিষ্যামি তং বিনা প্রিয়দর্শনম্ ॥৩৫॥
রামং রক্তান্তনয়নমপশ্যন্তী সুদুঃখিতা ।
ক্ষিপ্রং বৈবস্বতং দেবং পশ্যেয়ং পতিনা বিনা ॥৩৬॥
নাজানাজ্জীবতীং রামঃ স মাং ভরতপূর্বজঃ।
জানন্তৌ তু ন কুর্যাতাং নোর্ব্যাং হি পরিমার্গণম্ ॥৩৭॥
নূনং মমৈব শোকেন স বীরো লক্ষ্মণাগ্রজঃ।
দেবলোকমিতো যাতস্ত্যক্ত্বা দেহং মহীতলে ॥৩৮॥
ধন্যা দেবাঃ সগন্ধর্বাঃ সিদ্ধাশ্চ পরমর্ষয়ঃ।
মম পশ্যন্তি যে বীরং রামং রাজীবলোচনম্ ॥৩৯॥
অথবা নহি তস্যার্থো ধর্মকামস্য ধীমতঃ।
ময়া রামস্য রাজর্ষের্ভার্যযা পরমাত্মনঃ॥৪০॥
দৃশ্যমানে ভবেৎ প্রীতিঃ সৌহৃদং নাস্ত্যদৃশ্যতঃ।
নাশয়ন্তি কৃতঘ্নাস্তু ন রামো নাশয়িষ্যতি ॥৪১॥
কিং বা ময়্যগুণাঃ কেচিৎকিং বা ভাগ্য ক্ষয়ো হি মে ।
যা হি সীতা বরার্হেণ হীনা রামেণ ভামিনী ॥৪২॥
শ্রেয়ো মে জীবিতান্মর্তুং বিহীনায়া মহাত্মনা ।
রামাদক্লিষ্টচারিত্রাচ্ছূরাচ্ছত্রুনিবর্হণাৎ ॥৪৩॥
অথবা ন্যস্তশস্ত্রৌ তৌ বনে মূলফলাশনৌ ।
ভ্রাতরৌ হি নরশ্রেষ্ঠৌ চরন্তৌ বনগোচরৌ ॥৪৪॥
অথবা রাক্ষসেন্দ্রেণ রাবণেন দুরাত্মনা ।
ছদ্মনা ঘাতিতৌ শূরৌ ভ্রাতরৌ রামলক্ষ্মণৌ ॥৪৫॥
সাহমেবংবিধে কালে মর্তুমিচ্ছামি সর্বতঃ।
ন চ মে বিহিতো মৃত্যুরস্মিন্ দুঃখেঽতিবর্ততি ॥৪৬॥
ধন্যাঃ খলু মহাত্মানো মুনয়ঃ সত্যসংমতাঃ।
জিতাত্মানো মহাভাগা যেষাং ন স্তঃ প্রিয়াপ্রিয়ে ॥৪৭॥
প্রিয়ান্ন সম্ভবেদ্দুঃখমপ্রিয়াদধিকং ভবেৎ ।
তাভ্যাং হি তে বিয়ুজ্যন্তে নমস্তেষাং মহাত্মনাম্ ॥৪৮॥
সাহং ত্যক্তা প্রিয়েণৈব রামেণ বিদিতাত্মনা ।
প্রাণাংস্ত্যক্ষ্যামি পাপস্য রাবণস্য গতা বশম্ ॥৪৯॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ষড্বিংশঃ সর্গঃ