অথ সপ্তবিংশঃ সর্গঃ ইত্যুক্তাঃ সীতয়া ঘোরং রাক্ষস্যঃ ক্রোধমূর্ছিতাঃ। কাশ্চিজ্জগ্মুস্তদাখ্যাতুং রাবণস্য দুরাত্মনঃ॥১॥ ততঃ সীতামুপাগম্য রাক্ষস্যো ভীমদর্শনাঃ। পুনঃ পরুষমেকার্থমনর্থার্থমথাব্রুবন্ ॥২॥ অদ্যেদানীং তবানার্যে সীতে পাপবিনিশ্চয়ে । রাক্ষস্যো ভক্ষয়িষ্যন্তি মাংসমেতদ্যথাসুখম্ ॥৩॥ সীতাং তাভিরনার্যাভির্দৃষ্ট্বা সন্তর্জিতাং তদা । রাক্ষসী ত্রিজটাবৃদ্ধা প্রবুদ্ধা বাক্যমব্রবীৎ ॥৪॥ আত্মানং খাদতানার্যা ন সীতাং ভক্ষয়িষ্যথ । জনকস্য সুতামিষ্টাং স্নুষাং দশরথস্য চ ॥৫॥ স্বপ্নো হ্যদ্য ময়া দৃষ্টো দারুণো রোমহর্ষণঃ। রাক্ষসানামভাবায় ভর্তুরস্যা ভবায় চ ॥৬॥ এবমুক্তাস্ত্রিজটয়া রাক্ষস্যঃ ক্রোধমূর্ছিতাঃ। সর্বা এবাব্রুবন্ভীতাস্ত্রিজটাং তামিদং বচঃ॥৭॥ কথয়স্ব ত্বয়া দৃষ্টঃ স্বপ্নোঽয়ং কীদৃশো নিশি । তাসাং শ্রুত্বা তু বচনং রাক্ষসীনাং মুখোদ্গতম্ ॥৮॥ উবাচ বচনং কালে ত্রিজটা স্বপ্নসংশ্রিতম্ । গজদন্তময়ীং দিব্যাং শিবিকামন্তরিক্ষগাম্ ॥৯॥ যুক্তাং বাজিসহস্রেণ স্বয়মাস্থায় রাঘবঃ। শুক্লমাল্যাম্বরধরো লক্ষ্মণেন সমাগতঃ॥১০॥ স্বপ্নে চাদ্য ময়া দৃষ্টা সীতা শুক্লাম্বরাবৃতা । সাগরেণ পরিক্ষিপ্তং শ্বেতপর্বতমাস্থিতা ॥১১॥ রামেণ সঙ্গতা সীতা ভাস্করেণ প্রভা যথা । রাঘবশ্চ পুনর্দৃষ্টশ্চতুর্দন্তং মহাগজম্ ॥১২॥ আরূঢঃ শৈলসঙ্কাশং চকাস সহলক্ষ্মণঃ। ততস্তু সুর্যসঙ্কাশৌ দীপ্যমানৌ স্বতেজসা ॥১৩॥ শুক্লমাল্যাম্বরধরৌ জানকীং পর্যুপস্থিতৌ । ততস্তস্য নগস্যাগ্রে হ্যাকাশস্থস্য দন্তিনঃ॥১৪॥ ভর্ত্রা পরিগৃহীতস্য জানকী স্কন্ধমাশ্রিতা । ভর্তুরঙ্কাৎসমুৎপত্য ততঃ কমললোচনা ॥১৫॥ চন্দ্রসূর্যৌ ময়া দৃষ্টা পাণিভ্যাং পরিমার্জতী । ততস্তাভ্যাং কুমারাভ্যামাস্থিতঃ স গজোত্তমঃ। সীতয়া চ বিশালাক্ষ্যা লঙ্কায়া উপরি স্থিতঃ॥১৬॥ পাণ্ডুরর্ষভয়ুক্তেন রথেনাষ্টয়ুজা স্বয়ম্ । ইহোপয়াতঃ কাকুৎস্থঃ সীতয়া সহ ভার্যযা ॥১৭॥ শুক্লমাল্যাম্বরধরো লক্ষ্মণেন সহাগতঃ। ততোঽন্যত্র ময়া দৃষ্টো রামঃ সত্যপরাক্রমঃ॥১৮॥ লক্ষ্মণেন সহ ভ্রাত্রা সীতয়া সহ বীর্যবান্ । আরুহ্য পুষ্পকং দিব্যং বিমানং সূর্যসংনিভম্ ॥১৯॥ উত্তরাং দিশমালোচ্য প্রস্থিতঃ পুরুষোত্তমঃ। এবং স্বপ্নে ময়া দৃষ্টো রামো বিষ্ণুপরাক্রমঃ॥২০॥ লক্ষ্মণেন সহ ভ্রাত্রা সীতয়া সহ ভার্যযা । ন হি রামো মহাতেজাঃ শক্যো জেতুং সুরাসুরৈঃ॥২১॥ রাক্ষসৈর্বাপি চান্যৈর্বা স্বর্গঃ পাপজনৈরিব । রাবণশ্চ ময়া দৃষ্টো মুণ্ডস্তৈলসমুক্ষিতঃ॥২২॥ রক্তবাসাঃ পিবন্মত্তঃ করবীরকৃতস্রজঃ। বিমানাৎ পুষ্পকাদদ্য রাবণঃ পতিতঃ ক্ষিতৌ ॥২৩॥ কৃষ্যমাণঃ স্ত্রিয়া মুণ্ডো দৃষ্টঃ কৃষ্ণাম্বরঃ পুনঃ। রথেন খরয়ুক্তেন রক্তমাল্যানুলেপনঃ॥১৪॥ পিবংস্তৈলং হসন্নৃত্যন্ ভ্রান্তচিত্তাকুলেন্দ্রিয়ঃ। গর্দভেন যয়ৌ শীঘ্রং দক্ষিণাং দিশমাস্থিতঃ॥২৫॥ পুনরেব ময়া দৃষ্টো রাবণো রাক্ষসেশ্বরঃ। পতিতোঽবাক্শিরা ভূমৌ গর্দভাদ্ভয়মোহিতঃ॥২৬॥ সহসোত্থায় সম্ভ্রান্তো ভয়ার্তো মদবিহ্বলঃ। উন্মত্তরূপো দিগ্বাসা দুর্বাক্যং প্রলপন্বহু ॥২৭॥ দুর্গন্ধং দুঃসহং ঘোরং তিমিরং নরকোপমম্ । মলপঙ্কং প্রবিশ্যাশু মগ্নস্তত্র স রাবণঃ॥২৮॥ প্রস্থিতো দক্ষিণামাশাং প্রবিষ্টোঽকর্দমং হ্রদম্ । কণ্ঠে বদ্ধ্বা দশগ্রীবং প্রমদা রক্তবাসিনী ॥২৯॥ কালী কর্দমলিপ্তাঙ্গী দিশং যাম্যাং প্রকর্ষতি । এবং তত্র ময়া দৃষ্টঃ কুম্ভকর্ণো মহাবলঃ॥৩০॥ রাবণস্য সুতাঃ সর্বে মুণ্ডাস্তৈলসমুক্ষিতাঃ। বরাহেণ দশগ্রীবঃ শিশুমারেণ চেন্দ্রজিৎ ॥৩১॥ উষ্ট্রেণ কুম্ভকর্ণশ্চ প্রয়াতো দক্ষিণাং দিশম্ । একস্তত্র ময়া দৃষ্টঃ শ্বেতচ্ছত্রো বিভীষণঃ॥৩২॥ শুক্লমাল্যাম্বরধরঃ শুক্লগন্ধানুলেপনঃ। শঙ্খদুন্দুভিনির্ঘোষৈর্নৃত্তগীতৈরলঙ্কৃতঃ॥৩৩॥ আরুহ্য শৈলসঙ্কাশং মেঘস্তনিতনিঃস্বনম্ । চতুর্দন্তং গজং দিব্যমাস্তে তত্র বিভীষণঃ॥৩৪॥ চতুর্ভিস্সচিবৈঃ সার্ধং বৈহায়সমুপস্থিতঃ॥৩৫॥ সমাজশ্চ মহান্বৃত্তো গীতবাদিত্রনিঃস্বনঃ। পিবতাং রক্তমাল্যানাং রক্ষসাং রক্তবাসসাম্ ॥৩৬॥ লঙ্কা চেয়ং পুরী রম্যা সবাজিরথকুঞ্জরা । সাগরে পতিতা দৃষ্টা ভগ্নগোপুরতোরণা ॥৩৭॥ লঙ্কা দৃষ্টা ময়া স্বপ্নে রাবণেনাভিরক্ষিতা । দগ্ধা রামস্য দূতেন বানরেণ তরস্বিনা ॥৩৮॥ পীত্বা তৈলং প্রমত্তাশ্চ প্রহসন্ত্যো মহাস্বনাঃ। লঙ্কায়াং ভস্মরূক্ষায়াং সর্বা রাক্ষসয়োষিতঃ॥৩৯॥ কুম্ভকর্ণাদয়শ্চেমে সর্বে রাক্ষসপুঙ্গবাঃ। রক্তং নিবসনং গৃহ্য প্রবিষ্টা গোময়হ্রদম্ ॥৪০॥ অপগচ্ছত পশ্যধ্বং সীতামাপ্নোতি রাঘবঃ। ঘাতয়েৎপরমামর্ষী যুষ্মান্ সার্ধং হি রাক্ষসৈঃ॥৪১॥ প্রিয়াং বহুমতাং ভার্যাং বনবাসমনুব্রতাম্ । ভর্ত্সিতাং তর্জিতাং বাপি নানুমংস্যতি রাঘবঃ॥৪২॥ তদলং ক্রূরবাক্যৈশ্চ সান্ত্বমেবাভিধীয়তাম্ । অভিয়াচাম বৈদেহীমেতদ্ধি মম রোচতে ॥৪৩॥ যস্যা হ্যেবং বিধঃ স্বপ্নো দুঃখিতায়াঃ প্রদৃশ্যতে । সা দুঃখৈর্বহুভির্মুক্তা প্রিয়ং প্রাপ্নোত্যনুত্তমম্ ॥৪৪॥ ভর্ত্সিতামপি যাচধ্বং রাক্ষস্যঃ কিং বিবক্ষয়া । রাঘবাদ্ধি ভয়ং ঘোরং রাক্ষসানামুপস্থিতম্ ॥৪৫॥ প্রণিপাতপ্রসন্না হি মৈথিলী জনকাত্মজা । অলমেষা পরিত্রাতুং রাক্ষসির্মহতো ভয়াৎ ॥৪৬॥ অপি চাস্যা বিশালাক্ষ্যা ন কিঞ্চিদুপলক্ষয়ে । বিরূপমপি চাঙ্গেষু সুসূক্ষ্মমপি লক্ষণম্ ॥৪৭॥ ছায়াবৈগুণ্যমাত্রং তু শঙ্কে দুঃখমুপস্থিতম্ । অদুঃখার্হামিমাং দেবীং বৈহায়সমুপস্থিতাম্ ॥৪৮॥ অর্থসিদ্ধিং তু বৈদেহ্যাঃ পশ্যাম্যহমুপস্থিতাম্ । রাক্ষসেন্দ্রবিনাশং চ বিজয়ং রাঘবস্য চ ॥৪৯॥ নিমিত্তভূতমেতৎ তু শ্রোতুমস্যা মহৎ প্রিয়ম্ । দৃশ্যতে চ স্ফুরচ্চক্ষুঃ পদ্মপত্রমিবায়তম্ ॥৫০॥ ঈষদ্ধি হৃষিতো বাস্যা দক্ষিণায়া হ্যদক্ষিণঃ। অকস্মাদেব বৈদেহ্যা বাহুরেকঃ প্রকম্পতে ॥৫১॥ করেণুহস্তপ্রতিমঃ সব্যশ্চোরুরনুত্তমঃ। বেপন্ কথয়তীবাস্যা রাঘবং পুরতঃ স্থিতম্ ॥৫২॥ পক্ষী চ শাখানিলয় প্রবিষ্টঃ পুনঃ পুনশ্চোত্তমসান্ত্ববাদী । সুস্বাগতাং বাচমুদীরয়াণঃ পুনঃ পুনশ্চোদয়তীব হৃষ্টঃ॥৫৩॥ ততঃ সা হ্রীমতী বালা ভর্তুর্বিজয়হর্ষিতা । অবোচদ্ যদি তৎ তথ্যং ভবেয়ং শরণং হি বঃ॥৫৪॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে সপ্তবিংশঃ সর্গঃ