অথ অষ্টাবিংশঃ সর্গঃ সা রাক্ষসেন্দ্রস্য বচো নিশম্য তদ্ রাবণস্য প্রিয়মপ্রিয়ার্তা । সীতা বিতত্রাস যথা বনান্তে সিংহাভিপন্না গজরাজকন্যা ॥১॥ সা রাক্ষসীমধ্যগতা চ ভীরু- র্বাগ্ভির্ভৃশং রাবণতর্জিতা চ । কান্তারমধ্যে বিজনে বিসৃষ্টা বালেব কন্যা বিললাপ সীতা ॥২॥ সত্যং বতেদং প্রবদন্তি লোকে নাকালমৃত্যুর্ভবতীতি সন্তঃ। যত্রাহমেবং পরিভর্ত্স্যমানা জীবামি যস্মাৎ ক্ষণমপ্যপুণ্যা ॥৩॥ সুখাদ্বিহীনং বহুদুঃখপূর্ণ- মিদং তু নূনং হৃদয়ং স্থিরং মে । বিদীর্যতে যন্ন সহস্রধাদ্য বজ্রাহতং শৃঙ্গমিবাচলস্য ॥৪॥ নৈবাস্তি নূনং মম দোষমত্র বধ্যাহমস্যাপ্রিয়দর্শনস্য । ভাবং ন চাস্যাহমনুপ্রদাতু- মলং দ্বিজো মন্ত্রমিবাদ্বিজায় ॥৫॥ তস্মিন্ননাগচ্ছতি লোকনাথে গর্ভস্থজন্তোরিব শল্যকৃন্তঃ। নূনং মমাঙ্গান্যচিরাদনার্যঃ শস্ত্রৈঃ শিতৈশ্ছেৎস্যতি রাক্ষসেন্দ্রঃ॥৬॥ দুঃখং বতেদং ননু দুঃখিতায়া মাসৌ চিরায়াভিগমিষ্যতো দ্বৌ । বদ্ধস্য বধ্যস্য যথা নিশান্তে রাজোপরোধাদিব তস্করস্য ॥৭॥ হা রাম হা লক্ষ্মণ হা সুমিত্রে হা রামমাতঃ সহ মে জনন্যঃ। এষা বিপদ্যাম্যহমল্পভাগ্যা মহার্ণবে নৌরিব মূঢবাতা ॥৮॥ তরস্বিনৌ ধারয়তা মৃগস্য সত্ত্বেন রূপং মনুজেন্দ্রপুত্রৌ । নূনং বিশস্তৌ মম কারণাত্তৌ সিংহর্ষভৌ দ্বাবিব বৈদ্যুতেন ॥৯॥ নূনং স কালো মৃগরূপধারী মামল্পভাগ্যাং লুলুভে তদানীম্ । যত্রার্যপুত্রৌ বিসসর্জ মূঢা রামানুজং লক্ষ্মণপূর্বজং চ ॥১০॥ হা রাম সত্যব্রত দীর্ঘবাহো হা পূর্ণচন্দ্রপ্রতিমানবক্ত্র । হা জীবলোকস্য হিতঃ প্রিয়শ্চ বধ্যাং ন মাং বেৎসি হি রাক্ষসানাম্ ॥১১॥ অনন্যদেবত্বমিয়ং ক্ষমা চ ভূমৌ চ শয়্যা নিয়মশ্চ ধর্মে । পতিব্রতাত্বং বিফলং মমেদং কৃতং কৃতঘ্নেষ্বিব মানুষাণাম্ ॥১২॥ মোঘো হি ধর্মশ্চরিতো মমায়ং তথৈকপত্নীত্বমিদং নিরর্থকম্ । যা ত্বাং ন পশ্যামি কৃশা বিবর্ণা হীনা ত্বয়া সঙ্গমনে নিরাশা ॥১৩॥ পিতুর্নিদেশং নিয়মেন কৃত্বা বনান্নিবৃত্তশ্চরিতব্রতশ্চ । স্ত্রীভিস্তু মন্যে বিপুলেক্ষণাভিঃ সংরংস্যসে বীতভয়ঃ কৃতার্থঃ॥১৪॥ অহং তু রাম ত্বয়ি জাতকামা চিরং বিনাশায় নিবদ্ধভাবা । মোঘং চরিত্বাথ তপোব্রতং চ ত্যক্ষ্যামি ধিগ্জীবিতমল্পভাগ্যাম্ ॥১৫॥ সঞ্জীবিতং ক্ষিপ্রমহং ত্যজেয়ং বিষেণ শস্ত্রেণ শিতেন বাপি । বিষস্য দাতা ন তু মেঽস্তি কশ্চি- চ্ছস্ত্রস্য বা বেশ্মনি রাক্ষসস্য ॥১৬॥ শোকাভিতপ্তা বহুধা বিচিন্ত্য সীতাথ বেণীগ্রথনং গৃহীত্বা । উদ্বদ্ধ্য বেণ্যুদ্গ্রথনেন শীঘ্র- মহং গমিষ্যামি যমস্য মূলম্ ॥১৭॥ উপস্থিতা সা মৃদুসর্বগাত্রী শাখাং গৃহীত্বা চ নগস্য তস্য । তস্যাস্তু রামং পরিচিন্তয়ন্ত্যা রামানুজং স্বং চ কুলং শুভাঙ্গ্যাঃ॥১৮॥ তস্যা বিশোকানি তদা বহূনি ধৈর্যার্জিতানি প্রবরাণি লোকে । প্রাদুর্নিমিত্তানি তদা বভূবুঃ পুরাপি সিদ্ধান্যুপলক্ষিতানি ॥১৯॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে অষ্টাবিংশঃ সর্গঃ