অথ একোনত্রিংশঃ সর্গঃ
তথাগতাং তাং ব্যথিতামনিন্দিতাং
	ব্যপেতহর্ষাং পরিদীনমানসাম্ ।
শুভাং নিমিত্তানি শুভানি ভেজিরে
	নরং শ্রিয়া জুষ্টমিবোপজীবিনঃ॥১॥
তস্যাঃ শুভং বামমরালপক্ষ্ম
	রাজীবৃতং কৃষ্ণবিশালশুক্লম্ ।
প্রাস্পন্দতৈকং নয়নং সুকেশ্যা
	মীনাহতং পদ্মমিবাভিতাম্রম্ ॥২॥
ভুজশ্চ চার্বঞ্চিতপীনবৃত্তঃ
	পরার্ধ্যকালাগুরুচন্দনার্হঃ।
অনুত্তমেনাধ্যুষিতঃ প্রিয়েণ
	চিরেণ বামঃ সমবেপতাশু ॥৩॥
গজেন্দ্রহস্তপ্রতিমশ্চ পীন-
	স্তয়োর্দ্বয়োঃ সংহতয়োস্তু জাতঃ।
প্রস্পন্দমানঃ পুনরূরুরস্যা
	রামং পুরস্তাৎস্থিতমাচচক্ষে ॥৪॥
শুভং পুনর্হেমসমানবর্ণ-
	মীষদ্রজোধ্বস্তমিবামলাক্ষ্যাঃ ।
বাসঃ স্থিতায়াঃশিখরাগ্রদন্ত্যাঃ
	কিঞ্চিৎপরিস্রংসত চারুগাত্র্যাঃ॥৫॥
এতৈর্নিমিত্তৈরপরৈশ্চ সুভ্রূঃ
	সঞ্চোদিতা প্রাগপি সাধুসিদ্ধৈঃ।
বাতাতপক্লান্তমিব প্রণষ্টং
	বর্ষেণ বীজং প্রতিসঞ্জহর্ষ ॥৬॥
তস্যাঃ পুনর্বিম্বফলাধরোষ্ঠং
	স্বক্ষিভ্রুকেশান্তমরালপক্ষ্ম ।
বক্ত্রং বভাসে স্মিতশুক্লদংষ্ট্রং
	রাহোর্মুখাচ্চন্দ্র ইব প্রমুক্তঃ॥৭॥
সা বীতশোকা ব্যপনীততন্দ্রী
	শান্তজ্বরা হর্ষবিবৃদ্ধসত্ত্বা ।
অশোভতার্যা বদনেন শুক্লে
	শীতাংশুনা রাত্রিরিবোদিতেন ॥৮॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একোনত্রিংশঃ সর্গঃ