অথ ত্রিংশঃ সর্গঃ হনুমানপি বিক্রান্তঃ সর্বং শুশ্রাব তত্ত্বতঃ। সীতায়াস্ত্রিজটায়াশ্চ রাক্ষসীনাং চ তর্জিতম্ ॥১॥ অবেক্ষমাণস্তাং দেবীং দেবতামিব নন্দনে । ততো বহুবিধাং চিন্তাং চিন্তয়ামাস বানরঃ॥২॥ যাং কপীনাং সহস্রাণি সুবহূন্ যয়ুতানি চ । দিক্ষু সর্বাসু মার্গন্তে সেয়মাসাদিতা ময়া ॥৩॥ চারেণ তু সুয়ুক্তেন শত্রোঃ শক্তিমবেক্ষতা । গূঢেন চরতা তাবদবেক্ষিতমিদং ময়া ॥৪॥ রাক্ষসানাং বিশেষশ্চ পুরী চেয়ং নিরীক্ষিতা । রাক্ষসাধিপতেরস্য প্রভাবো রাবণস্য চ ॥৫॥ যথা তস্যাপ্রমেয়স্য সর্বসত্ত্বদয়াবতঃ। সমাশ্বাসয়িতুং ভার্যাং পতিদর্শনকাঙ্ক্ষিণীম্ ॥৬॥ অহমাশ্বাসয়াম্যেনাং পূর্ণচন্দ্রনিভাননাম্ । অদৃষ্টদুঃখাং দুঃখস্য ন হ্যন্তমধিগচ্ছতীম্ ॥৭॥ যদি হ্যহং সতীমেনাং শোকোপহতচেতনাম্ । অনাশ্বাস্য গমিষ্যামি দোষবদ্গমনং ভবেৎ ॥৮॥ গতে হি ময়ি তত্রেয়ং রাজপুত্রী যশস্বিনী । পরিত্রাণমপশ্যন্তী জানকী জীবিতং ত্যজেৎ ॥৯॥ যথা চ স মহাবাহুঃ পূর্ণচন্দ্রনিভাননঃ। সমাশ্বাসয়িতুং ন্যায়্যঃ সীতাদর্শনলালসঃ॥১০॥ নিশাচরীণাং প্রত্যক্ষমক্ষমং চাভিভাষিতম্ । কথং নু খলু কর্তব্যমিদং কৃচ্ছ্রগতো হ্যহম্ ॥১১॥ অনেন রাত্রিশেষেণ যদি নাশ্বাস্যতে ময়া । সর্বথা নাস্তি সন্দেহঃ পরিত্যক্ষ্যতি জীবিতম্ ॥১২॥ রামস্তু যদি পৃচ্ছেন্মাং কিং মাং সীতাব্রবীদ্বচঃ। কিমহং তং প্রতিব্রূয়ামসম্ভাষ্য সুমধ্যমাম্ ॥১৩॥ সীতাসন্দেশরহিতং মামিতস্ত্বরয়া গতম্ । নির্দহেদপি কাকুৎস্থঃ ক্রোধতীব্রেণ চক্ষুষা ॥১৪॥ যদি বোদ্যোজয়িষ্যামি ভর্তারং রামকারণাৎ । ব্যর্থমাগমনং তস্য সসৈন্যস্য ভবিষ্যতি ॥১৫॥ অন্তরং ত্বহমাসাদ্য রাক্ষসীনামবস্থিতঃ। শনৈরাশ্বাসয়াম্যদ্য সন্তাপবহুলামিমাম্ ॥১৬॥ অহং হ্যতিতনুশ্চৈব বানরশ্চ বিশেষতঃ। বাচং চোদাহরিষ্যামি মানুষীমিহ সংস্কৃতাম্ ॥১৭॥ যদি বাচং প্রদাস্যামি দ্বিজাতিরিব সংস্কৃতাম্ । রাবণং মন্যমানা মাং সীতা ভীতা ভবিষ্যতি ॥১৮॥ অবশ্যমেব বক্তব্যং মানুষং বাক্যমর্থবৎ । ময়া সান্ত্বয়িতুং শক্যা নান্যথেয়মনিন্দিতা ॥১৯॥ সেয়মালোক্য মে রূপং জানকী ভাষিতং তথা । রক্ষোভিস্ত্রাসিতা পূর্বং ভূয়স্ত্রাসমুপৈষ্যতি ॥২০॥ ততো জাতপরিত্রাসা শব্দং কুর্যান্মনস্বিনী । জানানা মাং বিশালাক্ষী রাবণং কামরূপিণম্ ॥২১॥ সীতয়া চ কৃতে শব্দে সহসা রাক্ষসীগণঃ। নানাপ্রহরণো ঘোরঃ সমেয়াদন্তকোপমঃ॥২২॥ ততো মাং সম্পরিক্ষিপ্য সর্বতো বিকৃতাননাঃ। বধে চ গ্রহণে চৈব কুর্যুর্যত্নং মহাবলাঃ॥২৩॥ তং মাং শাখাঃ প্রশাখাশ্চ স্কন্ধাংশ্চোত্তমশাখিনাম্ । দৃষ্ট্বা চ পরিধাবন্তং ভবেয়ুঃ পরিশঙ্কিতাঃ॥২৪॥ মম রূপং চ সম্প্রেক্ষ্য বনে বিচরতো মহৎ । রাক্ষস্যো ভয়বিত্রস্তা ভবেয়ুর্বিকৃতস্বরাঃ॥২৫॥ ততঃ কুর্যুঃ সমাহ্বানং রাক্ষস্যো রক্ষসামপি । রাক্ষসেন্দ্রনিয়ুক্তানাং রাক্ষসেন্দ্রনিবেশনে ॥২৬॥ তে শূলশরনিস্ত্রিংশবিবিধায়ুধপাণয়ঃ। আপতেয়ুর্বিমর্দেঽস্মিন্ বেগেনোদ্বেগকারণাৎ ॥২৭॥ সংরুদ্ধস্তৈস্তু পরিতো বিধমে রাক্ষসং বলম্ । শক্নুয়াং ন তু সম্প্রাপ্তুং পরং পারং মহোদধেঃ॥২৮॥ মাং বা গৃহ্ণীয়ুরাবৃত্য বহবঃ শীঘ্রকারিণঃ। স্যাদিয়ং চাগৃহীতার্থা মম চ গ্রহণং ভবেৎ ॥২৯॥ হিংসাভিরুচয়ো হিংস্যুরিমাং বা জনকাত্মজাম্ । বিপন্নং স্যাৎ ততঃ কার্যং রামসুগ্রীবয়োরিদম্ ॥৩০॥ উদ্দেশে নষ্টমার্গেঽস্মিন্ রাক্ষসৈঃ পরিবারিতে । সাগরেণ পরিক্ষিপ্তে গুপ্তে বসতি জানকী ॥৩১॥ বিশস্তে বা গৃহীতে বা রক্ষোভির্ময়ি সংয়ুগে । নান্যং পশ্যামি রামস্য সহায়ং কার্যসাধনে ॥৩২॥ বিমৃশংশ্চ ন পশ্যামি যো হতে ময়ি বানরঃ। শতয়োজনবিস্তীর্ণং লঙ্ঘয়েত মহোদধিম্ ॥৩৩॥ কামং হন্তুং সমর্থোঽস্মি সহস্রাণ্যপি রক্ষসাম্ । ন তু শক্ষ্যাম্যহং প্রাপ্তুং পরং পারং মহোদধেঃ॥৩৪॥ অসত্যানি চ যুদ্ধানি সংশয়ো মে ন রোচতে । কশ্চ নিঃসংশয়ং কার্যং কুর্যাৎপ্রাজ্ঞঃ সসংশয়ম্ ॥৩৫॥ এষ দোষো মহান্হি স্যান্মম সীতাভিভাষণে । প্রাণত্যাগশ্চ বৈদেহ্যা ভবেদনভিভাষণে ॥৩৬॥ ভূতাশ্চার্থা বিরুধ্যন্তি দেশকালবিরোধিতাঃ। বিক্লবং দূতমাসাদ্য তমঃ সূর্যোদয়ে যথা ॥৩৭॥ অর্থানর্থান্তরে বুদ্ধির্নিশ্চিতাপি ন শোভতে । ঘাতয়ন্তি হি কার্যাণি দূতাঃ পণ্ডিতমানিনঃ॥৩৮॥ ন বিনশ্যেৎকথং কার্যং বৈক্লব্যং ন কথং মম । লঙ্ঘনং চ সমুদ্রস্য কথং নু ন বৃথা ভবেৎ ॥৩৯॥ কথং নু খলু বাক্যং মে শৃণুয়ান্নোদ্বিজেত চ । ইতি সঞ্চিন্ত্য হনুমাংশ্চকার মতিমান্ মতিম্ ॥৪০॥ রামমক্লিষ্টকর্মাণং সুবন্ধুমনুকীর্তয়ন্ । নৈনামুদ্বেজয়িষ্যামি তদ্বন্ধুগতচেতনাম্ ॥৪১॥ ইক্ষ্বাকূণাং বরিষ্ঠস্য রামস্য বিদিতাত্মনঃ। শুভানি ধর্ময়ুক্তানি বচনানি সমর্পয়ন্ ॥৪২॥ শ্রাবয়িষ্যামি সর্বাণি মধুরাং প্রব্রুবন্ গিরম্ । শ্রদ্ধাস্যতি যথা সীতা তথা সর্বং সমাদধে ॥৪৩॥ ইতি স বহুবিধং মহাপ্রভাবো জগতিপতেঃ প্রমদামবেক্ষমাণঃ। মধুরমবিতথং জগাদ বাক্যং দ্রুমবিটপান্তরমাস্থিতো হনূমান্ ॥৪৪॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ত্রিংশঃ সর্গঃ