অথ একত্রিংশঃ সর্গঃ
এবং বহুবিধাং চিন্তাং চিন্তয়িত্বা মহামতিঃ।
সংশ্রবে মধুরং বাক্যং বৈদেহ্যা ব্যাজহার হ ॥১॥
রাজা দশরথো নাম রথকুঞ্জরবাজিমান্ ।
পুণ্যশীলো মহাকীর্তিরিক্ষ্বাকূণাং মহায়শাঃ॥২॥
রাজর্ষীণাং গুণশ্রেষ্ঠস্তপসা চর্ষিভিঃ সমঃ।
চক্রবর্তিকুলে জাতঃ পুরন্দরসমো বলে ॥৩॥
অহিংসারতিরক্ষুদ্রো ঘৃণী সত্যপরাক্রমঃ।
মুখ্যশ্চেক্ষ্বাকুবংশস্য লক্ষ্মীবাঁল্লক্ষ্মিবর্ধনঃ॥৪॥
পার্থিবব্যঞ্জনৈর্যুক্তঃ পৃথুশ্রীঃ পার্থিবর্ষভঃ।
পৃথিব্যাং চতুরন্তয়াং বিশ্রুতঃ সুখদঃ সুখী ॥৫॥
তস্য পুত্রঃ প্রিয়ো জ্যেষ্ঠস্তারাধিপনিভাননঃ।
রামো নাম বিশেষজ্ঞঃ শ্রেষ্ঠঃ সর্বধনুষ্মতাম্ ॥৬॥
রক্ষিতা স্বস্য বৃত্তস্য স্বজনস্যাপি রক্ষিতা ।
রক্ষিতা জীবলোকস্য ধর্মস্য চ পরন্তপঃ॥৭॥
তস্য সত্যাভিসন্ধস্য বৃদ্ধস্য বচনাৎ পিতুঃ।
সভার্যঃ সহ চ ভ্রাত্রা বীরঃ প্রব্রজিতো বনম্ ॥৮॥
তেন তত্র মহারণ্যে মৃগয়াং পরিধাবতা ।
রাক্ষসা নিহতাঃ শূরা বহবঃ কামরূপিণঃ॥৯॥
জনস্থানবধং শ্রুত্বা নিহতৌ খরদূষণৌ ।
ততস্ত্বমর্ষাপহৃতা জানকী রাবণেন তু ॥১০॥
বঞ্চয়িত্বা বনে রামং মৃগরূপেণ মায়যা ।
স মার্গমাণস্তাং দেবীং রামঃ সীতামনিন্দিতাম্ ॥১১॥
আসসাদ বনে মিত্রং সুগ্রীবং নাম বানরম্ ।
ততঃ স বালিনং হত্বা রামঃ পরপুরঞ্জয়ঃ॥১২॥
আয়চ্ছৎ কপিরাজ্যং তু সুগ্রীবায় মহাত্মনে ।
সুগ্রীবেণাভিসন্দিষ্টা হরয়ঃ কামরূপিণঃ॥১৩॥
দিক্ষু সর্বাসু তাং দেবীং বিচিন্বন্তঃ সহস্রশঃ।
অহং সম্পাতিবচনাচ্ছতয়োজনমায়তম্ ॥১৪॥
তস্যা হেতোর্বিশালাক্ষ্যাঃ সমুদ্রং বেগবান্ প্লুতঃ।
যথারূপাং যথাবর্ণাং যথালক্ষ্মীং চ নিশ্চিতাম্ ॥১৫॥
অশ্রৌষং রাঘবস্যাহং সেয়মাসাদিতা ময়া ।
বিররামৈবমুক্ত্বা স বাচং বানরপুঙ্গবঃ॥১৬॥
জানকী চাপি তচ্ছ্রুত্বা বিস্ময়ং পরমং গতা ।
ততঃ সা বক্রকেশান্তা সুকেশী কেশসংবৃতম্ ।
উন্নম্য বদনং ভীরুঃ শিংশপামন্ববৈক্ষত ॥১৭॥
নিশম্য সীতা বচনং কপেশ্চ
	দিশশ্চ সর্বাঃ প্রদিশশ্চ বীক্ষ্য ।
স্বয়ং প্রহর্ষং পরমং জগাম
	সর্বাত্মনা রামমনুস্মরন্তী ॥১৮॥
সা তির্যগূর্ধ্বং চ তথা হ্যধস্তান্
	নিরীক্ষমাণা তমচিন্ত্যবুদ্ধিম্ ।
দদর্শ পিঙ্গাধিপতেরমাত্যং
	বাতাত্মজং সূর্যমিবোদয়স্থম্ ॥১৯॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একত্রিংশঃ সর্গঃ