অথ দ্বাত্রিংশঃ সর্গঃ ততঃ শাখান্তরে লীনং দৃষ্ট্বা চলিতমানসা । বেষ্টিতার্জুনবস্ত্রং তং বিদ্যুৎসঙ্ঘাতপিঙ্গলম্ ॥১॥ সা দদর্শ কপিং তত্র প্রশ্রিতং প্রিয়বাদিনম্ । ফুল্লাশোকোৎকরাভাসং তপ্তচামীকরেক্ষণম্ ॥২॥ সাথ দৃষ্ট্বা হরিশ্রেষ্ঠং বিনীতবদবস্থিতম্ । মৈথিলী চিন্তয়ামাস বিস্ময়ং পরমং গতা ॥৩॥ অহো ভীমমিদং সত্ত্বং বানরস্য দুরাসদম্ । দুর্নিরীক্ষ্যমিদং মত্বা পুনরেব মুমোহ সা ॥৪॥ বিললাপ ভৃশং সীতা করুণং ভয়মোহিতা । রাম রামেতি দুঃখার্তা লক্ষ্মণেতি চ ভামিনী ॥৫॥ রুরোদ সহসা সীতা মন্দমন্দস্বরা সতী । সাথ দৃষ্ট্বা হরিবরং বিনীতবদুপাগতম্ । মৈথিলী চিন্তয়ামাস স্বপ্নোঽয়মিতি ভামিনী ॥৬॥ সা বীক্ষমাণা পৃথুভুগ্নবক্ত্রং শাখামৃগেন্দ্রস্য যথোক্তকারম্ । দদর্শ পিঙ্গপ্রবরং মহার্হং বাতাত্মজং বুদ্ধিমতাং বরিষ্ঠম্ ॥৭॥ সা তং সমীক্ষ্যৈব ভৃশং বিপন্না গতাসুকল্পেব বভূব সীতা । চিরেণ সঞ্জ্ঞাং প্রতিলভ্য চৈবং বিচিন্তয়ামাস বিশালনেত্রা ॥৮॥ স্বপ্নো ময়ায়ং বিকৃতোঽদ্য দৃষ্টঃ শাখামৃগঃ শাস্ত্রগণৈর্নিষিদ্ধঃ। স্বস্ত্যস্তু রামায় স লক্ষ্মণায় তথা পিতুর্মে জনকস্য রাজ্ঞঃ॥৯॥ স্বপ্নো হি নায়ং নহি মেঽস্তি নিদ্রা শোকেন দুঃখেন চ পীডিতায়াঃ। সুখং হি মে নাস্তি যতো বিহীনা তেনেন্দুপূর্ণপ্রতিমাননেন ॥১০॥ রামেতি রামেতি সদৈব বুদ্ধ্যা বিচিন্ত্য বাচা ব্রুবতী তমেব । তস্যানুরূপং চ কথাং তদর্থ- মেবং প্রপশ্যামি তথা শৃণোমি ॥১১॥ অহং হি তস্যাদ্য মনোভবেন সম্পীডিতা তদ্গতসর্বভাবা । বিচিন্তয়ন্তী সততং তমেব তথৈব পশ্যামি তথা শৃণোমি ॥১২॥ মনোরথঃ স্যাদিতি চিন্তয়ামি তথাপি বুদ্ধ্যাপি বিতর্কয়ামি । কিং কারণং তস্য হি নাস্তি রূপং সুব্যক্তরূপশ্চ বদত্যযং মাম্ ॥১৩॥ নমোঽস্তু বাচস্পতয়ে সবজ্রিণে স্বয়ম্ভুবে চৈব হুতাশনায় । অনেন চোক্তং যদিদং মমাগ্রতো বনৌকসা তচ্চ তথাস্তু নান্যথা ॥১৪॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে দ্বাত্রিংশঃ সর্গঃ