অথ ত্রয়স্ত্রিংশঃ সর্গঃ
সোঽবতীর্য দ্রুমাত্তস্মাদ্বিদ্রুমপ্রতিমাননঃ।
বিনীতবেষঃ কৃপণঃ প্রণিপত্যোপসৃত্য চ ॥১॥
তামব্রবীন্মহাতেজা হনূমান্ মারুতাত্মজঃ।
শিরস্যঞ্জলিমাধায় সীতাং মধুরয়া গিরা ॥২॥
কা নু পদ্মপলাশাক্ষী ক্লিষ্টকৌশেয়বাসিনী ।
দ্রুমস্য শাখামালম্ব্য তিষ্ঠসি ত্বমনিন্দিতে ॥৩॥
কিমর্থং তব নেত্রাভ্যাং বারি স্রবতি শোকজম্ ।
পুণ্ডরীকপলাশাভ্যাং বিপ্রকীর্ণমিবোদকম্ ॥৪॥
সুরাণামসুরাণাং চ নাগগন্ধর্বরক্ষসাম্ ।
যক্ষাণাং কিংনরাণাং চ কা ত্বং ভবসি শোভনে ॥৫॥
কা ত্বং ভবসি রুদ্রাণাং মরুতাং বা বরাননে ।
বসূনাং বা বরারোহে দেবতা প্রতিভাসি মে ॥৬॥
কিং নু চন্দ্রমসা হীনা পতিতা বিবুধালয়াৎ ।
রোহিণী জ্যোতিষাং শ্রেষ্ঠা শ্রেষ্ঠা সর্বগুণাধিকা ॥৭॥
কোপাদ্বা যদি বা মোহাদ্ভর্তারমসিতেক্ষণে ।
বসিষ্ঠং কোপয়িত্বা ত্বং বাসি কল্যাণ্যরুন্ধতী ॥৮॥
কো নু পুত্রঃ পিতা ভ্রাতা ভর্তা বা তে সুমধ্যমে ।
অস্মাল্লোকাদমুং লোকং গতং ত্বমনুশোচসি ॥৯॥
রোদনাদতিনিঃশ্বাসাদ্ভূমিসংস্পর্শনাদপি ।
ন ত্বাং দেবীমহং মন্যে রাজ্ঞঃ সঞ্জ্ঞাবধারণাৎ ॥১০॥
ব্যঞ্জনানি হি তে যানি লক্ষণানি চ লক্ষয়ে ।
মহিষী ভূমিপালস্য রাজকন্যা চ মে মতা ॥১১॥
রাবণেন জনস্থানাদ্বলাৎ প্রমথিতা যদি ।
সীতা ত্বমসি ভদ্রং তে তন্মমাচক্ষ্ব পৃচ্ছতঃ॥১২॥
যথা হি তব বৈ দৈন্যং রূপং চাপ্যতিমানুষম্ ।
তপসা চান্বিতো বেষস্ত্বং রামমহিষী ধ্রুবম্ ॥১৩॥
সা তস্য বচনং শ্রুত্বা রামকীর্তনহর্ষিতা ।
উবাচ বাক্যং বৈদেহী হনূমন্তং দ্রুমাশ্রিতম্ ॥১৪॥
পৃথিব্যাং রাজসিংহানাং মুখ্যস্য বিদিতাত্মনঃ।
স্নুষা দশরথস্যাহং শত্রুসৈন্যপ্রণাশিনঃ॥১৫॥
দুহিতা জনকস্যাহং বৈদেহস্য মহাত্মনঃ।
সীতেতি নাম্না চোক্তাহং ভার্যা রামস্য ধীমতঃ॥১৬॥
সমা দ্বাদশ তত্রাহং রাঘবস্য নিবেশনে ।
ভুঞ্জানা মানুষান্ভোগান্সর্বকামসমৃদ্ধিনী ॥১৭॥
ততস্ত্রয়োদশে বর্ষে রাজ্যে চেক্ষ্বাকুনন্দনম্ ।
অভিষেচয়িতুং রাজা সোপাধ্যায়ঃ প্রচক্রমে ॥১৮॥
তস্মিন্ সম্ভ্রিয়মাণে তু রাঘবস্যাভিষেচনে ।
কৈকেয়ী নাম ভর্তারমিদং বচনমব্রবীৎ ॥১৯॥
ন পিবেয়ং ন খাদেয়ং প্রত্যহং মম ভোজনম্ ।
এষ মে জীবিতস্যান্তো রামো যদ্যভিষিচ্যতে ॥২০॥
যত্তদুক্তং ত্বয়া বাক্যং প্রীত্যা নৃপতিসত্তম ।
তচ্চেন্ন বিতথং কার্যং বনং গচ্ছতু রাঘবঃ॥২১॥
স রাজা সত্যবাগ্দেব্যা বরদানমনুস্মরন্ ।
মুমোহ বচনং শ্রুত্বা কৈকেয়্যাঃ ক্রূরমপ্রিয়ম্ ॥২২॥
ততস্তং স্থবিরো রাজা সত্যধর্মে ব্যবস্থিতঃ।
জ্যেষ্ঠং যশস্বিনং পুত্রং রুদন্রাজ্যময়াচত ॥২৩॥
স পিতুর্বচনং শ্রীমানভিষেকাৎপরং প্রিয়ম্ ।
মনসা পূর্বমাসাদ্য বাচা প্রতিগৃহীতবান্ ॥২৪॥
দদ্যান্ন প্রতিগৃহ্ণীয়াৎ সত্যং ব্রূয়ান্ন চানৃতম্ ।
অপি জীবিতহেতোর্হি রামঃ সত্যপরাক্রমঃ॥২৫॥
স বিহায়োত্তরীয়াণি মহার্হাণি মহায়শাঃ।
বিসৃজ্য মনসা রাজ্যং জনন্যৈ মাং সমাদিশৎ ॥২৬॥
সাহং তস্যাগ্রতস্তূর্ণং প্রস্থিতা বনচারিণী ।
ন হি মে তেন হীনায়া বাসঃ স্বর্গেঽপি রোচতে ॥২৭॥
প্রাগেব তু মহাভাগঃ সৌমিত্রির্মিত্রনন্দনঃ।
পূর্বজস্যানুয়াত্রার্থে কুশচীরৈরলঙ্কৃতঃ॥২৮॥
তে বয়ং ভর্তুরাদেশং বহুমান্য দৃঢব্রতাঃ।
প্রবিষ্টাঃ স্ম পুরাদ্দৃষ্টং বনং গম্ভীরদর্শনম্ ॥২৯॥
বসতো দণ্ডকারণ্যে তস্যাহমমিতৌজসঃ।
রক্ষসাপহৃতা ভার্যা রাবণেন দুরাত্মনা ॥৩০॥
দ্বৌ মাসৌ তেন মে কালো জীবিতানুগ্রহঃ কৃতঃ।
ঊর্ধ্বং দ্বাভ্যাং তু মাসাভ্যাং ততস্ত্যক্ষ্যামি জীবিতম্ ॥৩১॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ত্রয়স্ত্রিংশঃ সর্গঃ