অথ চতুস্ত্রিংশঃ সর্গঃ
তস্যাস্তদ্বচনং শ্রুত্বা হনূমান্ হরিপুঙ্গবঃ।
দুঃখাদ্দুঃখাভিভূতায়াঃ সান্ত্বমুত্তরমব্রবীৎ ॥১॥
অহং রামস্য সন্দেশাদ্দেবি দূতস্তবাগতঃ।
বৈদেহি কুশলী রামঃ স ত্বাং কৌশলমব্রবীৎ ॥২॥
যো ব্রাহ্মমস্ত্রং বেদাংশ্চ বেদ বেদবিদাং বরঃ।
স ত্বাং দাশরথী রামো দেবি কৌশলমব্রবীৎ ॥৩॥
লক্ষ্মণশ্চ মহাতেজা ভর্তুস্তেঽনুচরঃ প্রিয়ঃ।
কৃতবাঞ্ছোকসন্তপ্তঃ শিরসা তেঽভিবাদনম্ ॥৪॥
সা তয়োঃ কুশলং দেবী নিশম্য নরসিংহয়োঃ।
প্রতিসংহৃষ্টসর্বাঙ্গী হনূমন্তমথাব্রবীৎ ॥৫॥
কল্যাণী বত গাথেয়ং লৌকিকী প্রতিভাতি মা ।
এতি জীবন্তমানন্দো নরং বর্ষশতাদপি ॥৬॥
তয়োঃ সমাগমে তস্মিন্ প্রীতিরুৎপাদিতাদ্ভুতা ।
পরস্পরেণ চালাপং বিশ্বস্তৌ তৌ প্রচক্রতুঃ॥৭॥
তস্যাস্তদ্বচনং শ্রুত্বা হনূমান্ মারুতাত্মজঃ।
সীতায়াঃ শোকতপ্তায়াঃ সমীপমুপচক্রমে ॥৮॥
যথা যথা সমীপং স হনূমানুপসর্পতি ।
তথা তথা রাবণং সা তং সীতা পরিশঙ্কতে ॥৯॥
অহো ধিগ্ধিক্কৃতমিদং কথিতং হি যদস্য মে ।
রূপান্তরমুপাগম্য স এবায়ং হি রাবণঃ॥১০॥
তামশোকস্য শাখাং তু বিমুক্ত্বা শোককর্শিতা ।
তস্যামেবানবদ্যাঙ্গী ধরণ্যাং সমুপাবিশৎ ॥১১॥
অবন্দত মহাবাহুস্ততস্তাং জনকাত্মজাম্ ।
সা চৈনং ভয়সন্ত্রস্তা ভূয়ো নৈনমুদৈক্ষত ॥১২॥
তং দৃষ্ট্বা বন্দমানং চ সীতা শশিনিভাননা ।
অব্রবীদ্দীর্ঘমুচ্ছ্বস্য বানরং মধুরস্বরা ॥১৩॥
মায়াং প্রবিষ্টো মায়াবী যদি ত্বং রাবণঃ স্বয়ম্ ।
উৎপাদয়সি মে ভূয়ঃ সন্তাপং তন্ন শোভনম্ ॥১৪॥
স্বং পরিত্যজ্য রূপং যঃ পরিব্রাজকরূপবান্ ।
জনস্থানে ময়া দৃষ্টস্ত্বং স এব হি রাবণঃ॥১৫॥
উপবাসকৃশাং দীনাং কামরূপ নিশাচর ।
সন্তাপয়সি মাং ভূয়ঃ সন্তাপং তন্ন শোভনম্ ॥১৬॥
অথবা নৈতদেবং হি যন্ময়া পরিশঙ্কিতম্ ।
মনসো হি মম প্রীতিরুৎপন্না তব দর্শনাৎ ॥১৭॥
যদি রামস্য দূতস্ত্বমাগতো ভদ্রমস্তু তে ।
পৃচ্ছামি ত্বাং হরিশ্রেষ্ঠ প্রিয়া রাম কথা হি মে ॥১৮॥
গুণান্ রামস্য কথয় প্রিয়স্য মম বানর ।
চিত্তং হরসি মে সৌম্য নদীকূলং যথা রয়ঃ॥১৯॥
অহো স্বপ্নস্য সুখতা যাহমেব চিরাহৃতা ।
প্রেষিতং নাম পশ্যামি রাঘবেণ বনৌকসং ॥২০॥
স্বপ্নেঽপি যদ্যহং বীরং রাঘবং সহলক্ষ্মণম্ ।
পশ্যেয়ং নাবসীদেয়ং স্বপ্নোঽপি মম মৎসরী ॥২১॥
নাহং স্বপ্নমিমং মন্যে স্বপ্নে দৃষ্ট্বা হি বানরম্ ।
ন শক্যোঽভ্যুদয়ঃ প্রাপ্তুং প্রাপ্তশ্চাভ্যুদয়ো মম ॥২২॥
কিং নু স্যাচ্চিত্তমোহোঽয়ং ভবেদ্বাতগতিস্ত্বিয়ম্ ।
উন্মাদজো বিকারো বা স্যাদয়ং মৃগতৃষ্ণিকা ॥২৩॥
অথবা নায়মুন্মাদো মোহোঽপ্যুন্মাদলক্ষণঃ।
সম্বুধ্যে চাহমাত্মানমিমং চাপি বনৌকসং ॥২৪॥
ইত্যেবং বহুধা সীতা সম্প্রধার্য বলাবলম্ ।
রক্ষসাং কামরূপত্বান্ মেনে তং রাক্ষসাধিপম্ ॥২৫॥
এতাং বুদ্ধিং তদা কৃত্বা সীতা সা তনুমধ্যমা ।
ন প্রতিব্যাজহারাথ বানরং জনকাত্মজা ॥২৬॥
সীতায়া নিশ্চিতং বুদ্ধ্বা হনূমান্ মারুতাত্মজঃ।
শ্রোত্রানুকূলৈর্বচনৈস্তদা তাং সম্প্রহর্ষয়ন্ ॥২৭॥
আদিত্য ইব তেজস্বী লোককান্তঃ শশী যথা ।
রাজা সর্বস্য লোকস্য দেবো বৈশ্রবণো যথা ॥২৮॥
বিক্রমেণোপপন্নশ্চ যথা বিষ্ণুর্মহায়শাঃ।
সত্যবাদী মধুরবাগ্দেবো বাচস্পতির্যথা ॥২৯॥
রূপবান্ সুভগঃ শ্রীমান্ কন্দর্প ইব মূর্তিমান্ ।
স্থানক্রোধে প্রহর্তা চ শ্রেষ্ঠো লোকে মহারথঃ॥৩০॥
বাহুচ্ছায়ামবষ্টব্ধো যস্য লোকো মহাত্মনঃ।
অপক্রম্যাশ্রমপদান্ মৃগরূপেণ রাঘবম্ ॥৩১॥
শূন্যে যেনাপনীতাসি তস্য দ্রক্ষ্যসি তৎফলম্ ।
অচিরাদ্রাবণং সঙ্খ্যে যো বধিষ্যতি বীর্যবান্ ॥৩২॥
ক্রোধপ্রমুক্তৈরিষুভির্জ্বলদ্ভিরিব পাবকৈঃ।
তেনাহং প্রেষিতো দূতস্ত্বৎসকাশমিহাগতঃ॥৩৩॥
ত্বদ্বিয়োগেন দুঃখার্তঃ স ত্বাং কৌশলমব্রবীৎ ।
লক্ষ্মণশ্চ মহাতেজাঃ সুমিত্রানন্দবর্ধনঃ॥৩৪॥
অভিবাদ্য মহাবাহুঃ স ত্বাং কৌশলমব্রবীৎ ।
রামস্য চ সখা দেবি সুগ্রীবো নাম বানরঃ॥৩৫॥
রাজা বানরমুখ্যানাং স ত্বাং কৌশলমব্রবীৎ ।
নিত্যং স্মরতি তে রামঃ সসুগ্রীবঃ সলক্ষ্মণঃ॥৩৬॥
দিষ্ট্যা জীবসি বৈদেহি রাক্ষসীবশমাগতা ।
নচিরাদ্দ্রক্ষ্যসে রামং লক্ষ্মণং চ মহারথম্ ॥৩৭॥
মধ্যে বানরকোটীনাং সুগ্রীবং চামিতৌজসং ।
অহং সুগ্রীবসচিবো হনূমান্ নাম বানরঃ॥৩৮॥
প্রবিষ্টো নগরীং লঙ্কাং লঙ্ঘয়িত্বা মহোদধিম্ ।
কৃত্বা মূর্ধ্নি পদন্যাসং রাবণস্য দুরাত্মনঃ॥৩৯॥
ত্বাং দ্রষ্টুমুপয়াতোঽহং সমাশ্রিত্য পরাক্রমম্ ।
নাহমস্মি তথা দেবি যথা মামবগচ্ছসি ।
বিশঙ্কা ত্যজ্যতামেষা শ্রদ্ধৎস্ব বদতো মম ॥৪০॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে চতুস্ত্রিংশঃ সর্গঃ