অথ পঞ্চত্রিংশঃ সর্গঃ তাং তু রামকথাং শ্রুত্বা বৈদেহী বানরর্ষভাৎ । উবাচ বচনং সান্ত্বমিদং মধুরয়া গিরা ॥১॥ ক্ব তে রামেণ সংসর্গঃ কথং জানাসি লক্ষ্মণম্ । বানরাণাং নরাণাং চ কথমাসীৎ সমাগমঃ॥২॥ যানি রামস্য চিহ্নানি লক্ষ্মণস্য চ বানর । তানি ভূয়ঃ সমাচক্ষ্ব ন মাং শোকঃ সমাবিশেৎ ॥৩॥ কীদৃশং তস্য সংস্থানং রূপং তস্য চ কীদৃশম্ । কথমূরূ কথং বাহূ লক্ষ্মণস্য চ শংস মে ॥৪॥ এবমুক্তস্তু বৈদেহ্যা হনূমান্ মারুতাত্মজঃ। ততো রামং যথাতত্ত্বমাখ্যাতুমুপচক্রমে ॥৫॥ জানন্তী বত দিষ্ট্যা মাং বৈদেহি পরিপৃচ্ছসি । ভর্তুঃ কমলপত্রাক্ষি সংস্থানং লক্ষ্মণস্য চ ॥৬॥ যানি রামস্য চিহ্নানি লক্ষ্মণস্য চ যানি বৈ । লক্ষিতানি বিশালাক্ষি বদতঃ শৃণু তানি মে ॥৭॥ রামঃ কমলপত্রাক্ষঃ পূর্ণচন্দ্রনিভাননঃ। রূপদাক্ষিণ্যসম্পন্নঃ প্রসূতো জনকাত্মজে ॥৮॥ তেজসাঽঽদিত্যসঙ্কাশঃ ক্ষময়া পৃথিবীসমঃ। বৃহস্পতিসমো বুদ্ধ্যা যশসা বাসবোপমঃ॥৯॥ রক্ষিতা জীবলোকস্য স্বজনস্য চ রক্ষিতা । রক্ষিতা স্বস্য বৃত্তস্য ধর্মস্য চ পরন্তপঃ॥১০॥ রামো ভামিনি লোকস্য চাতুর্বর্ণ্যস্য রক্ষিতা । মর্যাদানাং চ লোকস্য কর্তা কারয়িতা চ সঃ॥১১॥ অর্চিষ্মানর্চিতোঽত্যর্থং ব্রহ্মচর্যব্রতে স্থিতঃ। সাধূনামুপকারজ্ঞঃ প্রচারজ্ঞশ্চ কর্মণাম্ ॥১২॥ রাজনীত্যাং বিনীতশ্চ ব্রাহ্মণানামুপাসকঃ। জ্ঞানবাঞ্শীলসম্পন্নো বিনীতশ্চ পরন্তপঃ॥১৩॥ যজুর্বেদবিনীতশ্চ বেদবিদ্ভিঃ সুপূজিতঃ। ধনুর্বেদে চ বেদে চ বেদাঙ্গেষু চ নিষ্ঠিতঃ॥১৪॥ বিপুলাংসো মহাবাহুঃ কম্বুগ্রীবঃ শুভাননঃ। গূঢজত্রুঃ সুতাম্রাক্ষো রামো নাম জনৈঃ শ্রুতঃ॥১৫॥ দুন্দুভিস্বননির্ঘোষঃ স্নিগ্ধবর্ণঃ প্রতাপবান্ । সমশ্চ সুবিভক্তাঙ্গো বর্ণং শ্যামং সমাশ্রিতঃ॥১৬॥ ত্রিস্থিরস্ত্রিপ্রলম্বশ্চ ত্রিসমস্ত্রিষু চোন্নতঃ। ত্রিতাম্রস্ত্রিষু চ স্রিগ্ধো গম্ভীরস্ত্রিষু নিত্রশঃ॥১৭॥ ত্রিবলীমাংস্ত্র্যবনতশ্চতুর্ব্যঙ্গস্ত্রিশীর্ষবান্ । চতুষ্কলশ্চতুর্লেখশ্চতুষ্কিষ্কুশ্চতুঃ সমঃ॥১৮॥ চতুর্দশসমদ্বন্দ্বশ্চতুর্দষ্ট্রশ্চতুর্গতিঃ। মহৌষ্ঠহনুনাসশ্চ পঞ্চস্নিগ্ধোঽষ্টবংশবান্ ॥১৯॥ দশপদ্মো দশবৃহত্ত্রিভির্ব্যাপ্তো দ্বিশুক্লবান্ । ষডুন্নতো নবতনুস্ত্রিভির্ব্যাপ্নোতি রাঘবঃ॥২০॥ সত্যধর্মরতঃ শ্রীমান্ সঙ্গ্রহানুগ্রহে রতঃ। দেশকালবিভাগজ্ঞঃ সর্বলোকপ্রিয়ংবদঃ॥২১॥ ভ্রাতা চাস্য চ বৈমাত্রঃ সৌমিত্রিরমিতপ্রভঃ। অনুরাগেণ রূপেণ গুণৈশ্চাপি তথাবিধঃ॥২২॥ স সুবর্ণচ্ছবিঃ শ্রীমান্ রামঃ শ্যামো মহায়শাঃ। তাবুভৌ নরশার্দূলৌ ত্বদ্দর্শনকৃতোৎসবৌ ॥২৩॥ বিচিন্বন্তৌ মহীং কৃৎস্রামস্মাভিঃ সহ সঙ্গতৌ । ত্বামেব মার্গমাণৌ তৌ বিচরন্তৌ বসুন্ধরাম্ ॥২৪॥ দদর্শতুর্মৃগপতিং পূর্বজেনাবরোপিতম্ । ঋষ্যমূকস্য মূলে তু বহুপাদপসঙ্কুলে ॥২৫॥ ভ্রাতুর্ভয়ার্তমাসীনং সুগ্রীবং প্রিয়দর্শনম্ । বয়ং চ হরিরাজং তং সুগ্রীবং সত্যসঙ্গরম্ ॥২৬॥ পরিচর্যামহে রাজ্যাৎ পূর্বজেনাবরোপিতম্ । ততস্তৌ চীরবসনৌ ধনুঃপ্রবরপাণিনৌ ॥২৭॥ ঋষ্যমূকস্য শৈলস্য রম্যং দেশমুপাগতৌ । স তৌ দৃষ্ট্বা নরব্যাঘ্রৌ ধন্বিনৌ বানরর্ষভঃ॥২৮॥ অভিপ্লুতো গিরেস্তস্য শিখরং ভয়মোহিতঃ। ততঃ স শিখরে তস্মিন্ বানরেন্দ্রো ব্যবস্থিতঃ॥২৯॥ তয়োঃ সমীপং মামেব প্রেষয়ামাস সত্বরম্ । তাবহং পুরুষব্যাঘ্রৌ সুগ্রীববচনাৎপ্রভূ ॥৩০॥ রূপলক্ষণসম্পন্নৌ কৃতাঞ্জলিরুপস্থিতঃ। তৌ পরিজ্ঞাততত্ত্বার্থৌ ময়া প্রীতিসমন্বিতৌ ॥৩১॥ পৃষ্ঠমারোপ্য তং দেশং প্রাপিতৌ পুরুষর্ষভৌ । নিবেদিতৌ চ তত্ত্বেন সুগ্রীবায় মহাত্মনে ॥৩২॥ তয়োরন্যোন্যসম্ভাষাদ্ভৃশং প্রীতিরজায়ত । তত্র তৌ কীর্তিসম্পন্নৌ হরীশ্বরনরেশ্বরৌ ॥৩৩॥ পরস্পরকৃতাশ্বাসৌ কথয়া পূর্ববৃত্তয়া । তং ততঃ সান্ত্বয়ামাস সুগ্রীবং লক্ষ্মণাগ্রজঃ॥৩৪॥ স্ত্রীহেতোর্বালিনা ভ্রাত্রা নিরস্তং পুরুতেজসা । ততস্ত্বন্নাশজং শোকং রামস্যাক্লিষ্টকর্মণঃ॥৩৫॥ লক্ষ্মণো বানরেন্দ্রায় সুগ্রীবায় ন্যবেদয়ৎ । স শ্রুত্বা বানরেন্দ্রস্তু লক্ষ্মণেনেরিতং বচঃ॥৩৬॥ তদাসীন্নিষ্প্রভোঽত্যর্থং গ্রহগ্রস্ত ইবাংশুমান্ । ততস্ত্বদ্গাত্রশোভীনি রক্ষসা হ্রিয়মাণয়া ॥৩৭॥ যান্যাভরণজালানি পাতিতানি মহীতলে । তানি সর্বাণি রামায় আনীয় হরিয়ূথপাঃ॥৩৮॥ সংহৃষ্টা দর্শয়ামাসুর্গতিং তু ন বিদুস্তব । তানি রামায় দত্তানি ময়ৈবোপহৃতানি চ ॥৩৯॥ স্বনবন্ত্যবকীর্ণানি তস্মিন্বিহতচেতসি । তান্যঙ্কে দর্শনীয়ানি কৃত্বা বহুবিধং তদা ॥৪০॥ তেন দেবপ্রকাশেন দেবেন পরিদেবিতম্ । পশ্যতস্তানি রুদতস্তাম্যতশ্চ পুনঃ পুনঃ॥৪১॥ প্রাদীপয়দ্ দাশরথেস্তদা শোকহুতাশনম্ ॥৪২॥ শায়িতং চ চিরং তেন দুঃখার্তেন মহাত্মনা । ময়াপি বিবিধৈর্বাক্যৈঃ কৃচ্ছ্রাদুত্থাপিতঃ পুনঃ॥৪৩॥ তানি দৃষ্ট্বা মহার্হাণি দর্শয়িত্বা মুহুর্মুহুঃ। রাঘবঃ সহসৌমিত্রিঃ সুগ্রীবে সংন্যবেশয়ৎ ॥৪৪॥ স তবাদর্শনাদার্যে রাঘবঃ পরিতপ্যতে । মহতা জ্বলতা নিত্যমগ্নিনেবাগ্নিপর্বতঃ॥৪৫॥ ত্বৎকৃতে তমনিদ্রা চ শোকশ্চিন্তা চ রাঘবম্ । তাপয়ন্তি মহাত্মানমগ্ন্যগারমিবাগ্নয়ঃ॥৪৬॥ তবাদর্শনশোকেন রাঘবঃ প্ররিচাল্যতে । মহতা ভূমিকম্পেন মহানিব শিলোচ্চয়ঃ॥৪৭॥ কাননানি সুরম্যাণি নদীপ্রস্রবণানি চ । চরন্ন রতিমাপ্নোতি ত্বমপশ্যন্নৃপাত্মজে ॥৪৮॥ স ত্বাং মনুজশার্দূলঃ ক্ষিপ্রং প্রাপ্স্যতি রাঘবঃ। সমিত্রবান্ধবং হত্বা রাবণং জনকাত্মজে ॥৪৯॥ সহিতৌ রামসুগ্রীবাবুভাবকুরুতাং তদা । সময়ং বালিনং হন্তুং তব চান্বেষণং প্রতি ॥৫০॥ ততস্তাভ্যাং কুমারাভ্যাং বীরাভ্যাং স হরীশ্বরঃ। কিষ্কিন্ধাং সমুপাগম্য বালী যুদ্ধে নিপাতিতঃ॥৫১॥ ততো নিহত্য তরসা রামো বালিনমাহবে । সর্বর্ক্ষহরিসঙ্ঘানাং সুগ্রীবমকরোৎপতিম্ ॥৫২॥ রামসুগ্রীবয়োরৈক্যং দেব্যেবং সমজায়ত । হনূমন্তং চ মাং বিদ্ধি তয়োর্দূতমুপাগতম্ ॥৫৩॥ স্বং রাজ্যং প্রাপ্য সুগ্রীবঃ স্বানানীয় মহাকপীন্ । ত্বদর্থং প্রেষয়ামাস দিশো দশ মহাবলান্ ॥৫৪॥ আদিষ্টা বানরেন্দ্রেণ সুগ্রীবেণ মহৌজসঃ। অদ্রিরাজপ্রতীকাশাঃ সর্বতঃ প্রস্থিতা মহীম্ ॥৫৫॥ ততস্তে মার্গমাণা বৈ সুগ্রীববচনাতুরাঃ। চরন্তি বসুধাং কৃৎস্নাং বয়মন্যে চ বানরাঃ॥৫৬॥ অঙ্গদো নাম লক্ষ্মীবান্বালিসূনুর্মহাবলঃ। প্রস্থিতঃ কপিশার্দূলস্ত্রিভাগবলসংবৃতঃ॥৫৭॥ তেষাং নো বিপ্রণষ্টানাং বিন্ধ্যে পর্বতসত্তমে । ভৃশং শোকপরীতনামহোরাত্রগণা গতাঃ॥৫৮॥ তে বয়ং কার্যনৈরাশ্যাৎকালস্যাতিক্রমেণ চ । ভয়াচ্চ কপিরাজস্য প্রাণাংস্ত্যক্তুমুপস্থিতাঃ॥৫৯॥ বিচিত্য গিরিদুর্গাণি নদীপ্রস্রবণানি চ । অনাসাদ্য পদং দেব্যাঃ প্রাণাংস্ত্যক্তুং ব্যবস্থিতাঃ॥৬০॥ ততস্তস্য গিরের্মূধ্নি বয়ং প্রায়মুপাস্মহে । দৃষ্ট্বা প্রায়োপবিষ্টাংশ্চ সর্বান্ বানরপুঙ্গবান্ ॥৬১॥ ভৃশং শোকার্ণবে মগ্নঃ পর্যদেবয়দঙ্গদঃ। তব নাশং চ বৈদেহি বালিনশ্চ তথা বধম্ ॥৬২॥ প্রায়োপবেশমস্মাকং মরণং চ জটায়ুষঃ। তেষাং নঃ স্বামিসন্দেশান্নিরাশানাং মুমূর্ষতাম্ ॥৬৩॥ কার্যহেতোরিহায়াতঃ শকুনির্বীর্যবান্মহান্ । গৃধ্ররাজস্য সোদর্যঃ সম্পাতির্নাম গৃধ্ররাট্ ॥৬৪॥ শ্রুত্বা ভ্রাতৃবধং কোপাদিদং বচনমব্রবীৎ । যবীয়ান্ কেন মে ভ্রাতা হতঃ ক্ব চ নিপাতিতঃ॥৬৫॥ এতদাখ্যাতুমিচ্ছামি ভবদ্ভির্বানরোত্তমাঃ। অঙ্গদোঽকথয়ত্তস্য জনস্থানে মহদ্বধম্ ॥৬৬॥ রক্ষসা ভীমরূপেণ ত্বামুদ্দিশ্য যথার্থতঃ। জটায়োস্তু বধং শ্রুত্বা দুঃখিতঃ সোঽরুণাত্মজঃ॥৬৭॥ ত্বামাহ স বরারোহে বসন্তীং রাবণালয়ে । তস্য তদ্বচনং শ্রুত্বা সম্পাতেঃ প্রীতিবর্ধনম্ ॥৬৮॥ অঙ্গদপ্রমুখাঃ সর্বে ততঃ প্রস্থাপিতা বয়ম্ । বিন্ধ্যাদুত্থায় সম্প্রাপ্তাঃ সাগরস্যান্তমুত্তমম্ ॥৬৯॥ ত্বদ্দর্শনে কৃতোৎসাহা হৃষ্টাঃ পুষ্টাঃ প্লবঙ্গমাঃ। অঙ্গদপ্রমুখাঃ সর্বে বেলোপান্তমুপাগতাঃ॥৭০॥ চিন্তাং জগ্মুঃ পুনর্ভীমাং ত্বদ্দর্শনসমুৎসুকাঃ। অথাহং হরিসৈন্যস্য সাগরং দৃশ্য সীদতঃ॥৭১॥ ব্যবধূয় ভয়ং তীব্রং যোজনানাং শতং প্লুতঃ। লঙ্কা চাপি ময়া রাত্রৌ প্রবিষ্টা রাক্ষসাকুলা ॥৭২॥ রাবণশ্চ ময়া দৃষ্টস্ত্বং চ শোকনিপীডিতা । এতত্তে সর্বমাখ্যাতং যথাবৃত্তমনিন্দিতে ॥৭৩॥ অভিভাষস্ব মাং দেবি দূতো দাশরথেরহম্ । তন্মাং রামকৃতোদ্যোগং ত্বন্নিমিত্তমিহাগতম্ ॥৭৪॥ সুগ্রীবসচিবং দেবি বুদ্ধ্যস্ব পবনাত্মজম্ । কুশলী তব কাকুৎস্থঃ সর্বশস্ত্রভৃতাং বরঃ॥৭৫॥ গুরোরারাধনে যুক্তো লক্ষ্মণঃ শুভলক্ষণঃ। তস্য বীর্যবতো দেবি ভর্তুস্তব হিতে রতঃ॥৭৬॥ অহমেকস্তু সম্প্রাপ্তঃ সুগ্রীববচনাদিহ । ময়েয়মসহায়েন চরতা কামরূপিণা ॥৭৭॥ দক্ষিণা দিগনুক্রান্তা ত্বন্মার্গবিচয়ৈষিণা । দিষ্ট্যাহং হরিসৈন্যানাং ত্বন্নাশমনুশোচতাম্ ॥৭৮॥ অপনেষ্যামি সন্তাপং তবাধিগমশাসনাৎ । দিষ্ট্যা হি ন মম ব্যর্থং সাগরস্যেহ লঙ্ঘনম্ ॥৭৯॥ প্রাপ্স্যাম্যহমিদং দেবি ত্বদ্দর্শনকৃতং যশঃ। রাঘবশ্চ মহাবীর্যঃ ক্ষিপ্রং ত্বামভিপৎস্যতে ॥৮০॥ সপুত্রবান্ধবং হত্বা রাবণং রাক্ষসাধিপম্ । মাল্যবান্ নাম বৈদেহি গিরীণামুত্তমো গিরিঃ॥৮১॥ ততো গচ্ছতি গোকর্ণং পর্বতং কেসরী হরিঃ। স চ দেবর্ষিভির্দিষ্টঃ পিতা মম মহাকপিঃ। তীর্থে নদীপতেঃ পুণ্যে শম্বসাদনমুদ্ধরন্ ॥৮২॥ যস্যাহং হরিণঃ ক্ষেত্রে জাতো বাতেন মৈথিলি । হনূমানিতি বিখ্যাতো লোকে স্বেনৈব কর্মণা ॥৮৩॥ বিশ্বাসার্থং তু বৈদেহি ভর্তুরুক্তা ময়া গুণাঃ। অচিরাৎ ত্বামিতো দেবি রাঘবো নয়িতা ধ্রুবম্ ॥৮৪॥ এবং বিশ্বাসিতা সীতা হেতুভিঃ শোককর্শিতা । উপপন্নৈরভিজ্ঞানৈর্দূতং তমধিগচ্ছতি ॥৮৫॥ অতুলং চ গতা হর্ষং প্রহর্ষেণ তু জানকী । নেত্রাভ্যাং বক্রপক্ষ্মাভ্যাং মুমোচানন্দজং জলম্ ॥৮৬॥ চারু তদ্ বদনং তস্যাস্তাম্রশুক্লায়তেক্ষণম্ । অশোভত বিশালাক্ষ্যা রাহুমুক্ত ইবোডুরাট্ ॥৮৭॥ হনূমন্তং কপিং ব্যক্তং মন্যতে নান্যথেতি সা । অথোবাচ হনূমাংস্তামুত্তরং প্রিয়দর্শনাম্ ॥৮৮॥ এতত্তে সর্বমাখ্যাতং সমাশ্বসিহি মৈথিলি । কিং করোমি কথং বা তে রোচতে প্রতিয়াম্যহম্ ॥৮৯॥ হতেঽসুরে সংয়তি শম্বসাদনে কপিপ্রবীরেণ মহর্ষিচোদনাৎ । ততোঽস্মি বায়ুপ্রভবো হি মৈথিলি প্রভাবতস্তৎপ্রতিমশ্চ বানরঃ॥৯০॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে পঞ্চত্রিংশঃ সর্গঃ