অথ ষট্ত্রিংশঃ সর্গঃ ভূয় এব মহাতেজা হনূমান্ পবনাত্মজঃ। অব্রবীৎ প্রশ্রিতং বাক্যং সীতাপ্রত্যযকারণাৎ ॥১॥ বানরোঽহং মহাভাগে দূতো রামস্য ধীমতঃ। রামনামাঙ্কিতং চেদং পশ্য দেব্যঙ্গুলীয়কম্ ॥২॥ প্রত্যযার্থং তবানীতং তেন দত্তং মহাত্মনা । সমাশ্বসিহি ভদ্রং তে ক্ষীণদুঃখফলা হ্যসি ॥৩॥ গৃহীত্বা প্রেক্ষমাণা সা ভর্তুঃ করবিভূষিতম্ । ভর্তারমিব সম্প্রাপ্তং জানকী মুদিতাভবৎ ॥৪॥ চারু তদ্বদনং তস্যাস্তাম্রশুক্লায়তেক্ষণম্ । বভূব হর্ষোদগ্রং চ রাহুমুক্ত ইবোডুরাট্ ॥৫॥ ততঃ সা হ্রীমতী বালা ভর্তুঃ সন্দেশহর্ষিতা । পরিতুষ্টা প্রিয়ং কৃত্বা প্রশশংস মহাকপিম্ ॥৬॥ বিক্রান্তস্ত্বং সমর্থস্ত্বং প্রাজ্ঞস্ত্বং বানরোত্তম । যেনেদং রাক্ষসপদং ত্বয়ৈকেন প্রধর্ষিতম্ ॥৭॥ শতয়োজনবিস্তীর্ণঃ সাগরো মকরালয়ঃ। বিক্রমশ্লাঘনীয়েন ক্রমতা গোষ্পদীকৃতঃ॥৮॥ নহি ত্বাং প্রাকৃতং মন্যে বানরং বানরর্ষভ । যস্য তে নাস্তি সন্ত্রাসো রাবণাদপি সম্ভ্রমঃ॥৯॥ অর্হসে চ কপিশ্রেষ্ঠ ময়া সমভিভাষিতুম্ । যদ্যসি প্রেষিতস্তেন রামেণ বিদিতাত্মনা ॥১০॥ প্রেষয়িষ্যতি দুর্ধর্ষো রামো নহ্যপরীক্ষিতম্ । পরাক্রমমবিজ্ঞায় মৎসকাশং বিশেষতঃ॥১১॥ দিষ্ট্যা চ কুশলী রামো ধর্মাত্মা সত্যসগংরঃ। লক্ষ্মণশ্চ মহাতেজাঃ সুমিত্রানন্দবর্ধনঃ॥১২॥ কুশলী যদি কাকুৎস্থঃ কিং ন সাগরমেখলাম্ । মহীং দহতি কোপেন যুগান্তাগ্নিরিবোত্থিতঃ॥১৩॥ অথবা শক্তিমন্তৌ তৌ সুরাণামপি নিগ্রহে । মমৈব তু ন দুঃখানামস্তি মন্যে বিপর্যযঃ॥১৪॥ কচ্চিন্ন ব্যথতে রামঃ কচ্চিন্ন পরিতপ্যতে । উত্তরাণি চ কার্যাণি কুরুতে পুরুষোত্তমঃ॥১৫॥ কচ্চিন্ন দীনঃ সম্ভ্রান্তঃ কার্যেষু চ ন মুহ্যতি । কচ্চিৎ পুরুষকার্যাণি কুরুতে নৃপতেঃ সুতঃ॥১৬॥ দ্বিবিধং ত্রিবিধোপায়মুপায়মপি সেবতে । বিজিগীষুঃ সুহৃৎ কচ্চিন্মিত্রেষু চ পরন্তপঃ॥১৭॥ কচ্চিন্মিত্রাণি লভতে মিত্রৈশ্চাপ্যভিগম্যতে । কচ্চিৎকল্যাণমিত্রশ্চ মিত্রৈশ্চাপি পুরস্কৃতঃ॥১৮॥ কচ্চিদাশাস্তি দেবানাং প্রসাদং পার্থিবাত্মজঃ। কচ্চিৎপুরুষকারং চ দৈবং চ প্রতিপদ্যতে ॥১৯॥ কচ্চিন্ন বিগতস্নেহো বিবাসান্ময়ি রাঘবঃ। কচ্চিন্মাং ব্যসনাদস্মান্মোক্ষয়িষ্যতি রাঘবঃ॥২০॥ সুখানামুচিতো নিত্যমসুখানামনূচিতঃ। দুঃখমুত্তরমাসাদ্য কচ্চিদ্রামো ন সীদতি ॥২১॥ কৌসল্যায়াস্তথা কচ্চিৎসুমিত্রায়াস্তথৈব চ । অভীক্ষ্ণং শ্রূয়তে কচ্চিৎকুশলং ভরতস্য চ ॥২২॥ মন্নিমিত্তেন মানার্হঃ কচ্চিচ্ছোকেন রাঘবঃ। কচ্চিন্নান্যমনা রামঃ কচ্চিন্মাং তারয়িষ্যতি ॥২৩॥ কচ্চিদক্ষৌহিণীং ভীমাং ভরতো ভ্রাতৃবৎসলঃ। ধ্বজিনীং মন্ত্রিভির্গুপ্তাং প্রেষয়িষ্যতি মৎকৃতে ॥২৪॥ বানরাধিপতিঃ শ্রীমান্ সুগ্রীবঃ কচ্চিদেষ্যতি । মৎকৃতে হরিভির্বীরৈর্বৃতো দন্তনখায়ুধৈঃ॥২৫॥ কচ্চিচ্চ লক্ষ্মণঃ শূরঃ সুমিত্রানন্দবর্ধনঃ। অস্ত্রবিচ্ছরজালেন রাক্ষসান্বিধমিষ্যতি ॥২৬॥ রৌদ্রেণ কচ্চিদস্ত্রেণ রামেণ নিহতং রণে । দ্রক্ষ্যাম্যল্পেন কালেন রাবণং সসুহৃজ্জনম্ ॥২৭॥ কচ্চিন্ন তদ্ধেমসমানবর্ণং তস্যাননং পদ্মসমানগন্ধি । ময়া বিনা শুষ্যতি শোকদীনং জলক্ষয়ে পদ্মমিবাতপেন ॥২৮॥ ধর্মাপদেশাত্ত্যজতঃ স্বরাজ্যং মাং চাপ্যরণ্যং নয়তঃ পদাতেঃ। নাসীদ্ব্যথা যস্য ন ভীর্ন শোকঃ কচ্চিৎস ধৈর্যং হৃদয়ে করোতি ॥২৯॥ ন চাস্য মাতা ন পিতা ন চান্যঃ স্নেহাদ্বিশিষ্টোঽস্তি ময়া সমো বা । তাবদ্ধ্যহং দূত জিজীবিষেয়ং যাবৎপ্রবৃত্তিং শৃণুয়াং প্রিয়স্য ॥৩০॥ ইতীব দেবী বচনং মহার্থং তং বানরেন্দ্রং মধুরার্থমুক্ত্বা । শ্রোতুং পুনস্তস্য বচোঽভিরামং রামার্থয়ুক্তং বিররাম রামা ॥৩১॥ সীতায়া বচনং শ্রুত্বা মারুতির্ভীমবিক্রমঃ। শিরস্যঞ্জলিমাধায় বাক্যমুত্তরমব্রবীৎ ॥৩২॥ ন ত্বামিহস্থাং জানীতে রামঃ কমললোচনঃ। তেন ত্বাং নানয়ত্যাশু শচীমিব পুরন্দরঃ॥৩৩॥ শ্রুত্বৈব তু বচো মহ্যং ক্ষিপ্রমেষ্যতি রাঘবঃ। চমূং প্রকর্ষন্মহতীং হর্যৃক্ষগণসংয়ুতাম্ ॥৩৪॥ বিষ্টম্ভয়িত্বা বাণৌঘৈরক্ষোভ্যং বরুণালয়ম্ । করিষ্যতি পুরীং লঙ্কাং কাকুৎস্থঃ শান্তরাক্ষসাম্ ॥৩৫॥ তত্র যদ্যন্তরা মৃত্যুর্যদি দেবাঃ মহাসুরাঃ। স্থাস্যন্তি পথি রামস্য স তানপি বধিষ্যতি ॥৩৬॥ তবাদর্শনজেনার্যে শোকেন পরিপূরিতঃ। ন শর্ম লভতে রামঃ সিংহার্দিত ইব দ্বিপঃ॥৩৭॥ মন্দরেণ চ তে দেবি শপে মূলফলেন চ । মলয়েন চ বিন্ধ্যেন মেরুণা দর্দুরেণ চ ॥৩৮॥ যথা সুনয়নং বল্গু বিম্বোষ্ঠং চারুকুণ্ডলম্ । মুখং দ্রক্ষ্যসি রামস্য পূর্ণচন্দ্রমিবোদিতম্ ॥৩৯॥ ক্ষিপ্রং দ্রক্ষ্যসি বৈদেহি রামং প্রস্রবণে গিরৌ । শতক্রতুমিবাসীনং নাকপৃষ্ঠস্য মূর্ধনি ॥৪০॥ ন মাংসং রাঘবো ভুঙ্ক্তে ন চৈব মধুসেবতে । বন্যং সুবিহিতং নিত্যং ভক্তমশ্নাতি পঞ্চমম্ ॥৪১॥ নৈব দংশান্ন মশকান্ন কীটান্ন সরীসৃপান্ । রাঘবোঽপনয়েদ্গত্রাত্ত্বদ্গতেনান্তরাত্মনা ॥৪২॥ নিত্যং ধ্যানপরো রামো নিত্যং শোকপরায়ণঃ। নান্যচ্চিন্তয়তে কিঞ্চিৎস তু কামবশং গতঃ॥৪৩॥ অনিদ্রঃ সততং রামঃ সুপ্তোঽপি চ নরোত্তমঃ। সীতেতি মধুরাং বাণীং ব্যাহরন্প্রতিবুধ্যতে ॥৪৪॥ দৃষ্ট্বা ফলং বা পুষ্পং বা যচ্চান্যৎস্ত্রীমনোহরম্ । বহুশো হা প্রিয়েত্যেবং শ্বসংস্ত্বামভিভাষতে ॥৪৫॥ স দেবি নিত্যং পরিতপ্যমানঃ ত্বামেব সীতেত্যভিভাষমাণঃ। ধৃতব্রতো রাজসুতো মহাত্মা তবৈব লাভায় কৃতপ্রয়ত্নঃ॥৪৬॥ সা রামসঙ্কীর্তনবীতশোকা রামস্য শোকেন সমানশোকা । শরন্মুখেনাম্বুদশেষচন্দ্রা নিশেব বৈদেহসুতা বভূব ॥৪৫॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ষট্ত্রিংশঃ সর্গঃ