অথ সপ্তত্রিংশঃ সর্গঃ সা সীতা বচনং শ্রুত্বা পূর্ণচন্দ্রনিভাননা । হনূমন্তমুবাচেদং ধর্মার্থসহিতং বচঃ॥১॥ অমৃতং বিষসম্পৃক্তং ত্বয়া বানর ভাষিতম্ । যচ্চ নান্যমনা রামো যচ্চ শোকপরায়ণঃ॥২॥ ঐশ্বর্যে বা সুবিস্তীর্ণে ব্যসনে বা সুদারুণে । রজ্জ্বেব পুরুষং বদ্ধ্বা কৃতান্তঃ পরিকর্ষতি ॥৩॥ বিধির্নূনমসংহার্যঃ প্রাণিনাং প্লবগোত্তম । সৌমিত্রিং মাং চ রামং চ ব্যসনৈঃ পশ্য মোহিতান্ ॥৪॥ শোকস্যাস্য কথং পারং রাঘবোঽধিগমিষ্যতি । প্লবমানঃ পরিক্রান্তো হতনৌঃ সাগরে যথা ॥৫॥ রাক্ষসানাং বধং কৃত্বা সূদয়িত্বা চ রাবণম্ । লঙ্কামুন্মথিতাং কৃত্বা কদা দ্রক্ষ্যতি মাং পতিঃ॥৬॥ স বাচ্যঃ সন্ত্বরস্বেতি যাবদেব ন পূর্যতে । অয়ং সংবৎসরঃ কালস্তাবদ্ধি মম জীবিতম্ ॥৭॥ বর্ততে দশমো মাসো দ্বৌ তু শেষৌ প্লবঙ্গম । রাবণেন নৃশংসেন সময়ো যঃ কৃতো মম ॥৮॥ বিভীষণেন চ ভ্রাত্রা মম নির্যাতনং প্রতি । অনুনীতঃ প্রয়ত্নেন ন চ তৎকুরুতে মতিম্ ॥৯॥ মম প্রতিপ্রদানং হি রাবণস্য ন রোচতে । রাবণং মার্গতে সঙ্খ্যে মৃত্যুঃ কালবশঙ্গতম্ ॥১০॥ জ্যেষ্ঠা কন্যা কলা নাম বিভীষণসুতা কপে । তয়া মমৈতদাখ্যাতং মাত্রা প্রহিতয়া স্বয়ম্ ॥১১॥ অবিন্ধ্যো নাম মেধাবী বিদ্বান্রাক্ষসপুঙ্গবঃ। ধৃতিমাঞ্ছীলবান্বৃদ্ধো রাবণস্য সুসংমতঃ॥১২॥ রামাৎক্ষয়মনুপ্রাপ্তং রক্ষসাং প্রত্যচোদয়ৎ । ন চ তস্য স দুষ্টাত্মা শৃণোতি বচনং হিতম্ ॥১৩॥ আশংসেয়ং হরিশ্রেষ্ঠ ক্ষিপ্রং মাং প্রাপ্স্যতে পতিঃ। অন্তরাত্মা হি মে শুদ্ধস্তস্মিংশ্চ বহবো গুণাঃ॥১৪॥ উৎসাহঃ পৌরুষং সত্ত্বমানৃশংস্যং কৃতজ্ঞতা । বিক্রমশ্চ প্রভাবশ্চ সন্তি বানর রাঘবে ॥১৫॥ চতুর্দশ সহস্রাণি রাক্ষসানাং জঘান যঃ। জনস্থানে বিনা ভ্রাত্রা শত্রুঃ কস্তস্য নোদ্বিজেৎ ॥১৬॥ ন স শক্যস্তুলয়িতুং ব্যসনৈঃ পুরুষর্ষভঃ। অহং তস্যানুভাবজ্ঞা শক্রস্যেব পুলোমজা ॥১৭॥ শরজালাংশুমাঞ্ছূরঃ কপে রামদিবাকরঃ। শত্রুরক্ষোময়ং তোয়মুপশোষং নয়িষ্যতি ॥১৮॥ ইতি সঞ্জল্পমানাং তাং রামার্থে শোককর্শিতাম্ । অশ্রুসম্পূর্ণবদনামুবাচ হনুমান্ কপিঃ॥১৯॥ শ্রুত্বৈব চ বচো মহ্যং ক্ষিপ্রমেষ্যতি রাঘবঃ। চমূং প্রকর্ষন্ মহতীং হর্যৃক্ষগণসঙ্কুলাম্ ॥২০॥ অথবা মোচয়িষ্যামি ত্বামদ্যৈব সরাক্ষসাৎ । অস্মাদ্দুঃখাদুপারোহ মম পৃষ্ঠমনিন্দিতে ॥২১॥ ত্বাং তু পৃষ্ঠগতাং কৃত্বা সন্তরিষ্যামি সাগরম্ । শক্তিরস্তি হি মে বোঢুং লঙ্কামপি সরাবণাম্ ॥২২॥ অহং প্রস্রবণস্থায় রাঘবায়াদ্য মৈথিলি । প্রাপয়িষ্যামি শক্রায় হব্যং হুতমিবানলঃ॥২৩॥ দ্রক্ষ্যস্যদ্যৈব বৈদেহি রাঘবং সহলক্ষ্মণম্ । ব্যবসায় সমায়ুক্তং বিষ্ণুং দৈত্যবধে যথা ॥২৪॥ ত্বদ্দর্শনকৃতোৎসাহমাশ্রমস্থং মহাবলম্ । পুরন্দরমিবাসীনং নগরাজস্য মূর্ধনি ॥২৫॥ পৃষ্ঠমারোহ মে দেবি মা বিকাঙ্ক্ষস্ব শোভনে । যোগমন্বিচ্ছ রামেণ শশাঙ্কেনেব রোহিণী ॥২৬॥ কথয়ন্তীব শশিনা সঙ্গমিষ্যসি রোহিণী । মৎপৃষ্ঠমধিরোহ ত্বং তরাকাশং মহার্ণবম্ ॥২৭॥ নহি মে সম্প্রয়াতস্য ত্বামিতো নয়তোঽঙ্গনে । অনুগন্তুং গতিং শক্তাঃ সর্বে লঙ্কানিবাসিনঃ॥২৮॥ যথৈবাহমিহ প্রাপ্তস্তথৈবাহমসংশয়ম্ । যাস্যামি পশ্য বৈদেহি ত্বামুদ্যম্য বিহায়সং ॥২৯॥ মৈথিলী তু হরিশ্রেষ্ঠাচ্ছ্রুত্বা বচনমদ্ভুতম্ । হর্ষবিস্মিতসর্বাঙ্গী হনূমন্তমথাব্রবীৎ ॥৩০॥ হনূমন্দূরমধ্বানং কথং মাং নেতুমিচ্ছসি । তদেব খলু তে মন্যে কপিত্বং হরিয়ূথপ ॥৩১॥ কথং চাল্পশরীরস্ত্বং মামিতো নেতুমিচ্ছসি । সকাশং মানবেন্দ্রস্য ভর্তুর্মে প্লবগর্ষভ ॥৩২॥ সীতায়াস্তু বচঃ শ্রুত্বা হনূমান্ মারুতাত্মজঃ। চিন্তয়ামাস লক্ষ্মীবান্ নবং পরিভবং কৃতম্ ॥৩৩॥ ন মে জানাতি সত্ত্বং বা প্রভাবং বাসিতেক্ষণা । তস্মাৎপশ্যতু বৈদেহী যদ্রূপং মম কামতঃ॥৩৪॥ ইতি সঞ্চিন্ত্য হনুমাংস্তদা প্লবগসত্তমঃ। দর্শয়ামাস সীতায়াঃ স্বরূপমরিমর্দনঃ॥৩৫॥ স তস্মাৎ পাদপাদ্ধীমানাপ্লুত্য প্লবগর্ষভঃ। ততো বর্ধিতুমারেভে সীতাপ্রত্যযকারণাৎ ॥৩৬॥ মেরুমন্দরসঙ্কাশো বভৌ দীপ্তানলপ্রভঃ। অগ্রতো ব্যবতস্থে চ সীতায়া বানরর্ষভঃ॥৩৭॥ হরিঃ পর্বতসঙ্কাশস্তাম্রবক্ত্রো মহাবলঃ। বজ্রদংষ্ট্রনখো ভীমো বৈদেহীমিদমব্রবীৎ ॥৩৮॥ সপর্বতবনোদ্দেশাং সাট্টপ্রাকারতোরণাম্ । লঙ্কামিমাং সনাথাং বা নয়িতুং শক্তিরস্তি মে ॥৩৯॥ তদবস্থাপ্যতাং বুদ্ধিরলং দেবি বিকাঙ্ক্ষয়া । বিশোকং কুরু বৈদেহি রাঘবং সহলক্ষ্মণম্ ॥৪০॥ তং দৃষ্ট্বাচলসঙ্কাশমুবাচ জনকাত্মজা । পদ্মপত্রবিশালাক্ষী মারুতস্যৌরসং সুতম্ ॥৪১॥ তব সত্ত্বং বলং চৈব বিজানামি মহাকপে । বায়োরিব গতিশ্চাপি তেজশ্চাগ্নেরিবাদ্ভুতম্ ॥৪২॥ প্রাকৃতোঽন্যঃ কথং চেমাং ভূমিমাগন্তুমর্হতি । উদধেরপ্রমেয়স্য পারং বানরয়ূথপ ॥৪৩॥ জানামি গমনে শক্তিং নয়নে চাপি তে মম । অবশ্যং সম্প্রধার্যাশু কার্যসিদ্ধিরিবাত্মনঃ॥৪৪॥ অয়ুক্তং তু কপিশ্রেষ্ঠ ময়া গন্তুং ত্বয়া সহ । বায়ুবেগসবেগস্য বেগো মাং মোহয়েত্তব ॥৪৫॥ অহমাকাশমাসক্তা উপর্যুপরি সাগরম্ । প্রপতেয়ং হি তে পৃষ্ঠাদ্ ভূয়ো বেগেন গচ্ছতঃ॥৪৬॥ পতিতা সাগরে চাহং তিমিনক্রঝষাকুলে । ভবেয়মাশু বিবশা যাদসামন্নমুত্তমম্ ॥৪৭॥ ন চ শক্ষ্যে ত্বয়া সার্ধং গন্তুং শত্রুবিনাশন । কলত্রবতি সন্দেহস্ত্বয়ি স্যাদপ্যসংশয়ম্ ॥৪৮॥ হ্রিয়মাণাং তু মাং দৃষ্ট্বা রাক্ষসা ভীমবিক্রমাঃ। অনুগচ্ছেয়ুরাদিষ্টা রাবণেন দুরাত্মনা ॥৪৯॥ তৈস্ত্বং পরিবৃতঃ শূরৈঃ শূলমুদ্গর পাণিভিঃ। ভবেস্ত্বং সংশয়ং প্রাপ্তো ময়া বীর কলত্রবান্ ॥৫০॥ সায়ুধা বহবো ব্যোম্নি রাক্ষসাস্ত্বং নিরায়ুধঃ। কথং শক্ষ্যসি সংয়াতুং মাং চৈব পরিরক্ষিতুম্ ॥৫১॥ যুধ্যমানস্য রক্ষোভিস্ততস্তৈঃ ক্রূরকর্মভিঃ। প্রপতেয়ং হি তে পৃষ্ঠদ্ভয়ার্তা কপিসত্তম ॥৫২॥ অথ রক্ষাংসি ভীমানি মহান্তি বলবন্তি চ । কথঞ্চিৎসাম্পরায়ে ত্বাং জয়েয়ুঃ কপিসত্তম ॥৫৩॥ অথবা যুধ্যমানস্য পতেয়ং বিমুখস্য তে । পতিতাং চ গৃহীত্বা মাং নয়েয়ুঃ পাপরাক্ষসাঃ॥৫৪॥ মাং বা হরেয়ুস্ত্বদ্ধস্তাদ্বিশসেয়ুরথাপি বা । অনবস্থৌ হি দৃশ্যেতে যুদ্ধে জয়পরাজয়ৌ ॥৫৫॥ অহং বাপি বিপদ্যেয়ং রক্ষোভিরভিতর্জিতা । ত্বৎপ্রয়ত্নো হরিশ্রেষ্ঠ ভবেন্নিষ্ফল এব তু ॥৫৬॥ কামং ত্বমপি পর্যাপ্তো নিহন্তুং সর্বরাক্ষসান্ । রাঘবস্য যশো হীয়েত্ত্বয়া শস্তৈস্তু রাক্ষসৈঃ॥৫৭॥ অথবাঽঽদায় রক্ষাংসি ন্যসেয়ুঃ সংবৃতে হি মাম্ । যত্র তে নাভিজানীয়ুর্হরয়ো নাপি রাঘবঃ॥৫৮॥ আরম্ভস্তু মদর্থোঽয়ং ততস্তব নিরর্থকঃ। ত্বয়া হি সহ রামস্য মহানাগমনে গুণঃ॥৫৯॥ ময়ি জীবিতমায়ত্তং রাঘবস্যামিতৌজসঃ। ভ্রাতৄণাং চ মহাবাহো তব রাজকুলস্য চ ॥৬০॥ তৌ নিরাশৌ মদর্থং চ শোকসন্তাপকর্শিতৌ । সহ সর্বর্ক্ষহরিভিস্ত্যক্ষ্যতঃ প্রাণসঙ্গ্রহম্ ॥৬১॥ ভর্তুর্ভক্তিং পুরস্কৃত্য রামাদন্যস্য বানর । নাহং স্প্রষ্টুং স্বতো গাত্রমিচ্ছেয়ং বানরোত্তম ॥৬২॥ যদহং গাত্রসংস্পর্শং রাবণস্য গতা বলাৎ । অনীশা কিং করিষ্যামি বিনাথা বিবশা সতী ॥৬৩॥ যদি রামো দশগ্রীবমিহ হত্বা সরাক্ষসং । মামিতো গৃহ্য গচ্ছেত তত্তস্য সদৃশং ভবেৎ ॥৬৪॥ শ্রুতাশ্চ দৃষ্টা হি ময়া পরাক্রমা মহাত্মনস্তস্য রণাবমর্দিনঃ। ন দেবগন্ধর্বভুজঙ্গরাক্ষসা ভবন্তি রামেণ সমা হি সংয়ুগে ॥৬৫॥ সমীক্ষ্য তং সংয়তি চিত্রকার্মুকং মহাবলং বাসবতুল্যবিক্রমম্ । সলক্ষ্মণং কো বিষহেত রাঘবং হুতাশনং দীপ্তমিবানিলেরিতম্ ॥৬৬॥ সলক্ষ্মণং রাঘবমাজিমর্দনং দিশাগজং মত্তমিব ব্যবস্থিতম্ । সহেত কো বানরমুখ্য সংয়ুগে যুগান্তসূর্যপ্রতিমং শরার্চিষম্ ॥৬৭॥ স মে কপিশ্রেষ্ঠ সলক্ষ্মণং প্রিয়ং সয়ূথপং ক্ষিপ্রমিহোপপাদয় । চিরায় রামং প্রতি শোককর্শিতাং কুরুষ্ব মাং বানরবীর হর্ষিতাম্ ॥৬৮॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে সপ্তত্রিংশঃ সর্গঃ