অথ অষ্টাত্রিংশঃ সর্গঃ ততঃ স কপিশার্দূলস্তেন বাক্যেন তোষিতঃ। সীতামুবাচ তচ্ছ্রুত্বা বাক্যং বাক্যবিশারদঃ॥১॥ যুক্তরূপং ত্বয়া দেবি ভাষিতং শুভদর্শনে । সদৃশং স্ত্রীস্বভাবস্য সাধ্বীনাং বিনয়স্য চ ॥২॥ স্ত্রীত্বান্ন ত্বং সমর্থাসি সাগরং ব্যতিবর্তিতুম্ । মামধিষ্ঠায় বিস্তীর্ণং শতয়োজনমায়তম্ ॥৩॥ দ্বিতীয়ং কারণং যচ্চ ব্রবীষি বিনয়ান্বিতে । রামাদন্যস্য নার্হামি সংসর্গমিতি জানকি ॥৪॥ এতত্তে দেবি সদৃশং পত্ন্যাস্তস্য মহাত্মনঃ। কা হ্যন্যা ত্বামৃতে দেবি ব্রূয়াদ্বচনমীদৃশম্ ॥৫॥ শ্রোষ্যতে চৈব কাকুৎস্থঃ সর্বং নিরবশেষতঃ। চেষ্টিতং যত্ত্বয়া দেবি ভাষিতং চ মমাগ্রতঃ॥৬॥ কারণৈর্বহুভির্দেবি রাম প্রিয়চিকীর্ষয়া । স্নেহপ্রস্কন্নমনসা ময়ৈতৎসমুদীরিতম্ ॥৭॥ লঙ্কায়া দুষ্প্রবেশত্বাদ্দুস্তরত্বান্মহোদধেঃ। সামর্থ্যাদাত্মনশ্চৈব ময়ৈতৎসমুদীরিতম্ ॥৮॥ ইচ্ছামি ত্বাং সমানেতুমদ্যৈব রঘুনন্দিনা । গুরুস্নেহেন ভক্ত্যা চ নান্যথা তদুদাহৃতম্ ॥৯॥ যদি নোৎসহতে যাতুং ময়া সার্ধমনিন্দিতে । অভিজ্ঞানং প্রয়চ্ছ ত্বং জানীয়াদ্রাঘবো হি যৎ ॥১০॥ এবমুক্তা হনুমতা সীতা সুরসুতোপমা । উবাচ বচনং মন্দং বাষ্পপ্রগ্রথিতাক্ষরম্ ॥১১॥ ইদং শ্রেষ্ঠমভিজ্ঞানং ব্রূয়াস্ত্বং তু মম প্রিয়ম্ । শৈলস্য চিত্রকূটস্য পাদে পূর্বোত্তরে পদে ॥১২॥ তাপসাশ্রমবাসিন্যাঃ প্রাজ্যমূলফলোদকে । তস্মিন্সিদ্ধাশ্রিতে দেশে মন্দাকিন্যবিদূরতঃ॥১৩॥ তস্যোপবনখণ্ডেষু নানাপুষ্পসুগন্ধিষু । বিহৃত্য সলিলে ক্লিন্নো মমাঙ্কে সমুপাবিশঃ॥১৪॥ ততো মাংসসমায়ুক্তো বায়সঃ পর্যতুণ্ডয়ৎ । তমহং লোষ্টমুদ্যম্য বারয়ামি স্ম বায়সম্ ॥১৫॥ দারয়ন্স চ মাং কাকস্তত্রৈব পরিলীয়তে । ন চাপ্যুপারমন্মাংসাদ্ভক্ষার্থী বলিভোজনঃ॥১৬॥ উৎকর্ষন্ত্যাং চ রশনাং ক্রুদ্ধায়াং ময়ি পক্ষিণে । স্রংসমানে চ বসনে ততো দৃষ্টা ত্বয়া হ্যহম্ ॥১৭॥ ত্বয়া বিহসিতা চাহং ক্রুদ্ধা সংলজ্জিতা তদা । ভক্ষ্য গৃদ্ধেন কাকেন দারিতা ত্বামুপাগতা ॥১৮॥ ততঃ শ্রান্তাহমুৎসঙ্গমাসীনস্য তবাবিশম্ । ক্রুধ্যন্তীব প্রহৃষ্টেন ত্বয়াহং পরিসান্ত্বিতা ॥১৯॥ বাষ্পপূর্ণমুখী মন্দং চক্ষুষী পরিমার্জতী । লক্ষিতাহং ত্বয়া নাথ বায়সেন প্রকোপিতা ॥২০॥ পরিশ্রমাচ্চ সুপ্তা হে রাঘবাঙ্কেঽস্ম্যহং চিরম্ । পর্যায়েণ প্রসুপ্তশ্চ মমাঙ্কে ভরতাগ্রজঃ॥২১॥ স তত্র পুনরেবাথ বায়সঃ সমুপাগমৎ । ততঃ সুপ্তপ্রবুদ্ধাং মাং রাঘবাঙ্কাৎ সমুত্থিতাম্ । বায়সঃ সহসাগম্য বিদদার স্তনান্তরে ॥২২॥ পুনঃ পুনরথোৎপত্য বিদদার স মাং ভৃশম্ । ততঃ সমুত্থিতো রামো মুক্তৈঃ শোণিতবিন্দুভিঃ॥২৩॥ স মাং দৃষ্ট্বা মহাবাহুর্বিতুন্নাং স্তনয়োস্তদা । আশীবিষ ইব ক্রুদ্ধঃ শ্বসন্ বাক্যমভাষত ॥২৪॥ কেন তে নাগনাসোরু বিক্ষতং বৈ স্তনান্তরম্ । কঃ ক্রীডতি সরোষেণ পঞ্চবক্ত্রেণ ভোগিনা ॥২৫॥ বীক্ষমাণস্ততস্তং বৈ বায়সং সমবৈক্ষত । নখৈঃ সরুধিরৈস্তীক্ষ্ণৈর্মামেবাভিমুখং স্থিতম্ ॥২৬॥ পুত্রঃ কিল স শক্রস্য বায়সঃ পততাং বরঃ। ধরান্তরং গতঃ শীঘ্রং পবনস্য গতৌ সমঃ॥২৭॥ ততস্তস্মিন্মহাবাহুঃ কোপসংবর্তিতেক্ষণঃ। বায়সে কৃতবান্ক্রূরাং মতিং মতিমতাং বরঃ॥২৮॥ স দর্ভসংস্তরাদ্গৃহ্য ব্রহ্মণোঽস্ত্রেণ যোজয়েৎ । স দীপ্ত ইব কালাগ্নির্জজ্বালাভিমুখো দ্বিজম্ ॥২৯॥ স তং প্রদীপ্তং চিক্ষেপ দর্ভং তং বায়সং প্রতি । ততস্তু বায়সং দর্ভঃ সোঽম্বরেঽনুজগাম হ ॥৩০॥ অনুসৃষ্টস্তদা কাকো জগাম বিবিধাং গতিম্ । ত্রাণকাম ইমং লোকং সর্বং বৈ বিচচার হ ॥৩১॥ স পিত্রা চ পরিত্যক্তঃ সর্বৈশ্চ পরমর্ষিভিঃ। ত্রীঁল্লোকান্সম্পরিক্রম্য তমেব শরণং গতঃ॥৩২॥ স তং নিপতিতং ভূমৌ শরণ্যঃ শরণাগতম্ । বধার্হমপি কাকুৎস্থঃ কৃপয়া পর্যপালয়ৎ ॥৩৩॥ পরিদ্যূনং বিবর্ণং চ পতমানং তমব্রবীৎ । মোঘংমস্ত্রং ন শক্যং তু ব্রাহ্মং কর্তুং তদুচ্যতাম্ ॥৩৪॥ ততস্তস্যাক্ষি কাকস্য হিনস্তি স্ম স দক্ষিণম্ । দত্ত্বা তু দক্ষিণং নেত্রং প্রাণেভ্যঃ পরিরক্ষিতঃ॥৩৫॥ স রামায় নমস্কৃত্বা রাজ্ঞে দশরথায় চ । বিসৃষ্টস্তেন বীরেণ প্রতিপেদে স্বমালয়ম্ ॥৩৬॥ মৎকৃতে কাকমাত্রেঽপি ব্রহ্মাস্ত্রং সমুদীরিতম্ । কস্মাদ্যো মাহরত্ত্বত্তঃ ক্ষমসে তং মহীপতে ॥৩৭॥ স কুরুষ্ব মহোৎসাহাং কৃপাং ময়ি নরর্ষভ । ত্বয়া নাথবতী নাথ হ্যনাথা ইব দৃশ্যতে ॥৩৮॥ আনৃশংস্যং পরো ধর্মস্ত্বত্ত এব ময়া শ্রুতম্ । জানামি ত্বাং মহাবীর্যং মহোৎসাহং মহাবলম্ ॥৩৯॥ অপারপারমক্ষোভ্যং গাম্ভীর্যাৎসাগরোপমম্ । ভর্তারং সসমুদ্রায়া ধরণ্যা বাসবোপমম্ ॥৪০॥ এবমস্ত্রবিদাং শ্রেষ্ঠো বলবান্ সত্ত্ববানপি । কিমর্থমস্ত্রং রক্ষঃসু ন যোজয়সি রাঘব ॥৪১॥ ন নাগা নাপি গন্ধর্বা ন সুরা ন মরুদ্গণাঃ। রামস্য সমরে বেগং শক্তাঃ প্রতিসমীহিতুম্ ॥৪২॥ তস্য বীর্যবতঃ কশ্চিদ্যদ্যস্তি ময়ি সম্ভ্রমঃ। কিমর্থং ন শরৈস্তীক্ষ্ণৈঃ ক্ষয়ং নয়তি রাক্ষসান্ ॥৪৩॥ ভ্রাতুরাদেশমাদায় লক্ষ্মণো বা পরন্তপঃ। কস্য হেতোর্ন মাং বীরঃ পরিত্রাতি মহাবলঃ॥৪৪॥ যদি তৌ পুরুষব্যাঘ্রৌ বায়্বিন্দ্রসমতেজসৌ । সুরাণামপি দুর্ধর্ষৌ কিমর্থং মামুপেক্ষতঃ॥৪৫॥ মমৈব দুষ্কৃতং কিঞ্চিন্মহদস্তি ন সংশয়ঃ। সমর্থাবপি তৌ যন্মাং নাবেক্ষেতে পরন্তপৌ ॥৪৬॥ বৈদেহ্যা বচনং শ্রুত্বা করুণং সাশ্রুভাষিতম্ । অথাব্রবীন্মহাতেজা হনুমান্ হরিয়ূথপঃ॥৪৭॥ ত্বচ্ছোকবিমুখো রামো দেবি সত্যেন তে শপে । রামে দুঃখাভিপন্নে তু লক্ষ্মণঃ পরিতপ্যতে ॥৪৮॥ কথঞ্চিদ্ভবতী দৃষ্টা ন কালঃ পরিশোচিতুম্ । ইমং মুহূর্তং দুঃখানামন্তং দ্রক্ষ্যসি শোভনে ॥৪৯॥ তাবুভৌ পুরুষব্যাঘ্রৌ রাজপুত্রৌ মহাবলৌ । ত্বদ্দর্শনকৃতোৎসাহৌ লোকান্ ভস্মীকরিষ্যতঃ॥৫০॥ হত্ত্বা চ সমরক্রূরং রাবণং সহবান্ধবম্ । রাঘবস্ত্বাং বিশালাক্ষি স্বাং পুরীং প্রতি নেষ্যতি ॥৫১॥ ব্রূহি যদ্রাঘবো বাচ্যো লক্ষ্মণশ্চ মহাবলঃ। সুগ্রীবো বাপি তেজস্বী হরয়ো বা সমাগতাঃ॥৫২॥ ইত্যুক্তবতি তস্মিংশ্চ সীতা পুনরথাব্রবীৎ । কৌসল্যা লোকভর্তারং সুষুবে যং মনস্বিনী ॥৫৩॥ তং মমার্থে সুখং পৃচ্ছ শিরসা চাভিবাদয় । স্রজশ্চ সর্বরত্নানি প্রিয়ায়াশ্চ বরাঙ্গনাঃ॥৫৪॥ ঐশ্বর্যং চ বিশালায়াং পৃথিব্যামপি দুর্লভম্ । পিতরং মাতরং চৈব সংমান্যাভিপ্রসাদ্য চ ॥৫৫॥ অনুপ্রব্রজিতো রামং সুমিত্রা যেন সুপ্রজাঃ। আনুকূল্যেন ধর্মাত্মা ত্যক্ত্বা সুখমনুত্তমম্ ॥৫৬॥ অনুগচ্ছতি কাকুৎস্থং ভ্রাতরং পালয়ন্বনে । সিংহস্কন্ধো মহাবাহুর্মনস্বী প্রিয়দর্শনঃ॥৫৭॥ পিতৃবদ্বর্ততে রামে মাতৃবন্মাং সমাচরৎ । হ্রিয়মাণাং তদা বীরো ন তু মাং বেদ লক্ষ্মণঃ॥৫৮॥ বৃদ্ধোপসেবী লক্ষ্মীবাঞ্শক্তো ন বহুভাষিতা । রাজপুত্রঃ প্রিয়শ্রেষ্ঠঃ সদৃশঃ শ্বশুরস্য মে ॥৫৯॥ মত্তঃ প্রিয়তরো নিত্যং ভ্রাতা রামস্য লক্ষ্মণঃ। নিয়ুক্তো ধুরি যস্যাং তু তামুদ্বহতি বীর্যবান্ ॥৬০॥ যং দৃষ্ট্বা রাঘবো নৈব বৃত্তমার্যমনুস্মরৎ । স মমার্থায় কুশলং বক্তব্যো বচনান্মম ॥৬১॥ মৃদুর্নিত্যং শুচির্দক্ষঃ প্রিয়ো রামস্য লক্ষ্মণঃ। যথা হি বানরশ্রেষ্ঠ দুঃখক্ষয়করো ভবেৎ ॥৬২॥ ত্বমস্মিন্ কার্যনির্বাহে প্রমাণং হরিয়ূথপ । রাঘবস্ত্বৎসমারম্ভান্ময়ি যত্নপরো ভবেৎ ॥৬৩॥ ইদং ব্রূয়াশ্চ মে নাথং শূরং রামং পুনঃ পুনঃ। জীবিতং ধারয়িষ্যামি মাসং দশরথাত্মজ ॥৬৪॥ ঊর্ধ্বং মাসান্ন জীবেয়ং সত্যেনাহং ব্রবীমি তে । রাবণেনোপরুদ্ধাং মাং নিকৃত্যা পাপকর্মণা । ত্রাতুমর্হসি বীর ত্বং পাতালাদিব কৌশিকীম্ ॥৬৫॥ ততো বস্ত্রগতং মুক্ত্বা দিব্যং চূডামণিং শুভম্ । প্রদেয়ো রাঘবায়েতি সীতা হনুমতে দদৌ ॥৬৬॥ প্রতিগৃহ্য ততো বীরো মণিরত্নমনুত্তমম্ । অঙ্গুল্যা যোজয়ামাস নহ্যস্য প্রাভবদ্ভুজঃ॥৬৭॥ মণিরত্নং কপিবরঃ প্রতিগৃহ্যাভিবাদ্য চ । সীতাং প্রদক্ষিণং কৃত্বা প্রণতঃ পার্শ্বতঃ স্থিতঃ॥৬৮॥ হর্ষেণ মহতা যুক্তঃ সীতাদর্শনজেন সঃ। হৃদয়েন গতো রামং লক্ষ্মণং চ সলক্ষণম্ ॥৬৯॥ মণিবরমুপগৃহ্য তং মহার্হং জনকনৃপাত্মজয়া ধৃতং প্রভাবাৎ । গিরিবরপবনাবধূতমুক্তঃ সুখিতমনাঃ প্রতিসঙ্ক্রমং প্রপেদে ॥৭০॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে অষ্টাত্রিংশঃ সর্গঃ