অথ একোনচত্বারিংশঃ সর্গঃ মণিং দত্ত্বা ততঃ সীতা হনূমন্তমথাব্রবীৎ । অভিজ্ঞানমভিজ্ঞাতমেতদ্ রামস্য তত্ত্বতঃ॥১॥ মণিং দৃষ্ট্বা তু রামো বৈ ত্রয়াণাং সংস্মরিষ্যতি । বীরো জনন্যা মম চ রাজ্ঞো দশরথস্য চ ॥২॥ স ভূয়স্ত্বং সমুৎসাহচোদিতো হরিসত্তম । অস্মিন্ কার্যসমুৎসাহে প্রচিন্তয় যদুত্তরম্ ॥৩॥ ত্বমস্মিন্কার্যনির্যোগে প্রমাণং হরিসত্তম । তস্য চিন্তয় যো যত্নো দুঃখক্ষয়করো ভবেৎ ॥৪॥ হনুমন্ যত্নমাস্থায় দুঃখক্ষয়করো ভব । স তথেতি প্রতিজ্ঞায় মারুতির্ভীমবিক্রমঃ॥৫॥ শিরসাঽঽবন্দ্য বৈদেহীং গমনায়োপচক্রমে । জ্ঞাত্বা সম্প্রস্থিতং দেবী বানরং পবনাত্মজম্ ॥৬॥ বাষ্পগদ্গদয়া বাচা মৈথিলী বাক্যমব্রবীৎ । হনূমন্ কুশলং ব্রূয়াঃ সহিতৌ রামলক্ষ্মণৌ ॥৭॥ সুগ্রীবং চ সহামাত্যং সর্বান্ বৃদ্ধাংশ্চ বানরান্ । ব্রূয়াস্ত্বং বানরশ্রেষ্ঠ কুশলং ধর্মসংহিতম্ ॥৮॥ যথা চ স মহাবাহুর্মাং তারয়তি রাঘবঃ। অস্মাদ্দুঃখাম্বুসংরোধাত্ত্বং সমাধাতুমর্হসি ॥৯॥ জীবন্তীং মাং যথা রামঃ সম্ভাবয়তি কীর্তিমান্ । তত্ত্বয়া হনুমন্বাচ্যং বাচা ধর্মমবাপ্নুহি ॥১০॥ নিত্যমুৎসাহয়ুক্তস্য বাচঃ শ্রুত্বা ময়েরিতাঃ। বর্ধিষ্যতে দাশরথেঃ পৌরুষং মদবাপ্তয়ে ॥১১॥ মৎসন্দেশয়ুতা বাচস্ত্বত্তঃ শ্রুত্বৈব রাঘবঃ। পরাক্রমে মতিং বীরো বিধিবৎসংবিধাস্যতি ॥১২॥ সীতায়াস্তদ্বচঃ শ্রুত্বা হনুমান্ মারুতাত্মজঃ। শিরস্যঞ্জলিমাধায় বাক্যমুত্তরমব্রবীৎ ॥১৩॥ ক্ষিপ্রমেষ্যতি কাকুৎস্থো হর্যৃক্ষপ্রবরৈর্বৃতঃ। যস্তে যুধি বিজিত্যারীঞ্শোকং ব্যপনয়িষ্যতি ॥১৪॥ নহি পশ্যামি মর্ত্যেষু নাসুরেষু সুরেষু বা । যস্তস্য বমতো বাণান্ স্থাতুমুৎসহতেঽগ্রতঃ॥১৫॥ অপ্যর্কমপি পর্জন্যমপি বৈবস্বতং যমম্ । স হি সোঢুং রণে শক্তস্তব হেতোর্বিশেষতঃ॥১৬॥ স হি সাগরপর্যন্তাং মহীং সাধিতুমর্হতি । ত্বন্নিমিত্তো হি রামস্য জয়ো জনকনন্দিনি ॥১৭॥ তস্য তদ্বচনং শ্রুত্বা সম্যক্সত্যং সুভাষিতম্ । জানকী বহু মেনে তং বচনং চেদমব্রবীৎ ॥১৮॥ ততস্তং প্রস্থিতং সীতা বীক্ষমাণা পুনঃ পুনঃ। ভর্তুস্নেহান্বিতং বাক্যং সৌহার্দাদনুমানয়ৎ ॥১৯॥ যদি বা মন্যসে বীর বসৈকাহমরিন্দম । কস্মিংশ্চিৎসংবৃতে দেশে বিশ্রান্তঃ শ্বো গমিষ্যসি ॥২০॥ মম চৈবাল্পভাগ্যায়াঃ সাংনিধ্যাৎ তব বানর । অস্য শোকস্য মহতো মুহূর্তং মোক্ষণং ভবেৎ ॥২১॥ ততো হি হরিশার্দূল পুনরাগমনায় তু । প্রাণানামপি সন্দেহো মম স্যান্নাত্র সংশয়ঃ॥২২॥ তবাদর্শনজঃ শোকো ভূয়ো মাং পরিতাপয়েৎ । দুঃখাদ্দুঃখপরামৃষ্টাং দীপয়ন্নিব বানর ॥২৩॥ অয়ং চ বীর সন্দেহস্তিষ্ঠতীব মমাগ্রতঃ। সুমহাংস্ত্বৎসহায়েষু হর্যৃক্ষেষু হরীশ্বর ॥২৪॥ কথং নু খলু দুষ্পারং তরিষ্যন্তি মহোদধিম্ । তানি হর্যৃক্ষসৈন্যানি তৌ বা নরবরাত্মজৌ ॥২৫॥ ত্রয়াণামেব ভূতানাং সাগরস্যেহ লঙ্ঘনে । শক্তিঃ স্যাদ্বৈনতেয়স্য তব বা মারুতস্য বা ॥২৬॥ তদস্মিন্কার্যনির্যোগে বীরৈবং দুরতিক্রমে । কিং পশ্যসে সমাধানং ত্বং হি কার্যবিদাং বরঃ॥২৭॥ কামমস্য ত্বমেবৈকঃ কার্যস্য পরিসাধনে । পর্যাপ্তঃ পরবীরঘ্ন যশস্যস্তে ফলোদয়ঃ॥২৮॥ বলৈঃ সমগ্রৈর্যুধি মাং রাবণং জিত্য সংয়ুগে । বিজয়ী স্বপুরং যায়াৎ তত্তস্য সদৃশং ভবেৎ ॥২৯॥ বলৈস্তু সঙ্কুলাং কৃত্বা লঙ্কাং পরবলার্দনঃ। মাং নয়েদ্যদি কাকুৎস্থস্তত্তস্য সদৃশং ভবেৎ ॥৩০॥ তদ্যথা তস্য বিক্রান্তমনুরূপং মহাত্মনঃ। ভবেদাহব শূরস্য তথা ত্বমুপপাদয় ॥৩১॥ তদর্থোপহিতং বাক্যং প্রশ্রিতং হেতুসংহিতম্ । নিশম্য হনুমাঞ্শেষং বাক্যমুত্তরমব্রবীৎ ॥৩২॥ দেবি হর্যৃক্ষসৈন্যানামীশ্বরঃ প্লবতাং বরঃ। সুগ্রীবঃ সত্যসম্পন্নস্তবার্থে কৃতনিশ্চয়ঃ॥৩৩॥ স বানরসহস্রাণাং কোটীভিরভিসংবৃতঃ। ক্ষিপ্রমেষ্যতি বৈদেহি রাক্ষসানাং নিবর্হণঃ॥৩৪॥ তস্য বিক্রমসম্পন্নাঃ সত্ত্ববন্তো মহাবলাঃ। মনঃসঙ্কল্পসম্পাতা নিদেশে হরয়ঃ স্থিতাঃ॥৩৫॥ যেষাং নোপরি নাধস্তান্ন তির্যক্সজ্জতে গতিঃ। ন চ কর্মসু সীদন্তি মহৎস্বমিততেজসঃ॥৩৬॥ অসকৃত্তৈর্মহোৎসাহৈঃ সসাগরধরাধরা । প্রদক্ষিণীকৃতা ভূমির্বায়ুমার্গানুসারিভিঃ॥৩৭॥ মদ্বিশিষ্টাশ্চ তুল্যাশ্চ সন্তি তত্র বনৌকসঃ। মত্তঃ প্রত্যবরঃ কশ্চিন্নাস্তি সুগ্রীবসংনিধৌ ॥৩৮॥ অহং তাবদিহ প্রাপ্তঃ কিং পুনস্তে মহাবলাঃ। ন হি প্রকৃষ্টাঃ প্রেষ্যন্তে প্রেষ্যন্তে হীতরে জনাঃ॥৩৯॥ তদলং পরিতাপেন দেবি শোকো ব্যপৈতু তে । একোৎপাতেন তে লঙ্কামেষ্যন্তি হরিয়ূথপাঃ॥৪০॥ মম পৃষ্ঠগতৌ তৌ চ চন্দ্রসূর্যাবিবোদিতৌ । ত্বৎসকাশং মহাসঙ্ঘৌ নৃসিংহাবাগমিষ্যতঃ॥৪১॥ তৌ হি বীরৌ নরবরৌ সহিতৌ রামলক্ষ্মণৌ । আগম্য নগরীং লঙ্কাং সায়কৈর্বিধমিষ্যতঃ॥৪২॥ সগণং রাবণং হত্বা রাঘবো রঘুনন্দনঃ। ত্বামাদায় বরারোহে স্বপুরীং প্রতিয়াস্যতি ॥৪৩॥ তদাশ্বসিহি ভদ্রং তে ভব ত্বং কালকাঙ্ক্ষিণী । নচিরাদ্দ্রক্ষ্যসে রামং প্রজ্বলন্তমিবানলম্ ॥৪৪॥ নিহতে রাক্ষসেন্দ্রে চ সপুত্রামাত্যবান্ধবে । ত্বং সমেষ্যসি রামেণ শশাঙ্কেনেব রোহিণী ॥৪৫॥ ক্ষিপ্রং ত্বং দেবি শোকস্য পারং দ্রক্ষ্যসি মৈথিলি । রাবণং চৈব রামেণ দ্রক্ষ্যসে নিহতং বলাৎ ॥৪৬॥ এবমাশ্বাস্য বৈদেহীং হনূমান্মারুতাত্মজঃ। গমনায় মতিং কৃত্বা বৈদেহীং পুনরব্রবীৎ ॥৪৭॥ তমরিঘ্নং কৃতাত্মানং ক্ষিপ্রং দ্রক্ষ্যসি রাঘবম্ । লক্ষ্মণং চ ধনুষ্পাণিং লঙ্কাদ্বারমুপাগতম্ ॥৪৮॥ নখদংষ্ট্রায়ুধান্বীরান্ সিংহশার্দূলবিক্রমান্ । বানরান্বারণেন্দ্রাভান্ক্ষিপ্রং দ্রক্ষ্যসি সঙ্গতান্ ॥৪৯॥ শৈলাম্বুদনিকাশানাং লঙ্কামলয়সানুষু । নর্দতাং কপিমুখ্যানামার্যে যূথান্যনেকশঃ॥৫০॥ স তু মর্মণি ঘোরেণ তাডিতো মন্মথেষুণা । ন শর্ম লভতে রামঃ সিংহার্দিত ইব দ্বিপঃ॥৫১॥ রুদ মা দেবি শোকেন মা ভূত্তে মনসো ভয়ম্ । শচীব ভর্ত্রা শক্রেণ সঙ্গমেষ্যসি শোভনে ॥৫২॥ রামাদ্বিশিষ্টঃ কোঽন্যোঽস্তি কশ্চিৎসৌমিত্রিণা সমঃ। অগ্নিমারুতকল্পৌ তৌ ভ্রাতরৌ তব সংশ্রয়ৌ ॥৫৩॥ নাস্মিংশ্চিরং বৎস্যসি দেবি দেশে রক্ষোগণৈরধ্যুষিতেঽতিরৌদ্রে । ন তে চিরাদাগমনং প্রিয়স্য ক্ষমস্ব মৎসঙ্গমকালমাত্রম্ ॥৫৪॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একোনচত্বারিংশঃ সর্গঃ