অথ চত্বারিংশঃ সর্গঃ শ্রুত্বা তু বচনং তস্য বায়ুসূনোর্মহাত্মনঃ। উবাচাত্মহিতং বাক্যং সীতা সুরসুতোপমা ॥১॥ ত্বাং দৃষ্ট্বা প্রিয়বক্তারং সম্প্রহৃষ্যামি বানর । অর্ধসঞ্জাতসস্যেব বৃষ্টিং প্রাপ্য বসুন্ধরা ॥২॥ যথা তং পুরুষব্যাঘ্রং গাত্রৈঃ শোকাভিকর্শিতৈঃ। সংস্পৃশেয়ং সকামাহং তথা কুরু দয়াং ময়ি ॥৩॥ অভিজ্ঞানং চ রামস্য দদ্যা হরিগণোত্তম । ক্ষিপ্তামিষিকাং কাকস্য কোপাদেকাক্ষিশাতনীম্ ॥৪॥ মনঃশিলায়াস্তিলকো গণ্ডপার্শ্বে নিবেশিতঃ। ত্বয়া প্রণষ্টে তিলকে তং কিল স্মর্তুমর্হসি ॥৫॥ স বীর্যবান্ কথং সীতাং হৃতাং সমনুমন্যসে । বসন্তীং রক্ষসাং মধ্যে মহেন্দ্রবরুণোপম ॥৬॥ এষ চূডামণির্দিব্যো ময়া সুপরিরক্ষিতঃ। এতং দৃষ্ট্বা প্রহৃষ্যামি ব্যসনে ত্বামিবানঘ ॥৭॥ এষ নির্যাতিতঃ শ্রীমান্ ময়া তে বারিসম্ভবঃ। অতঃ পরং ন শক্ষ্যামি জীবিতুং শোকলালসা ॥৮॥ অসহ্যানি চ দুঃখানি বাচশ্চ হৃদয়চ্ছিদঃ। রাক্ষসৈঃ সহ সংবাসং ত্বৎকৃতে মর্ষয়াম্যহম্ ॥৯॥ ধারয়িষ্যামি মাসং তু জীবিতং শত্রুসূদন । মাসাদূর্ধ্বং ন জীবিষ্যে ত্বয়া হীনা নৃপাত্মজ ॥১০॥ ঘোরো রাক্ষসরাজোঽয়ং দৃষ্টিশ্চ ন সুখা ময়ি । ত্বাং চ শ্রুত্বা বিষজ্জন্তং ন জীবেয়মপি ক্ষণম্ ॥১১॥ বৈদেহ্যা বচনং শ্রুত্বা করুণং সাশ্রুভাষিতম্ । অথাব্রবীন্মহাতেজা হনুমান্মারুতাত্মজঃ॥১২॥ ত্বচ্ছোকবিমুখো রামো দেবি সত্যেন তে শপে । রামে শোকাভিভূতে তু লক্ষ্মণঃ পরিতপ্যতে ॥১৩॥ দৃষ্টা কথঞ্চিদ্ভবতী ন কালঃ পরিদেবিতুম্ । ইমং মুহূর্তং দুঃখানামন্তং দ্রক্ষ্যসি ভামিনি ॥১৪॥ তাবুভৌ পুরুষব্যাঘ্রৌ রাজপুত্রাবনিন্দিতৌ । ত্বদ্দর্শনকৃতোৎসাহৌ লঙ্কাং ভস্মীকরিষ্যতঃ॥১৫॥ হত্বা তু সমরে রক্ষো রাবণং সহবান্ধবৈঃ। রাঘবৌ ত্বাং বিশালাক্ষি স্বাং পুরীং প্রতি নেষ্যতঃ॥১৬॥ যত্তু রামো বিজানীয়াদভিজ্ঞানমনিন্দিতে । প্রীতিসঞ্জননং ভূয়স্তস্য ত্বং দাতুমর্হসি ॥১৭॥ সাব্রবীদ্দত্তমেবাহো ময়াভিজ্ঞানমুত্তমম্ । এতদেব হি রামস্য দৃষ্ট্বা যত্নেন ভূষণম্ ॥১৮॥ শ্রদ্ধেয়ং হনুমন্বাক্যং তব বীর ভবিষ্যতি । স তং মণিবরং গৃহ্য শ্রীমান্প্লবগসত্তমঃ॥১৯॥ প্রণম্য শিরসা দেবীং গমনায়োপচক্রমে । তমুৎপাতকৃতোৎসাহমবেক্ষ্য হরিয়ূথপম্ ॥২০॥ বর্ধমানং মহাবেগমুবাচ জনকাত্মজা । অশ্রুপূর্ণমুখী দীনা বাষ্পগদ্গদয়া গিরা ॥২১॥ হনূমন্সিংহসঙ্কাশৌ ভ্রাতরৌ রামলক্ষ্মণৌ । সুগ্রীবং চ সহামাত্যং সর্বান্ব্রূয়া অনাময়ম্ ॥২২॥ যথা চ স মহাবাহুর্মাং তারয়তি রাঘবঃ। অস্মাদ্দুঃখাম্বুসংরোধাৎ ত্বং সমাধাতুমর্হসি ॥২৩॥ ইদং চ তীব্রং মম শোকবেগং রক্ষোভিরেভিঃ পরিভর্ত্সনং চ । ব্রূয়াস্তু রামস্য গতঃ সমীপং শিবশ্চ তেঽধ্বাঽস্তু হরিপ্রবীর ॥২৪॥ স রাজপুত্র্যা প্রতিবেদিতার্থঃ কপিঃ কৃতার্থঃ পরিহৃষ্টচেতাঃ। তদল্পশেষং প্রসমীক্ষ্য কার্যং দিশং হ্যুদীচীং মনসা জগাম ॥২৫॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে চত্বারিংশঃ সর্গঃ