অথ একচত্বারিংশঃ সর্গঃ স চ বাগ্ভিঃ প্রশস্তাভির্গমিষ্যন্ পূজিতস্তয়া । তস্মাদ্দেশাদপাক্রম্য চিন্তয়ামাস বানরঃ॥১॥ অল্পশেষমিদং কার্যং দৃষ্টেয়মসিতেক্ষণা । ত্রীনুপায়ানতিক্রম্য চতুর্থ ইহ দৃশ্যতে ॥২॥ ন সাম রক্ষঃসু গুণায় কল্পতে ন দানমর্থোপচিতেষু যুজ্যতে । ন ভেদসাধ্যা বলদর্পিতা জনাঃ পরাক্রমস্ত্বেষ মমেহ রোচতে ॥৩॥ ন চাস্য কার্যস্য পরাক্রমাদৃতে বিনিশ্চয়ঃ কশ্চিদিহোপপদ্যতে । হতপ্রবীরাশ্চ রণে তু রাক্ষসাঃ কথঞ্চিদীয়ুর্যদিহাদ্য মার্দবম্ ॥৪॥ কার্যে কর্মণি নির্বৃত্তে যো বহূন্যপি সাধয়েৎ । পূর্বকার্যাবিরোধেন স কার্যং কর্তুমর্হতি ॥৫॥ ন হ্যেকঃ সাধকো হেতুঃ স্বল্পস্যাপীহ কর্মণঃ। যো হ্যর্থং বহুধা বেদ স সমর্থোঽর্থসাধনে ॥৬॥ ইহৈব তাবৎকৃতনিশ্চয়ো হ্যহং ব্রজেয়মদ্য প্লবগেশ্বরালয়ম্ । পরাত্মসংমর্দ বিশেষতত্ত্ববিৎ ততঃকৃতং স্যান্মম ভর্তৃশাসনম্ ॥৭॥ কথং নু খল্বদ্য ভবেৎসুখাগতং প্রসহ্য যুদ্ধং মম রাক্ষসৈঃ সহ । তথৈব খল্বাত্মবলং চ সারবৎ সমানয়েন্মাং চ রণে দশাননঃ॥৮॥ ততঃ সমাসাদ্য রণে দশাননং সমন্ত্রিবর্গং সবলং সয়ায়িনম্ । হৃদি স্থিতং তস্য মতং বলং চ সুখেন মত্বাহমিতঃ পুনর্ব্রজে ॥৯॥ ইদমস্য নৃশংসস্য নন্দনোপমমুত্তমম্ । বনং নেত্রমনঃকান্তং নানাদ্রুমলতায়ুতম্ ॥১০॥ ইদং বিধ্বংসয়িষ্যামি শুষ্কং বনমিবানলঃ। অস্মিন্ভগ্নে ততঃ কোপং করিষ্যতি স রাবণঃ॥১১॥ ততো মহৎসাশ্বমহারথদ্বিপং বলং সমানেষ্যতি রাক্ষসাধিপঃ। ত্রিশূলকালায়সপট্টিশায়ুধং ততো মহদ্যুদ্ধমিদং ভবিষ্যতি ॥১২॥ অহং চ তৈঃ সংয়তি চণ্ডবিক্রমৈঃ সমেত্য রক্ষোভিরভঙ্গবিক্রমঃ। নিহত্য তদ্রাবণচোদিতং বলং সুখং গমিষ্যামি হরীশ্বরালয়ম্ ॥১৩॥ ততো মারুতবৎক্রুদ্ধো মারুতির্ভীমবিক্রমঃ। ঊরুবেগেন মহতা দ্রুমান্ক্ষেপ্তুমথারভৎ ॥১৪॥ ততস্তদ্ধনুমান্বীরো বভঞ্জ প্রমদাবনম্ । মত্তদ্বিজসমাঘুষ্টং নানাদ্রুমলতায়ুতম্ ॥১৫॥ তদ্বনং মথিতৈর্বৃক্ষৈর্ভিন্নৈশ্চ সলিলাশয়ৈঃ। চূর্ণিতৈঃ পর্বতাগ্রৈশ্চ বভূবাপ্রিয়দর্শনম্ ॥১৬॥ নানাশকুন্তবিরুতৈঃ প্রভিন্নসলিলাশয়ৈঃ। তাম্রৈঃ কিসলয়ৈঃ ক্লান্তৈঃ ক্লান্তদ্রুমলতায়ুতৈঃ॥১৭॥ ন বভৌ তদ্বনং তত্র দাবানলহতং যথা । ব্যাকুলাবরণা রেজুর্বিহ্বলা ইব তা লতাঃ॥১৮॥ লতাগৃহৈশ্চিত্রগৃহৈশ্চ সাদিতৈ- র্ব্যালৈর্মৃগৈরার্তরবৈশ্চ পক্ষিভিঃ। শিলাগৃহৈরুন্মথিতৈস্তথা গৃহৈঃ প্রণষ্টরূপং তদভূন্মহদ্বনম্ ॥১৯॥ সা বিহ্বলাশোকলতাপ্রতানা বনস্থলী শোকলতাপ্রতানা । জাতা দশাস্যপ্রমদাবনস্য কপের্বলাদ্ধি প্রমদাবনস্য ॥২০॥ ততঃ স কৃত্বা জগতীপতের্মহান্ মহদ্ব্যলীকং মনসো মহাত্মনঃ। যুয়ুৎসুরেকো বহুভির্মহাবলৈঃ শ্রিয়াজ্বলংস্তোরণমাশ্রিতঃ কপিঃ॥২১॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে একচত্বারিংশঃ সর্গঃ