অথ দ্বিচত্বারিংশঃ সর্গঃ
ততঃ পক্ষিনিনাদেন বৃক্ষভঙ্গস্বনেন চ ।
বভূবুস্ত্রাসসম্ভ্রান্তাঃ সর্বে লঙ্কানিবাসিনঃ॥১॥
বিদ্রুতাশ্চ ভয়ত্রস্তা বিনেদুর্মৃগপক্ষিণঃ।
রক্ষসাং চ নিমিত্তানি ক্রূরাণি প্রতিপেদিরে ॥২॥
ততো গতায়াং নিদ্রায়াং রাক্ষস্যো বিকৃতাননাঃ।
তদ্বনং দদৃশুর্ভগ্নং তং চ বীরং মহাকপিম্ ॥৩॥
স তা দৃষ্ট্ব মহাবাহুর্মহাসত্ত্বো মহাবলঃ।
চকার সুমহদ্রূপং রাক্ষসীনাং ভয়াবহম্ ॥৪॥
ততস্তু গিরিসঙ্কাশমতিকায়ং মহাবলম্ ।
রাক্ষস্যো বানরং দৃষ্ট্বা পপ্রচ্ছুর্জনকাত্মজাম্ ॥৫॥
কোঽয়ং কস্য কুতো বায়ং কিংনিমিত্তমিহাগতঃ।
কথং ত্বয়া সহানেন সংবাদঃ কৃত ইত্যুত ॥৬॥
আচক্ষ্ব নো বিশালাক্ষি মা ভূত্তে সুভগে ভয়ম্ ।
সংবাদমসিতাপাঙ্গি ত্বয়া কিং কৃতবানয়ম্ ॥৭॥
অথাব্রবীত্তদা সাধ্বী সীতা সর্বাঙ্গশোভনা ।
রক্ষসাং কামরূপাণাং বিজ্ঞানে কা গতির্মম ॥৮॥
যূয়মেবাস্য জানীত যোঽয়ং যদ্বা করিষ্যতি ।
অহিরেব হ্যহেঃ পাদান্বিজানাতি ন সংশয়ঃ॥৯॥
অহমপ্যতি ভীতাস্মি নৈব জানামি কো হ্যযম্ ।
বেদ্মি রাক্ষসমেবৈনং কামরূপিণমাগতম্ ॥১০॥
বৈদেহ্যা বচনং শ্রুত্বা রাক্ষস্যো বিদ্রুতা দ্রুতম্ ।
স্থিতাঃ কাশ্চিদ্গতাঃ কাশ্চিদ্রাবণায় নিবেদিতুম্ ॥১১॥
রাবণস্য সমীপে তু রাক্ষস্যো বিকৃতাননাঃ।
বিরূপং বানরং ভীমং রাবণায় ন্যবেদিষুঃ॥১২॥
অশোকবনিকা মধ্যে রাজন্ ভীমবপুঃ কপিঃ।
সীতয়া কৃতসংবাদস্তিষ্ঠত্যমিতবিক্রমঃ॥১৩॥
ন চ তং জানকী সীতা হরিং হরিণলোচনা ।
অস্মাভির্বহুধা পৃষ্টা নিবেদয়িতুমিচ্ছতি ॥১৪॥
বাসবস্য ভবেদ্দূতো দূতো বৈশ্রবণস্য বা ।
প্রেষিতো বাপি রামেণ সীতান্বেষণকাঙ্ক্ষয়া ॥১৫॥
তেনৈবাদ্ভুতরূপেণ যত্তত্তব মনোহরম্ ।
নানামৃগগণাকীর্ণং প্রমৃষ্টং প্রমদাবনম্ ॥১৬॥
ন তত্র কশ্চিদুদ্দেশো যস্তেন ন বিনাশিতঃ।
যত্র সা জানকী দেবী স তেন ন বিনাশিতঃ॥১৭॥
জানকীরক্ষণার্থং বা শ্রমাদ্বা নোপলক্ষ্যতে ।
অথবা কঃ শ্রমস্তস্য সৈব তেনাভিরক্ষিতা ॥১৮॥
চারুপল্লবপত্রাঢ্যং যং সীতা স্বয়মাস্থিতা ।
প্রবৃদ্ধঃ শিংশপাবৃক্ষঃ স চ তেনাভিরক্ষিতঃ॥১৯॥
তস্যোগ্ররূপস্যোগ্রং ত্বং দণ্ডমাজ্ঞাতুমর্হসি ।
সীতা সম্ভাষিতা যেন বনং তেন বিনাশিতম্ ॥২০॥
মনঃপরিগৃহীতাং তাং তব রক্ষোগণেশ্বর ।
কঃ সীতামভিভাষেত যো ন স্যাত্ত্যক্তজীবিতঃ॥২১॥
রাক্ষসীনাং বচঃ শ্রুত্বা রাবণো রাক্ষসেশ্বরঃ।
চিতাগ্নিরিব জজ্বাল কোপসংবর্তিতেক্ষণঃ॥২২॥
তস্য ক্রুদ্ধস্য নেত্রাভ্যাং প্রাপতন্নশ্রুবিন্দবঃ।
দীপ্তাভ্যামিব দীপাভ্যাং সার্চিষঃ স্নেহবিন্দবঃ॥২৩॥
আত্মনঃ সদৃশান্ বীরান্কিঙ্করান্নাম রাক্ষসান্ ।
ব্যাদিদেশ মহাতেজা নিগ্রহার্থং হনূমতঃ॥২৪॥
তেষামশীতিসাহস্রং কিঙ্করাণাং তরস্বিনাম্ ।
নির্যযুর্ভবনাত্তস্মাৎকূটমুদ্গরপাণয়ঃ॥২৫॥
মহোদরা মহাদংষ্ট্রা ঘোররূপা মহাবলাঃ।
যুদ্ধাভিমনসঃ সর্বে হনূমদ্গ্রহণোন্মুখাঃ॥২৬॥
তে কপিং তং সমাসাদ্য তোরণস্থমবস্থিতম্ ।
অভিপেতুর্মহাবেগাঃ পতঙ্গা ইব পাবকম্ ॥২৭॥
তে গদাভির্বিচিত্রাভিঃ পরিঘৈঃ কাঞ্চনাঙ্গদৈঃ।
আজগ্মুর্বানরশ্রেষ্ঠং শরৈরাদিত্যসংনিভৈঃ॥২৮॥
মুদ্গরৈঃ পট্টিশৈঃ শূলৈঃ প্রাসতোমরপাণয়ঃ।
পরিবার্য হনূমন্তং সহসা তস্থুরগ্রতঃ॥২৯॥
হনূমানপি তেজস্বী শ্রীমান্পর্বতসংনিভঃ।
ক্ষিতাবাবিদ্ধ্য লাঙ্গূলং ননাদ চ মহাধ্বনিম্ ॥৩০॥
স ভূত্বা তু মহাকায়ো হনুমান্মারুতাত্মজঃ।
পুচ্ছমাস্ফোটয়ামাস লঙ্কাং শব্দেন পূরয়ন্ ॥৩১॥
তস্যাস্ফোটিতশব্দেন মহতা চানুনাদিনা ।
পেতুর্বিহঙ্গা গগনাদুচ্চৈশ্চেদমঘোষয়ৎ ॥৩২॥
জয়ত্যতিবলো রামো লক্ষ্মণশ্চ মহাবলঃ।
রাজা জয়তি সুগ্রীবো রাঘবেণাভিপালিতঃ॥৩৩॥
দাসোঽহং কোসলেন্দ্রস্য রামস্যাক্লিষ্টকর্মণঃ।
হনুমাঞ্শত্রুসৈন্যানাং নিহন্তা মারুতাত্মজঃ॥৩৪॥
ন রাবণসহস্রং মে যুদ্ধে প্রতিবলং ভবেৎ ।
শিলাভিশ্চ প্রহরতঃ পাদপৈশ্চ সহস্রশঃ॥৩৫॥
অর্দয়িত্বা পুরীং লঙ্কামভিবাদ্য চ মৈথিলীম্ ।
সমৃদ্ধার্থো গমিষ্যামি মিষতাং সর্বরক্ষসাম্ ॥৩৬॥
তস্য সংনাদশব্দেন তেঽভবন্ভয়শঙ্কিতাঃ।
দদৃশুশ্চ হনূমন্তং সন্ধ্যামেঘমিবোন্নতম্ ॥৩৭॥
স্বামিসন্দেশনিঃশঙ্কাস্ততস্তে রাক্ষসাঃ কপিম্ ।
চিত্রৈঃ প্রহরণৈর্ভীমৈরভিপেতুস্ততস্ততঃ॥৩৮॥
স তৈঃ পরিবৃতঃ শূরৈঃ সর্বতঃ স মহাবলঃ।
আসসাদায়সং ভীমং পরিঘং তোরণাশ্রিতম্ ॥৩৯॥
স তং পরিঘমাদায় জঘান রজনীচরান্ ।
সপন্নগমিবাদায় স্ফুরন্তং বিনতাসুতঃ॥৪০॥
বিচচারাম্বরে বীরঃ পরিগৃহ্য চ মারুতিঃ।
সূদয়ামাস বজ্রেণ দৈত্যানিব সহস্রদৃক্ ॥৪১॥
স হত্বা রাক্ষসান্বীরঃ কিঙ্করান্মারুতাত্মজঃ।
যুদ্ধাকাঙ্ক্ষী মহাবীরস্তোরণং সমবস্থিতঃ॥৪২॥
ততস্তস্মাদ্ভয়ান্মুক্তাঃ কতিচিত্তত্র রাক্ষসাঃ।
নিহতান্কিঙ্করান্সর্বান্রাবণায় ন্যবেদয়ন্ ॥৪৩॥
স রাক্ষসানাং নিহতং মহাবলং
	নিশম্য রাজা পরিবৃত্তলোচনঃ।
সমাদিদেশাপ্রতিমং পরাক্রমে
	প্রহস্তপুত্রং সমরে সুদুর্জয়ম্ ॥৪৪॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে দ্বিচত্বারিংশঃ সর্গঃ