অথ ত্রিচত্বারিংশঃ সর্গঃ
ততঃ স কিঙ্করান্ হত্বা হনূমান্ ধ্যানমাস্থিতঃ।
বনং ভগ্নং ময়া চৈত্যপ্রাসাদো ন বিনাশিতঃ॥১॥
তস্মাৎপ্রাসাদমদ্যৈবমিমং বিধ্বংসয়াম্যহম্ ।
ইতি সঞ্চিন্ত্য হনুমান্মনসাদর্শয়ন্ বলম্ ॥২॥
চৈত্যপ্রাসাদমুৎপ্লুত্য মেরুশৃঙ্গমিবোন্নতম্ ।
আরুরোহ হরিশ্রেষ্ঠো হনূমান্মারুতাত্মজঃ॥৩॥
আরুহ্য গিরিসঙ্কাশং প্রাসাদং হরিয়ূথপঃ।
বভৌ স সুমহাতেজাঃ প্রতিসূর্য ইবোদিতঃ॥৪॥
সম্প্রধৃষ্য তু দুর্ধর্ষশ্চৈত্যপ্রাসাদমুন্নতম্ ।
হনূমান্প্রজ্বলঁল্লক্ষ্ম্যা পারিয়াত্রোপমোঽভবৎ ॥৫॥
স ভূত্বা সুমহাকায়ঃ প্রভাবান্ মারুতাত্মজঃ।
ধৃষ্টমাস্ফোটয়ামাস লঙ্কাং শব্দেন পূরয়ন্ ॥৬॥
তস্যাস্ফোটিতশব্দেন মহতা শ্রোত্রঘাতিনা ।
পেতুর্বিহঙ্গমাস্তত্র চৈত্যপালাশ্চ মোহিতাঃ॥৭॥
অস্ত্রবিজ্জয়তাং রামো লক্ষ্মণশ্চ মহাবলঃ।
রাজা জয়তি সুগ্রীবো রাঘবেণাভিপালিতঃ॥৮॥
দাসোঽহং কোসলেন্দ্রস্য রামস্যাক্লিষ্টকর্মণঃ।
হনুমাঞ্শত্রুসৈন্যানাং নিহন্তা মারুতাত্মজঃ॥৯॥
ন রাবণসহস্রং মে যুদ্ধে প্রতিবলং ভবেৎ ।
শিলাভিস্তু প্রহরতঃ পাদপৈশ্চ সহস্রশঃ॥১০॥
অর্দয়িত্বা পুরীং লঙ্কামভিবাদ্য চ মৈথিলীম্ ।
সমৃদ্ধার্থো গমিষ্যামি মিষতাং সর্বরক্ষসাম্ ॥১১॥
এবমুক্ত্বা মহাকায়শ্চৈত্যস্থো হরিয়ূথপঃ।
ননাদ ভীমনির্হ্রাদো রক্ষসাং জনয়ন্ভয়ম্ ॥১২॥
তেন নাদেন মহতা চৈত্যপালাঃ শতং যয়ুঃ।
গৃহীত্বা বিবিধানস্ত্রান্প্রাসান্খড্গান্পরশ্বধান্ ॥১৩॥
বিসৃজন্তো মহাকায়া মারুতিং পর্যবারয়ন্ ।
তে গদাভির্বিচিত্রাভিঃ পরিঘৈঃ কাঞ্চনাঙ্গদৈঃ॥১৪॥
আজগ্মুর্বানরশ্রেষ্ঠং বাণৈশ্চাদিত্যসন্নিভৈঃ।
আবর্ত ইব গঙ্গায়াস্তোয়স্য বিপুলো মহান্ ॥১৫॥
পরিক্ষিপ্য হরিশ্রেষ্ঠং স বভৌ রক্ষসাং গণঃ।
ততো বাতাত্মজঃ ক্রুদ্ধো ভীমরূপং সমাস্থিতঃ॥১৬॥
প্রাসাদস্য মহাংস্তস্য স্তম্ভং হেমপরিষ্কৃতম্ ।
উৎপাটয়িত্বা বেগেন হনূমান্মারুতাত্মজঃ॥১৭॥
ততস্তং ভ্রাময়ামাস শতধারং মহাবলঃ।
তত্র চাগ্নিস্সমভবৎপ্রাসাদশ্চাপ্যদহ্যত ॥১৮॥
দহ্যমানং ততো দৃষ্ট্বা প্রাসাদং হরিয়ূথপঃ।
স রাক্ষসশতং হত্বা বজ্রেণেন্দ্র ইবাসুরান্ ॥১৯॥
অন্তরিক্ষস্থিতঃ শ্রীমানিদং বচনমব্রবীৎ ।
মাদৃশানাং সহস্রাণি বিসৃষ্টানি মহাত্মনাম্ ॥২০॥
বলিনাং বানরেন্দ্রাণাং সুগ্রীববশবর্তিনাম্ ।
অটন্তি বসুধাং কৃৎস্নাং বয়মন্যে চ বানরাঃ॥২১॥
দশনাগবলাঃ কেচিৎকেচিদ্দশগুণোত্তরাঃ।
কেচিন্নাগসহস্রস্য বভূবুস্তুল্যবিক্রমাঃ॥২২॥
সন্তি চৌঘবলাঃ কেচিৎ সন্তি বায়ুবলোপমাঃ।
অপ্রমেয়বলাঃ কেচিৎ তত্রাসন্হরিয়ূথপাঃ॥২৩॥
ঈদৃগ্বিধৈস্তু হরিভির্বৃতো দন্তনখায়ুধৈঃ।
শতৈঃ শতসহস্রৈশ্চ কোটীভিশ্চায়ুতৈরপি ॥২৪॥
আগমিষ্যতি সুগ্রীবঃ সর্বেষাং বো নিষূদনঃ।
নেয়মস্তি পুরী লঙ্কা ন যূয়ং ন চ রাবণঃ।
যস্য ত্বিক্ষ্বাকুবীরেণ বদ্ধং বৈরং মহাত্মনা ॥২৫॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ত্রিচত্বারিংশঃ সর্গঃ