অথ চতুশ্চত্বারিংশঃ সর্গঃ
সন্দিষ্টো রাক্ষসেন্দ্রেণ প্রহস্তস্য সুতো বলী ।
জম্বুমালী মহাদংষ্ট্রো নির্জগাম ধনুর্ধরঃ॥১॥
রক্তমাল্যাম্বরধরঃ স্রগ্বী রুচিরকুণ্ডলঃ।
মহান্বিবৃত্তনয়নশ্চণ্ডঃ সমরদুর্জয়ঃ॥২॥
ধনুঃ শক্রধনুঃ প্রখ্যং মহদ্ রুচিরসায়কম্ ।
বিস্ফারয়াণো বেগেন বজ্রাশনিসমস্বনম্ ॥৩॥
তস্য বিস্ফারঘোষেণ ধনুষো মহতা দিশঃ।
প্রদিশশ্চ নভশ্চৈব সহসা সমপূর্যত ॥৪॥
রথেন খরয়ুক্তেন তমাগতমুদীক্ষ্য সঃ।
হনূমান্বেগসম্পন্নো জহর্ষ চ ননাদ চ ॥৫॥
তং তোরণবিটঙ্কস্থং হনূমন্তং মহাকপিম্ ।
জম্বুমালী মহাতেজা বিব্যাধ নিশিতৈঃ শরৈঃ॥৬॥
অর্ধচন্দ্রেণ বদনে শিরস্যেকেন কর্ণিনা ।
বাহ্বোর্বিব্যাধ নারাচৈর্দশভিস্তু কপীশ্বরম্ ॥৭॥
তস্য তচ্ছুশুভে তাম্রং শরেণাভিহতং মুখম্ ।
শরদীবাম্বুজং ফুল্লং বিদ্ধং ভাস্কররশ্মিনা ॥৮॥
তত্তস্য রক্তং রক্তেন রঞ্জিতং শুশুভে মুখম্ ।
যথাঽঽকাশে মহাপদ্মং সিক্তং কাঞ্চনবিন্দুভিঃ॥৯॥
চুকোপ বাণাভিহতো রাক্ষসস্য মহাকপিঃ।
ততঃ পার্শ্বেঽতিবিপুলাং দদর্শ মহতীং শিলাম্ ॥১০॥
তরসা তাং সমুৎপাট্য চিক্ষেপ জববদ্ বলী ।
তাং শরৈর্দশভিঃ ক্রুদ্ধস্তাডয়ামাস রাক্ষসঃ॥১১॥
বিপন্নং কর্ম তদ্দৃষ্ট্বা হনূমাংশ্চণ্ডবিক্রমঃ।
সালং বিপুলমুৎপাট্য ভ্রাময়ামাস বীর্যবান্ ॥১২॥
ভ্রাময়ন্তং কপিং দৃষ্ট্বা সালবৃক্ষং মহাবলম্ ।
চিক্ষেপ সুবহূন্বাণাঞ্জম্বুমালী মহাবলঃ॥১৩॥
সালং চতুর্ভিশ্চিচ্ছেদ বানরং পঞ্চভির্ভুজে ।
উরস্যেকেন বাণেন দশভিস্তু স্তনান্তরে ॥১৪॥
স শরৈঃ পূরিততনুঃ ক্রোধেন মহতা বৃতঃ।
তমেব পরিঘং গৃহ্য ভ্রাময়ামাস বেগিতঃ॥১৫॥
অতিবেগোঽতিবেগেন ভ্রাময়িত্বা বলোৎকটঃ।
পরিঘং পাতয়ামাস জম্বুমালের্মহোরসি ॥১৬॥
তস্য চৈব শিরো নাস্তি ন বাহূ জানুনী ন চ ।
ন ধনুর্ন রথো নাশ্বাস্তত্রাদৃশ্যন্ত নেষবঃ॥১৭॥
স হতস্তরসা তেন জম্বুমালী মহারথঃ।
পপাত নিহতো ভূমৌ চূর্ণিতাঙ্গ ইব দ্রুমঃ॥১৮॥
জম্বুমালিং সুনিহতং কিঙ্করাংশ্চ মহাবলান্ ।
চুক্রোধ রাবণঃ শ্রুত্বা ক্রোধসংরক্তলোচনঃ॥১৯॥
স রোষসংবর্তিততাম্রলোচনঃ
	প্রহস্তপুত্রে নিহতে মহাবলে ।
অমাত্যপুত্রানতিবীর্যবিক্রমান্
	সমাদিদেশাশু নিশাচরেশ্বরঃ॥২০॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে চতুশ্চত্বারিংশঃ সর্গঃ