অথ পঞ্চচত্বারিংশঃ সর্গঃ
ততস্তে রাক্ষসেন্দ্রেণ চোদিতা মন্ত্রিণঃ সুতাঃ।
নির্যযুর্ভবনাত্তস্মাৎসপ্ত সপ্তার্চিবর্চসঃ॥১॥
মহদ্বলপরীবারা ধনুষ্মন্তো মহাবলাঃ।
কৃতাস্ত্রাস্ত্রবিদাং শ্রেষ্ঠাঃ পরস্পরজয়ৈষিণঃ॥২॥
হেমজালপরিক্ষিপ্তৈর্ধ্বজবদ্ভিঃ পতাকিভিঃ।
তোয়দস্বননির্ঘোষৈর্বাজিয়ুক্তৈর্মহারথৈঃ॥৩॥
তপ্তকাঞ্চনচিত্রাণি চাপান্যমিতবিক্রমাঃ।
বিস্ফারয়ন্তঃ সংহৃষ্টাস্তডিদ্বন্ত ইবাম্বুদাঃ॥৪॥
জনন্যস্তাস্ততস্তেষাং বিদিত্বা কিঙ্করান্হতান্ ।
বভূবুঃ শোকসম্ভ্রান্তাঃ সবান্ধবসুহৃজ্জনাঃ॥৫॥
তে পরস্পরসঙ্ঘর্ষাৎ তপ্তকাঞ্চনভূষণাঃ।
অভিপেতুর্হনূমন্তং তোরণস্থমবস্থিতম্ ॥৬॥
সৃজন্তো বাণবৃষ্টিং তে রথগর্জিতনিঃস্বনাঃ।
প্রাবৃট্কাল ইবাম্ভোদা বিচেরুর্নৈরৃতাম্বুদাঃ॥৭॥
অবকীর্ণস্ততস্তাভির্হনূমাঞ্শরবৃষ্টিভিঃ।
অভবৎসংবৃতাকারঃ শৈলরাডিব বৃষ্টিভিঃ॥৮॥
স শরান্বঞ্চয়ামাস তেষামাশুচরঃ কপিঃ।
রথবেগাংশ্চ বীরাণাং বিচরন্বিমলেঽম্বরে ॥৯॥
স তৈঃ ক্রীডন্ধনুষ্মদ্ভির্ব্যোম্নি বীরঃ প্রকাশতে ।
ধনুষ্মদ্ভির্যথা মেঘৈর্মারুতঃ প্রভুরম্বরে ॥১০॥
স কৃত্বা নিনদং ঘোরং ত্রাসয়ংস্তাং মহাচমূম্ ।
চকার হনুমান্বেগং তেষু রক্ষঃসু বীর্যবান্ ॥১১॥
তলেনাভিহনৎকাংশ্চিৎপাদৈঃ কাংশ্চিৎপরন্তপঃ।
মুষ্টিভিশ্চাহনৎকাংশ্চিন্নখৈঃ কাংশ্চিদ্ব্যদারয়ৎ ॥১২॥
প্রমমাথোরসা কাংশ্চিদূরুভ্যামপরানপি।
কেচিৎ তস্যৈব নাদেন তত্রৈব পতিতা ভুবি ॥১৩॥
ততস্তেষ্ববপন্নেষু ভূমৌ নিপতিতেষু চ ।
তৎসৈন্যমগমৎসর্বং দিশো দশ ভয়ার্দিতম্ ॥১৪॥
বিনেদুর্বিস্বরং নাগা নিপেতুর্ভুবি বাজিনঃ।
ভগ্ননীডধ্বজচ্ছত্রৈর্ভূশ্চ কীর্ণাভবদ্রথৈঃ॥১৫॥
স্রবতা রুধিরেণাথ স্রবন্ত্যো দর্শিতাঃ পথি ।
বিবিধৈশ্চ স্বনৈর্লঙ্কা ননাদ বিকৃতং তদা ॥১৬॥
স তান্প্রবৃদ্ধান্বিনিহত্য রাক্ষসান্
	মহাবলশ্চণ্ডপরাক্রমঃ কপিঃ।
যুয়ুৎসুরন্যৈঃ পুনরেব রাক্ষসৈ-
	স্তদেব বীরোঽভিজগাম তোরণম্ ॥১৭॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে পঞ্চচত্বারিংশঃ সর্গঃ