অথ ষট্চত্বারিংশঃ সর্গঃ
হতান্মন্ত্রিসুতান্বুদ্ধ্বা বানরেণ মহাত্মনা ।
রাবণঃ সংবৃতাকারশ্চকার মতিমুত্তমাম্ ॥১॥
স বিরূপাক্ষয়ূপাক্ষৌ দুর্ধরং চৈব রাক্ষসং ।
প্রঘসং ভাসকর্ণং চ পঞ্চসেনাগ্রনায়কান্ ॥২॥
সন্দিদেশ দশগ্রীবো বীরান্নয়বিশারদান্ ।
হনূমদ্গ্রহণেঽব্যগ্রান্ বায়ুবেগসমান্যুধি ॥৩॥
যাত সেনাগ্রগাঃ সর্বে মহাবলপরিগ্রহাঃ।
সবাজিরথমাতঙ্গাঃ স কপিঃ শাস্যতামিতি ॥৪॥
যত্তৈশ্চ খলু ভাব্যং স্যাত্তমাসাদ্য বনালয়ম্ ।
কর্ম চাপি সমাধেয়ং দেশকালাবিরোধিতম্ ॥৫॥
ন হ্যহং তং কপিং মন্যে কর্মণা প্রতিতর্কয়ন্ ।
সর্বথা তন্মহদ্ভূতং মহাবলপরিগ্রহম্ ॥৬॥
বানরোঽয়মিতি জ্ঞাত্বা নহি শুদ্ধ্যতি মে মনঃ।
নৈবাহং তং কপিং মন্যে যথেয়ং প্রস্তুতা কথা ॥৭॥
ভবেদিন্দ্রেণ বা সৃষ্টমস্মদর্থং তপোবলাৎ ।
সনাগয়ক্ষগন্ধর্ব দেবাসুরমহর্ষয়ঃ॥৮॥
যুষ্মাভিঃ প্রহিতৈঃ সর্বৈর্ময়া সহ বিনির্জিতাঃ।
তৈরবশ্যং বিধাতব্যং ব্যলীকং কিঞ্চিদেব নঃ॥৯॥
তদেব নাত্র সন্দেহঃ প্রসহ্য পরিগৃহ্যতাম্ ।
যাত সেনাগ্রগাঃ সর্বে মহাবলপরিগ্রহাঃ॥১০॥
সবাজিরথমাতঙ্গাঃ স কপিঃ শাস্যতামিতি ।
নাবমন্যো ভবদ্ভিশ্চ কপির্ধীরপরাক্রমঃ॥১১॥
দৃষ্টা হি হরয়ঃ পূর্বে ময়া বিপুলবিক্রমাঃ।
বালী চ সহ সুগ্রীবো জাম্ববাংশ্চ মহাবলঃ॥১২॥
নীলঃ সেনাপতিশ্চৈব যে চান্যে দ্বিবিদাদয়ঃ।
নৈব তেষাং গতির্ভীমা ন তেজো ন পরাক্রমঃ॥১৩॥
ন মতির্ন বলোৎসাহো ন রূপপরিকল্পনম্ ।
মহৎসত্ত্বমিদং জ্ঞেয়ং কপিরূপং ব্যবস্থিতম্ ॥১৪॥
প্রয়ত্নং মহদাস্থায় ক্রিয়তামস্য নিগ্রহঃ।
কামং লোকাস্ত্রয়ঃ সেন্দ্রাঃ সসুরাসুরমানবাঃ॥১৫॥
ভবতামগ্রতঃ স্থাতুং ন পর্যাপ্তা রণাজিরে ।
তথাপি তু নয়জ্ঞেন জয়মাকাঙ্ক্ষতা রণে ॥১৬॥
আত্মা রক্ষ্যঃ প্রয়ত্নেন যুদ্ধসিদ্ধির্হি চঞ্চলা ।
তে স্বামিবচনং সর্বে প্রতিগৃহ্য মহৌজসঃ॥১৭॥
সমুৎপেতুর্মহাবেগা হুতাশসমতেজসঃ।
রথৈশ্চ মত্তৈর্নাগৈশ্চ বাজিভিশ্চ মহাজবৈঃ॥১৮॥
শস্ত্রৈশ্চ বিবিধৈস্তীক্ষ্ণৈঃ সর্বৈশ্চোপহিতা বলৈঃ।
ততস্তু দদৃশুর্বীরা দীপ্যমানং মহাকপিম্ ॥১৯॥
রশ্মিমন্তমিবোদ্যন্তং স্বতেজোরশ্মিমালিনম্ ।
তোরণস্থং মহাবেগং মহাসত্ত্বং মহাবলম্ ॥২০॥
মহামতিং মহোৎসাহং মহাকায়ং মহাভুজম্ ।
তং সমীক্ষ্যৈব তে সর্বে দিক্ষু সর্বাস্ববস্থিতাঃ॥২১॥
তৈস্তৈঃ প্রহরণৈর্ভীমৈরভিপেতুস্ততস্ততঃ।
তস্য পঞ্চায়সাস্তীক্ষ্ণাঃ সিতাঃ পীতমুখাঃ শরাঃ।
শিরস্ত্যুৎপলপত্রাভা দুর্ধরেণ নিপাতিতাঃ॥২২॥
স তৈঃ পঞ্চভিরাবিদ্ধঃ শরৈঃ শিরসি বানরঃ।
উৎপপাত নদন্ব্যোম্নি দিশো দশ বিনাদয়ন্ ॥২৩॥
ততস্তু দুর্ধরো বীরঃ সরথঃ সজ্জকার্মুকঃ।
কিরঞ্শরশতৈর্নৈকৈরভিপেদে মহাবলঃ॥২৪॥
স কপির্বারয়ামাস তং ব্যোম্নি শরবর্ষিণম্ ।
বৃষ্টিমন্তং পয়োদান্তে পয়োদমিব মারুতঃ॥২৫॥
অর্দ্যমানস্ততস্তেন দুর্ধরেণানিলাত্মজঃ।
চকার নিনদং ভূয়ো ব্যবর্ধত চ বীর্যবান্ ॥২৬॥
স দূরং সহসোৎপত্য দুর্ধরস্য রথে হরিঃ।
নিপপাত মহাবেগো বিদ্যুদ্রাশির্গিরাবিব ॥২৭॥
ততঃ স মথিতাষ্টাশ্বং রথং ভগ্নাক্ষকূবরম্ ।
বিহায় ন্যপতদ্ভূমৌ দুর্ধরস্ত্যক্তজীবিতঃ॥২৮॥
তং বিরূপাক্ষয়ূপাক্ষৌ দৃষ্ট্বা নিপতিতং ভুবি ।
তৌ জাতরোষৌ দুর্ধর্ষাবুৎপেততুররিন্দমৌ ॥২৯॥
স তাভ্যাং সহসোৎপ্লুত্য বিষ্ঠিতো বিমলেঽম্বরে ।
মুদ্গরাভ্যাং মহাবাহুর্বক্ষস্যভিহতঃ কপিঃ॥৩০॥
তয়োর্বেগবতোর্বেগং নিহত্য স মহাবলঃ।
নিপপাত পুনর্ভূমৌ সুপর্ণ ইব বেগিতঃ॥৩১॥
স সালবৃক্ষমাসাদ্য সমুৎপাট্য চ বানরঃ।
তাবুভৌ রাক্ষসৌ বীরৌ জঘান পবনাত্মজঃ॥৩২॥
ততস্তাংস্ত্রীন্হতাঞ্জ্ঞাত্বা বানরেণ তরস্বিনা ।
অভিপেদে মহাবেগঃ প্রসহ্য প্রঘসো বলী ॥৩৩॥
ভাসকর্ণশ্চ সঙ্ক্রুদ্ধঃ শূলমাদায় বীর্যবান্ ।
একতঃ কপিশার্দূলং যশস্বিনমবস্থিতৌ ॥৩৪॥
পট্টিশেন শিতাগ্রেণ প্রঘসঃ প্রত্যপোথয়ৎ ।
ভাসকর্ণশ্চ শূলেন রাক্ষসঃ কপিকুঞ্জরম্ ॥৩৫॥
স তাভ্যাং বিক্ষতৈর্গাত্রৈরসৃগ্দিগ্ধতনূরুহঃ।
অভবদ্বানরঃ ক্রুদ্ধো বালসূর্যসমপ্রভঃ॥৩৬॥
সমুৎপাট্য গিরেঃ শৃঙ্গং সমৃগব্যালপাদপম্ ।
জঘান হনুমান্বীরো রাক্ষসৌ কপিকুঞ্জরঃ।
গিরিশৃঙ্গসুনিষ্পিষ্টৌ তিলশস্তৌ বভূবতুঃ॥৩৭॥
ততস্তেষ্ববসন্নেষু সেনাপতিষু পঞ্চসু ।
বলং তদবশেষং তু নাশয়ামাস বানরঃ॥৩৮॥
অশ্বৈরশ্বান্গজৈর্নাগান্যোধৈর্যোধান্রথৈ রথান্ ।
স কপির্নাশয়ামাস সহস্রাক্ষ ইবাসুরান্ ॥৩৯॥
হতৈর্নাগৈস্তুরঙ্গৈশ্চ ভগ্নাক্ষৈশ্চ মহারথৈঃ।
হতৈশ্চ রাক্ষসৈর্ভূমী রুদ্ধমার্গা সমন্ততঃ॥৪০॥
ততঃ কপিস্তান্ধ্বজিনীপতীন্রণে
	নিহত্য বীরান্সবলান্সবাহনান্ ।
তথৈব বীরঃ পরিগৃহ্য তোরণং
	কৃতক্ষণঃ কাল ইব প্রজাক্ষয়ে ॥৪১॥
ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে ষট্চত্বারিংশঃ সর্গঃ