অথ সপ্তচত্বারিংশঃ সর্গঃ সেনাপতীন্পঞ্চ স তু প্রমাপিতান্ হনূমতা সানুচরান্সবাহনান্ । নিশম্য রাজা সমরোদ্ধতোন্মুখং কুমারমক্ষং প্রসমৈক্ষতাক্ষম্ ॥১॥ স তস্য দৃষ্ট্যর্পণসম্প্রচোদিতঃ প্রতাপবান্কাঞ্চনচিত্রকার্মুকঃ। সমুৎপপাতাথ সদস্যুদীরিতো দ্বিজাতিমুখ্যৈর্হবিষেব পাবকঃ॥২॥ ততো মহান্ বালদিবাকরপ্রভং প্রতপ্তজাম্বূনদজালসন্ততম্ । রথাং সমাস্থায় যয়ৌ স বীর্যবান্ মহাহরিং তং প্রতি নৈরৃতর্ষভঃ॥৩॥ ততস্তপঃসঙ্গ্রহসঞ্চয়ার্জিতং প্রতপ্তজাম্বূনদজালচিত্রিতম্ । পতাকিনং রত্নবিভূষিতধ্বজং মনোজবাষ্টাশ্ববরৈঃ সুয়োজিতম্ ॥৪॥ সুরাসুরাধৃষ্যমসঙ্গচারিণং তডিৎপ্রভং ব্যোমচরং সমাহিতম্ । সতূণমষ্টাসিনিবদ্ধবন্ধুরং যথাক্রমাবেশিতশক্তিতোমরম্ ॥৫॥ বিরাজমানং প্রতিপূর্ণবস্তুনা সহেমদাম্না শশিসূর্যবর্চসা । দিবাকরাভং রথমাস্থিতস্ততঃ স নির্জগামামরতুল্যবিক্রমঃ॥৬॥ স পূরয়ন্খং চ মহীং চ সাচলাং তুরঙ্গমতঙ্গমহারথস্বনৈঃ। বলৈঃ সমেতৈঃ সহতোরণস্থিতং সমর্থমাসীনমুপাগমৎকপিম্ ॥৭॥ স তং সমাসাদ্য হরিং হরীক্ষণো যুগান্তকালাগ্নিমিব প্রজাক্ষয়ে । অবস্থিতং বিস্মিতজাতসম্ভ্রমং সমৈক্ষতাক্ষো বহুমানচক্ষুষা ॥৮॥ স তস্য বেগং চ কপের্মহাত্মনঃ পরাক্রমং চারিষু রাবণাত্মজঃ। বিচারয়ন্ স্বং চ বলং মহাবলো যুগক্ষয়ে সূর্য ইবাভিবর্ধত ॥৯॥ স জাতমন্যুঃ প্রসমীক্ষ্য বিক্রমং স্থিতঃ স্থিরঃ সংয়তি দুর্নিবারণম্ । সমাহিতাত্মা হনুমন্তমাহবে প্রচোদয়ামাস শিতৈঃ শরৈস্ত্রিভিঃ॥১০॥ ততঃ কপিং তং প্রসমীক্ষ্য গর্বিতং জিতশ্রমং শত্রুপরাজয়োচিতম্ । অবৈক্ষতাক্ষঃ সমুদীর্ণমানসং সবাণপাণিঃ প্রগৃহীতকার্মুকঃ॥১১॥ স হেমনিষ্কাঙ্গদচারুকুণ্ডলঃ সমাসসাদাশু পরাক্রমঃ কপিম্ । তয়োর্বভূবাপ্রতিমঃ সমাগমঃ সুরাসুরাণামপি সম্ভ্রমপ্রদঃ॥১২॥ ররাস ভূমির্ন ততাপ ভানুমান্ ববৌ ন বায়ুঃ প্রচচাল চাচলঃ। কপেঃ কুমারস্য চ বীর্যসংয়ুগং ননাদ চ দ্যৌরুদধিশ্চ চুক্ষুভে ॥১৩॥ স তস্য বীরঃ সুমুখান্পতত্রিণঃ সুবর্ণপুঙ্খান্সবিষানিবোরগান্ । সমাধিসংয়োগবিমোক্ষতত্ত্ববি- চ্ছরানথ ত্রীন্কপিমূর্ধ্ন্যতাডয়ৎ ॥১৪॥ স তৈঃ শরৈর্মূর্ধ্নি সমং নিপাতিতৈঃ ক্ষরন্নসৃগ্দিগ্ধবিবৃত্তনেত্রঃ। নবোদিতাদিত্যনিভঃ শরাংশুমান্ ব্যরাজতাদিত্য ইবাংশুমালিকঃ॥১৫॥ ততঃ প্লবঙ্গাধিপমন্ত্রিসত্তমঃ সমীক্ষ্য তং রাজবরাত্মজং রণে । উদগ্রচিত্রায়ুধচিত্রকার্মুকং জহর্ষ চাপূর্যত চাহবোন্মুখঃ॥১৬॥ স মন্দরাগ্রস্থ ইবাংশুমালী বিবৃদ্ধকোপো বলবীর্যসংবৃতঃ। কুমারমক্ষং সবলং সবাহনং দদাহ নেত্রাগ্নিমরীচিভিস্তদা ॥১৭॥ ততঃ স বাণাসনশক্রকার্মুকঃ শরপ্রবর্ষো যুধি রাক্ষসাম্বুদঃ। শরান্মুমোচাশু হরীশ্বরাচলে বলাহকো বৃষ্টিমিবাচলোত্তমে ॥১৮॥ কপিস্ততস্তং রণচণ্ডবিক্রমং প্রবৃদ্ধতেজোবলবীর্যসায়কম্ । কুমারমক্ষং প্রসমীক্ষ্য সংয়ুগে ননাদ হর্ষাদ্ ঘনতুল্যনিঃস্বনঃ॥১৯॥ স বালভাবাদ্যুধি বীর্যদর্পিতঃ প্রবৃদ্ধমন্যুঃ ক্ষতজোপমেক্ষণঃ। সমাসসাদাপ্রতিমং রণে কপিং গজো মহাকূপমিবাবৃতং তৃণৈঃ॥২০॥ স তেন বাণৈঃ প্রসভং নিপাতিতৈ- শ্চকার নাদং ঘননাদনিঃস্বনঃ। সমুৎসহেনাশু নভঃ সমারুজন্ ভুজোরুবিক্ষেপণঘোরদর্শনঃ॥২১॥ তমুৎপতন্তং সমভিদ্রবদ্বলী স রাক্ষসানাং প্রবরঃ প্রতাপবান্ । রথী রথশ্রেষ্ঠতরঃ কিরঞ্ছরৈঃ পয়োধরঃ শৈলমিবাশ্মবৃষ্টিভিঃ॥২২॥ স তাঞ্ছরাংস্তস্য হরির্বিমোক্ষয়ং- শ্চচার বীরঃ পথি বায়ুসেবিতে । শরান্তরে মারুতবদ্বিনিষ্পতন্ মনোজবঃ সংয়তি ভীমবিক্রমঃ॥২৩॥ তমাত্তবাণাসনমাহবোন্মুখং খমাস্তৃণন্তং বিবিধৈঃ শরোত্তমৈঃ। অবৈক্ষতাক্ষং বহুমানচক্ষুষা জগাম চিন্তাং স চ মারুতাত্মজঃ॥২৪॥ ততঃ শরৈর্ভিন্নভুজান্তরঃ কপিঃ কুমারবর্যেণ মহাত্মনা নদন্ । মহাভুজঃ কর্মবিশেষতত্ত্ববিদ্ বিচিন্তয়ামাস রণে পরাক্রমম্ ॥২৫॥ অবালবদ্বালদিবাকরপ্রভঃ করোত্যযং কর্ম মহন্মহাবলঃ। ন চাস্য সর্বাহবকর্মশালিনঃ প্রমাপণে মে মতিরত্র জায়তে ॥২৬॥ অয়ং মহাত্মা চ মহাংশ্চ বীর্যতঃ সমাহিতশ্চাতিসহশ্চ সংয়ুগে । অসংশয়ং কর্মগুণোদয়াদয়ং সনাগয়ক্ষৈর্মুনিভিশ্চ পূজিতঃ॥২৭॥ পরাক্রমোৎসাহবিবৃদ্ধমানসঃ সমীক্ষতে মাং প্রমুখোঽগ্রতঃ স্থিতঃ। পরাক্রমো হ্যস্য মনাংসি কম্পয়েৎ সুরাসুরাণামপি শীঘ্রকারিণঃ॥২৮॥ ন খল্বয়ং নাভিভবেদুপেক্ষিতঃ পরাক্রমো হ্যস্য রণে বিবর্ধতে । প্রমাপণং হ্যস্য মমাদ্য রোচতে ন বর্ধমানোঽগ্নিরুপেক্ষিতুং ক্ষমঃ॥২৯॥ ইতি প্রবেগং তু পরস্য তর্কয়ন্ স্বকর্ময়োগং চ বিধায় বীর্যবান্ । চকার বেগং তু মহাবলস্তদা মতিং চ চক্রেঽস্য বধে তদানীম্ ॥৩০॥ স তস্য তানষ্ট বরান্ মহাহয়ান্ সমাহিতান্ভারসহান্বিবর্তনে । জঘান বীরঃ পথি বায়ুসেবিতে তলপ্রহারৈঃ পবনাত্মজঃ কপিঃ॥৩১॥ ততস্তলেনাভিহতো মহারথঃ স তস্য পিঙ্গাধিপমন্ত্রিনির্জিতঃ। স ভগ্ননীডঃ পরিবৃত্তকূবরঃ পপাত ভূমৌ হতবাজিরম্বরাৎ ॥৩২॥ স তং পরিত্যজ্য মহারথো রথং সকার্মুকঃ খড্গধরঃ খমুৎপতন্ । ততোঽভিয়োগাদৃষিরুগ্রবীর্যবান্ বিহায় দেহং মরুতামিবালয়ম্ ॥৩৩॥ কপিস্ততস্তং বিচরন্তমম্বরে পতত্রিরাজানিলসিদ্ধসেবিতে । সমেত্য তং মারুতবেগবিক্রমঃ ক্রমেণ জগ্রাহ চ পাদয়োর্দৃঢম্ ॥৩৪॥ স তং সমাবিধ্য সহস্রশঃ কপি- র্মহোরগং গৃহ্য ইবাণ্ডজেশ্বরঃ। মুমোচ বেগাৎপিতৃতুল্যবিক্রমো মহীতলে সংয়তি বানরোত্তমঃ॥৩৫॥ স ভগ্নবাহূরুকটীপয়োধরঃ ক্ষরন্নসৃঙিনর্মথিতাস্থিলোচনঃ। সম্ভিন্নসন্ধিঃ প্রবিকীর্ণবন্ধনো হতঃ ক্ষিতৌ বায়ুসুতেন রাক্ষসঃ॥৩৬॥ মহাকপির্ভূমিতলে নিপীড্য তং চকার রক্ষোঽধিপতের্মহদ্ভয়ম্ । মহর্ষিভিশ্চক্রচরৈঃ সমাগতৈঃ সমেত্য ভূতৈশ্চ সয়ক্ষপন্নগৈঃ। সুরৈশ্চ সেন্দ্রৈর্ভৃশজাতবিস্ময়ৈ- র্হতে কুমারে স কপির্নিরীক্ষিতঃ॥৩৭॥ নিহত্য তং বজ্রিসুতোপমং রণে কুমারমক্ষং ক্ষতজোপমেক্ষণম্ । তদেব বীরোঽভিজগাম তোরণং কৃতক্ষণঃ কাল ইব প্রজাক্ষয়ে ॥৩৮॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে সপ্তচত্বারিংশঃ সর্গঃ