অথ অষ্টচত্বারিংশঃ সর্গঃ ততস্তু রক্ষোঽধিপতির্মহাত্মা হনূমতাক্ষে নিহতে কুমারে । মনঃ সমাধায় স দেবকল্পং সমাদিদেশেন্দ্রজিতং সরোষঃ॥১॥ ত্বমস্ত্রবিচ্ছস্ত্রভৃতাং বরিষ্ঠঃ সুরাসুরাণামপি শোকদাতা । সুরেষু সেন্দ্রেষু চ দৃষ্টকর্মা পিতামহারাধনসঞ্চিতাস্ত্রঃ॥২॥ ত্বদস্ত্রবলমাসাদ্য সসুরাঃ সমরুদ্গণাঃ। ন শেকুঃ সমরে স্থাতুং সুরেশ্বরসমাশ্রিতাঃ॥৩॥ ন কশ্চিত্ত্রিষু লোকেষু সংয়ুগেন গতশ্রমঃ। ভুজবীর্যাভিগুপ্তশ্চ তপসা চাভিরক্ষিতঃ। দেশকালপ্রধানশ্চ ত্বমেব মতিসত্তমঃ॥৪॥ ন তেঽস্ত্যশক্যং সমরেষু কর্মণাং ন তেঽস্ত্যকার্যং মতিপূর্বমন্ত্রণে । ন সোঽস্তি কশ্চিত্ত্রিষু সঙ্গ্রহেষু ন বেদ যস্তেঽস্ত্রবলং বলং চ ॥৫॥ মমানুরূপং তপসো বলং চ তে পরাক্রমশ্চাস্ত্রবলং চ সংয়ুগে । ন ত্বাং সমাসাদ্য রণাবমর্দে মনঃ শ্রমং গচ্ছতি নিশ্চিতার্থম্ ॥৬॥ নিহতা কিঙ্করাঃ সর্বে জম্বুমালী চ রাক্ষসঃ। অমাত্যপুত্রা বীরাশ্চ পঞ্চ সেনাগ্রগামিনঃ॥৭॥ বলানি সুসমৃদ্ধানি সাশ্বনাগরথানি চ । সহোদরস্তে দয়িতঃ কুমারোঽক্ষশ্চ সূদিতঃ। ন তু তেষ্বেব মে সারো যস্ত্বয়্যরিনিষূদন ॥৮॥ ইদং চ দৃষ্ট্বা নিহতং মহদ্ বলং কপেঃ প্রভাবং চ পরাক্রমং চ । ত্বমাত্মনশ্চাপি নিরীক্ষ্য সারং কুরুষ্ব বেগং স্ববলানুরূপম্ ॥৯॥ বলাবমর্দস্ত্বয়ি সংনিকৃষ্টে যথা গতে শাম্যতি শান্তশত্রৌ । তথা সমীক্ষ্যাত্মবলং পরং চ সমারভস্বাস্ত্রভৃতাং বরিষ্ঠ ॥১০॥ ন বীর সেনা গণশশ্চ্যবন্তি ন বজ্রমাদায় বিশালসারম্ । ন মারুতস্যাস্তি গতিপ্রমাণং ন চাগ্নিকল্পঃ করণেন হন্তুম্ ॥১১॥ তমেবমর্থং প্রসমীক্ষ্য সম্যক্ স্বকর্মসাম্যাদ্ধি সমাহিতাত্মা । স্মরংশ্চ দিব্যং ধনুষোঽস্য বীর্যং ব্রজাক্ষতং কর্ম সমারভস্ব ॥১২॥ ন খল্বিয়ং মতিশ্রেষ্ঠ যত্ত্বাং সম্প্রেষয়াম্যহম্ । ইয়ং চ রাজধর্মাণাং ক্ষত্রস্য চ মতির্মতা ॥১৩॥ নানাশস্ত্রেষু সঙ্গ্রামে বৈশারদ্যমরিন্দম । অবশ্যমেব বোদ্ধব্যং কাম্যশ্চ বিজয়ো রণে ॥১৪॥ ততঃ পিতুস্তদ্বচনং নিশম্য প্রদক্ষিণং দক্ষসুতপ্রভাবঃ। চকার ভর্তারমতিত্বরেণ রণায় বীরঃ প্রতিপন্নবুদ্ধিঃ॥১৫॥ ততস্তৈঃ স্বগণৈরিষ্টৈরিন্দ্রজিৎ প্রতিপূজিতঃ। যুদ্ধোদ্ধতকৃতোৎসাহঃ সঙ্গ্রামং সম্প্রপদ্যত ॥১৬॥ শ্রীমান্ পদ্মবিশালাক্ষো রাক্ষসাধিপতেঃ সুতঃ। নির্জগাম মহাতেজাঃ সমুদ্র ইব পর্বণি ॥১৭॥ স পক্ষিরাজোপমতুল্যবেগৈ- র্ব্যাঘ্রৈশ্চতুর্ভিঃ স তু তীক্ষ্ণদংষ্ট্রৈঃ। রথং সমায়ুক্তমসহ্যবেগঃ সমারুরোহেন্দ্রজিদিন্দ্রকল্পঃ॥১৮॥ স রথী ধন্বিনাং শ্রেষ্ঠঃ শস্ত্রজ্ঞোঽস্ত্রবিদাং বরঃ। রথেনাভিয়যৌ ক্ষিপ্রং হনূমান্যত্র সোঽভবৎ ॥১৯॥ স তস্য রথনির্ঘোষং জ্যাস্বনং কার্মুকস্য চ । নিশম্য হরিবীরোঽসৌ সম্প্রহৃষ্টতরোঽভবৎ ॥২০॥ ইন্দ্রজিচ্চাপমাদায় শিতশল্যাংশ্চ সায়কান্ । হনূমন্তমভিপ্রেত্য জগাম রণপণ্ডিতঃ॥২১॥ তস্মিংস্ততঃ সংয়তি জাতহর্ষে রণায় নির্গচ্ছতি বাণপাণৌ । দিশশ্চ সর্বাঃ কলুষা বভূবু- র্মৃগাশ্চ রৌদ্রা বহুধা বিনেদুঃ॥২২॥ সমাগতাস্তত্র তু নাগয়ক্ষা মহর্ষয়শ্চক্রচরাশ্চ সিদ্ধাঃ। নভঃ সমাবৃত্য চ পক্ষিসঙ্ঘা বিনেদুরুচ্চৈঃ পরমপ্রহৃষ্টাঃ॥২৩॥ আয়ান্তং স রথং দৃষ্ট্বা তূর্ণমিন্দ্রধ্বজং কপিঃ। ননাদ চ মহানাদং ব্যবর্ধত চ বেগবান্ ॥২৪॥ ইন্দ্রজিৎ স রথং দিব্যমাশ্রিতশ্চিত্রকার্মুকঃ। ধনুর্বিস্ফারয়ামাস তডিদূর্জিতনিঃস্বনম্ ॥২৫॥ ততঃ সমেতাবতিতীক্ষ্ণবেগৌ মহাবলৌ তৌ রণনির্বিশঙ্কৌ । কপিশ্চ রক্ষোঽধিপতেস্তনূজঃ সুরাসুরেন্দ্রাবিব বদ্ধবৈরৌ ॥২৬॥ স তস্য বীরস্য মহারথস্য ধনুষ্মতঃ সংয়তি সংমতস্য । শরপ্রবেগং ব্যহনৎপ্রবৃদ্ধ- শ্চচার মার্গে পিতুরপ্রমেয়ঃ॥২৭॥ ততঃ শরানায়ততীক্ষ্ণশল্যান্ সুপত্রিণঃ কাঞ্চনচিত্রপুঙ্খান্ । মুমোচ বীরঃ পরবীরহন্তা সুসন্ততান্ বজ্রসমানবেগান্ ॥২৮॥ ততঃ স তৎস্যন্দননিঃস্বনং চ মৃদঙ্গভেরীপটহস্বনং চ । বিকৃষ্যমাণস্য চ কার্মুকস্য নিশম্য ঘোষং পুনরুৎপপাত ॥২৯॥ শরাণামন্তরেষ্বাশু ব্যাবর্তত মহাকপিঃ। হরিস্তস্যাভিলক্ষ্যস্য মোক্ষয়ঁল্লক্ষ্যসঙ্গ্রহম্ ॥৩০॥ শরাণামগ্রতস্তস্য পুনঃ সমভিবর্তত । প্রসার্য হস্তৌ হনুমানুৎপপাতানিলাত্মজঃ॥৩১॥ তাবুভৌ বেগসম্পন্নৌ রণকর্মবিশারদৌ । সর্বভূতমনোগ্রাহি চক্রতুর্যুদ্ধমুত্তমম্ ॥৩২॥ হনূমতো বেদ ন রাক্ষসোঽন্তরং ন মারুতিস্তস্য মহাত্মনোঽন্তরম্ । পরস্পরং নির্বিষহৌ বভূবতুঃ সমেত্য তৌ দেবসমানবিক্রমৌ ॥৩৩॥ ততস্তু লক্ষ্যে স বিহন্যমানে শরেষ্বমোঘেষু চ সম্পতৎসু । জগাম চিন্তাং মহতীং মহাত্মা সমাধিসংয়োগসমাহিতাত্মা ॥৩৪॥ ততো মতিং রাক্ষসরাজসূনু- শ্চকার তস্মিন্হরিবীরমুখ্যে । অবধ্যতাং তস্য কপেঃ সমীক্ষ্য কথং নিগচ্ছেদিতি নিগ্রহার্থম্ ॥৩৫॥ ততঃ পৈতামহং বীরঃ সোঽস্ত্রমস্ত্রবিদাং বরঃ। সন্দধে সুমহাতেজাস্তং হরিপ্রবরং প্রতি ॥৩৬॥ অবধ্যোঽয়মিতি জ্ঞাত্বা তমস্ত্রেণাস্ত্রতত্ত্ববিৎ । নিজগ্রাহ মহাবাহুং মারুতাত্মজমিন্দ্রজিৎ ॥৩৭॥ তেন বদ্ধস্ততোঽস্ত্রেণ রাক্ষসেন স বানরঃ। অভবন্নির্বিচেষ্টশ্চ পপাত চ মহীতলে ॥৩৮॥ ততোঽথ বুদ্ধ্বা স তদাস্ত্রবন্ধং প্রভোঃ প্রভাবাদ্বিগতাল্পবেগঃ। পিতামহানুগ্রহমাত্মনশ্চ বিচিন্তয়ামাস হরিপ্রবীরঃ॥৩৯॥ ততঃ স্বায়ম্ভুবৈর্মন্ত্রৈর্ব্রহ্মাস্ত্রং চাভিমন্ত্রিতম্ । হনূমাংশ্চিন্তয়ামাস বরদানং পিতামহাৎ ॥৪০॥ ন মেঽস্য বন্ধস্য চ শক্তিরস্তি বিমোক্ষণে লোকগুরোঃ প্রভাবাৎ । ইত্যেবমেবংবিহিতোঽস্ত্রবন্ধো ময়াঽঽত্ময়োনেরনুবর্তিতব্যঃ॥৪১॥ স বীর্যমস্ত্রস্য কপির্বিচার্য পিতামহানুগ্রহমাত্মনশ্চ । বিমোক্ষশক্তিং পরিচিন্তয়িত্বা পিতামহাজ্ঞামনুবর্ততে স্ম ॥৪২॥ অস্ত্রেণাপি হি বদ্ধস্য ভয়ং মম ন জায়তে । পিতামহমহেন্দ্রাভ্যাং রক্ষিতস্যানিলেন চ ॥৪৩॥ গ্রহণে চাপি রক্ষোভির্মহন্মে গুণদর্শনম্ । রাক্ষসেন্দ্রেণ সংবাদস্তস্মাদ্গৃহ্ণন্তু মাং পরে ॥৪৪॥ স নিশ্চিতার্থঃ পরবীরহন্তা সমীক্ষ্যকারী বিনিবৃত্তচেষ্টঃ। পরৈঃ প্রসহ্যাভিগতৈর্নিগৃহ্য ননাদ তৈস্তৈঃ পরিভর্ত্স্যমানঃ॥৪৫॥ ততস্তে রাক্ষসা দৃষ্ট্বা বিনিশ্চেষ্টমরিন্দমম্ । ববন্ধুঃ শণবল্কৈশ্চ দ্রুমচীরৈশ্চ সংহতৈঃ॥৪৬॥ স রোচয়ামাস পরৈশ্চ বন্ধং প্রসহ্য বীরৈরভিগর্হণং চ । কৌতূহলান্মাং যদি রাক্ষসেন্দ্রো দ্রষ্টুং ব্যবস্যেদিতি নিশ্চিতার্থঃ॥৪৭॥ স বদ্ধস্তেন বল্কেন বিমুক্তোঽস্ত্রেণ বীর্যবান্ । অস্ত্রবন্ধঃ স চান্যং হি ন বন্ধমনুবর্ততে ॥৪৮॥ অথেন্দ্রজিত্তং দ্রুমচীরবদ্ধং বিচার্য বীরঃ কপিসত্তমং তম্ । বিমুক্তমস্ত্রেণ জগাম চিন্তা- মন্যেন বদ্ধোঽপ্যনুবর্ততেঽস্ত্রম্ ॥৪৯॥ অহো মহৎকর্ম কৃতং নিরর্থং ন রাক্ষসৈর্মন্ত্রগতির্বিমৃষ্টা । পুনশ্চ নাস্ত্রে বিহতেঽস্ত্রমন্যৎ প্রবর্ততে সংশয়িতাঃ স্ম সর্বে ॥৫০॥ অস্ত্রেণ হনুমান্মুক্তো নাত্মানমববুধ্যতে । কৃষ্যমাণস্তু রক্ষোভিস্তৈশ্চ বন্ধৈর্নিপীডিতঃ॥৫১॥ হন্যমানস্ততঃ ক্রূরৈ রাক্ষসৈঃ কালমুষ্টিভিঃ। সমীপং রাক্ষসেন্দ্রস্য প্রাকৃষ্যত স বানরঃ॥৫২॥ অথেন্দ্রজিত্তং প্রসমীক্ষ্য মুক্ত- মস্ত্রেণ বদ্ধং দ্রুমচীরসূত্রৈঃ। ব্যদর্শয়ত্তত্র মহাবলং তং হরিপ্রবীরং সগণায় রাজ্ঞে ॥৫৩॥ তং মত্তমিব মাতঙ্গং বদ্ধং কপিবরোত্তমম্ । রাক্ষসা রাক্ষসেন্দ্রায় রাবণায় ন্যবেদয়ন্ ॥৫৪॥ কোঽয়ং কস্য কুতো বাপি কিং কার্যং কোঽভ্যুপাশ্রয়ঃ। ইতি রাক্ষসবীরাণাং দৃষ্ট্বা সঞ্জজ্ঞিরে কথাঃ॥৫৫॥ হন্যতাং দহ্যতাং বাপি ভক্ষ্যতামিতি চাপরে । রাক্ষসাস্তত্র সঙ্ক্রুদ্ধাঃ পরস্পরমথাব্রুবন্ ॥৫৬॥ অতীত্য মার্গং সহসা মহাত্মা স তত্র রক্ষোঽধিপপাদমূলে । দদর্শ রাজ্ঞঃ পরিচারবৃদ্ধান্ গৃহং মহারত্নবিভূষিতং চ ॥৫৭॥ স দদর্শ মহাতেজা রাবণঃ কপিসত্তমম্ । রক্ষোভির্বিকৃতাকারৈঃ কৃষ্যমাণমিতস্ততঃ॥৫৮॥ রাক্ষসাধিপতিং চাপি দদর্শ কপিসত্তমঃ। তেজোবলসমায়ুক্তং তপন্তমিব ভাস্করম্ ॥৫৯॥ স রোষসংবর্তিততাম্রদৃষ্টি- র্দশাননস্তং কপিমন্ববেক্ষ্য । অথোপবিষ্টান্কুলশীলবৃদ্ধান্ সমাদিশত্তং প্রতি মুখ্যমন্ত্রীন্ ॥৬০॥ যথাক্রমং তৈঃ স কপিশ্চ পৃষ্টঃ কার্যার্থমর্থস্য চ মূলমাদৌ । নিবেদয়ামাস হরীশ্বরস্য দূতঃ সকাশাদহমাগতোঽস্মি ॥৬১॥ ইত্যার্ষে শ্রীমদ্্রামায়ণে বাল্মীকীয়ে আদিকাব্যে সুন্দরকাণ্ডে অষ্টচত্বারিংশঃ সর্গঃ